ထိုင်းနိုင်ငံရှိ လုပ်ငန်းခွင်သို့ သွားရောက်ကြမည့် မြန်မာ့ရွှေ့ပြောင်းလုပ်သားများအား ချစ်ကြည်ရေးတံတားအနီးတွင် ဧပြီလ တတိယပတ်က တွေ့ရစဉ် (ဓာတ်ပုံ- ကိုရွှေသိန်း-မြဝတီ)

စာရေးသူအနေနဲ့ ကုန်သွယ်မှုလမ်းကြောင်းတွေ မှန်ကန်ကောင်းမွန်ပြီး နိုင်ငံသားတွေရဲ့ ဆင်းရဲမှုလျော့နည်း ကျဆင်းစေတာ ဖွံ့ဖြိုးတိုးတက်စေဖို့မှာ ဒီတစ်ပတ်ရေးဖို့ စိတ်ကူးရလာတာက နိုင်ငံကဆင်းရဲတွင်းနက်နေတဲ့အတွက် လူတွေကပါ ကုန်သွယ်မှု ထုတ်ကုန်ပစ္စည်းတွေ ဖြစ်လာရတဲ့ အကြောင်းအချက်တွေ ဖြစ်ပါတယ်။ ကုန်သွယ်မှုမှာထုတ်ကုန် (Export Product) နဲ့ သွင်းကုန် (Import Product) တွေလို့ဆိုရာမှာ နိုင်ငံတစ်နိုင်ငံအနေနဲ့ မိမိနိုင်ငံက ထုတ်ကုန်တွေ (ထုတ်ကုန်တွေလို့ ဆိုရာမှာ တန်ဖိုးပေါင်းထည့် ထုတ်ကုန်တွေဖြစ်ဖို့ လိုအပ်ပါတယ်) ကို နိုင်ငံတကာ ဈေးကွက်အတွင်း ကျယ်ကျယ်ပြန့်ပြန့် တင်ပို့ရောင်းချနိုင်ပါမှ ဝင်ငွေတွေ ကောင်းမွန်လာပြီး နိုင်ငံတိုးတက်စေဖို့အတွက် ဘက်ပေါင်းစုံကို အကျိုးရှိရှိ ဆောင်ရွက်နိုင်စေမှာ ဖြစ်ပါတယ်။

ကုန်သွယ်မှုရဲ့ ထုတ်ကုန်တွေမှာ Tangible Product လို့ ခေါ်တဲ့ မြင်သာမှုရှိပြီး လက်နဲ့ကိုင်တွယ်နိုင်တဲ့ ထုတ်ကုန်တွေနဲ့ Intangible Product လို့ခေါ်တဲ့ မမြင်နိုင်သလို လက်နဲ့ကိုင်တွယ်ကြည့်လို့ မရနိုင်တဲ့ ထုတ်ကုန်တွေ ရှိပါတယ်။ ဟိုယခင်ကတော့ လက်နဲ့ကိုင်တွယ်ကြည့်လို့မရတဲ့ ထုတ်ကုန်တွေကို သိမ်းဆည်းထားလို့မရပေမယ့် ဒီကနေ့လို နည်းပညာ မြင့်မားလာတဲ့ ခေတ်ကာလမှာတော့ သိမ်းဆည်းထားနိုင်စေပြီ ဖြစ်ပါတယ်။

၂၁ ရာစုမှာ နိုင်ငံအတော်များများမှာ လူသားရင်းမြစ်တွေကလည်း ထုတ်ကုန်တွေ ဖြစ်လာကြပြီး Honiara Trafficking လို့ ခေါ်တဲ့ လူသားကုန်သွယ်မှုတွေပါ ပေါ်ပေါက်လာခဲ့ပါတယ်။ လူသားကုန်သွယ်မှုတွေမှာ လူတွေနဲ့ဆက်စပ်တဲ့ လိင်ကုန်သွယ်မှုတွေပါ ဖြစ်ထွန်း ပေါ်ပေါက်လာပါတယ်။ ထုတ်ကုန်ပစ္စည်းတွေမှာ ကြားခံဖြန့်ဖြူး ရောင်းချပေးသူတွေနည်းတူ လူသားတွေကိုလည်း ကြားခံ ကုန်သွယ်သူတွေပါ ပေါ်ပေါက်လာပါတယ်။ ကြားခံဆောင်ရွက်ပေးသူတွေကလည်း ငွေကြေးအားဖြင့် အကျိုးအမြတ်တွေ ရရှိကြတဲ့အတွက် ဥပဒေကို အလေးမထားတော့ဘဲ Sex Trafficking လို့ခေါ်တဲ့ လိင်ကုန်ကူးတာတွေလည်း ဖြစ်ထွန်းပေါ်ပေါက်လာခဲ့ပါတယ်။

အမေရိကန်နိုင်ငံလို ဖွံ့ဖြိုးတိုးတက်တဲ့ နိုင်ငံမှာသော်မှ လူကုန်ကူးတဲ့လုပ်ငန်းတွေ ရှိနေတာကို ဖတ်လိုက်ရပါတယ်။ အမေရိကန်လို နိုင်ငံမှာ ၂၀၁၆ ခုနှစ်က လူကုန်ကူးမှု တိုက်ဖျက်ရေးဌာနကို တိုင်ကြားတဲ့ အမှုပေါင်း ၇၆၂၁ မှုရှိတယ်လို့ ဆိုပါတယ်။ အမေရိကန်နိုင်ငံမှာ Trafficking is Agent (TIAM) လို့ခေါ်တဲ့ လူကုန်ကူးမှုကို စုံစမ်းထောက်လှမ်း ဖော်ထုတ်ပေးတဲ့အဖွဲ့ကနေ လူကုန်ကူးတာတွေကို ဖော်ထုတ်ပေးနေတာကို ဖတ်ရပါတယ်။ နေ့စဉ်နဲ့အမျှ သတင်းစာတွေမှာ မြို့ပြယိုယွင်းလာမှုတွေ၊ မညီမျှမှုတွေ၊ အလှအပ၊ စားသုံးမှုတွေ၊ စစ်ပွဲတွေ၊ AIDS လို့ခေါ်တဲ့ ခုခံအားကျဆင်းတဲ့ရောဂါ စတာတွေ ဖြစ်ပွားလာခဲ့ပါတယ်။

အတိတ်ကို အပြစ်အနေနဲ့ဆိုတာ မဟုတ်ပေမယ့် သင်ခန်းစာယူနိုင်ဖို့က အတိတ်ကာလမှာ လွဲမှားတဲ့စီမံခန့်ခွဲမှု၊ လူမှန်နေရာမှန် မဖြစ်မှုတွေကနေ ပြည်တွင်းမှာ အလုပ်အကိုင် ရှားပါးမှုကြောင့် ဘ၀၀မ်းရေးအတွက် တရားဝင် နည်းလမ်းတွေနဲ့ရော တရားမဝင် နည်းလမ်းတွေနဲ့ပါ သွားရောက်အလုပ် လုပ်ကိုင်နေကြရတာဖြစ်တယ်။ အဲဒီလို ကြားလူတွေနဲ့ ကြားခံလုပ်ဆောင်မှုတွေကနေ လူကုန်ကူးမှု၊ အဲဒီကနေ လိင်ကုန်ကူးမှု (Sex Trafficking) လုပ်ငန်းတွေပါ ကျယ်ကျယ်ပြန့်ပြန့် ဖြစ်ထွန်းလာစေခဲ့တယ်။

အလုပ်သမား ညွှန်ကြားရေးဦးစီးဌာနရဲ့ တရားဝင်စာရင်းအရ ၂၀၁၈ ခုနှစ် ဇန်နဝါရီလမှ ဧပြီလအထိ အမျိုးသား အမျိုးသမီး ၆၃၀၀၀ ဦး ထွက်ခွာသွားတယ်လို့ သိရပါတယ်။ တရားမဝင်နည်းလမ်းနဲ့ ထွက်ခွာအလုပ်လုပ်သူဦးရေကတော့ မသိနိုင်ပါ။ ၂၀၁၇ ခုနှစ်မှာ အပြန်အလှန် နားလည်မှုအရ နိုင်ငံခြားကို ထွက်ခွာအလုပ်လုပ်သူဦးရေက ၁၄၅၁၆၁ ဦး ရှိတယ်လို့ သိရပါတယ်။

အတိတ်ကာလနိုင်ငံရပ်ခြားထွက်ခွာ အလုပ်လုပ်သူတွေက တရားမဝင် သွားရောက်လုပ်ကိုင်သူများပါတယ်။ ဒီမိုကရေစီခေတ်ပိုင်းမှာတော့ MoU နဲ့ ထွက်ခွာလုပ်ကိုင်တဲ့ စာရင်းတွေ တိတိကျကျ ထွက်လာတာ ဖြစ်ပါတယ်။ ဒီအထဲမှာ MoU ကို ခုတုံးလုပ်ပြီး လူကုန်ကူးတာတွေလည်း ရှိလာတယ်လို့ဆိုတယ်။ လူတွေကို ကုန်ပစ္စည်းတစ်ခုအဖြစ် သတ်မှတ်လုပ်ကိုင်နေသူက ကိုယ်ကျိုးရှာသမားတွေဖြစ်တဲ့အတွက် ခိုင်မာမှုမရှိတဲ့ အတွက် အခက်အခဲတွေနဲ့ ရင်ဆိုင်ကြုံတွေ့နေရပြီး နေရပ်ပြန်လာရသူတွေများသလို အချို့ကျတော့လည်း လိင်ကျွန်အဖြစ် နိုင်ငံခြားကို ရောင်းချခံရသူတွေလည်း ရှိလာနေပါတယ်။

နောက်ဆုံးသတင်းအရ လူတွေကိုသာ ထုတ်ကုန်အဖြစ် ရောင်းနေတာမဟုတ်ဘဲ တိရစ္ဆာန်တွေပါ ရောင်းလာတာကြားနေရတယ်။ ကုန်သွယ်မှုမှာ အဓိကကတော့ ကုန်ကြမ်းအနေနဲ့ မိမိနိုင်ငံကနေ ထွက်သွားစေတာထက် Value Added Product လို့ ခေါ်တဲ့ တန်ဖိုးပေါင်းထည့် ထုတ်ကုန်တွေအဖြစ် ပြောင်းလဲထုတ်လုပ်ရောင်းချနိုင်ပါမှ ဈေးမြင့်လာပြီး နိုင်ငံအတွက်လည်း ဝင်ငွေပိုမိုမြင့်မားလာစေမှာ ကမ္ဘာတစ်လွှားမှာလူဦးရေ လေးသန်းလောက်က တစ်နှစ်စီမှာ လူကုန်ကူးခံနေကြရပြီး အဲဒီအထဲမှာ လိင်ကုန်ကူးခံရသူတွေက တစ်သန်းရှိတယ်လို့ ဆိုပါတယ်။ သုတေသန ပညာရှင်တွေရဲ့ ခန့်မှန်းချက်အရကိန်း ဂဏန်းအမှန်က ဒီထက်ပိုနိုင်တယ်လို့ ဆိုပါတယ်။ နယ်စပ်တွေကို ဖြတ်ကျော်လာပြီး လူကုန်ကူးမှုတွေရှိနေလို့ ဖြစ်ပါတယ်။ ပြည့်တန်ဆာတွေအဖြစ် လူကုန်ကူးတာတွေအပြင် ကလေးသူငယ် အလုပ်သမားတွေအဖြစ်လည်း လူကုန်ကူးတာတွေ ရှိနေပါတယ်။ ဒီလိုဖြစ်ရတဲ့ အကြောင်းရင်းတွေက ဆင်းရဲတွင်းနက်နေကြတဲ့ ဖွံ့ဖြိုးမှုနိမ့်ကျမှုတွေကြောင့် ဖြစ်ပါတယ်။

ပြည့်တန်ဆာတွေအဖြစ် လူကုန်ကူးတာဝန်ခံကြရတဲ့ အမျိုးသမီးတွေကို ဒေသအလိုက် ဖော်ပြထားတဲ့စာရင်းတွေကို လေ့လာကြည့်ရာမှာ -

■ ထိုင်းနိုင်ငံကအမျိုးသမီး ၁၀၀၀၀၀ ကနေ ၂၀၀၀၀၀၀ အထိက အခြားနိုင်ငံတွေကို ရောက်ရှိသွားကြတယ်။

■ ဘာလင်တစ်ခုတည်းမှာ ထိုင်းပြည့်တန်ဆာ ၁၅၀၀၀ ရှိတယ်လို့ ဆိုပါတယ်။

■ ဒိုမိုနီကန်နိုင်ငံက အမျိုးသမီး ၅၀၀၀၀ က နိုင်ငံခြားတိုင်းပြည်တွေကို ရောက်ကုန်တယ်။

■ အယ်လ်ဘေးနီးယားက အမျိုးသမီး ၁၄၀၀၀ က များစွာသော ဥရောပနိုင်ငံတွေကို ရောက်သွားတယ်။ ကိုလံဘီယာနိုင်ငံရဲ့ ပြင်ပကို လူကုန်ကူးခံရတဲ့ အမျိုးသမီးဦးရေက ၃၅၀၀၀ ရှိပါတယ်။

နိုင်ငံအလိုက် ဖြန့်ကြက်ရောက်ရှိသွားတဲ့ လိင်ကုန်ကူးခံရ အမျိုးသမီးတွေကတော့ -

■ လွန်ခဲ့သော ၁၀ နှစ်ကျော်ကာလအတွင်းမှာ ပါကစ္စတန်နိုင်ငံကို ပြည့်တန်ဆာအဖြစ် လူကုန်ကူးခံရတဲ့ ဘင်္ဂလားဒေ့ရှ်နိုင်ငံက အမျိုးသမီးဦးရေက ၂၀၀၀၀၀ ရှိပြီးတစ်လကို ၂၀၀ ကနေ ၄၀၀ အထိ ရှိပါတယ်။

■ ဂျပန်နိုင်ငံကို ပြည့်တန်ဆာအဖြစ် ရောက်ရှိသွားတဲ့ အမျိုးသမီးဦးရေက ၁၅၀၀၀၀ ရှိပြီး အဲဒီပမာဏမှာ ၉၀၀၀၀ ခန့်က ထိုင်းနိုင်ငံနဲ့ ဖိလစ်ပိုင်နိုင်ငံဖြစ်တယ်လို့ ဆိုပါတယ်။

■ ဘရာဇီးနိုင်ငံ အမျိုးသမီးဦးရေ ၇၅၀၀၀ က ဥရောပနိုင်ငံတွေကို ပြည့်တန်ဆာအဖြစ် ရောက်သွားတယ်လို့ ဆိုပါတယ်။

■ ယခင်ဆိုဗီယက်ပြည်ထောင်စုပြည်နယ်တွေက အမျိုးသမီး ၁၀၀၀ ကနေ ၂၀၀၀ လောက် အစ္စရေးနိုင်ငံကို ပြည့်တန်ဆာတွေအဖြစ် ရောက်သွားတယ်လို့ ဆိုပါတယ်။

စာရေးသူတို့နိုင်ငံကတော့ လူကုန်ကူးခံနေရသူတွေကို အတိအကျ စာရင်းထုတ်ပြန်နိုင်ခြင်း မရှိပေမယ့် လူကုန်ကူးခံနေရတဲ့ သတင်းတွေကိုတော့ အမြဲလိုကြားနေရပါတယ်။ လူကုန်ကူးမှုအတွင်းမှာ လိင်ကုန်ကူးမှုတွေလည်း ပါဝင်နေတာဖြစ်လို့ ဒါတွေကို ပပျောက်သွားအောင် နိုင်ငံအတွင်းမှာ မိမိနိုင်ငံသား အချင်းချင်း တိုက်နေခိုက်နေတဲ့ စစ်ပွဲတွေကို ရပ်တန်းကရပ်ပြီး ငြိမ်းချမ်းရေး တည်ဆောက်နိုင်ပြီး အသေးစား၊ အလတ်စားနဲ့ အကြီးစား စီးပွားရေးလုပ်ငန်းတွေကို တန်ဖိုးပေါင်းထည့် ထုတ်ကုန်တွေအဖြစ် ထုတ်လုပ်နိုင်မယ်ဆိုရင် နိုင်ငံလည်း တိုးတက်လာစေမှာဖြစ်သလို နိုင်ငံသားတွေရဲ့ ဘဝတန်ဖိုးလည်း မြင့်မားလာစေမှာ ဖြစ်တယ်လို့ဆိုချင်ကြောင်းပါ။

လူသည် ရောင်းကုန် မဟုတ်ပါ။

လိင်သည် ရောင်းကုန် မဟုတ်ပါ။