မှောင်နေဆဲ ည

မှောင်နေဆဲ ည
Published 8 May 2018

ပတ်ဝန်းကျင်သည် တို့ထိခံထားရခြင်းမရှိ၊ ပကတိသဘာဝအတိုင်း စိမ်းလန်းလှပနေသည်။ တောတောင်ရေမြေ ရှုမျှော်ခင်း အလှတရားများသည် ဖိအားနွံထဲ နစ်နေသူများအား စိတ်လက်ပေါ့ပါးသွားစေလိမ့်မည်။ အမြဲစိမ်းလန်းနေသည့် ရွှေဖြူ (ခေါ်) ရော်ဘာ စိုက်ခင်းများ မျက်စိတစ်ဆုံးမြင်ရသည်။ တောင်တန်းကြီးများက တောင်နှင့် မြောက် သွယ်တန်းနေသည်။

မှောင်မိုက်သော ညကို ဖြတ်သန်းခဲ့ရသည်မှာ ဆယ်စုနှစ်ပေါင်းများစွာ ကြာမြင့်ပြီးဖြစ်သည်။ ယခုထိတိုင် ဆက်လက်ဖြတ်သန်းနေရဆဲ။ မျက်ကြည်လွှာပေါ် စိတ်ကူးနှင့် ရေးခြစ်မိသည့် အိပ်မက်များစွာရှိသည်။ ဦးနှောက်ထဲ ရိုက်သွင်းခံထားရသည့် သံချေးတက်နေသည့် အယူအဆများစွာ ရှိသည်။ စမ်းတဝါးဝါး ညအမှောင်ထဲ ရည်မှန်းချက်ကိုယ်စီ။ စိတ်ကူးယဉ်ကမ္ဘာငယ်လေးထဲမှ အိမ်လေးကို ညအမှောင်ထဲ ပုံဖော်ရန် ကြိုးစားရင်း ေ၀ဝါးသွားသည့် နေ့စွဲများ မရေတွက်နိုင်အောင် ရှိသည်။ ရေရာစွာ ဆုပ်ကိုင်ပြခွင့်မရှိသည့် အခြေအနေတွင် ဘဝအာမခံချက်ဆိုသည်မှာ လေထဲက ပြာပမာ။ လေအဝေ့မှာ အကြိမ်ကြိမ် လွင့်ပြယ်ပျောက်ဆုံးသွားရစမြဲ။ လဲကျ၍ ပြန်မထနိုင်သည့် အခိုက်အတန့်များစွာ တွေ့ကြုံ ဖြတ်သန်းခဲ့ပြီးဖြစ်သည်။

နေဝင်ချိန်ဖြစ်၍ အိမ်တိုင်းလိုလို အင်ဂျင်စက်သံများ ဆူညံစွာ ပေါ်ထွက်လာသည်။ ရော်ဘာခေတ်ကောင်းချိန်နှင့် ဆုံခဲ့ဖူး၍ အင်ဂျင်မီးစက်ဖြင့် ကိုယ့်အားကိုယ်ကိုး လျှပ်စစ်မီးအလင်း အိမ်တိုင်း ထွန်းညှိနိုင်သည်။ စာကျက်သံများလည်း ကြားနေရသည်။ တစ်ခါတစ်ရံ တိုင်းရင်းသားစာပေများ ကျက်မှတ်သံများလည်း ကြားရသည်။ ယခင်ချိန်က ဖယောင်းတိုင် မီးမှိန်မှိန်အောက်၌ ဖြစ်သလို စာပေများ ကျက်မှတ်ခဲ့ရဖူးသည်။ ဘဝအလင်းရောင် ရရှိရန်အတွက် စာပေအသိပညာများ ခက်ခဲကြမ်းတမ်းစွာ ရှာဖွေခဲ့ကြရသည်။ ပင်ပန်းမှုဒဏ်ကို စိတ်အဆာပြေ ဖြေဖျော်ရန်အတွက် အဆာပလာများ အူမကြီးထဲမှ ဆွဲထုတ်နေရဆဲ။

ညက တဖြည်းဖြည်း နက်လာသည်။ တိတ်ဆိတ်သွားသည့် ညအမှောင်ကို အိမ်ပြတင်းတံခါးမှတစ်ဆင့် ကျွန်တော် ခံစားကြည့်မိသည်။ ကြီးစိုးနေသည့် အမှောင်ညကြား အလင်းတစ်ပေါက်မျှ ထိုးဖောက်မမြင်ရပါ။ လပြည့်နေ့များမှလွဲ၍ ဝန်းကျင်တစ်ခုလုံး မှောင်အတိ။ ကြယ်ရောင်ဝိုးတဝါးဖြင့် စမ်းတဝါးဝါး ရေဆန်လမ်းပေါ် ခရီးဆက်နေရဆဲ။ မည်သို့ပင်ဖြစ်စေ အိပ်မက်သစ်များ ဖူးသစ်လာတော့မည်ဟု တိတ်တဆိတ် မျှော်လင့်နေမိသည်။ သေချာမှု မရှိသော်လည်း မျှော်လင့်ခြင်းဆိုသည်မှာ လူတစ်ဦး၏ တစ်ကိုယ်စာ ရည်မှန်းချင်ပင် မဟုတ်လား။ အမှောင်ညများ မည်သည့်အချိန်တိုင် ဆက်လက်ကြီးစိုးနေဦးမလဲ။ ကျွန်တော် ဆက်လက် အတွေးမပွားချင်သော်လည်း ရောက်လာမည့် နေ့သစ်မနက်ဖြန်တိုင်း တိတ်တဆိတ် မျှော်လင့်နေမိသည်။

မိုးရာသီတွင် မြစ်ကျိုးအင်းများ အိုင်ထွန်းကာ ရေပတ်လည်ဝိုင်းနေသည်။ ပဲ့ချိတ်၊ စက်လှေ၊ စက်တပ်ယာဉ်များကို ယနေ့တိုင် မှီခိုနေရဆဲ။ တစ်ခါတစ်ရံ ဝမ်းနည်းကြေကွဲစရာ အဖြစ်များလည်း ကြုံတွေ့ခဲ့ဖူးသည်။ စက်လှေမြုပ်၍ ရွာတွင် တာဝန်ကျနေသည့် ကျောင်းဆရာမလေး သေဆုံး ကွယ်လွန်သွားပါသည်။ ရင်နာစရာ အဖြစ်အပျက်များ ရင်နှင့်မဆံ့တော့။ မှိုင်းတိုက်ခံနေရသည့် အမှောင်ညများ အလင်းခရန် အချိန်တန်ပြီဖြစ်သည်။

ပိတ်ထားသည့် တံခါးချပ်ပေါ် ရည်မှန်းချက်ကိုယ်စီရှိသည်။ ဝလုံးအရေးသင်စလက်များတွင် အနာဂတ်များစွာ ပိုင်ဆိုင်ထားသည်။ ဖယောင်းတိုင်မီး အလင်းမှိန်မှိန်အောက်တွင် မခံချင်စိတ်ဖြင့် ပန်းတိုင်ချီတက်မည့် ခြေလှမ်းများရှိသည်။ “မိသားစုတစ်စုလုံးပေါင်းမှ လေးတန်းမအောင်ဘူး” ဟူသော အနှိမ်ခံ ရက်စွဲများနှင့်လည်း တွေ့ကြုံခဲ့ဖူးသည်။ ဆွဲထုတ် ချပြခွင့်မရလိုက်သော ရင်နာစရာ အတိတ်စာမျက်နှာထဲတွင် သေနတ်သံကြား သက်စွန့်ဆံဖျား ပြေးလွှားနေရသည့် ကာလများပါဝင်သည်။ စစ်ကြောင်း၏ အတင်းအဓမ္မ ပေါ်တာဆွဲခေါ်မှုဖြင့် အိမ်ပြန်မရောက်တော့သည့် သားအတွက် မိခင်တစ်ဦး၏ ရင်ထဲ၌သောကများ ရှိသည်။

လူတန်းစေ့ဘဝအတွက် မိမိအရပ်ဒေသကို စွန့်ခွာခဲ့ရသည့် ပညာသင်ရွယ် လူငယ်များရှိသည်။ ဒေသဖွံ့ဖြိုးရေးကို မြှင့်တင်ပေးမည့် ပရဟိတအဖွဲ့အစည်းများ၏ လုပ်ဆောင်ချက်များ ပိတ်ပင်တားဆီးခံရသည့် နေ့စွဲများလည်း ရှိခဲ့သည်။ မှောင်မိုက်နေသည့် ညကို အခွင့်ကောင်းယူပြီး မထူးဇာတ်ခင်းနေသူများလည်းရှိသည်။ လူခြေတိတ်ချိန်များတွင် ဝမ်းရေးအတွက် အလုပ်ခွင်ထဲဆင်းရသည်။ မည်သို့ပင်ဆိုစေ ညအမှောင်က ဆက်လက်ကြီးစိုးနေဆဲပင်။

ဓလေ့ရိုးရာဆန်သည့် ပွဲတော်ညများလည်း ရှိသည်။ ဟောင်းနွမ်းနေပြီးသော ရှေးရိုးဆန်သည့် အတွေးအခေါ်များလည်း ကိန်းအောင်းနေဆဲပင်ဖြစ်သည်။ အိမ်တွင်းရေးအတွက် ပြည်ပကျွန်ဆိုသည့် ပုံစံခွက်အတွင်း ဆက်လက်အသုံးတော်ခံနေသည်။ ဆယ်ကျော်သက်ကာလ အရွယ်မတိုင်မီပင် စာသင်ခန်းနှင့် ဝေးသထက် ဝေးသွားသည့် ခြေလှမ်းများလည်း ရှိနေဆဲ။ မူးယစ်ဆေးဝါးကို အမွေတစ်ခုပမာ လက်ဆင့်ကမ်းနေကြသည်။ ငြိမ်းချမ်းခြင်း အတိတ်နိမိတ်ကို ငတ်မွတ်တောင့်တနေရသည်။ အမှောင်ညက ဆက်လက်ကြီးစိုးနေဆဲပင် ဖြစ်သည်။

မှောင်နေဆဲ ညထဲ ‘အပျို၊ လူပျို’ အောက်နှိုက်သည့်ဓလေ့များ ကွယ်ပျောက်လာသည်။ ၁၅၀၀ တန် ဖုန်းကတ်အစွမ်းဖြင့် ဂလိုဘယ် တိုက်စားမှုနောက် ပျော်မွေ့လာသည်။ အပျို၊ လူပျိုအိမ် အလည်သွားသည့် ဓလေ့များ ပျောက်ကွယ်သွားသည်။ ညဦးယံ ရွာလယ် တံတားထိပ်မှ ကာလသားများ၏ ဂစ်တာဝိုင်းလေး မရှိတော့။ မူးယစ်ဆေးဝါး (မြင်းဆေး) အငွေ့အသက်ကို ပိုမိုခုံမင်လာကြသည်။ ဘိန်းစာရွက်အရည်ကို မက်မောစွာ သောက်သုံးလာကြသည်။ ကလေးကအစ ခွေးအဆုံး မူးယစ်ဆေးဝါးအကြောင်း အာပေါင်အာရင်း သန်သန် မရှက်မကြောက် ပြောနေကြသည်။ မှောင်နေဆဲညအောက်တွင် လူငယ်များ စာရိတ္တဖြောင့်မတ်မှု မရှိတော့။

မှောင်နေဆဲ ညထဲတွင် အချို့က စိတ်အမှောင်ကျသွားကြသည်။ အဆိုးဆုံး အခြေအနေတစ်ရပ်တွင် အတူရုန်းကန်ခဲ့သည်။ ဝေဟင်က ကြယ်တံခွန်ကို အတူကြည့်ပြီး နိမိတ်ဖတ်တမ်း ကစားခဲ့သည်။ ချိတ်ပိတ်ခံရသည့် ရက်စွဲများကြား အမှောင်ကို အခွင့်ကောင်းယူပြီး ကိုယ်ကျိုးအတွက် ရှာဖွေစားသောက်သွားခဲ့သည်။ အိတ်ကပ်အဖောင်းနှင့် အိမ်ပြန်သွားကြသည်။ နာမည်ကောင်း လက်မှတ်ဖြင့် မျက်နှာဖုံးတုတပ် ရေငတ်နေသူများ ဖေးမသယောင် မျက်လှည့်ပြသွားသည်။ ကျန်ရစ်နေသူများမှာ ပကတိအမှောင်ကို ရှူရှိုက်ရင်း မထူးဆန်းသော နိစ္စဓူဝကို ဖြတ်သန်းနေရဆဲပင်။

ဖွင့်ထားသော ပြတင်းတံခါးမှ မှိတ်တုတ် မှိတ်တုတ်နှင့် လင်းလက်နေသည့် ကြယ်ကလေးများကို ကျွန်တော် ငေးနေမိသည်။ မှောင်နေဆဲညက ရိုးသားမှုမျက်နှာဖုံးကိုစွပ်ပြီး ကျွန်တော့်အား ပုံမှားရိုက်နေဆဲ။ သက္ကရာဇ် မည်မျှတိုင် ညအမှောင်ကို အန်တုနေရဦးမည်နည်း။ ကျွန်တော် ဆက်လက် အတွေးပွားချင်နေမိသည်။ ရင်ထဲမခံမရပ်နိုင်သည့်အဆုံး ကျွန်တော် ထွေးအန်ထုတ်ပြချင်လာသည်။ ဤတစ်ညသည် ကျွန်တော့်အတွက် အိပ်ပျက်ည ဖြစ်ဦးမည်။

ဆိုင်ကယ်စက်သံများ နေအိမ်အသီးသီးမှ ပေါ်ထွက်လာသည်။ ညက နက်သထက် နက်လာ၍ မကြာမီ သန်းခေါင်ယံကို ရောက်တော့မည်ဖြစ်သည်။ ဝမ်းတစ်ထွာအတွက် မှောင်နေဆဲညကို အန်တုရင်း ရွှေဖြူစိုက်ခင်းဘက် သွားနေကြသည်။ ငှက်မြန်လေးများ၏ အနာဂတ်အတွက် မြွေမကြောက်၊ ကင်းမကြောက် ညအမှောင်ထဲ သွားနေကြသည်။ ဝလုံးရေးသင်စ ငှက်မြန်လေးများအတွက် မှောင်နေဆဲ ညထဲ တိုးဝင်နေကြသည်။ အားလုံးသည် မည်သည့်အချိန်မှန်းမသိ ရောက်လာမည့် ပုံပြင်ထဲက အလင်းကိုမျှော်နေကြသည်။ ရောင်နီက အလင်းကို စောင့်မျှော်ရင်း မှောင်နေဆဲညက ဆက်လက်မှောင်မိုက်နေသည်။

Most Read

Most Recent