ကျောက်မဲမြို့နယ် အောင်မြေသာယာ ဘုန်းတော်ကြီးကျောင်းရှိ စစ်ဘေးရှောင်များအား မတ် ၁၆ ရက်က တွေ့ရစဉ်

ကျွန်တော်တို့သည် နေ့စဉ်မကုန်ဆုံးနိုင်သော မျှော်လင့်ချက်များဖြင့် ကျွန်တော်တို့၏အသက်များကို ရှင်သန်နေထိုင်လျက်ရှိကြပါသည်။ ထို့အတူ ကျွန်တော်တို့၏ဘ၀ ကျွန်တော်တို့၏မနက်ဖြန်များ ရှင်သန်နေပျော်စေဖို့အတွက် မျှော်လင့်ချက်များကို ဖန်တီးပြုလုပ်ရင်း ရံဖန်ရံခါ၌ ကျွန်တော်တို့ကိုယ်တိုင်ပင်လျှင် မျှော်လင့်ချက်များကို ပြုလုပ်ဖန်တီးမိလိုက်မှန်းမသိဘဲ ဖြစ်နေတတ်ကြပါသည်။

တကယ်တော့ တစ်ခုမဟုတ် တစ်ခုသောမျှော်လင့်ချက်များဖြင့် ကျွန်တော်တို့သည် ကျွန်တော်တို့၏ ဘဝများကိုနေပျော်အောင် တည်ဆောက်ထားသူများသာ ဖြစ်ကြပါသည်။ ထို့အတွက် မျှော်လင့်ချက်များကလည်း ကျွန်တော်တို့၏ရှင်သန်နေပျော်မှုကို သိသာစွာရော မသိမသာပါ ပြန်လည်ဆွဲဆန့် ဖော်ဆောင်ပေးခဲ့ကြပါသည်။ မည်သို့ပင်ဖြစ်စေ နေ့စဉ်တစ်ခုမဟုတ်တစ်ခုအပေါ်၌ ကျွန်တော်တို့ မျှော်လင့်နေမိခဲ့ကြ စောင့်စားနေမိခဲ့ကြသည်ကတော့ သေချာသည်သာ ဖြစ်ပါသည်။

ဟုတ်ပါသည်။ မြန်မာ့အဘိဓာန်တွင် မျှော်လင့်ဆိုသည့် စကား၏အဓိပ္ပာယ်အား ရည်မှန်းသည်၊ စောင့်စားသည်ဟု ဖွင့်ဆိုပေးထားခဲ့ပါသည်။ တကယ်လည်း ကျွန်တော်တို့သည် နေ့စဉ် တစ်ခုမဟုတ်တစ်ခုကို ရည်မှန်းစောင့်စားရင်း အသက်ရှင်သန်နေခဲ့ကြသည်သာ ဖြစ်ပါသည်။ ရာထူးတိုးဖို့၊ စည်းစိမ်ဥစ္စာများ တိုးပွားလာဖို့ အစရှိသည့် မတူညီသည့်မျှော်လင့်ချက်များဖြင့် မျှော်လင့်စောင့်စားရင်း ရှင်သန်နေထိုင်နေကြပါသည်။ ပိုမိုကောင်းမွန်သောအရာများကို မျှော်လင့်ရင်းဘဝများကို နေပျော်အောင် ဖန်တီးထားခဲ့ကြပါသည်။ မျှော်လင့်ချက်များဖြင့် တည်ဆောက်ထားသည့် ဘဝများဟုဆိုလျှင်တော့ ပို၍မှန်လိမ့်မည်ထင်ပါသည်။

တကယ်လည်း ရာထူးရှိသူက ရာထူးတွေ ထပ်မံတိုးလာဖို့အတွက် မျှော်လင့်သလို အခြေခံအလုပ်သမားလူတန်းစားများကလည်း အခြေခံလုပ်ခလစာများ တိုးလာဖို့အတွက် မျှော်လင့်မိမည်သာ ဖြစ်ပါသည်။ လုပ်ငန်းရှိသူက သူ၏လုပ်ငန်းကိုင်ငန်းများ အဆင်ပြေစေဖို့ မျှော့်လင့်မိမည်ဖြစ်သလို အိမ်ပိုင်ယာပိုင်မရှိသူများကလည်း အိမ်ကလေးတစ်လုံး ခြံကလေးတစ်ခြံဝယ်နိုင်ဖို့အတွက် မျှော်လင့်နေမိကြလိမ့်မည်သာ ဖြစ်ပါသည်။ ကျွန်တော်တို့ မျှော်လင့်ခဲ့ကြပါသည်။ သတင်းကောင်းများကိုကြားရဖို့၊ စာမေးပွဲအောင်ဖို့၊ တိုင်းပြည်ကြီး ငြိမ်းချမ်းဖို့ စစ်ပွဲတွေ ရပ်စဲသွားကြဖို့၊ ကုန်ဈေးနှုန်းများ ကျဆင်းလာဖို့ အစရှိသဖြင့် ကျွန်တော်တို့ မျှော်လင့်ခဲ့ကြပါသည်။ ယုတ်စွအဆုံး မိုးရွာဖို့၊ နေသာဖို့၊ နှင်းကျဖို့အထိ ကျွန်တော်တို့ မျှော်လင့်ခဲ့ကြပါသည်။။

တကယ်လည်း မျှော်လင့်ချက်ဖြင့် အသက်ရှင်သည်ဆိုသည့် စကားလို တစ်စုံတစ်ခုကို မျှော်လင့်ရင်း တစ်စုံတစ်ခုအတွက် မျှော်လင့်ရင်း ကျွန်တော်တို့ ရှင်သန်နေခဲ့ကြပါသည်။ ဈေးကနေပြန်လာမည့် အမေ့၏ ဈေးခြင်းတောင်းထဲမှ မုန့်ကိုမျှော်လင့်နေသည့် ကလေးတစ်ယောက်၏ မျှော်လင့်မှုလိုမျိုး တစ်စုံတစ်ယောက်၏ ပေးကမ်းစွန့်ကျဲမှုကို မျှော်လင့်နေသည့် သူဖုန်းစားတစ်ယောက်၏ မျှော်လင့်မှုလိုမျိုး တစ်ဦးနှင့်တစ်ဦး မတူညီသည့် မျှော်လင့်မှုများဖြင့် ကျွန်တော်တို့ မျှော်လင့်ခဲ့ဖူးကြပါသည်။

တကယ်တော့ နေ့စဉ်မတူညီသည့် မျှော်လင့်ချက်များကိုပွေ့ပိုက်ရင်း ကျွန်တော်တို့ ရှင်သန်နေထိုင်နေခဲ့ကြခြင်းဖြစ်ပါသည်။ ထို့အတူ ပန်းပင်ကလေးတစ်ပင်မှ ပန်းကလေးတစ်ပွင့် ပွင့်လာဖို့အထိကနေ လကမ္ဘာပေါ်သို့ သွားရောက်နိုင်ဖို့အထိ ကျွန်တော်တို့ မျှော်လင့်ခဲ့ကြပါသည်။ မျှော်လင့်နိုင်သည့် အခွင့်အရေးလည်း ကျွန်တော်တို့ဆီ၌ ရှိနေခဲ့ပါသည်။ ကျွန်တော်တို့ မျှော်လည်း မျှော်လင့်ခဲ့ကြပါသည်။ ထိုမျှော်လင့်ချက်များဖြင့်ပင် ကျွန်တော်တို့ ရှင်သန်နေထိုင်ခဲ့ကြပါသည်။ မတူညီသည့် မျှော်လင့်ချက်များကို ကိုယ်စီပွေ့ပိုက်ရင်း ကျွန်တော်တို့၏ဘဝများကို နေပျော်အောင် ဖန်တီးထားခဲ့ကြပါသည်။ အထူးသဖြင့် ပညာမတတ်သည့် မိဘများက ကိုယ့်သားသမီးများကို ပညာတတ်ကြီးတစ်ယောက်အဖြစ် မြင်ချင်သည့် မျှော်လင့်မှုများကို ကျွန်တော်တို့၏ ပတ်ဝန်းကျင်များ၌ မြောက်များစွာပင် တွေ့နိုင်ကြပါသည်။ တကယ်လည်း ကိုယ်ကိုယ်၌က မူလတန်းကိုတောင် မအောင်မြင်ခဲ့ပေမယ့်လည်း ကိုယ့်သားကိုယ့်သမီးများကိုတော့ ဆရာဝန်ကြီးများ၊ အင်ဂျင်နီယာကြီးများအဖြစ် မြင်ခွင့်ရဖို့ မိဘတိုင်း မိဘတိုင်း မျှော်လင့်တတ်ကြပါသည်။

ထို့အတူ ထိုမျှော်လင့်ချက်သည်ပင် မိဘများ၏ ဘဝနေပျော်မှု ဖြစ်ကြပါသည်။ ထိုမျှော်လင့်ချက်သည်ပင် သူတို့၏အလုပ်များကို မညည်းမညူ ပင်ပန်းကြီးစွာလုပ်နိုင်ကြသည့် ခွန်အားတစ်ရပ် ဖြစ်ပါသေးသည်။ ထို့အပြင် ကိုယ့်တပည့်ကို ကိုယ့်ထက်တော်စေချင်သည့် ဆရာတစ်ယောက်၏မျှော်လင့်မှု၊ ကိုယ့်သားကိုယ့်သမီးတွေကို ကိုယ့်ထက်မြင့်မားသည့် ဘဝတွေမှာသာ မြင်ချင်ကြသည့် မိဘများ၏မျှော်လင့်မှုဆိုသည့် မျှော်လင့်မှုများကိုလည်း တွေ့မြင်နိုင်ကြပါသေးသည်။ ဤမျှမက ထိုမျှော်လင့်မှုများနှင့် မတူညီသည့် မျှော်လင့်မှုများကိုလည်း ကျွန်တော်တို့ လူ့အသိုင်းအဝိုင်းထဲ၌ တွေ့နိုင်ကြပါသေးသည်။ ဥပမာစစ်ပွဲတွေ ဖြစ်ပေါ်လာဖို့ မျှော်လင့်နေသည့် လူတစ်ယောက်၏ မျှော်လင့်မှု တစ်စုံတစ်ယောက် ဘေးဒုက္ခဖြစ်ရန် မျှော်လင့်နေသည့် လူတစ်ယောက်၏ မျှော်လင့်မှုများ ဖြစ်ပါသည်။

မည်သို့ပင်ဖြစ်စေ မည်သည့်ရှုထောင့်မှ မျှော်လင့်နေမိ မျှော်လင့်ချက်ထားမိသည်ဖြစ်စေ ထိုမျှော်လင့်မှုသည် ထိုလူ၏ ရှင်သန်နေထိုင်မှုကို ဆွဲဆန့်ပေးထားသည့် အချက်တစ်ခုအဖြစ် ပါဝင်နေလိမ့်မည်သာ ဖြစ်ပါသည်။ ကျွန်တော်ဆိုလိုသည်မှာ လူတစ်ယောက်၏ မျှော်လင့်နေသည့် အကြောင်းကိုမဟုတ်ဘဲ မျှော်လင့်ချက်ထားခြင်း၏ ကျွန်တော်တို့အပေါ် အကျိုးသက်ရောက်ကိုသာ ဖြစ်ပါသည်။ တကယ်လည်း မည်သည့်မျှော်လင့်စရာမှမရှိသည့် လူတစ်ယောက်သည် အသက်ရှင်လျက် သေဆုံးနေသည့် လူတစ်ယောက်နှင့်တူသည်ဟု ကျွန်တော်ကတော့ ယူဆမိပါသည်။ ထို့အတူ တစ်စုံတစ်ခုသော မျှော်လင့်ချက်မရှိဘဲ အသက်ရှင်သန်နေထိုင်ရခြင်းက ပျင်းရိငြီးငွေ့စရာကောင်းသည်ဟု ကျွန်တော်ကတော့ ထင်မြင်မိပါသည်။ တကယ်တော့ မျှော်လင့်ချက်ကုန်ဆုံးသွားပြီဟု သတ်မှတ်လိုက်ခြင်းခံရသည့် သေအံ့ဆဲဆဲ လူတစ်ယောက်ဆီ၌ပင် မျှော်လင့်ချက်လေးတစ်ခုတော့ ရှိနေတတ်ပါသည်။ ဥပမာမသေဆုံးခင် ချစ်ခင်ရသူတစ်ယောက်ယောက်၏ မျက်နှာကို နောက်ဆုံးအကြိမ်အဖြစ် တွေ့မြင်သွားရဖို့ မျှော်လင့်မိသည် မျှော်လင့်နေမူမျိုးဖြစ်ပါသည်။ တကယ်လည်း မျှော်လင့်ချက်နှင့် ပတ်သတ်၍ အကြောင်းအရာလေးတစ်ခု ကြားခဲ့ဖူးပါသည်။ ဦးနီဟုခေါ်သည့် လူတစ်ယောက်သည် ဆရာဝန်များ လက်လျှော့၍ သေအံ့မူးမူး လူနာတစ်ယောက်အဖြစ် ရှိနေခဲ့ပါသည်။ ဦးနီတွင် အချစ်ဆုံးသားတစ်ယောက် ရှိပါသည်။ ထိုသားအား နောက်ဆုံးအကြိမ်အဖြစ် တွေ့မြင်သွားချင်သည့် ဆန္ဒတစ်ခု ဦးနီဆီ၌ ရှိနေခဲ့ပါသည်။ ထိုသားသူ့ဆီ အချိန်မီရောက်လာနိုင်လိမ့်မည်ဆိုသည့် မျှော်လင့်ချက်တစ်ခု ဦးနီဆီ၌ ရှိနေခဲ့ပါသည်။ သို့ပါသော်လည်း ကံဆိုးချင်တော့ ထိုသားငယ်ရောက်ရှိနေသည့်နေရာမှ ဦးနီဆီသို့လာရန် ခရီးပြင်းနှင်မည်ဆိုလျှင်တောင်မှ အနည်းဆုံး သုံးရက်ခန့်ကြာမြင့်မည် ဖြစ်ပါသည်။ ဦးနီသည် ထိုသားငယ်ကို ရောက်လာလိမ့်မည်ဆိုသည် မျှော်လင့်ချက်ဖြင့် ဆရာဝန်များက အံ့သြရလောက်အောင် သူ့အသက်ကိုဆွဲဆန့်၍ သူ၏သားငယ် ရောက်လာသည့်အထိ စောင့်ဆိုင်းပြသွားခဲ့ပါသည်။ တကယ်လည်း ထိုသားငယ်၏ မျက်နှာကိုမြင်ခွင့်ရပြီး စက္ကန့်ပိုင်းအတွင်း ဦးနီသည် သူချစ်ရသောသားနှင့် မိသားစုဝင်များအား ထားခဲ့နှုတ်ဆက်ပြီး လူ့လောကကြီးထဲမှ ထွက်ခွာသွားခဲ့ပါသည်။

ကျွန်တော်ပြောလိုသည်မှာ မျှော်လင့်ချက်နှင့် ကျွန်တော့်တို့၏ အသက်ရှင်သန်နေထိုင်မှု ဆက်စပ်နေခြင်းကိုပင် ဖြစ်ပါသည်။ တကယ်လည်း ကျွန်တော်တို့သည့် တစ်ခုမဟုတ်တစ်ခုအပေါ် မျှော်လင့်ရင်း အသက်ရှင်နေထိုင်နေသူများသာ ဖြစ်ကြပါသည်။ ဒီနေ့ စားသောက်ခဲ့သည့် အစားအသောက်များထက် ပိုမိုကောင်းမွန်သည့် အစားအသောက်များကို စားသောက်နိုင်ဖို့ မျှော်လင့်ရင်း အသက်ရှင်နေခဲ့ကြပါသည်။ ဒီနေ့ နေထိုင်သည့်အိမ်ထက် ပိုမိုကောင်းမွန်သည့်အိမ်များနှင့် နေထိုင်ဖို့ မျှော်လင့်ရင်း ရှင်သန်နေထိုင်နေခဲ့ကြပါသည်။

ထို့အတူ အခြား အခြားသော ပိုမိုကောင်းမွန်သည့် ရာထူးစည်းစိမ်များရရှိဖို့ကိုလည်း မျှော်လင့်နေတတ်ကြပါသည်။ ဒါတင်မက ကျွန်တော်တို့သည် ကျွန်တော်တို့ မျှော်လင့်ထားသည့်အရာများ မျှော်လင့်ထားသလို ဖြစ်မလာသည့်အခါများတွင် ဝမ်းနည်းကြ၊ စိတ်မကောင်းဖြစ်ကြ ဒေါသဖြစ်တတ်ကြပါသေးသည်။ သို့ပေမယ့် ဘယ်လောက်ပဲ မျှော်လင့်ထားသလို ဖြစ်မလာသည်ဖြစ်စေ ကျွန်တော်တို့၏ မျှော်လင့်ချက်များက မရပ်တန့်။ နောက်ထပ် အသစ်အသစ်သော မျှော်လင့်ချက်များကို ထပ်မံမွေးဖွား ဖြစ်ပေါ်လာစေသည်သာ ဖြစ်ပါသည်။ ဥပမာ မနက်ဆည်းဆာအချိန်ကို မြင်ခွင့်မရလိုက်သည့် လူတစ်ယောက် ညနေဆည်းဆာအချိန်ကို တွေ့မြင်ရဖို့ ထပ်မံမျှော်လင့်မိသည့် မျှော်လင့်မှုမျိုးဖြစ်ပါသည်။

တကယ်တော့ မျှော်လင့်ချက်တွေ သေဆုံးသွားသည်ဆိုသည့် စကားရှိသလို မျှော်လင့်ချက်အသစ်တွေ ပြန်လည်မွေးဖွားလာသည်ဆိုသည့် စကားလည်းရှိသည်သာဖြစ်ပါသည်။ မျှော်လင့်ချက်တွေကို ရိုက်ချိုးခံလိုက်ရသည်ဆိုသည့် စကားလည်းရှိသလို မျှော်လင့်ချက်ရောင်ခြည် သန်းလာပြီဆိုသည့် စကားများလည်း ရှိသည်သာဖြစ်ပါသည်။ ဆိုလိုသည်မှာ မျှော်လင့်ချက်ဆိုသည်မှာ မျှော်လင့်ချက် ဖန်တီးမွေးဖွားလိုက်သည့်သူနှင့်သာ တိုက်ရိုက်သက်ဆိုင်သည် ဆိုတာကိုပင် ဖြစ်ပါသည်။ တကယ်လည်း အသက်မသေသေးသမျှ မျှော်လင့်ခွင့်ရှိသည်ဆိုသည့် စကားကဲ့သို့ မည်သည့်ကိစ္စကိုမဆို အသက်ရှင်နေသမျှ ကာလပတ်လုံး ကျွန်တော်တို့ မျှော်လင့်ခွင့်ရှိနေခဲ့ပါသည်။

သို့သော် ကျွန်တော်တို့ မျှော်လင့်နေမိသည့် မျှော်လင့်ချက်သည် ကျွန်တော့်အတွက် ဖြစ်နိုင်သည် မျှော်လင့်ချက်မျိုး ဖြစ်ဖို့လိုပါသည်။ တကယ်လည်း မဖြစ်နိုင်တာကို မျှော်လင့် (မမျှော်လင့်ရဟုဆိုလိုခြင်းမဟုတ်ပါ) တာထက် ဖြစ်နိုင်တာကို မျှော်လင့်တာက ကျွန်တော်တို့၏ မျှော်လင့်ချက်များ ပြည့်ဝလာစေဖို့ ပိုမိုနီးစပ်လိမ်မည် ဖြစ်ပါသည်။ ဖိုးလမင်းကြီးကို အိမ်ထဲမှာချိတ်ဆွဲနိုင်ဖို့ မျှော်လင့်နေတာထက် လရောင်အောက်တွင် လမ်းလျှောက်ခွင့်ရနိုင်ဖို့ မျှော်လင့်မိသည်ကသာ ပိုမိုမှန်ကန်သည့် မျှော်လင့်ချက်ထားမှုမျိုး ဖြစ်လိမ့်မည်ဟုထင်ပါသည်။ ထို့အတူ လမ်းပေါ်က ငွေထုပ်ကြီးများ ကောက်ရလာလေမလားဆိုသည့် မျှော်လင့်မှုထက် ငွေရနိုင်မည့် အလုပ်တစ်ခုကို မျှော်လင့်မိသည်ကသာ ပိုမိုမှန်ကန်သင့်တော်သည့် မျှော်လင့်ချက်ထားမှုမျိုး ဖြစ်လိမ့်မည်ဟုထင်ပါသည်။

မည်သို့ပင်ဖြစ်စေ တစ်ခုမဟုတ်တစ်ခုအပေါ် ကျွန်တော်တို့၏မျှော်လင့်ချက်များ ထားရှိနေခဲ့ကြသည်ကတော့ သေချာသည်သာ ဖြစ်ပါသည်။ တကယ်လည်း စာရေးဝါသနာပါသူတစ်ယောက်သည် သူ၏စာလေးများကို ပုံနှိပ်စာလုံးများအဖြစ် ပြန်မြင်ရဖို့အတွက် မျှော်လင့်မိမည်ဖြစ်သလို လမ်းဘေးမှာ ဈေးရောင်းနေသူတစ်ယောက်သည်လည်း သူ့ထံသို့ ဈေးဝယ်သူများရောက်ရှိလာဖို့အတွက် မျှော်လင့်မိမည်သာ ဖြစ်ပါသည်။

ထို့အတူ ရာထူးရှိသူက ရာထူးထပ်မံတိုးဖို့အတွက် မျှော်လင့်မိမည်ဖြစ်သကဲ့သို့ အခြေခံလူတန်းစား အလုပ်သမား လူတန်းစားများကလည်း အခြေခံလုပ်ခလစာများ တိုးလာဖို့အတွက် မျှော်လင့်မိမည်သာ ဖြစ်ပါသည်။ လုပ်ငန်းရှိသူက လုပ်ငန်းကိုင်ငန်းများ အဆင်ပြေစေဖို့ မျှော်လင့်မိမည်ဖြစ်သကဲ့သို့ အိမ်ပိုင်ယာပိုင်မရှိသူများကလည်း အိမ်ကလေးတစ်လုံး ခြံကလေးတစ်ကွက် ဝယ်နိုင်ဖို့အတွက် မျှော်လင့်မိမည်သာ ဖြစ်ပါသည်။ ဤမျှမက ပိုက်ဆံတောင်းရမ်း စားသောက်နေသူ လူတစ်ယောက်သည် ပိုက်ဆံပေးကမ်းလှူဒါန်းမည့်သူများနှင့် ကြုံရဖို့မျှော်လင့်မိမည်ဖြစ်သလို စစ်ပွဲတွေရပ်စဲသွားဖို့ အမျှော်ကြီး မျှော်လင့်နေမိကြသူများလည်း ရှိနေခဲ့ကြလိမ့်မည်ဖြစ်ပါသည်။

မည်သို့ပင်ဖြစ်စေ သေချာသည်ကတော့ ကျွန်တော်တို့သည် ကျွန်တော်တို့၏ဘဝများကို မျှော်လင့်ချက်များဖြင့် တည်ဆောက်ထားခဲ့ပြီး ကျွန်တော်တို့၏နေ့စွဲများ ကိုမျှော်လင့်ချက်များဖြင့် ရှင်သန်နေထိုင် နေနေခဲ့ကြသည်ဆိုတာပင် ဖြစ်ပါတော့သည်။