ရန်ကုန်မြို့ ပွဲရုံတစ်ခုတွင် ဆန်များ အိတ်အတွင်းသို့သွင်းရန် ပြင်ဆင်နေသည်ကို တွေ့ရစဉ်

မြန်မာနိုင်ငံမှ ပြည်ပဆန်တင်ပို့မှုကို နှစ်စဉ် ၁၅ ရာခိုင်နှုန်းနှင့် ၂၀ ရာခိုင်နှုန်းခန့် တိုးတက်လာရန်နှင့် လာမည့် ၂၀၂၀-၂၀၂၁ ခုနှစ်တွင် ဆန်တန်ချိန်သုံးသန်းအထိ တင်ပို့နိုင်ရန် မျှော်မှန်းဆောင်ရွက်လျက်ရှိကြောင်း မြန်မာနိုင်ငံ ဆန်စပါးအသင်းချုပ်၊ အထွေထွေအတွင်းရေးမှူး ဦးရဲမင်းအောင်က ပြောကြားသည်။

မြန်မာနိုင်ငံ ဆန်စပါးအသင်းချုပ်အနေဖြင့် ဆန်စပါးပြည်ပတင်ပို့သည့်လုပ်ငန်းကို ဖွံ့ဖြိုးတိုးတက်ပြီး ပြည်ပတင်ပို့သည့် ဈေးကွက်ကို ဖွင့်လိုက်ပိတ်လိုက် လုပ်ဆောင်ခြင်းမျိုး မဟုတ်ဘဲ လွတ်လွတ်လပ်လပ်ဖြင့် နယ်စပ်ကုန်သွယ်ရေးမှ ပုံမှန်တည်တည်ငြိမ်ငြိမ် လုပ်ကိုင်နိုင်ပါက မြန်မာ့ဆန်စပါးဈေးကွက်ကပိုပြီး ဖွံ့ဖြိုးလာမည်ဖြစ်ကြောင်း သိရသည်။

နှစ်အလိုက် ပြည်ပဆန်တင်ပို့မှုအနေအထားကို လေ့လာပါက ၂၀၁၁-၂၀၁၂ ဘဏ္ဍာနှစ်မှစပြီး ပြည်ပသို့ မြန်မာ့ဆန်တန်ချိန် တစ်သန်းကျော်ကို ငါးနှစ်ဆက်တိုက်ပို့ခဲ့သည်။ ယင်းကဲ့သို့ ငါးနှစ်ဆက်တိုက်ပို့နိုင်သည့် အနေအထားသည် ပြီးခဲ့သည့်နှစ်၂၀ အတွင်း မရှိခဲ့ပေ။ ၂၀၀၆ ခုနှစ်ခန့်မှ ဆန်တန်ချိန် တစ်သန်းခန့် တင်ပိ့ုနိုင်ခဲ့ပြီးနောက်ပိုင်းတွင် တန်ချိန်ခုနစ်သိန်း၊ ရှစ်သိန်းခန့် တင်ပို့နိုင်ခဲ့သည်။

သမ္မတဦးသိန်းစိန် အစိုးရလက်ထက် ၂၀၁၁-၂၀၁၂ ဘဏ္ဍာနှစ်မှစတင်ပြီး ဆန်တန်ချိန်တစ်သန်းကို ငါးနှစ်ဆက်တိုက် ပို့လာနိုင်သည့်အတွက် ၂၀၁၇-၂၀၁၈ ဘဏ္ဍာနှစ်တွင် ဆန်တန်ချိန် နှစ်သန်း တင်ပို့နိုင်ရန် ခန့်မှန်းထားခြင်းဖြစ်သည်။

၂၀၁၇-၂၀၁၈ ဘဏ္ဍာနှစ် အောက်တိုဘာ ၆ ရက်အထိ ပြည်ပသို့ မြန်မာနိုင်ငံမှ ဆန်တန်ချိန် ၁ ဒသမ ၆ သန်းကျော် တင်ပို့ထားမှုမှ ဒေါ်လာသန်း ၅၀၀ နီးပါး ရရှိထားကြောင်း၊ ခြောက်လအတွင်း ယခုနှစ် လျာထားချက်နှစ်သန်း၏ ရာခိုင်နှုန်း ၈၀ ခန့် တင်ပို့ထားကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

၂၀၁၇-၂၀၁၈ ဘဏ္ဍာနှစ် အောက်တိုဘာ ၆ ရက်အထိ မြန်မာ့ဆန်တန်ချိန် ၁၆၆၅၈၃၆ ဒသမ ၅၇ သန်းတင်ပို့ထားမှုမှ ဒေါ်လာ ၄၉၄ ဒသမ ၃၄၄ သန်း ရရှိထားခြင်း ဖြစ်သည်။ ယခုဘဏ္ဍာနှစ်အတွင်း ပြည်ပသို့ မြန်မာ့ဆန်တန်ချိန်နှစ်သန်းအထိ တင်ပို့နိုင်ရန် ခန့်မှန်းထားသည်။

“ဆန် ပြည်ပတင်ပို့မှုကို နှစ်စဉ်တိုးတက်မှုကို အနည်းဆုံး ၁၅ ရာခိုင်နှုန်းနဲ့ ၂၀ ရာခိုင်နှုန်းလောက်ကို မှန်းတယ်။ ဆန် ပြည်ပ တင်ပို့မှုရဲ့ Annual Growth Rate ပေါ့၊ ရည်ရွယ်ချက်ကတော့ ၂၀၂၀-၂၀၂၁ လောက် မှာ ဆန်တန်ချိန် သုံးသန်းလောက် ပို့နိုင် မယ်။ အမျိုးသားပို့ကုန် မဟာဗျူဟာမှာ ဆိုရင် လေးသန်းလောက်အထိ မှန်းတယ်။ ဒီ နေရာမှာလည်း တန်းမြင့်ဆန်တင်ပို့မှုကို တိုးချဲ့ပြီးတော့ ပါလာအောင် ကျွန်တော်တို့ မြန်မာနိုင်ငံ ဆန်စပါးအသင်းချုပ်က ရည်ရွယ်တယ်”ဟု ဦးရဲမင်းအောင်က ဆိုသည်။

“အဲဒီတော့ အချက်သုံးချက်ကို နိုင်ငံတော်ကို ခိုင်ခိုင်မာမာ တင်ပြထားတယ်။ နံပတ်တစ်က ၂၀၁၇-၂၀၁၈ မှာ ဆန်တန်ချိန် နှစ်သန်းကို တင်ပို့မယ်။ အဲဒီလို ပို့ဖို့ဆိုတဲ့ ကိစ္စတစ်ခုတည်းကို တင်ပြတာ မဟုတ်ပါဘူး။ ဆန်တန်ချိန်နှစ်သန်း ပို့မယ်ဆိုရင် အ ထွက်နှုန်း တိုးလာဖို့လိုတယ်။ တစ်ဧက အထွက်နှုန်းက ၆၀၊ ၇၀ နဲ့ တဝဲလည်လည်ဖြစ်နေရုံနဲ့ မရတော့ဘူး။ ရေတော်မိုးတော်မှာ အထွက်နှုန်း တင်း ၁၀၀ ထွက်မယ်ဆိုတာ နှစ် ပေါင်းများစွာ မလုပ်နိုင်ခဲ့ဘူး။ တစ်ဘက်က ဆန်တန်ချိန်နှစ်သန်း၊ နောက်ပိုင်းမှာ သုံးသန်းအထိ ပို့မယ်ဆိုတဲ့ဟာမျိုးမှာ အထွက် နှုန်းတိုးအောင်လုပ်မယ်ဆိုတဲ့ အနေအထား အရေးကြီးလာတယ်။ အထွက်နှုန်းတိုးလာဖို့ Contract Farming ကို သွားမှရမယ်။ လုပ်မယ်ဆိုရင် ပုဂ္ဂလိကနဲ့ တောင်သူလယ်သမားနဲ့ စက်ပိုင်၊ တောင်သူနှစ်ဦးထဲ လုပ်လို့ မရဘူး။ သုံးဦးသုံးဖလှယ် လုပ်မှရမယ်” ဟု ဦးရဲမင်းအောင်က သုံးသပ်ပြောကြားသည်။
ယင်းကဲ့သို့ သုံးဦးသုံးဖလှယ်ဆောင်ရွက်ရာ၌ အစိုးရအနေဖြင့် ပါဝင်လာရန် အရေးကြီးကြောင်း၊အခြားတစ်ဖက်ကလည်း ဘဏ္ဍာငွေကြေး ထောက်ပံ့ပေးမှုလည်း လိုအပ်ကြောင်း ဦးရဲမင်းအောင်က ပြောကြားသည်။

ယခုဘဏ္ဍာနှစ်တွင် ဆန်တန်ချိန်နှစ်သန်း တင်ပို့နိုင်သော်လည်း လာမည့်နှစ်များတွင် ဆန်တင်ပို့မှုပြန်ကျသွားမည်ကိုလည်း စိုးရိမ်မှုများရှိသည်။ ယင်းကဲ့သို့မဖြစ်စေရန် အထွက်နှုန်း တိုးတက်ရန်လိုသည်။

ယခုနှစ်အတွင်း နွေစပါးစိုက်ဧက ၁၈ သိန်းခန့်အထိ တိုးချဲ့စိုက်ပျိုးနိုင်မည်ဖြစ်ပြီး နွေစပါးစိုက်ပျိုးမည့် တောင်သူများအနေဖြင့် မျိုးကောင်းမျိုးသန့် အပါအဝင် ထွန်ယက်ရေး လုပ်ငန်းများကို စိုက်ပျိုးရေး၊ မွေးမြူရေး နှင့်ဆည်မြောင်းဝန်ကြီးဌာနနှင့် ဆက်သွယ် ဆောင်ရွက်နိုင်ကြောင်း အဆိုပါဝန်ကြီးဌာနမှ ထုတ်ပြန်ထားသည်မှာ ဆန်စပါးဈေးကွက်အတွက် အားရစရာကောင်းသည်။

စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာနအနေဖြင့် စိုက်ပျိုးရေပေးဝေနိုင်ရေး ရည်ရွယ်တည်ဆောက်ထားသည့် ရေလှောင်တမံများတွင် အောက်တိုဘာ ၂၃ ရက်အထိ စိုက်ပျိုးရေဧကပေ ၁၃ ဒသမ ၃ သန်းကျော်ခန့် သိုလှောင်ထားရှိပြီး ဖြစ်ကြောင်း သိရသည်။

ယခင်နှစ်က ဆည်ရေဖြင့် နွေစပါးဧကပေါင်း ကိုးသိန်းကျော်ကို စိုက်ပျိုးနိုင်ခဲ့ပြီး ယခုနှစ်တွင် နွေစပါးစိုက်ဧက ၁၈ သိန်းခန့် စိုက်ပျိုးရန်အတွက် စိုက်ပျိုးရေ ပေးဝေနိုင်မည်ဖြစ်ကြောင်း၊ ယခုနှစ် နွေစပါးစိုက်ပျိုးမည့် တောင်သူများအနေဖြင့် ဆည်/ကန် များနှင့် မြစ်ရေတင်လုပ်ငန်းများမှ ရေရယူ စိုက်ပျိုးရေး၊ မျိုးကောင်းမျိုးသန့်ရရှိရေး၊ စိုက်ပျိုးမှု နည်းပညာ အကူအညီများရရှိရေး၊ လယ်ယာထွန်ယက်ရေး ကိစ္စများကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန လက်အောက်ရှိ နီးစပ်ရာ ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာန၊ စိုက်ပျိုးရေး ဦးစီးဌာန၊ စက်မှုလယ်ယာဦးစီးဌာနတို့ နှင့်ဆက်သွယ်၍ ကြိုတင်ညှိနှိုင်းစီမံ ဆောင်ရွက်နိုင်ကြောင်း အသိပေးချက် ထုတ်ပြန်ထားသည်။

“နွေစပါးကို ဧက ၁၈ သိန်းစာ နွေစပါး ရေပေးနိုင်မယ်ဆိုရင် အခြေခံကျတဲ့ စပါးတွေက အခုငါးသိန်းဝန်းကျင်မှာ ဖြစ်နေတယ်ဆိုတဲ့ အနေအထားဟာ တောင်သူလယ်သမားအတွက် ဆန်စပါးစိုက်ပျိုးထုတ် လုပ်ခြင်းဟာ အဆင်ပြေနိုင်တဲ့နည်းလမ်း တစ်ခုဖြစ်ပါတယ်။ ဆန်စပါးဟာ အရင်းအ နှီး များများမလိုဘူး။ အကျိုးအမြတ်လည်း ရရှိနိုင်တယ်၊ နည်းစနစ်နဲ့နည်းပညာမှာ တောင်သူတွေအတွက် အထူးအဆန်းမဟုတ်တော့ဘူး။ ဒါကြောင့် ဆန်စပါးဟာ လတ်တလောမှာ ကျွန်တော်တို့ တိုင်းပြည်အတွက် ပစ်ပယ်လို့မရတဲ့ သီးနှံဖြစ်နေတဲ့အတွက် နွေစပါးကို တောင်သူတွေ အားထည့်စိုက်ပျိုးနိုင်ဖို့ လိုပါတယ်” ဟု ဆန်ကုန်သည်တစ်ဦးက ပြောကြားသည်။