အလီဘာဘာ တည်ထောင်သူ ဂျက်မာကို ဖိတ်ခေါ်ပါ

အလီဘာဘာ တည်ထောင်သူ ဂျက်မာကို ဖိတ်ခေါ်ပါ
Published 11 October 2017

မြန်မာပြည်သူလူထုသည် ရုပ်ရှင်မင်းသား ဂျက်လီကို ကောင်းကောင်းသိကြသည်။ ဂျက်မာကို သိသူနည်းကြမည်။ ဂျက်မာတည်ထောင်သည့် အလီဘာဘာ အွန်လိုင်းဈေးဝယ် စာမျက်နှာကို ပိုသိကောင်းသိကြလိမ့်မည်။ အသေးစားစီးပွားရေး၊ စွန့်ဦးတီထွင် စီးပွားရေး၊ အီလက်ထရွန်နစ်အုပ်ချုပ်ရေး၊ အီလက်ထရွန်နစ် ကုန်သွယ်ရေးတို့အကြောင်း ပြောမည်ဆိုလျှင် ဂျက်မာသည် ဆရာ့ဆရာကြီးဖြစ်သည်။ ဆင်းရဲမွဲတေမှုနွံထဲနစ်သည် ထက်နစ်ကာ ယောင်ချာချာဖြစ်နေဆဲ ပကတိမြန်မာ့စီးပွားရေးကို ကုစားရာတွင် ဂျက်မာသည် ဆေးလိုက်သော ဆေးဆရာကောင်းဖြစ်နိုင်ဖွယ်ရှိသည်။

တရုတ်နိုင်ငံ အီလက်ထရွန်နစ် ကုန်သွယ်ရေးဂုရုကြီးဖြစ်သည့် ဂျက်မာသည် အမေရိကန်သမ္မတ ဒေါ်နယ်ထရန့်က သီးသန့်တွေ့ဆုံခဲ့ရသူဖြစ်သည့်အပြင် အိုဘားမား သမ္မတသက်တမ်းအတွင်း အိမ်ဖြူတော်သို့ဖိတ်ခေါ်၍ နေ့လယ်စာ တိတ်တဆိတ် ကျွေးခဲ့သဖြင့် သတင်းမီဒီယာများအကြား ဆူညံပွက်လောရိုက်ခဲ့ရသည်။ ဂျက်မာ၏ ဆွေးနွေးပွဲတွင် သမ္မတအိုဘားမားက ကြားဝင်ညှိနှိုင်းဆွေးနွေးသူ (မော်ဒရေတာ)အဖြစ် ပါဝင်ခဲ့ရသည်အထိ ကမ္ဘာ့ခေါင်းဆောင်များက အသိအမှတ်ပြု၊ နေရာပေးခံရသူလည်း ဖြစ်သည်။ ဂျက်မာသည် နိုင်ငံတကာခေါင်းဆောင်များအကြား လူကြိုက်များ၊ ရေပန်းစားသည့် စွန့်ဦးတီထွင် လုပ်ငန်းရှင်ကြီးဟုလည်း ဆိုနိုင်မည်ဖြစ်သည်။

ဂျက်မာနှင့် ဒေါ်နယ်ထရန့် တွေ့ဆုံခဲ့စဉ်က ပေကျင်းနှင့် ဝါရှင်တန်အကြား ကုန်သွယ်ရေး တင်းမာမှုများ မြင့်မားနေခဲ့ပြီး ထရန့်က ဆင်ဖမ်းမည်၊ ကျားဖမ်းမည်ဟု ကြွေးကြော်နေခဲ့သော ကာလဖြစ်သည်။ ၂၀၁၇ ခုနှစ် ဇန်နဝါရီ ၉ ရက်တွင် အလီဘာဘာ တည်ထောင်သူဂျက်မာသည် အမေရိကန်သမ္မတအဖြစ် ရွေးကောက်ခံထားရသူ ဒေါ်နယ်ထရန့်နှင့် တွေ့ဆုံခဲ့ပြီးနောက် အမေရိကန် အလတ်စားနှင့် အသေးစား စီးပွားရေးလုပ်ငန်းတစ်သန်းမှ ထုတ်လုပ်သော ပစ္စည်းများနှင့် ဝန်ဆောင်မှုများကို သူပိုင်ဆိုင်သည့် အလီဘာဘာ အီလက်ထရွန်နစ် ကုန်သွယ်ရေးစြင်္ကံလမ်းမှ တစ်ဆင့် တရုတ်နိုင်ငံနှင့် အာရှဈေးကွက်၌ ရောင်းချနိုင်ရန် ကူညီမည်ဟု ကတိကဝတ်ပြုခဲ့သည်။ အမေရိကန်နိုင်ငံတွင် သန်းချီသော အလုပ်အကိုင် အခွင့်အလမ်းများကို ဖန်တီးပေးနိုင်မည်ဟု ဂျက်မာကပြောကြောင်း သတင်းရေးသား ဖော်ပြခဲ့ကြသည်။

တရုတ်သမ္မတရှီကျင့်ဖျင်နှင့် အမေရိကန်သမ္မတ ဒေါ်နယ်ထရန့်အကြား အရေးပါသော စေ့စပ်ညှိနှိုင်းပေးသူဟုလည်း သတင်းကြီးခဲ့သည်။ အမေရိကန်အစိုးရသစ် မဖွဲ့စည်းနိုင်မီကာလ ဝါရှင်တန်အစိုးရသစ်နှင့် ပေကျင်းအကြား ယုံကြည်မှုရရှိပြီး ဆက်ဆံရေး ပိုမိုကောင်းမွန်စေရန် ကြားဝင်ခဲ့သူများအကြားတွင် တရုတ်လုပ်ငန်းရှင်ကြီး ဂျက်မာသည်လည်း အရေးပါသူတစ်ဦးဖြစ်သည်။ တရုတ်သမ္မတရှီကျင့်ဖျင်၏ အမေရိကန်ခရီးစဉ်နှင့် ရှီကျင့်ဖျင်-ဒေါ်နယ်ထရန့် ပထမအကြိမ် တွေ့ဆုံဆွေးနွေးမှုတို့ အထမြောက်ခဲ့သည်မှာ အလီဘာဘာ ပဲ့ကိုင်ရှင်ကြီးဂျက်မာ၏ စွမ်းဆောင်ရည်နှင့်လည်း ကြီးကြီးမားမား ဆက်စပ်နေခဲ့သည်။ ဝါရှင်တန်-ပေကျင်း ဆက်ဆံရေးတွင် ဂျက်မာ၏ ကြားဝင်ဆောင်ရွက်မှုများကို နောက်ဖေးပေါက် သံခင်းတမန်ခင်းဟုပင် အမည်ပေးခဲ့ကြသည်။

အလီဘာဘာတည်ထောင်သူ ဂျက်မာ၏ အခြေခံယုံကြည်ချက်မှာ ဈေးဝယ်သူသည် ပထမ၊ အလုပ်သမားသည် ဒုတိယ၊ ရင်းနှီးမြှုပ်နှံသူသည် တတိယပင်ဖြစ်သည်။ ဂျက်မာက စီးပွားရေးလုပ်ငန်းတစ်ခုတွင် တန်ဖိုးတက်အောင်လုပ်နိုင်ဖို့ထက် အခြားသူများကို ဝန်ဆောင်မှုပေးနိုင်ဖို့၊ အကူအညီပေးနိုင်ဖို့က ပိုမိုသော့ချက်ကျ အရေးပါသည်ဟု ထုတ်ဖော် ပြောကြားခဲ့သည်။ စီးပွားရေးလုပ်ရာတွင် ငွေကြေးအကျိုးအမြတ်ထက် ဖောက်သည်များနှင့် ဈေးဝယ်သူများ၏ ယုံကြည်မှုရရှိရန် ဦးစားပေး ဆောင်ရွက်သင့်သည်ဟု ဂျက်မာက တိုက်တွန်းခဲ့သည်။ ဂျက်မာ၏ ဝယ်သူနှင့် အလုပ်သမားကို ဦးစားပေးပြီး ရင်းနှီးမြှုပ်နှံသူကို နောက်ပို့ထားသည့် မူဝါဒအပေါ် အနောက်နိုင်ငံများမှ အရင်းရှင်များနှင့် စီးပွားရေးလုပ်ငန်းရှင်ကြီးများက သိပ်သဘောတွေ့ကြပုံမရပေ။

ကမ္ဘာ့ရွာပြုခြင်း (ဂလိုဘယ်လိုက်ဇေးရှင်း) ကိုလည်း ဂျက်မာက မေးခွန်းထုတ်ခဲ့သည်။ ဂလိုဘယ်လိုက်ဇေးရှင်းသည် ကောင်းမွန်သော်လည်း၊ ပိုမိုကောင်းမွန်အောင် ပြုပြင်ဖို့လိုအပ်နေကြောင်း၊ လွန်ခဲ့သောနှစ်ပေါင်း သုံးဆယ်က ဂလိုဘယ်လိုက်ဇေးရှင်းသည် ကုမ္ပဏီကြီး ခြောက်သောင်းလက်ထဲတွင် ရှိခဲ့ကြောင်း၊ လွန်ခဲ့သော နှစ်တစ်ရာကဆိုလျှင် ဘုရင်နှင့် မင်းဧကရာဇ်များသည် ဂလိုဘယ်လိုက်ဇေးရှင်းကို ချုပ်ကိုင်ခဲ့ကြောင်း၊ လာမည့် နှစ်သုံးဆယ်တွင် ဂလိုဘယ်လိုက်ဇေးရှင်း၏ လားရာနှင့် သွင်ပြင်လက္ခဏာသည် ဆင့်ကဲပြောင်းလဲလာနိုင်ကြောင်း ဂျက်မာက သုံးသပ် မှတ်ချက်ပြုခဲ့သည်။ လာမည့် နှစ်သုံးဆယ်တွင် ဂလိုဘယ်လိုက်ဇေးရှင်းသည် အားလုံးပါဝင်နိုင်သည့် အခင်းအကျင်း ဖြစ်လာနိုင်ပြီး ထိုသို့ဖြစ်လာနိုင်ရန် နယ်စည်းမခြား အလုပ်လုပ်နိုင်မည့် စီးပွားရေးလုပ်ငန်းစု ခြောက်သန်းနှင့် အသေးစား စီးပွားရေးလုပ်ငန်း သန်းနှစ်ဆယ်တို့ကို ဒေါင်ဒေါင်မြည် အားကောင်းလာအောင် ပံ့ပိုးပေးနိုင်ရမည်ဟု ဂျက်မာက ဆွေးနွေးခဲ့သည်။ အနာဂတ် ဂလိုဘယ်လိုက်ဇေးရှင်းပုံစံတွင် ကြွယ်ဝချမ်းသာမှုများကို အားလုံးမျှဝေခံစားနိုင်ရေး မျက်မှောက်ပြုသင့်ကြောင်းလည်း ဆွေးနွေးအမြင်ဖလှယ်ခဲ့ကြသည်။

အာဆီယံဒေသတွင်းနိုင်ငံများဖြစ်သည့် အင်ဒိုနီးရှားနိုင်ငံနှင့် မလေးရှားနိုင်ငံတို့သည် အီလက်ထရွန်နစ်ကုန်သွယ်ရေး (အီးကောမတ်စ်) နှင့် အီလက်ထရွန်နစ်အုပ်ချုပ်ရေးတို့ကို ဗျူဟာမြောက် ဖော်ဆောင်နိုင်ရေးအတွက် အလီဘာဘာတည်ထောင်သူ ဂျက်မာကို အစိုးရ၏ အတိုင်ပင်ခံအဖြစ် တရားဝင် ခန့်အပ်ခဲ့ကြသည်။ အင်ဒိုနီးရှားသမ္မတနှင့် မလေးရှားဝန်ကြီးချုပ်တို့ကိုယ်တိုင် ဂျက်မာကို ကမ်းလှမ်းခဲ့ကြသည်ဟုသိရှိရသည်။ ဂျက်မာ၏ အလီဘာဘာလုပ်ငန်းစုကြီးနှင့် အင်ဒိုနီးရှားနိုင်ငံ၊ မလေးရှားနိုင်ငံတို့အကြား အီလက်ထရွန်နစ် ကုန်သွယ်ရေးကိစ္စ ပူးပေါင်းဆောင်ရွက်မည့် အစီအစဉ်များကသည် အားရဖွယ်ရာပင်ဖြစ်သည်။ အီလက်ထရောနစ် အုပ်ချုပ်ရေး၊ ကုန်သွယ်ရေးတို့နှင့်စပ်လျဉ်း၍ ဒေသတွင်းနိုင်ငံများအကြား အောက်တန်း၊ နောက်တန်းရောက်နေဆဲ မြန်မာနိုင်ငံ အနေဖြင့် အီလက်ထရွန်နစ် တော်လှန်ရေးကို မည်သို့မည်ပုံမောင်းနှင်မည်၊ အကြံဉာဏ်သာမက အရင်းအနှီး ရရှိရေးကို မည်သို့မည်ပုံ ဆောင်ရွက်မည်၊ အားသာချက်၊ အားနည်းချက်များကို မည်သို့မည်ပုံ သင်ခန်းစာယူမည်တို့ကို ဗျူဟာမြောက် ထွင်းဖောက်စဉ်းစားနိုင်ရန် လစ်ဟာနေဆဲပင်ဖြစ်သည်။

အလီဘာဘာပဲ့ကိုင်ရှင်ကြီး ဂျက်မာ (ခေါ်) မာယွန်သည် အရှေ့တောင်အာရှနိုင်ငံများဖြစ်သည့် အင်ဒိုနီးရှားနိုင်ငံ၊ မလေးရှားနိုင်ငံ၊ ဖိလစ်ပိုင်နိုင်ငံ၊ စင်ကာပူနိုင်ငံ၊ ထိုင်းနိုင်ငံတို့ကို အလည်အပတ် သွားရောက်ခဲ့ပြီး စွန့်ဦးတီထွင် စီးပွားရေးနှင့် အသေးစားစီးပွားရေးဆိုင်ရာ ဆွေးနွေးပွဲများ၊ အီလက်ထရွန်နစ် ကုန်သွယ်ရေး (အီးကောမတ်စ်) ဆိုင်ရာ အလုပ်သဘော ဆွေးနွေးမှုများကို ပြုလုပ်ခဲ့သည်။ မြန်မာနိုင်ငံ၏ ဈေးကွက်စီးပွားရေးစနစ် ပိုမိုရုပ်လုံးပေါ်လာရေးနှင့်စပ်လျဉ်း၍ အီလက်ထရောနစ်ကုန်သွယ်ရေး၊ စွန့်ဦးတီထွင်စီးပွားရေးနှင့် အသေးစားစီးပွားရေးတို့သည် သော့ချက်ကျ၊ အရေးပါနေသည့်အလျောက် မြန်မာ့စီးပွားရေး အပြောင်းအလဲတွင် ဂျက်မာကဲ့သို့ ပုဂ္ဂိုလ်မျိုးကို တိုင်ပင်သင့်သည်။ အကြံဉာဏ်ယူသင့်သည်။ လက်ငင်း သောင်မတင်ရေမကျဖြစ်နေဆဲ မြန်မာ့စီးပွားရေး အခင်းအကျင်းတွင် ဂျက်မာ၏ အမြင်၊ အတွေး၊ သုံးသပ်ချက်၊ အကြံပြုချက်များကို စီးပွားရေးလုပ်ငန်းရှင် ကြီးငယ်လတ်များ သာမက အစိုးရ၊ လွှတ်တော်၊ တပ်မတော် အပါအဝင် သော့ချက်အစုအဖွဲ့ဝင်များ၊ ခေါင်းဆောင်များအနေဖြင့် မဖြစ်မနေ နားစွင့်သင့်၊ မေးခွန်းထုတ်သင့်သည်ဟု ထင်မြင်သုံးသပ်မိပါသည်။

စဉ်းစားမိသည်မှာ အလီဘာဘာတည်ထောင်သူ ဂျက်မာကို မြန်မာနိုင်ငံသို့ ဖိတ်ခေါ်ပြီး မြန်မာနိုင်ငံ၏ အုပ်ချုပ်ရေး၊ စီးပွားရေးနှင့် ကုန်သွယ်ရေးတို့ကို အီလက်ထရောနစ်ပြုရေးနှင့် စပ်လျဉ်း၍ နာခံသင့်သည်၊ အကြံဉာဏ်ရယူသင့်သည်။ နိုင်ငံတော်သမ္မတ ဦးထင်ကျော် သို့မဟုတ် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကိုယ်တိုင် ဂျက်မာကို ဖိတ်ကြားနိုင်မည်ဆိုလျှင် ပိုမိုလျော်ကန်သင့်မြတ်မည်ဖြစ်သည်။ အစိုးရ၊ လွှတ်တော်၊ တပ်မတော်နှင့် နိုင်ငံရေးပါတီခေါင်းဆောင်များ အပါအဝင် မြန်မာ့ခေါင်းဆောင်များသည် ဂျက်မာနှင့် အမြင်ဖလှယ် ဆွေးနွေးသင့်သည်။ ဂျက်မာ၏ ဟောပြော ဆွေးနွေးပွဲများကို မြန်မာဘာသာပြန်ဆိုပြီး တိုက်ရိုက်ထုတ်လွှင့်နိုင်မည်ဆိုလျှင် ပိုကောင်းဦးမည်ဖြစ်သည်။ ကမ္ဘာ့ခေါင်းဆောင်ကြီးများကပင် အလေးထား၊ အချိန်ပေး တွေ့ဆုံစကားပြောလေ့ရှိသည့် စီးပွားရေးလုပ်ငန်းရှင်ကြီး ဂျက်မာကို မြန်မာ့ခေါင်းဆောင်များကလည်း အချိန်ပေးသင့်သည်။ အလေးထား ဖိတ်ခေါ်သင့်သည်ဟု ထင်မြင်မိပါသည်။

ဂျက်မာ (ခေါ်) မာယွန်သည် အင်တာနက်အခြေပြု စီးပွားရေးလုပ်ငန်းစုကြီးဖြစ်သည့် အလီဘာဘာစီးပွားရေးလုပ်ငန်းစု၏ အမှုဆောင်ဥက္ကဋ္ဌနှင့် တည်ထောင်သူဖြစ်ပြီး ၂၀၁၇ ခုနှစ် အောက်တိုဘာလထုတ် အချက်အလက်အရ အမေရိကန်ဒေါ်လာ ၄၆ ဒသမ ၄ ဘီလျံ အသားတင် ပိုင်ဆိုင်သည့် တရုတ်နိုင်ငံ၏ ဒုတိယအချမ်းသာဆုံးပုဂ္ဂိုလ်ဖြစ်သည်။ ဂျက်မာဖောင်ဒေးရှင်းကို ထူထောင်ထားပြီး ပညာရေး၊ ကျန်းမာရေး၊ ဆင်းရဲမွဲတေမှုလျှော့ချရေး၊ လူမှုရေး စသည့် နယ်ပယ်ကဏ္ဍအသီးသီးတွင် ကူညီထောက်ပံ့လျက်ရှိသည်။ ကမ္ဘာ့စီးပွားရေးနှင့် စွန့်ဦးတီထွင်စီးပွားရေး နယ်ပယ်တွင် စံပြုထိုက်သော ပုဂ္ဂိုလ်တစ်ဦးဖြစ်သည့်အပြင် ကမ္ဘာ့သြဇာအကြီးမားဆုံး စီးပွားရေးလုပ်ငန်းရှင်ကြီးများထဲတွင် တစ်ဦးအပါအဝင်ဖြစ်သည်။

အချုပ်အားဖြင့်ဆိုသော် အသေးစား စီးပွားရေးလုပ်ငန်းများ အားကောင်းမောင်းသန်ရန် အရေးတကြီး လိုအပ်နေသော၊ စွန့် ဦးတီထွင်စီးပွားရေးလုပ်ငန်းရှင်များကို မြေတောင်မြှောက်ပေးရန် အလွန်အမင်း လိုအပ်နေသော၊ အလုပ်အကိုင် အခွင့်အလမ်းသစ်များ သိန်းချီ၊ သန်းချီဖော်ထုတ်ရန် အဆောတလျင် လိုအပ်နေသော၊ ထုတ်ကုန်များကို ကမ္ဘာ့ဈေးကွက်တွင် တစ်နိုင်တစ်ပိုင် တင်ပို့ရောင်းချနိုင်မည့် အခွင့်အရေးကောင်းများ သိသိသာသာ လိုအပ်နေဆဲဖြစ်သော မြန်မာနိုင်ငံ အနေဖြင့် ဂျက်မာကဲ့သို့ စီးပွားရေးလုပ်ငန်းရှင်ကြီးကို ဖိတ်ခေါ် အကြံဉာဏ်ယူကာ တိုင်ပင်နှီးနှော ဖလှယ်နိုင်မည်ဆိုလျှင် စီးပွားရေး ပြုပြင်ပြောင်းလဲရေးလုပ်ငန်းစဉ်၌ များစွာအထောက်အကူ ပြုလာနိုင်မည်ဖြစ်ပါကြောင်း သုံးသပ် တင်ပြလိုက်ရပါသည်။

Most Read

Most Recent