ဘုရားရှင် ဗျာဒိတ်ထားတော်မူခဲ့သည့် ဧရာဝတီမြစ်ကမ်းနံဘေးက ဘုရားနှစ်ဆူဆီ

မန္တလေးသားဖြစ်တဲ့ ကျွန်တော်က မန္တလေးနဲ့ သိပ်မဝေးလှတဲ့ စစ်ကိုင်းမြို့ကို မကြာခဏ ရောက်ဖြစ်ပေမယ့် စစ်ကိုင်းမြို့အနီး ဧရာဝတီမြစ်ကမ်းနံဘေးမှာရှိတဲ့ ဘုရားနှစ်ဆူကို ၀င်မဖူးဖြစ်တာ အရင်ဆုံးဝန်ခံပါရစေ။ ဘုရားအတွင်း ၀င်မဖူးဖြစ်ပေမယ့် အဲဒီအနားကနေ ဖြတ်သွားတိုင်း စိတ်ထဲကနေတော့ ဘုရားကို အမြဲဖူးမြော် ဖြစ်ပါတယ်။

အဲဒီဘုရားနှစ်ဆူက အမရပူရမြို့နယ်၊ စစ်ကိုင်းမြို့ အရှေ့ဘက်မှာရှိတဲ့ ရွှေကြက်ယက် ရွှေကြက်ကျ ဘုရားနှစ်ဆူဖြစ်ပြီး ဧရာဝတီမြစ်ကမ်းနံဘေး ရတနာပုံတံတားအနီးတွင် တည်ရှိပါတယ်။

ဘုရားအနီးကဖြတ်သွားတိုင်း မ၀င်ဖြစ်ပေမယ့် ဒီတစ်ခေါက်တော့ အဲဒီဘုရားနှစ်ဆူရှိရာကို သက်သက်သွားပြီး ဘုရားဖူးရင်း ခရီးသွားဆောင်းပါးတစ်ပုဒ် အသက်သွင်းရန်အတွက် သွားရောက်ခဲ့ပါတယ်။ ခရီးသွားဆောင်းပါးအတွက်သွားတိုင်း များသောအားဖြင့် ကျွန်တော်တစ်ယောက်တည်း ဆိုင်ကယ်တစ်စီးနဲ့ သွားဖြစ်ပါတယ်။ အခုလည်း ဆိုင်ကယ်နဲ့ အနောက်မြောက်တိုင်း မြို့တော်သို့ ခရီးသည်တင်ကားတွေသွားတဲ့ ဧရာဝတီမြစ်ကမ်း မြို့ပတ်လမ်းကနေ မောင်းလာခဲ့ပါတယ်။

ဧရာဝတီမြစ်ရေ၊ စစ်ကိုင်းတောင်တန်းကြီးနဲ့ ကောင်းကင်ပြာကြီးက အရမ်းလှပတဲ့ ပန်းချီကားတစ်ချပ်သဖွယ် ဖြစ်နေတာကို လှမ်းမြင်ရပါတယ်။ အရမ်းလှပတဲ့ ရှုခင်းတွေကို ကြည့်နေလို့လည်းမရပါဘူး။ တချို့ခရီးသည် တင်ယာဉ်တွေရဲ့ စည်ကမ်းမဲ့မောင်းနှင်မှုတွေကြောင့် ဆိုင်ကယ်သတိထားပြီး မောင်းနှင်ရပါသေးတယ်။

အရင်ဦးဆုံး ရွှေကြက်ကျဘုရားကို သွားရောက်ဖူးမြော်ခဲ့ပါတယ်။ ဆိုင်ကယ်ကို အပ်နှံခဲ့ပြီး စောင်းတန်းအတိုင်း တက်လာခဲ့ပါတယ်။

အရင်ဆုံး ဘုရားရှိခိုးပြီးတာနဲ့ ဘုရားတစ်ပတ်ပတ်ခဲ့ပါတယ်။ ဘုရားပေါ်ကနေ ဧရာဝတီမြစ်ပြင်ကြီး၊ အနီးကပ်မြင်နေရတဲ့ စိမ်းစိုနေတဲ့ စစ်ကိုင်းတောင်၊ ရတနာပုံတံတားနဲ့ အင်းဝတံတားတွေကို လှမ်းမြင်ရပါတယ်။ ဧရာဝတီမြစ်ကမ်းစပ်မှာ စက်လှေသင်္ဘောတွေကလည်း အပြည့်၊ လှေဦးတိုက်ပွဲနဲ့ ရေစာ-၀ဲစာ ကျွေးပွဲကို တော်သလင်းလပြည့်ကျော် ၇ ရက် ၈ ရက်များမှာ ရွှေကြက်ကျဘုရားအခြေ ဧရာဝတီမြစ်ပြင်မှာ ကျင်းပကြပါတယ်။ လှေဦးတိုက်ပွဲနဲ့ ရေစာ-၀ဲစာကျွေးပွဲကို ရှေးယခင် အဆက်ဆက်ကျင်းပခဲ့ကြောင်း သိရပါတယ်။

ဆက်ပြီး လမ်းတစ်ဖက်ခြမ်းမှာရှိတဲ့ ရွှေကြက်ယက်ဘုရားကို ဖူးမြော်ရန်အတွက် ကားလမ်းကူးပြီး သွားခဲ့ပါတယ်။ စောင်းတန်းတစ်လျှောက်တက်ခဲ့ပြီး လိုဏ်ဂူတော်အတွင်း ရွှေရောင်တ၀င်းဝင်း တောက်ပနေတဲ့ မြတ်စွာဘုရားကို ရှိခိုးခဲ့ပါတယ်။

ဘုရားသမိုင်းအကြောင်းနဲ့ ပတ်သက်ပြီး ဘုရားဂေါပကအဖွဲ့ဝင် နာယကကြီးဖြစ်တဲ့ အဘိုးဦးအေးကို မေးမြန်းဖြစ်ခဲ့ပါတယ်။ “ဘုရားအလောင်းတော် ကြက်မင်းမောင်နှံရုပ်အစစ်က ရွှေကြက်ယက်ဘုရားမှာ ရှိတာပါ။ ကိုယ်ပွားက မောင်နှံနှစ်စုံရှိပါတယ်။ ကိုယ်ပွားတစ်စုံက ဒီရွှေကြက်ယက်မှာရှိပြီး ကျန်တစ်စုံက ရွှေကြက်ကျမှာရှိတာပါ” ဟု အဘိုးဦးအေးကိုက ရှင်းပြပါတယ်။

အဘိုးဦးအေးကိုအသက်ကို မေးကြည့်လိုက်တော့ ရယ်မောသံနဲ့ အသက် ၈၅ နှစ်ရှိ ပြီဆိုတာရယ်၊ ဘုရားသမိုင်းကြောင်းတွေကို မမောပန်းဘဲ ပြောပြနေပုံတွေကိုကြည့်ရင်း ကျွန်တော်အရမ်းအံသြမိပါတယ်။

“ရွှေကြက်ယက်-ရွှေကြက်ကျဘုရား တောင်ကုန်းပေါ်မှာ စေတီစုစုပေါင်း ၁၃၀ ကျော်ရှိတယ်” ဆိုပြီး အဘိုးက ဆက်ပြောပြပါသေးတယ်။

ရှေးမင်းအဆက်ဆက်လက်ထက်မှ ရွှေကြက်ယက်-ရွှေကြက်ကျ ဆုတောင်းပြည့်ဘုရား ကဆုန်ညောင်ရေသွန်းပွဲကို ယခုအချိန်အထိ နှစ်စဉ်မပျက် ရွှေကြက်ယက်ဘုရားရှိ ဗောဓိပင်တွင် ကဆုန်လဆန်း ၁၄ ရက်နဲ့ ၁၅ ရက်တို့တွင် ကဆုန်ညောင်ရေသွန်းပွဲတော် ကျင်းပကြောင်း သိရပါတယ်။

မြတ်စွာဘုရားသည် မန္တလေးတောင်နှင့် အင်းဝပြည် တည်ထွန်းမည့်ဒေသများကို အစဉ်အတိုင်း ခရီးဒေသစာရီ ကြွချီတော်မူလာရာ မန္တလေးတောင်စောင့်ဘီလူးမ “အဇ္ဇမုခီ” ၏ မောင်တော်များဖြစ်သည့် ငတောင်ပြုန်း၊ ငတောင်ကြဉ်း၊ ငတောင်သမန်၊ ငတောင်မြင့်စသည့် နတ်ဘီလူးလေးဦးတို့သည် ဘုရားရှင်အား ကြည်ညိုခြင်းကြီးစွာဖြစ်၍ မွန်မြတ်လှစွာသော သားပြွမ်းဆွမ်း ဆပ်ကပ်လှူဒါန်းရာ ဘုရားရှင်က ခံယူတော်မူပြီးလျှင် ပြုံးတော်မူ၏။ ထိုအကြောင်းကို အရှင်အာနန္ဒာက လျှောက်ထားရာ “ချစ်သောအာနန္ဒာ ရှေးသောအခါ ဤအရပ်၌ ကြက်မင်းမောင်နှမအစစ်ဖြစ်၍ ကြက်စားစမှတ်ပြုသည်။ ကြက်ထောင့်အရပ်၌ အိပ်စမှတ်ပြုသည်။ ငါပရိနိဗ္ဗာန်လွန်သည့်နောက် ၂၁၈ နှစ်ရောက်သောအခါ ထိုတောင် နှစ်တောင်ဝယ် ဘုန်းတန်ခိုးကြီးမားသော အသောက ဘုရင်မင်းမြတ်သည် ငါ၏ဓာတ်တော်၊ မွေတော်တို့ကို ဋ္ဌာပနာ၍ စေတီနှစ်ဆူ တည်လတ္တံ့” ဟု ဘုရားရှင်က ဗျာဒိတ်ထား တော်မူခဲ့သည်။

ရွှေကြက်ယက်-ရွှေကြက်ကျ ဘုရားနှစ်ဆူကို သီရီဓမ္မာသောကမင်းက စတင်တည်ထားခဲ့ပြီး အနော်ရထာမင်း၊ နရပတိစည်သူမင်း၊ စစ်ကိုင်းတရဖျားမိဖုရားကြီး၊ မင်းကြီးစွာစော်ကဲ၊ သာလွန်မင်းတရားကြီး၊ ဆင်ဖြူရှင်မင်းတရား၊ ဘိုးတော်မင်းတရားကြီး၏ သားတော် အိမ်ရှေ့မင်း၊ ဘကြီးတော်၊ ပုဂံမင်းမယ် တော်ဘုရားကြီးနှင့် မင်းတုန်းမင်းတရားကြီး၏ မြောက်နန်းတော်မိဖုရားစသည့် မင်းအဆက်ဆက်က ပြုပြင်မွမ်းမံခဲ့ကြောင်း သိရပါတယ်။

သက္ကရာဇ် ၆၈၈ခုနှစ်က ရွှေကြက်ယက် ဆုတောင်းပြည့်ဘုရားရင်ပြင် ရန်ကြီးအောင် ကုန်းတော်ပေါ်တွင် စစ်ကိုင်းတရဖျားမင်းကြီး၏ မိဖုရားတော်ကြီးဖွားစောက ကျောက်စာပေါ်တွင် ပျူစာဖြင့် ရေးထိုးစိုက်ထူလှူဒါန်းခဲ့သည့် ကျောက်စာတည်ရှိပါတယ်။ အဆိုပါ ကျောက်နံစာဘေးတွင် ဘာသာပြန်ဆိုရေးသားထားသည့် ကျောက်စာကိုလည်း အဘိုးပြောပြတဲ့အတွက် ကြည့်ရှုခဲ့ပါတယ်။

ကျွန်တော်သိချင်တာတွေလည်း စုံနေပြီ ဖြစ်တဲ့အတွက် ပြည့်ပြည့်စုံစုံရှင်းပြပေးသော အဘိုးဦးအေးကိုအား ကျေးဇူးတင်စကားပြောကြားပြီး မန္တလေးရွှေမြို့တော်ဆီသို့ ပြန်လာခဲ့ပါတော့တယ်။