<

မြန်မာရုပ်ရှင်ဇာတ်ကားသစ်များ တစ်ပတ်လျှင် နှစ်ကား၊ သုံးကားခန့် အပြိုင်ပြသနေရသောကြောင့် ၀င်ငွေခွဲဝေယူရသည့် အခြေအနေ ဖြစ်လာ

မြန်မာရုပ်ရှင်ဇာတ်ကားသစ်များအား တစ်ပတ်လျှင် နှစ်ကားသုံး ကားခန့်အပြိုင် ရုံတင်ပြသနေရသောကြောင့် ၀င်ငွေခွဲဝေယူရသည့် အခြေအနေဖြစ်လာပြီး ၀င်ငွေအများစု၏ ထက်ဝက်ခန့်သို့ ကျဆင်းသွားကြောင်း ရုပ်ရှင်ထုတ်လုပ်ရေးများက သုံးသပ်ခဲ့ကြသည်။ ယခင်က မြန်မာဇာတ်ကားသစ်တစ်ကားတည်းသာ အပတ်စဉ် ရုံတင်ပြသခဲ့ခြင်း ဖြစ်သော်လည်း လက်ရှိတွင် ဆင်ဆာခွင့်ပြုပြီး မြန်မာဇာတ်ကားသစ် အရေအတွက် ၂၄၀ ခန့်ရှိနေ သဖြင့် တစ်ပတ်လျှင်အနည်းဆုံး နှစ်ကားမှသုံးကားအထိ ထိပ်တိုက် ပြသရလျက်ရှိကာ ရုံအရေအတွက်မှာလည်း သိသာစွာ များပြားခြင်း မရှိသေးသဖြင့် ၀င်ငွေခွဲဝေယူရသည့် အခြေအနေသို့ ရောက်ရှိနေခြင်းဖြစ်ကြောင်း သိရသည်။

“လက်ရှိမှာဆင်ဆာခွင့်ပြုပြီးသား မြန်မာဇာတ်ကားအရေအတွက်က ၂၄၀ လောက် ရှိပါတယ်။ ဒါကြောင့် ဆက်တိုက်ပြသခွင့်ရဖို့ကိုပဲ ထုတ်လုပ်သူတွေကလည်း ကြိုးစားနေရတယ်။ ရုံရှင်ကားရှင် ညှိနှိုင်းစနစ်ဖြစ်တဲ့အတွက် ရုံရှင်တွေကလည်း စိတ်ကြိုက်ဖြစ်တဲ့ကားကိုပဲ ရွေးတင်တယ်။ ဒါကြောင့်ဇာတ်ကားထုတ်လုပ်သူတွေက တော်တော်လေး ခက်ခဲပါတယ်။ ကိုယ့်ကားကိုပြသပေးမှလည်း ကိုယ်စိုက်ထုတ်ထားတဲ့ ၀င်ငွေပြန်ရမှာလေ။ ဘယ်လောက်ပဲ ဇာတ်ကားကောင်းအောင် အားထုတ်ထားပေမယ့် ဇာတ်ကားသစ်နှစ်ကားသုံးကား အပြိုင်တင်နေတာဖြစ်လို့ ပရိသတ်ပြန့်ကျဲသွားပြီး ၀င်ငွေကခွဲဝေယူရတဲ့ အနေအထားဖြစ်လာတာပါ။ ဇာတ်ကားများတာကြောင့် ဒီလိုအပြိုင်ပြသမှလည်း ဇာတ်ကားအားလုံး ပြသခွင့်ရမှာဆိုတော့ ရုံအရေအတွက် ပိုများလာမှပဲ ရုပ်ရှင်လောကအတွက် ပိုပြီးအဆင်ပြေလာမယ် ထင်ပါတယ်” ဟု ထုတ်လုပ်သူတစ်ဦးက သုံးသပ်ခဲ့သည်။

လက်ရှိတွင် ဆင်ဆာခွင့်ပြုပြီး ဇာတ်ကားများအနေဖြင့် ပြသခွင့်ရရှိရန် ရုံပိုင်ရှင်များနှင့် ညှိနှိုင်းကာ ပြသနေရခြင်းဖြစ်ပြီး ရုံအုပ်စုများခွဲ၍ ပြသနေရခြင်းဖြစ်သည်။ ရုံအုပ်စုများ အနေဖြင့် မင်္ဂလာရုပ်ရှင်ရုံအုပ်စု၊ JCGV ရုပ်ရှင်ရုံအုပ်စု၊ Mega Ace ရုပ်ရှင်ရုံအုပ်စု၊ Paradiso နှင့် အခြားသော ရုပ်ရှင်ရုံများခွဲခြား ပြသနေရခြင်းဖြစ်သည်။ ဇာတ်ကားသစ်တစ်ကားမှာ ပြသခွင့်ရပြီးချိန်တွင် ပထမပတ်၏ ၀င်ငွေပေါ် မူတည်ကာ ဒုတိယပတ်၊ တတိယပတ်စသဖြင့် ထပ်မံပြသခွင့်ရရှိခြင်းလည်းဖြစ်ပြီး ပရိသတ်စိတ်ဝင်စားမှု လွန်စွာနည်းပါးသည့်ဇာတ်ကားအချို့မှာ ရက်သတ္တပတ်တစ်ပတ်သာ ပြသခွင့်ရသည်များလည်းရှိကြောင်း သိရသည်။

July 9, 2018














Copy Protected by Chetan's WP-Copyprotect.