အမေရိကန်သမ္မတဟောင်း ဘာရက်အိုဘားမားနှင့် ဇနီးသည်မီရှယ်အိုဘားမားတို့က အွန်လိုင်းရုပ်သံ Netflix အတွက် ဇာတ်ကားနှင့် ရုပ်သံဇာတ်လမ်းတွဲများ ထုတ်လုပ်ရန် စာချုပ်ချုပ်ဆိုခဲ့သည်ဟု Netflix က မေ  ၂၁ ရက်တွင် ထုတ်ပြန်ခဲ့သည်။

အိုဘားမားဇနီးမောင်နှံသည် Higher Ground Productions ကို ထူထောင်ခဲ့ပြီး Netflix  အတွက် ဇာတ်ညွှန်းများ၊ ဟောပြောထုတ်လွှင့်ချက်များ၊ မှတ်တမ်းရုပ်ရှင်များနှင့် ဇာတ်ကားများ ထုတ်လုပ်ပေးမည်ဟု Netflix က ဆိုသည်။ အိုဘားမား ဇနီးမောင်နှံသည် Twitter နှင့် Instagram တွင် စုစုပေါင်း Follower သန်း ၁၅၀ ရရှိထားသည်။

အိုဘားမား၏ သမ္မတသက်တမ်းအတွင်း ထင်ရှားခဲ့သည့် ကျန်းမာရေးစောင့်ရှောက်မှု၊ လူဝင်မှုကြီးကြပ်ရေး၊ နိုင်ငံခြားရေးရာမူဝါဒ နှင့် ရာသီဥတုပြောင်းလဲမှု တိုက်ဖျက်ရေးကဲ့သို့သော အကြောင်းအရာများကို အွန်လိုင်း ရုပ်သံဝန်ဆောင်မှုတွင် ဦးဆောင်နေသော Netflix ၌ တင်ဆက်မည့် အလားအလာရှိသည်ဟု နယူးယောက်တိုင်းမ်က ဖော်ပြခဲ့သည်။ မီရှယ်အိုဘားမားသည်လည်း အာဟာရ အကြောင်းနှင့် သမ္မတကတော်အဖြစ် အိမ်ဖြူတော်တွင် ရပ်တည်ခဲ့ရသည့် အကြောင်းအရာများကိုလည်း တင်ဆက်နိုင်ခြေရှိသည်ဟုလည်း ဖော်ပြခဲ့သည်။ မီရှယ်အိုဘားမားသည် ကိုယ်တွေ့မှတ်တမ်းစာအုပ်တစ်အုပ်ကို နိုဝင်ဘာ ၁၃ ရက်တွင် ဖြန့်ချိရန် စီစဉ်ထားသည်။

အိုဘားမားသည် သမ္မတဒေါ်နယ်ထရန့် (သို့မဟုတ်) အခြားကွန်ဆာဗေးတစ်များကို တိုက်ရိုက်တုံ့ပြန်ရန်အတွက် Netflix ရုပ်သံအစီအစဉ်များကိုအသုံးချရန် အစီအစဉ်မရှိဘဲ စိတ်ဓာတ်မြှင့်တင်ရေးဇာတ်လမ်းများကို ပြသရန်ရည်ရွယ်ကြောင်း နယူးယောက်တိုင်မ်းက ဖော်ပြခဲ့သည်။

အွန်လိုင်းရုပ်သံတွင် ဦးဆောင်နေပြီး လစဉ်ကြေးဖြင့် ကြည့်ရှုသူ ၁၂၅ သန်းရှိသည့် Netflix သည် ရုပ်ရှင်နှင့် ရုပ်သံထူးချွန်ဆုပေးပွဲများတွင် ဆုများသိမ်းပိုက်ခဲ့ခြင်းက ရုပ်သံနှင့် ရုပ်ရှင်လုပ်ငန်းများကို လှုပ်ခတ်စေခဲ့သည်။ ၂၀၁၈ ခုနှစ်တွင် ရုပ်သံအစီအစဉ်နှင့် ထုတ်လုပ်မှုများအတွက် ဒေါ်လာ ၇ ဒသမ ၅ ဘီလျံနှင့် ရှစ်ဘီလျံအတွင်း အသုံးပြုမည်ဟု မျှော်မှန်းထားကြောင်း Netflix က ထုတ်ပြန်ခဲ့သည်။