ဒစ္စနေ၏ စူပါဟီးရိုးဇာတ်ကား Avengers: Infinity War သည် ဖြန့်ချိပြီး ၁၁ ရက်အတွင်း ကမ္ဘာတစ်ဝန်း လက်မှတ်ရောင်းချမှုဝင်ငွေ ဒေါ်လာ တစ်ဘီလျံအထိ စံချိန်တင်ရရှိခဲ့သည်ဟု ဒစ္စနေစတူဒီယိုက မေ ၅ ရက်တွင် ထုတ်ပြန်ခဲ့သည်။
Iron Man ၊ Spider Man ၊ Black Panther ၊ Thor ၊ Guardians of the Galaxy အပါအဝင် စူပါဟီးရိုးဇာတ်ကောင် ၂၀ ကျော် ပါဝင်သည့် ယင်းဇာတ်ကားသည် ၂၀၁၅ ခုနှစ်က ဖြန့်ချိခဲ့သည့် ှ Star Wars: The Force Awakens ဇာတ်ကား ဝင်ငွေ ဒေါ်လာတစ်ဘီလျံရရှိသည့် ရက်ထက် တစ်ရက် စောပြီး ဒေါ်လာ တစ်ဘီလျံ စံချိန်တင်ရရှိခဲ့ခြင်းဖြစ်သည်။ Avengers: Infinity War သည် မာဗယ်စတူဒီယိုအတွက် ဒေါ်လာတစ်ဘီလျံ ရရှိသည့် ဆဋ္ဌမမြောက် ဇာတ်ကားနှင့် ဝေါဒစ္စနေအတွက် ဒေါ်လာ တစ်ဘီလျံ ရရှိသည့် ၁၇ ခုမြောက် ဇာတ်ကားဖြစ်သည်။ ယင်းဝင်ငွေစာရင်းတွင် ကမ္ဘာ့ဒုတိယအကြီးဆုံး ရုပ်ရှင်ဈေးကွက်ဖြစ်သော တရုတ်နိုင်ငံမှရရှိသည့် ဝင်ငွေ မပါဝင်သေးပေ။ Avengers: Infinity War ဇာတ်ကားကို တရုတ်တွင် မေ ၁၁ ရက်မှသာ ဖြန့်ချိမည်ဖြစ်သည်။ ယင်းဇာတ်ကားသည် ပြီးခဲ့သည့် သီတင်းပတ်တွင်လည်း ပွဲဦးထွက် ဝင်ငွေအများဆုံးရရှိသည့် ဇာတ်ကားအဖြစ် စံချိန်တင်ခဲ့သည်။ Avengers: Infinity War ဇာတ်ကားသည် ဖြန့်ချိပြီး ၁၁ ရက် အတွင်း Wonder Woman ၊ Batman v Superman: Dawn of Justice၊ Guardians of the Galaxy၊ X-Men: Days of Future Past နှင့် Justice League ဇာတ်ကားများ၏ ဝင်ငွေ ကို ကျော်တက်ခဲ့သည်။ သို့သော် Avengers: Infinity War သည် Black Panther ဇာတ်ကား၏ ဝင်ငွေကို မီရန် အလှမ်းဝေးနေသေးသည်။
အင်အားကြီးသည့်ဂြိုဟ်သား Thanos က Infinity Stones ဟု ခေါ်ဆိုသည့် စွမ်းအင်ကျောက်တုံး ခြောက်တုံးကိုစုစည်းပြီး ကမ္ဘာကို ဖျက်ဆီးရန်ကြံရွယ်မှုအား စူပါဟီးရိုးများက စုပေါင်းဟန့်တားသည့်အကြောင်း ဒါရိုက်တာအန်ထိုနီရပ်စ်ဆိုနှင့် ဂျိုးရပ်စ်ဆိုတို့ ရိုက်ကူး ထားသည့် ယင်းဇာတ်ကားတွင် ရောဘတ်ဒေါင်းနင်းဂျူနီယာ၊ ဘင်နီဒက်ကမ်ဘာဘာ့ချ်၊ စကားလက်ဂျိုဟန်ဆင်၊ ခရစ်ဟမ်းစ်ဝါ့သ်၊ မက်ရက်ဖ်ဖလို၊ ခရစ်အီဗန်၊ တွမ်ဟော်လန်၊ဇိုးဆယ်ဒါနာ၊ အလိဇဘတ်အိုလ်ဆန်၊ အန်တိုနီမက်ကီ၊ပေါလ်ဘတ်တနီ၊ ခရစ်ပရတ်တို့က အဓိက ဇာတ်ကောင်များအဖြစ် ပါဝင်ထားသည်။