မြန်မာနိုင်ငံတစ်ဝန်းမှ ကာတွန်းဆရာများ၏လက်ရာများအား ဖိတ်ခေါ်ထားကာ ပါဝင်ပြသစေမည့် မန္တလေးလမ်းလျှောက် သြင်္ကန်ရေစိုခံ ကာတွန်းပြပွဲပြုလုပ်မည်ဖြစ်ကြောင်း သိရသည်။ ရေစိုခံကာတွန်းပြပွဲကို သြင်္ကန်ပွဲတော်ကျင်းပရာ ဧပြီ ၁၃ ရက်မှ ၁၇  ရက်အထိပြုလုပ်မည်ဖြစ်ပြီး ကာတွန်းစတုဒိသာအဖြစ် ပါဝင်ပြသရန် ဖိတ်ခေါ်ခဲ့ခြင်း ဖြစ်သည်။ ရေစိုခံကာတွန်းပြပွဲအတွက် ပေးပို့လာသည့်ကာတွန်း လက်ရာများအနက် ကာတွန်းဆရာ ဦးမောင်မောင်၊ ဆရာဦးငွေကြည်တို့ ဦးဆောင်ကာ ပြန်လည်ရွေးချယ် ပြသမည်ဖြစ်ကြောင်း သိရသည်။

ရေစိုခံကာတွန်းပြပွဲသို့ပေးပို့လာသည့် ကာတွန်းလက်ရာများအား ၁.၅x၂ ပေအရွယ် Multiboard ပေါ်တွင်ရိုက်နှိပ်ပြသမည်ဖြစ်ကာ ကာတွန်းပညာရှင်တစ်ဦးလျှင် ကာတွန်းလက်ရာ သုံးပုံစီပေးပို့ရန် တောင်းခံထားခြင်းဖြစ်သည်။ မတ် ၂၀ ရက် နောက်ဆုံးထား ပေးပို့ရန် ဖိတ်ခေါ်ခဲ့ခြင်းဖြစ်ပြီး မြန်မာနိုင်ငံတစ်ဝန်းမှ ကာတွန်းပညာရှင်များက မြန်မာနိုင်ငံကာတွန်းဆရာများအသင်းသို့ ပေးပို့ခဲ့ခြင်းဖြစ်ကြောင်း သိရသည်။ ပေးပို့လာသည့် ကာတွန်းလက်ရာများထဲမှ ဟာသမြောက်ပြီး ရယ်ရသည့်ကာတွန်းများ၊ ဝေဖန် ထောက်ပြထားခြင်းဖြစ်သော်လည်း ဆဲဆိုသကဲ့သို့မဟုတ်ဘဲ သြင်္ကန်သံချပ်များကဲ့သို့သော အရသာရှိသည့် ကာတွန်းလက်ရာများအား စိစစ်ရွေးချယ်မည်ဖြစ်ပြီး စိစစ်ရွေးချယ်ရေးအဖွဲ့ကာတွန်း ပညာရှင်ငါးဦးကို ဖွဲ့စည်းရွေးချယ်ခဲ့ခြင်းဖြစ်သည်။                               မန္တလေးရေစိုခံကာတွန်းပြပွဲမှာ ကာတွန်းစတုဒိသာအဖြစ် ရည်ရွယ်ပြုလုပ်မည် ဖြစ်သဖြင့် ဉာဏ်ပူဇော်ခ ချီးမြှင့်နိုင်မည် မဟုတ်ဘဲ သြင်္ကန်ကာလ ကာတွန်းစတုဒိသာ အလှူအဖြစ် ပါဝင်လက်စွမ်းပြရန် ဖိတ်ခေါ်ခဲ့ခြင်းဖြစ်ကြောင်းလည်း သိရသည်။ လက်ရှိအချိန်အထိ မြန်မာနိုင်ငံကာတွန်းဆရာများအသင်းသို့ ကာတွန်းပညာရှင် ၁၀၀ ကျော်၏ ကာတွန်းလက်ရာများအား ပေးပို့ထားပြီး ကွယ်လွန်ခဲ့ပြီး ဖြစ်သည့် ကာတွန်းပညာရှင်ကြီးများ၏ ကာတွန်းလက်ရာအချို့ကိုလည်း အမှတ်တရအဖြစ် ထည့်သွင်းပြသမည်ဖြစ်သည်။ ယခုပြပွဲမှာပထမဆုံးအကြိမ်ပြုလုပ်ခြင်းဖြစ်သည်။