ရောင်းရသမျှ ငွေကြေးများကို မြန်မာနိုင်ငံရှိ ကျန်းမာရေးစောင့်ရှောက်မှု လိုအပ်သည့်နေရာများသို့ လှူဒါန်းသွားမည့် မြန်မာပန်းချီအနုပညာရှင် ၁၈ ဦး၏ ပန်းချီပြပွဲကို နယူးယောက်မြို့၊ Art at Leeds ပြခန်းတွင် သြဂုတ် ၁၂ ရက်၌ ပြုလုပ်နေကြောင်း သိရသည်။
အဆိုပါ အနုပညာပြပွဲကို The Parasol Project ဟု အမည်ပေးထားပြီး မြန်မာ့ယဉ်ကျေးမှု၊ ဓလေ့၊ ရိုးရာပုံစံများနှင့် ခေတ်ပြိုင်ဟန်တို့ကို ပေါင်းစပ်ထားသည့် အနုပညာလက်ရာများကို ပြသထားပြီး ပုသိမ်ထီးပေါ်တွင် ရေးဆွဲထားသည့် ပန်းချီကားများလည်း ပါဝင်ကြောင်း သိရသည်။ ပန်းချီပြပွဲတွင် ပန်းချီအောင်လင်း၊ ပန်းချီအောင်သစ်၊ အောင်သူရ၊ ခရေမြင့်သန်း၊ ကေကျော်၊ ကောင်းဝေ၊ မင်းမောင်မောင်ရွှေ၊ မိုးကျော်သန့်၊ မျိုးကျော်၊ နေအောင်ရှု၊ ဘုန်းမြင့်သူ၊ ရွှေကျော်လင်း၊ တင်တင်ခိုင်၊ တြိဂံထွန်းနိုင်၊ ထွန်းအောင်၊ ရီရီခင်၊ ဇာခြည် စသည့် ပန်းချီအနုပညာရှင် ၁၈ ဦး၏ ပန်းချီလက်ရာများ ပြသထားကြောင်း သိရသည်။ အဆိုပါ ပြပွဲတွင် ခေတ်ပြိုင်အနုပညာလက်ရာများနှင့်အတူ မြန်မာ့ဓလေ့ပုံရိပ်တစ်ခုဖြစ်သည့် ပုသိမ်ထီးပေါ်တွင် ဘုရားပုံတော်များ၊ အမျိုးသမီးတို့၏ ပုံတူများ၊ ပန်းများ၊ ကနုတ်များ စသဖြင့် ပုံဖော်ရေးဆွဲထားသည့် ပန်းချီများလည်း ပါဝင်သည်။
အဆိုပါပြပွဲတွင် ရောင်းချရသည့် ပန်းချီကားရောင်းရငွေများ၏ ၁၀၀ ရာခိုင်နှုန်းကို မြန်မာနိုင်ငံ၏ ဆင်းရဲနွမ်းပါးသောနေရာများတွင် ကျန်းမာရေးစောင့်ရှောက်မှုပေးနေသည့် Better Burmese Healthcare (BBHC) သို့ ချိတ်ဆက် လှူဒါန်းသွားမည် ဖြစ်ကြောင်း သိရသည်။ Better Burmese Healthcare (BBHC) သည် အခမဲ့ကျန်းမာရေး စောင့်ရှောက်မှုပေးနေသည့်အဖွဲ့ဖြစ်ပြီး လစဉ်ကျန်းမာရေးစောင့်ရှောက်မှုများ အပါအဝင် ဆေးကုသမှုများ ပြုလုပ်ပေးနေသည့် အဖွဲ့အစည်းဖြစ်သည်။ Better Burmese Healthcare (BBHC) အနေဖြင့်လည်း ရန်ပုံငွေရှာဖွေသည့်အနေဖြင့် ပြုလုပ်သည့် ပုသိမ်ထီးပန်းချီအနုပညာပြပွဲကို ရန်ကုန်မြို့တွင် ပြုလုပ်ခဲ့သည်။
