(၆၈) ကြိမ်မြောက် ဘာလင်ရုပ်ရှင်ပွဲတော်၏ ရွှေဝက်ဝံဆုရွေးချယ်ရေး ဂျူရီအဖွဲ့ဝင်များ

ဝိန်းစတိန်း၏ လိင်ပိုင်းဆိုင်ရာ အရှုပ်တော်ပုံ ပေါ်ပေါက်ခဲ့ပြီးနောက် ယခုလတွင် ကျင်းပမည့် ဘာလင်ရုပ်ရှင်ပွဲတော်တွင် ရုပ်ရှင်နယ်ပယ်အတွင်း လိင်ပိုင်းဆိုင်ရာ စော်ကားမှုများကို မီးမောင်းထိုးပြသမည်ဟု ဘာလင်ရုပ်ရှင်ပွဲတော်၏ ဒါရိုက်တာ Dieter Kosslick က ဖေဖော်ဝါရီ ၆ ရက်တွင် ပြောကြားခဲ့သည်။

ကျယ်ကျယ်ပြန့်ပြန့်ဖြစ်နေသော ခွဲခြားဆက်ဆံမှုနှင့် လိင်ပိုင်းဆိုင်ရာ စော်ကားမှုနှင့် ပတ်သက်ပြီး ကာလကြာပြီဖြစ်သော ဆွေးနွေးမှုတစ်ခုကို (၆၈) ကြိမ်မြောက် ဘာလင်ရုပ်ရှင်ပွဲတော်တွင် ဖော်ဆောင်ပေးသွားမည်ဟု Kosslick က ပြောကြားခဲ့သည်။

အနုပညာနယ်ပယ်တွင် လိင်ပိုင်းဆိုင်ရာ စော်ကားမှုများကို နှိမ်နင်းရေး၊ အမျိုးသမီး ဦးဆောင်သည့် ဇာတ်ကားများအတွက် ငွေကြေးထောက်ပံ့ ထုတ်လုပ်ပေးရေးနှင့် ရုပ်ရှင်ရုပ်ရိုက်ကူးထုတ်လုပ်ရေး၏ နည်းပညာဆိုင်ရာ နယ်ပယ်တွင် အမျိုးသမီးများ ပိုမိုပါဝင်ခွင့်ရရေးတို့ကိုလည်း အဖွဲ့လိုက် ဆွေးနွေးကြမည်ဟု ဆိုသည်။

ဥရောပ၏ ထိပ်တန်းရုပ်ရှင်ပွဲတော်များထဲတွင် ကိန်းနှင့် ဗင်းနစ်တို့နှင့်တန်းတူဖြစ်သည့် ဘာလင်ရုပ်ရှင်ပွဲတော်သည် နိုင်ငံရေးဆိုင်ရာ အရေးစိုက်မှု အများဆုံးဟု ယေဘုယျအားဖြင့် ယူဆထားသည်။

(၆၈) ကြိမ်မြောက် ဘာလင်ရုပ်ရှင်ပွဲတော်ကို ဖေဖော်ဝါရီ ၁၅ ရက်မှ ၂၅ ရက်အထိ ကျင်းပမည်ဖြစ်ပြီး ဇာတ်ကားသစ် ၂၄ ကား အပါအဝင် စုစုပေါင်းဇာတ်ကား ၄၀၀ ကျော် ပြသသွားမည်ဖြစ်သည်။ ယခုနှစ်တွင် ရွှေဝက်ဝံဆုရွေးချယ်မည့် ဂျူရီအဖွဲ့ကို ဂျာမန်ဒါရိုက်တာ Tom Tykwer က ဦးဆောင်မည် ဖြစ်သည်။ ယင်းဆုအတွက် ဝင်ရောက်ယှဉ်ပြိုင်မည့် ဇာတ်ကား ၁၉ ကားတွင် အမျိုးသမီး ဒါရိုက်တာများရိုက်ကူးသည့် ဇာတ်ကားလေးကား ပါဝင်သည်ဟု သိရသည်။

လိင်ပိုင်းဆိုင်ရာ စော်ကားမှုစွဲချက်များနှင့် ရင်ဆိုင်နေရသည့် ထုတ်လုပ်ရေးနှင့် ဆက်စပ်သည့် ဒါရိုက်တာ၊ ဇာတ်ညွှန်းရေးဆရာနှင့် သရုပ်ဆောင်များ ပါဝင်သည့်ဇာတ်ကားများကို စည်းကမ်းနှင့် မညီညွတ်မှုကြောင့် ရုပ်ရှင်ပွဲတော်တွင် ပါဝင်ခွင့် ပိတ်ပင်ခဲ့သည်။

ယခုနှစ် ရုပ်ရှင်ပွဲတော်ကို ဒါရိုက်တာ ဝက်စ်အန်ဒါဆန်၏ အန်နီမေးရှင်းဇာတ် Isle of Dogs ဖြင့် ဖွင့်လှစ်မည်ဖြစ်သည်။