ပြင်သစ် ကိန်းစ်ရုပ်ရှင်ပွဲတော်သို့ မြန်မာဒါရိုက်တာ ၀ီရ တက်ရောက်လျက်ရှိပြီး ရုပ်ရှင်ဇာတ်ကား ဖွံ့ဖြိုးတိုးတက်မှုဆိုင်ရာ ဆွေးနွေးသည့် အစီအစဉ်တွင် One Summer Day ဇာတ်ကားစီမံချက် ပါဝင်ဆွေးနွေးမည်

One Summer Day ဇာတ်ကား၏ ပိုစတာအား တွေ့ရစဉ်

မေလ ၁၇ ရက်တွင်ပြင်သစ်နိုင်ငံ၌ စတင်ကျင်းပသည့် ကိန်းစ်ရုပ်ရှင်ပွဲတော်သို့ မြန်မာလူငယ် ဒါရိုက်တာဝီရ တက်ရောက်လျက်ရှိပြီး ကိန်းစ်ရုပ်ရှင်ပွဲတော်၏ အစိတ်အပိုင်းတစ်ခု ဖြစ်သည့် ရုပ်ရှင်ဇာတ်ကား ဖွံ့ဖြိုးတိုးတက်မှုဆိုင်ရာ ဆွေးနွေးသည့် အစီအစဉ်တွင် ဒါရိုက်တာဝီရ ရိုက်ကူးမည့် One Summer Day ဇာတ်ကားစီမံချက် ပါဝင်ဆွေးနွေးမည်ဖြစ်ကြောင်းသိရသည်။ ကိန်းစ်ရုပ်ရှင်ပွဲတော်ကို မေ ၁၇ ရက်မှ ၂၈ ရက်အထိ ကျင်းပခြင်းဖြစ်ပြီး ကမ္ဘာ့နိုင်ငံ အများအပြားမှ အမျိုးအစားစုံ ရုပ်ရှင်ဇာတ်ကားများအား ရွေးချယ်ပြသခြင်း၊ ကမ္ဘာ့နိုင်ငံအများအပြားမှ ပေးပို့လာသည့် ရုပ်ရှင်ဇာတ်ကား စီမံချက်များထဲမှ အကောင်းဆုံးဇာတ်ကား စီမံချက် ၁၀ ခုအား ရွေးချယ်ကာ ရုပ်ရှင်ဇာတ်ကား ဖွံ့ဖြိုးတိုးတက်မှုဆိုင်ရာ ဆွေး နွေးခြင်းအစီအစဉ်အား နိုင်ငံတကာမှရုပ်ရှင် ကျွမ်းကျင်သူများနှင့် ပြုလုပ်စေခြင်းများ ပါဝင်မည်ဖြစ်ကြောင်းသိရသည်။

“ကိန်းစ်ရုပ်ရှင်ပွဲတော်ရဲ့အစီအစဉ်တစ်ခုမှာ ကျွန်တော့်ဇာတ်ကား စီမံချက်က ပါဝင်ခွင့်ရမှာဖြစ်လို့ ပြောမပြနိုင်လောက်အောင် ၀မ်းသာပျော်ရွှင် ဂုဏ်ယူမိပါတယ်။ ရုပ်ရှင်ဒါရိုက်တာ တစ်ယောက်ဖြစ်လာတဲ့အချိန်မှာ တစ်နေ့ကျရင် မြန်မာနိုင်ငံက ရုပ်ရှင်ဇာတ်ကားတွေ ကိန်းစ်မှာပြနိုင်ရမယ်ဆိုတဲ့ အိပ်မက်တွေ ရှိခဲ့ဖူးပါတယ်။ ဒါပေမယ့် ကိန်းစ်ဆိုတာ ကျွန်တော်တို့အတွက် အဝေးကြီးပါပဲဆိုပြီး အိပ်မက်မက်ရုံပဲ ရှိခဲ့ပါတယ်။ ဒီနေ့တော့ အိပ်မက်တွေကို အကောင်အထည်ဖော်ဖို့ လမ်းကြောင်းပေါ်ကို ရောက်လာပါပြီ။ အိပ်မက်တွေ တကယ်ဖြစ်လာဖို့ ဆက်လက် အကောင်အထည်ဖော်ပြီး ကြိုးစားသွားပါမယ်။ အခုလိုငယ်စဉ်က အရမ်းတက်ရောက်ချင်ခဲ့တဲ့ ကိန်းစ်ရုပ်ရှင်ပွဲတော်ကို ရောက်ရှိခွင့်ရနေတာက မယုံနိုင်အောင် ၀မ်းသာရသလို အိပ်မက်တစ်ခုလိုပါပဲ” ဟု ဒါရိုက်တာဝီရက ဆိုသည်။

ဒါရိုက်တာဝီရ ရိုက်ကူးမည့် 'One Summer Day' ဇာတ်ကားစီမံချက်အား ပါဝင်ဆွေးနွေးနိုင်မည့် အဆိုပါအစီအစဉ်တွင် ရုပ်ရှင်ဇာတ်ကားများအား နိုင်ငံတကာအဆင့်မီ ရိုက်ကူးဖြန့်ချိနိုင်ရန်အတွက် စီစဉ်ထုတ်လုပ်သူနှင့် ဒါရိုက်တာတို့ကို ကိန်းစ်ရုပ်ရှင်ပွဲတော်မှ ဖိတ်ခေါ်ပြီး နိုင်ငံတကာမှ ပညာရှင်များနှင့် ဆွေးနွေးတိုင်ပင်စေ၍ Project Development လုပ်စေသည့် အစီအစဉ်တစ်ခုဖြစ်ကြောင်း သိရသည်။

ကိန်းစ်ရုပ်ရှင်ပွဲတော်၏ ဇာတ်ကားဖွံ့ဖြိုးတိုးတက်မှုဆိုင်ရာ ဆွေးနွေးသည့် အစီအစဉ်အတွက် ကမ္ဘာ့နိုင်ငံအများအပြားမှ ဇာတ်ကားများစွာ ပေးပို့သည့်အနက် ဇာတ်ကား ၁၀ ကားကိုသာ ရွေးချယ်ခြင်းဖြစ်ပြီး မြန်မာနိုင်ငံမှ ဒါရိုက်တာဝီရ၏ 'One Summer Day' ဇာတ်ကား စီမံချက်က ရွေးချယ်ခံရခြင်းဖြစ်သည်။ အဆိုပါအစီအစဉ်တွင် နိုင်ငံတကာမှ ရုပ်ရှင်ကျွမ်းကျင်သူများ လာရောက်ကာ ဇာတ်ညွှန်း၊ ထုတ်လုပ်မှုအပိုင်း၊ နိုင်ငံတကာဈေးကွက်ဖြန့်ချိမှု နည်းစနစ် စသည်များအား ဆွေးနွေးတိုင်ပင် သင်ကြားပေးမည်ဖြစ်ကြောင်း သိရသည်။ ရွေးချယ်ခံထားရသည့် 'One Summer Day' ဇာတ်ကား၏ ဇာတ်လမ်းကို ကိုအောင်မင်းက ရေးသားထားခြင်းဖြစ်ပြီး ဒါရိုက်တာဝီရက ရိုက်ကူးမည်ဖြစ်ကြောင်း သိရသည်။
ဒါရိုက်တာဝီရသည် မှတ်တမ်းရုပ်ရှင် နှင့် ဇာတ်ကားတိုများ ရိုက်ကူးသည့် ဒါရိုက်တာတစ်ဦးဖြစ်ကာ နိုင်ငံတကာရုပ်ရှင်ကျောင်းများ၊ ရုပ်ရှင်ဆွေးနွေးပွဲများ၌ တက်ရောက်လေ့လာ သင်ယူခဲ့ဖူးပြီးသူတစ်ဦး ဖြစ်ကြောင်း သိရသည်။

Writer: 
လင်းလင်းခိုင်