ကာဒစ်ရှန် မိသားစုဝင်တစ်ဦးဖြစ်သည့် မော်ဒယ်ကင်ဒဲဂျန်နာက ဝင်ငွေ ဒေါ်လာ ၂၂ သန်းဖြင့် Forbes မဂ္ဂဇင်း၏ ဝင်ငွေအများဆုံးရ မော်ဒယ်စာရင်းတွင် ဦးဆောင်ခဲ့သည်။
အသက် ၂၂ နှစ်အရွယ်ရှိ ဂျန်နာသည် ခရစ်ဆီတေဂျန်၊ အဒရီယာနာလီမာနှင့် ဂီဂီဟာဒစ်ကို ကျော်လွန်ပြီး နံပါတ် ၁ နေရာတွင် ဦးဆောင်ခဲ့ခြင်းဖြစ်သည်။ ဂျန်နာ၏ ဝင်ငွေသည် ပြီးခဲ့သည့်နှစ် ဝင်ငွေ ဒေါ်လာ ၁၀ သန်းထက် နှစ်ဆ ကျော် မြင့်တက်လာခဲ့သည်ဟု Forbes က ဖော်ပြခဲ့သည်။
ဂျန်နာသည် ယခုနှစ်တွင် Alexander Wang ၊ Fendi ၊ Chanel၊ Marc Jacobs နှင့် အခြား ဖက်ရှင်အမှတ်တံဆိပ်များ၏ ဖက်ရှင်ပြပွဲများတွင် ပါဝင်ခဲ့သည့်အပြင် Estee Lauder နှင့် Adudas အတွက် ကြော်ငြာရိုက်ကူးမှုများတွင် ပါဝင်ခဲ့သည်။ ထို့ပြင် Keeping Up with the Kardashians ရုပ်သံအစီအစဉ်၊ ညီမဖြစ်သူ ခိုင်လီဂျန်နာနှင့် တွဲဖက်လုပ်ကိုင်သည့် Kendall + Kylie တံဆိပ် အဝတ်အထည်တို့မှလည်း ဝင်ငွေရရှိခဲ့သည်။
အသက် ၃၇ နှစ်အရွယ်ရှိ ဘရာဇီးမော်ဒယ် Gisele ၌ Bundchen သည် ပြီးခဲ့သည့်နှစ်တွင် ဖက်ရှင်ရှိုးလျှောက်မှုမှ အနားယူခဲ့သော်လည်း ဒေါ်လာ ၁၇ ဒသမ ၅ သန်းဖြင့် အဆိုပါစာရင်း၏ဒုတိယနေရာတွင် ဖော်ပြခံခဲ့ရသည်။ BUndchen သည် သည် Carolina Herrera ရေမွှေး၊ Arezzo ဖိနပ်နှင့် မွေးရပ်မြေဘရာဇီးတွင် Vivara လက်ဝတ်ရတနာ အတွက် ကြော်ငြာရိုက်ကူးခဲ့ရသော်လည်း ယခင်နှစ်က ဝင်ငွေထက် ၄၃ ရာခိုင်နှုန်း ကျဆင်းခဲ့သည်ဟု သိရသည်။
အမေရိကန်မော်ဒယ် ခရစ်ဆီတေဂျန်သည် ဒေါ်လာ ၁၃ ဒသမ ၅ သန်းဖြင့် Forbes ၏ ဝင်ငွေအများဆုံးရ မော်ဒယ်စာရင်းတွင် ပထမဆုံးအကြိမ် ပါဝင်ခဲ့သည်။ အသက် ၃၁ နှစ်အရွယ်ရှိ ခရစ်ဆီတေဂျန်သည် Vita CoCo နှင့် Smirnoff အစရှိသည့် ဖျော်ရည်နှင့် ယမကာရိုက်ကူးမှုများမှ ဝင်ငွေရရှိခဲ့ခြင်းဖြစ်သည်။
ယခုနှစ် Forbes မဂ္ဂဇင်း၏ ဝင်ငွေအများဆုံးရ မော်ဒယ်ထိပ်တန်း ၁၀ စာရင်းတွင် အမေရိကန်မော်ဒယ် plus-sized မော်ဒယ် အက်ရှ်လေဂရေဟမ်က နံပါတ် ၁၀ နေရာတွင် ပါဝင်ခဲ့သည်။ ဝင်ငွေအများဆုံးရ မော်ဒယ် ၁၀ ဦးသည် ၂၀၁၆ ခုနှစ် ဇွန် ၁ ရက်မှ ၂၀၁၇ ခုနှစ် ဇွန် ၁ ရက်အတွင်း ဝင်ငွေစုစုပေါင်း ဒေါ်လာ ၁၀၉ ဒသမ ၅ သန်း ရရှိခဲ့သည်ဟု သိရသည်။
