လွန်ခဲ့သည့် သီတင်းလေးပတ်က စတင်ပြသခဲ့သော ကြောက်မက်ဖွယ်ရာရုပ်ရှင် It သည် ဟောလိုးဝင်း နီးကပ်လာပြီဖြစ်သည့်အတွက် မြောက်အမေရိက၏ဝင်ငွေအကောင်းဆုံး ရုပ်ရှင်စာရင်း၏ ထိပ်ဆုံးသို့ပြန်လည် ရောက်ရှိလာခဲ့သည်။ It သည် စာရင်း၏ ဒုတိယနေရာသို့ သီတင်းတစ်ပတ်ကြာ ဆင်းသွားပြီးမှ ယခုကဲ့သို့ ထိပ်ဆုံးသို့ ပြန်ရောက်လာခြင်းဖြစ်သည်။

ကြောက်မက်ဖွယ်ရာ ရုပ်ရှင်များအနက် ဝင်ငွေအကောင်းဆုံးဖြစ်သည့် It သည် ပြီးခဲ့သည့်သီတင်းပတ်က ဝင်ငွေဒေါ်လာ ၁၇ ဒသမ ၃ သန်း ရရှိခဲ့သည်ဟု သိရသည်။ It ရုပ်ရှင်သည် ဒေသတွင်းမှာပင် စုစုပေါင်း ဒေါ်လာ ၂၉၁ ဒသမ ၁ သန်းရရှိပြီးဖြစ်သည်။

It နှင့် ဝင်ငွေအနည်းငယ်မျှသာကွာပြီး ဒုတိယနေရာတွင် ရပ်တည်နေသည့် ရုပ်ရှင်မှာ Universal မှ အသစ်ထုတ်လုပ်လိုက်သော American Made ဖြစ်ပြီး ဒေါ်လာ ၁၇ သန်း ရရှိထားသည်။ တွမ်ခရုဇ်အဓိက ပါဝင်သရုပ်ဆောင်ထားသော American Made ရုပ်ရှင်၏ဇာတ်လမ်းမှာ ခရီးသည် တင်လေယာဉ်မောင်းနှင်သည့် လေယာဉ်မှူးတစ်ဦးသည် စီအိုင်အေအတွက် တောင်အမေရိကတွင် ထောက်လှမ်းရေးလုပ်ပေးရန် စည်းရုံးခံရသည့်အကြောင်း ဖြစ်သည်။

Kingsman: The Golden Circle သည် အဆင့်သုံးသို့ ကျဆင်းသွားပြီး ဝင်ငွေမှာလည်း ထက်ဝက်ကျော်ကျဆင်းကာ ဒေါ်လာ ၁၇ သန်း ရရှိထားသည်။

စာရင်း၏ နံပါတ်လေးနေရာတွင် ရပ်တည်နေသည့် ရုပ်ရှင်မှာ အန်နီမေးရှင်းဇာတ်ကားဖြစ်သော The Lego Ninjago ဖြစ်သည်။ The Lego Movie ၏ တတိယမြောက် ရုပ်ရှင်ဖြစ်သော The Lego Ninjago သည် ဝင်ငွေဒေါ်လာ ၁၂ သန်း ရရှိထားသည်။

ဆိုနီက ပြန်လည်ဆန်းသစ်ထားပြီး ပြီးခဲ့သည့် သီတင်းပတ်ကမှ ပွဲဦးထွက်ပြသသော  ထိတ်လန့်ဖွယ်ရုပ်ရှင် Flatliners သည် ဝင်ငွေ ဒေါ်လာ ၆ ဒသမ ၇ သန်းသာ ရရှိခဲ့သည်။ ၁၉၉၀ ပြည့်နှစ်က ထုတ်လုပ်ခဲ့သော မူလ  Flatliners ရုပ်ရှင်ထဲတွင် ဆေးကျောင်းသား ငါးဦးသည် သေလွန်ပြီးလျှင် နောက်ထပ်ဘ၀ တစ်ခု ရှိ၊ မရှိကို ရှာဖွေရန်အတွက် အသက် သေစေနိုင်လောက်သော စမ်းသပ်မှုများပြုလုပ်ကြသည့် အကြောင်းဖြစ်သည်။