တရားဥပဒေစိုးမိုးရေးအပြင် အကြမ်းဖက်မှုတိုက်ဖျက်ရေးသည် မြန်မာနိုင်ငံအတွက် မည်မျှအရေးပါနေသည်ကို မောင်တောဒေသ အကြမ်းဖက်ဖြစ်ရပ်များက သာဓက ပြလျက်ရှိပါသည်။ လတ်တလောသတင်းများအရ မောင်တောမြို့တွင် ပေါ်ပေါက်ခဲ့သော အကြမ်းဖက်ဖြစ်ရပ်များကြောင့် ဒေသခံ ရခိုင်တိုင်းရင်းသားအများအပြား ဘေးကင်းရာ နေရာများသို့ ရွှေ့ပြောင်းနေကြရပြီး အခက်အခဲများစွာ ရင်ဆိုင်နေကြရသည်။ မောင်တောဒေသမှ ဘူးသီးတောင်၊ စစ်တွေ အပါအဝင် အခြားဒေသများသို့ ပြောင်းရွှေ့နေသူများ ထောင်ချီရှိလာသည်။ ယင်းအပြင် ပေါ်ပေါက်ခဲ့သော အကြမ်းဖက်ဖြစ်ရပ်များကြောင့် အခက်တွေ့ခဲ့ရသူ အများစုမှာ ကယ်ဆယ်ရေးစခန်းများတွင် ရွှေ့ပြောင်းနေထိုင်နေကြရသည်။ ထို့ကြောင့် စိတ်ပိုင်းဆိုင်ရာ စိုးရိမ်မှုများကိုသာ ခံစားခဲ့ရသည်မဟုတ်ဘဲ အခြားသော ကျန်းမာရေးအပါအဝင် လူမှုအခက်အခဲများကိုပါ ရင်ဆိုင်နေကြရသည်။
ထို့ပြင် ဘင်္ဂါလီအစွန်းရောက် အကြမ်းဖက်သမားများ၏ တိုက်ခိုက်မှုကြောင့် သေဆုံးသူများ ဆက်လက်ရှိနေဆဲဖြစ်ပြီး ပျောက်ဆုံးနေသူများလည်း ရှိနေသည်။ မောင်တောမြို့ပေါ်နှင့် ပတ်ဝန်းကျင်ကျေးရွာများတွင်လည်း ဘင်္ဂါလီအကြမ်းဖက်သမားများနှင့် လုံခြုံရေးတပ်ဖွဲ့ဝင်များအကြား တိုက်ခိုက်မှုများလည်း ဆက်လက်ဖြစ်ပွားနေသည်။ ယင်းကဲ့သို့သော အကြမ်းဖက်ဖြစ်ရပ်များကြောင့် ဒေသခံတိုင်းရင်းသားများ၏ အလိုလားဆုံးဆန္ဒမှာ ဘေးအန္တရာယ်ကင်း၍ လုံခြုံစိတ်ချစွာ နေထိုင်နိုင်ရေးအတွက် လုံလောက်သည့် အကာအကွယ်များရရှိရေးပင် ဖြစ်သည်။
“နိုင်ငံတော်အနေနဲ့ ရခိုင်ပြည်နယ်အတွင်း အုပ်ချုပ်ရေးယန္တရား ကောင်းမွန်စွာ လည်ပတ်နိုင်ဖို့နဲ့ ဒေသဖွံ့ဖြိုးတိုးတက်ရေးအတွက် ရေတိုရေရှည်အစီအမံတွေနဲ့ ဖြေရှင်းကြိုးပမ်းဆောင်ရွက်နေတဲ့အပြင် လတ်တလော နေရပ်စွန့်ခွာနေရသူတွေရဲ့ လုံခြုံရေးနဲ့ ရေရှည်ရပ်တည်နေနိုင်ရေးတို့အတွက်လည်း အလေးထား ဆောင်ရွက်နေပါတယ်။ ဒါကြောင့် အစွန်းရောက်အကြမ်းဖက်သမားတွေနဲ့ အားပေးကူညီသူတွေကို အကြမ်းဖက်ဥပဒေနဲ့အညီ ထိထိရောက်ရောက် အရေးယူဆောင်ရွက်သွားမှာဖြစ်ပြီး လိုအပ်တဲ့ဒေသတွေမှာ ပြစ်မှုဆိုင်ရာ ကျင့်ထုံးဥပဒေပုဒ်မ ၁၄၄ ညမထွက်ရ အမိန့်ထုတ်ပြန် ဆောင်ရွက်နေပါတယ်။ ဒေသခံတိုင်းရင်းသားတွေကို အကာအကွယ်ပေးနိုင်ရေးအတွက် တပ်မတော်နဲ့ မြန်မာနိုင်ငံ ရဲတပ်ဖွဲ့တို့က လုံခြုံရေးအင်အား တိုးမြှင့်ချထားဆောင်ရွက်ပေးနေပြီး ဒေသဖွံ့ဖြိုးရေးကိုလည်း အလေးထား ဆောင်ရွက်နေပါတယ်။ ဒါကြောင့် အဆိုကို အတည်ပြုသင့်ပါတယ်” ဟု မောင်တော၊ ဘူးသီးတောင်နှင့် ရသေ့တောင်မြို့နယ်များတွင် လှုပ်ရှားနေသော အကြမ်းဖက်အဖွဲ့ဝင်များကို ဖော်ထုတ်ပြီး အကြမ်းဖက်မှုတိုက်ဖျက်ရေး ဥပဒေအရ အရေးယူပေးရန်နှင့် ယင်းတို့၏ခြိမ်းခြောက်မှုကြောင့် လောလောဆယ် နေရပ်စွန့်ခွာထွက်ပြေးလာသော တိုင်းရင်းသားများ၏ ကျေးရွာများ ဆက်လက်ရပ်တည်နိုင်ရေးအတွက် အရေးတယူ ဆောင်ရွက်ပေးရန်အဆိုနှင့် ပတ်သက်၍လွှတ်တော်၌ ဆွေးနွေးရာတွင် ဒုတိယဝန်ကြီးက ယင်းသို့ ထည့်သွင်းပြောကြားခဲ့သည်။
ယခုအခါတွင် မောင်တောဖြစ်စဉ် စတင်ပေါ်ပေါက်ခဲ့သည့် သြဂုတ် ၂၅ ရက် နောက်ပိုင်းမှစ၍ သက်ဆိုင်ရာ လုံခြုံရေးတပ်ဖွဲ့ အင်အားများဖြင့် အကာအကွယ်ပေးနိုင်ရန်၊ မလိုလားအပ်သော ပြဿနာများ မပေါ်ပေါက်ရန်၊ အစွန်းရောက်အကြမ်းဖက်များ အန္တရာယ်မှ ကာကွယ်ရန် လုပ်ဆောင်လျက်ရှိနေပြီ ဖြစ်သည်။ သို့ပါ၍ ယခုကဲ့သို့ အကြမ်းဖက်ဖြစ်ရပ်များအပေါ် သာဓကပြု၍ ဘေးကင်းလုံခြုံမှုရှိစေရေး၊ တရားဥပဒေစိုးမိုးမှုရှိစွာဖြင့် ပြည်သူလူထုအား အကာအကွယ်ပေးနိုင်ရေး အကြမ်းဖက်မှုတိုက်ဖျက်ရေး လုပ်ငန်းများ အလေးထားလုပ်ဆောင်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
(စက်တင်ဘာ ၁ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)
