ဒီမိုကရေစီဆန်သော ခေါင်းဆောင်မှုကို စုပေါင်းခေါင်းဆောင်မှုဟုလည်းခေါ်ပြီး ဆုံးဖြတ်ချက် ချမှတ်ရေးလုပ်ငန်းစဉ်တွင် အဖွဲ့ဝင်များ ပါဝင်သော အုပ်စုက ပို၍ပါဝင်သည့် ခေါင်းဆောင်မှုပုံစံအမျိုးအစား ဖြစ်သည်။ ယင်းခေါင်းဆောင်မှုပုံစံကို ပုဂ္ဂလိကလုပ်ငန်းများမှသည် ကျောင်းများသာမက အစိုးရအဖွဲ့များအထိ မည်သည့်အဖွဲ့အစည်း၌မဆို ကျင့်သုံးနိုင်သည်။ ယင်းခေါင်းဆောင်မှုပုံစံတွင် လူတိုင်းပါဝင်နိုင်ခွင့်ရှိခြင်း၊ စိတ်ကူးစိတ်သန်းများ လွတ်လပ်စွာ ဖလှယ်နိုင်ခြင်းနှင့် ဆွေးနွေးမှုကို အားပေးခြင်းတို့ ပါဝင်သည်။ ဒီမိုကရေစီဆန်သော လုပ်ငန်းစဉ်သည် အုပ်စု၌ အခွင့်အရေးတန်းတူမှုနှင့် စိတ်ကူးစိတ်သန်းများ လွတ်လပ်စွာ စီးဆင်းမှုအပေါ် အဓိကထားသော်လည်း အုပ်စုခေါင်းဆောင်က လမ်းညွှန်မှုနှင့် ထိန်းချုပ်မှုကို ပေးဆဲဖြစ်သည်။
သုတေသနပြုမှုများအရ ဒီမိုကရေစီဆန်သော ခေါင်းဆောင်မှုပုံစံသည် အထိရောက်ဆုံး ပုံစံတစ်ရပ်ဖြစ်ပြီး ပိုမိုမြင့်မားသော ထုတ်လုပ်နိုင်စွမ်း၊ အုပ်စုဝင်များထံမှ ပိုမိုကောင်းမွန်သော ထည့်ဝင်မှုနှင့် အဖွဲ့လိုက် ကိုယ်ကျင့်တရား တိုးတက်မှုတု့ိကို ဖြစ်စေကြောင်း တွေ့ရှိရသည်။ ဒီမိုကရေစီဆန်သော ခေါင်းဆောင်မှု၏ အခြေခံကျသော စရိုက်လက္ခဏာ ရပ်အချို့မှာ ခေါင်းဆောင်က ဆုံးဖြတ်ချက်နှင့်ပတ်သက်၍ နောက်ဆုံးစကားကို ဆိုသော်လည်း အဖွဲ့ဝင်များကို စိတ်ကူးစိတ်သန်းများနှင့် ထင်မြင်ချက်များ မျှဝေရန် အားပေးခြင်း၊ အဖွဲ့ဝင်များအနေဖြင့် လုပ်ငန်းစဉ်၌ ၎င်းတို့ ပိုမိုပါဝင်နေသည်ဟု ခံစားရခြင်းနှင့် ဖန်တီးနိုင်စွမ်းကို အားပေးချီးမြှင့်ခြင်း အစရှိသည်တို့ ဖြစ်ကြသည်။ ဒီမိုကရေစီဆန်သည့် ခေါင်းဆောင်ကောင်းများ ပိုင်ဆိုင်သည့် အရည်အသွေးများကို သုတေသနပြုသူများက ထောက်ပြခဲ့ကြသည်။ ၎င်းတို့မှာ ရိုးသားမှု၊ အသိဉာဏ်ထက်မြက်မှု၊ သတ္တိရှိမှု၊ ဖန်တီးနိုင်စွမ်းရှိမှု၊ ကျွမ်းကျင်မှုနှင့် မျှတမှုတို့ဖြစ်ကြသည်။ အားကောင်းသော ဒီမိုကရေစီဆန်သည့် ခေါင်းဆောင်များသည် နောက်လိုက်များအကြား ယုံကြည်မှုနှင့် လေးစားမှုကို ရရှိကြသည်။ ၎င်းတို့သည် ရိုးဖြောင့်မှန်ကန်သူများဖြစ်ပြီး ၎င်းတို့၏ ဆုံးဖြတ်ချက်များကို ၎င်းတို့၏ ကိုယ်ကျင့်တရားစံများနှင့် တန်ဖိုးသတ်မှတ်ချက်များအပေါ်၌ အခြေခံကြသည်။ ခေါင်းဆောင်ကောင်းများသည် မတူခြားနားသော ထင်မြင်ချက်များကို ရှာဖွေလေ့ရှိပြီး အတိုက်အခံပြုသည့်အသံများ သို့မဟုတ် လူကြိုက်နည်းသည့် အမြင်များကို ပေးသူများအား တိတ်ဆိတ်သွားအောင် ကြိုးပမ်းခြင်းမပြုပါ။
အဖွဲ့ဝင်များအား ၎င်းတို့၏ အတွေးများကို မျှဝေဖလှယ်ရန် အားပေးသောကြောင့် ဒီမိုကရေစီဆန်သော ခေါင်းဆောင်မှုသည် ပိုမိုကောင်းမွန်သော စိတ်ကူးစိတ်သန်းများ နှင့် ပို၍ ဖန်တီးမှုအားကောင်းသော ပြဿနာကို ဖြေရှင်းရန် နည်းလမ်းများ ရရှိနိုင်သည်။ အဖွဲ့ဝင်များအနေဖြင့်လည်း စီမံကိန်းတစ်ရပ်၌ ၎င်းတို့ ပိုမိုပါဝင်ရသည်/ ပိုမိုလုပ်ဆောင် ခွင့်ရသည်ဟု ခံစားရစေပြီး ထွက်ပေါ်လာမည့် ရလဒ်နှင့်ပတ်သက်၍ ပိုမိုဂရုစိုက်လာခြင်းကို ဖြစ်စေသည်။ သုတေသနများအရ ဒီမိုကရေစီဆန်သော ခေါင်းဆောင်မှုသည် အဖွဲ့ဝင်များအကြား ပိုမိုမြင့်မားသည့် ထုတ်လုပ်နိုင်စွမ်းကို ဖြစ်စေကြောင်း တွေ့ရှိရသည်။ အမေရိကန်သမိုင်းတွင် ကုမ္ပဏီအများအပြားနှင့် ခေါင်းဆောင်အများအပြားတို့က ဒီမိုကရေစီဆန်သော ခေါင်းဆောင်မှုကို ကျင့်သုံးခဲ့ကြပြီး အကောင်းဆုံးနမူနာများမှာ ဂျော့ဝါရှင်တန်၊ Mayo Clinic ၊ Google ၊ အီဘရာဟင်လင်ကွန်း၊ Amazon.com ၊ ဂင်နီရိုမက်တီနှင့် Twitter တို့ဖြစ်ကြသည်။
ထို့ကြောင့် သမိုင်းတွင် တစ်ဦးတစ်ယောက်တည်း၏ ခေါင်းဆောင်မှုကြောင့် ဒုက္ခအကြီးအကျယ် တွေ့ခဲ့ရသော မြန်မာနိုင်ငံအတွက် ဒီမိုကရေစီဆန်သော ခေါင်းဆောင်မှုသည်သာ ထိရောက်သည့် ခေါင်းဆောင်မှုဖြစ်နိုင်ပါကြောင်း The Daily Eleven သတင်းစာက ရေးသားအပ်ပါသည်။
(စက်တင်ဘာ ၅ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)
