ရခိုင်ပြည်နယ်အတွင်း ရဲစခန်းများအား ဘင်္ဂါလီအကြမ်းဖက်သမားများက ဝင်ရောက် စီးနင်းတိုက်ခိုက်မှုမှ စတင်ခဲ့သည့် ဒေသတွင်း မတည်ငြိမ်မှုများ သြဂုတ် ၂၅ ရက်တွင် တစ်နှစ်ပြည့်ခဲ့ပြီဖြစ်သည်။ ARSA အစွန်းရောက် အကြမ်းဖက်သမားများက ရဲကင်းစခန်း ၃၀ နှင့် တပ်စခန်းတစ်ခုကို တိုက်ခိုက်လာမှုသည် မြန်မာ့နိုင်ငံရေးကိုပါ အကြီးအကျယ် ဂယက်ရိုက်စေခဲ့သည်။ ကွယ်လွန်သွားပြီဖြစ်သည့် ကိုဖီအာနန်၏ ရခိုင်ပြည်နယ်ဆိုင်ရာ အကြံပေးကော်မရှင်က ရခိုင်ပြည်နယ်အရေးနှင့် ပတ်သက်၍ အစီရင်ခံစာ တင်သွင်းသည့် နောက်နေ့တွင်ပင် ရခိုင်ပြည်နယ်အတွင်း အကြမ်းဖက်တိုက်ခိုက်မှုများ စတင်ခဲ့သည်။
ရခိုင်ပြည်နယ်အတွင်း အစွန်းရောက်ဘင်္ဂါလီများ၏အကြမ်းဖက်တိုက်ခိုက်မှုများကြောင့် ဒေသခံ တိုင်းရင်းသားများအပါအဝင် ဟိန္ဒူဘာသာဝင်များလည်း အတိဒုက္ခရောက်ခဲ့ရသည်။ သို့သော် နိုင်ငံတကာစာမျက်နှာတွင်မူ ဒေသခံတိုင်းရင်းသားများ၏ဒုက္ခများထက် အကြမ်းဖက်မှုများအပြီး ဘင်္ဂလားဒေ့ရှ်သို့တိမ်းရှောင်သွားသူများ၏ အခက်အခဲမျိုးစုံကိုသာ ပုံစံမျိုးစုံဖြင့် ဖော်ပြခဲ့ကြသည်။ အနောက်နိုင်ငံများ၏ ဘင်္ဂါလီအရေး အာဂျင်ဒါများ နှင့် မီဒီယာအားကို အသုံးပြုကာ တစ်ဖက်သတ်ဆန်သော ကောက်ချက်များနှင့် ရခိုင်အရေးတွင် မြန်မာအပေါ် ဖိအားအမျိုးမျိုး ပေးခဲ့ကြသည်။ ယခုအချိန်ထိလည်း ဘင်္ဂါလီအရေးနှင့် ပတ်သက်လျှင် မြန်မာအာဏာပိုင်များအပေါ် နိုင်ငံတကာ ရာဇဝတ်တရားရုံးသို့ ပို့ဆောင်နိုင်ရန်အထိ အားထုတ်မှုများရှိနေသည်ကို တွေ့ရသည်။ သြဂုတ် ၂၄ ရက်ကပင် ဘင်္ဂါလီဒုက္ခသည်များအပေါ် ကျူးလွန်ခဲ့မှုနှင့်ပတ်သက်၍ မြန်မာအာဏာပိုင်များကို နိုင်ငံတကာရာဇ ဝတ်တရားရုံး ICC သို့ ပို့ရန် အာဆီယံလွှတ်တော်အမတ်များက ကြေညာချက်ထုတ်ပြန်ခဲ့သေးသည်။ မြန်မာနိုင်ငံအနေဖြင့် ICC အဖွဲ့ဝင်နိုင်ငံ မဟုတ်သော်လည်း ကုလသမဂ္ဂလုံခြုံရေး ကောင်စီမှတစ်ဆင့် ICC သို့ ပို့ပေးရန် တောင်းဆိုမှုများရှိခဲ့ကြသည်။ ရခိုင်ပြည်နယ်ကို အာဆာအကြမ်းဖက်အဖွဲ့က တိုက်ခိုက်ခဲ့သည်မှာ တစ်နှစ်ပြည့်ပြီဖြစ်သော်လည်း နိုင်ငံတကာအနေဖြင့် ရခိုင်ပြည်နယ်အတွင်း ကြုံတွေ့နေရသော အကြမ်းဖက်အန္တရာယ်အပေါ် လုံလောက်သည့် စိုးရိမ်ပူပန်မှုမျိုးမပြဘဲ ဒုက္ခသည်များအရေးနှင့် ဘင်္ဂါလီအရေးကိုသာ ဦးစားပေး ကြိုးစား တောင်းဆိုမှုများ ရှိနေသည်မှာ မြန်မာ့အနာဂတ်အတွက် စိုးရိမ်စရာပင် ဖြစ်နေသည်။
ရခိုင်အရေးမှာ များစွာ ရှုပ်ထွေးပြီး ဖြေရှင်းရန် ခက်ခဲကျပ်တည်းရခြင်း၏ အကြောင်းခြင်းရာမှာ နိုင်ငံတကာအဖွဲ့အစည်းအချို့နှင့် ရခိုင်ပြည်နယ်ကို မြန်မာ့မြေပေါ်မှ ဖဲ့ထုတ်လိုသည့် အာဂျင်ဒါတစ်ရပ်အဖြစ် ဘက်ပေါင်းစုံ၊ ထောင့်ပေါင်းစုံမှ လုပ်ဆောင်နေကြသူများကြောင့်ပင်ဖြစ်သည်ဟု ဆိုရပေလိမ့်မည်။ မြန်မာနိုင်ငံတွင် နိုင်ငံသား၊ ဧည့်နိုင်ငံသား သတ်မှတ်မှုများအတွက် ၁၉၈၂ ခုနှစ် နိုင်ငံသားဥပဒေကို တရားဝင်ပြဋ္ဌာန်းထားပြီးသား ဖြစ်သည်။ ယင်းဥပဒေအရပင် နိုင်ငံသားဖြစ်ခွင့်များနှင့်ပတ်သက်သော အဓိပ္ပာယ်ဖွင့်ဆိုချက် သတ်မှတ်ပြဋ္ဌာန်းချက်များလည်း ရှိထားပြီးဖြစ်သည်။ ဘင်္ဂါလီအရေးကိုအကြောင်းပြုကာ ဒေသတွင်း မတည်ငြိမ်မှုနှင့် နိုင်ငံအချုပ်အခြာအာဏာကို ထိပါးလာစေနိုင်သည်အထိ ဖန်တီးလုပ်ဆောင်နေမှုများကို လက်ခံနိုင်ဖွယ်မရှိပေ။
အကြမ်းဖက်လုပ်ရပ်များ၏ နောက်ဆက်တွဲဆိုးကျိုးများစွာကို ဒေသခံတိုင်းရင်းသားများ၊ မတူညီသောလူ့အဖွဲ့အစည်းအသီးသီးမှ ယခုအချိန်ထိ ခံစားနေကြရသည်မှာ အမှန်ပင်ဖြစ်သည်။ ပညာရေးအပါအဝင် ကဏ္ဍအသီးသီးတွင် ပုံမှန်ပြန်ဖြစ်ရန် ယင်းဒေသများ၌ အတော်ပင်အချိန်ယူကြရမည်ဖြစ်သည်။ မတူညီသော လူ့အသိုက်အဝန်းများအတွင်း ကျန်ရှိခဲ့သည့် စိတ်ဒဏ်ရာများကိုလည်း ပြန်လည်ကုစားနိုင်ရန် များစွာအချိန်ယူကြရမည်ဖြစ်သည်။ အခြားတစ်ဖက်တွင်လည်း ဒေသတည်ငြိမ်အေးချမ်းရေး ပြည်သူလူထုအသက် အိုးအိမ်စည်းစိမ် လုံခြုံမှုရှိစေရေးအတွက် အာဏာပိုင်အဖွဲ့အစည်းများအနေဖြင့် အာမခံချက်ပေးနိုင်ရန် ကြိုးစားလုပ်ဆောင်ပေးရန် လိုအပ်နေသည်။ အကြမ်းဖက်တိုက်ခိုက်ခံရမှု တစ်နှစ်ပြည့်မြောက်သွားပြီဖြစ်သော်လည်း ရခိုင်ပြည်နယ်တွင် ရှိနေသော နောက်ဆက်တွဲဂယက်နှင့်မြန်မာနိုင်ငံ၏ အနာဂတ်အခြေအနေတို့အတွက် အမှားယွင်းမခံဘဲ လုပ်ဆောင်ရမည့် အရာများနှင့် စိန်ခေါ်မှုများစွာရှိနေပါကြောင်း The Daily Eleven သတင်းစာက ရေးသားအပ်ပါသည်။
(သြဂုတ်လ ၂၆ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)
