ပြန်ပေးရန် ပျက်ကွက်နေသော ဝန်ဆောင်မှု

ပြန်ပေးရန် ပျက်ကွက်နေသော ဝန်ဆောင်မှု
Published 25 August 2018

ရန်ကုန်မြို့တွင်း ခြောက်မြို့နယ်တွင် ယာဉ်ရပ်နား ကန့်သတ်ဇုန်ရှစ်ဇုန်၌ ယာဉ်ရပ်နားခ ကောက်ခံခြင်း လုပ်ငန်းများကို ဈေးပြိုင်တင်ဒါစနစ်ဖြင့် ရန်ကုန်မြို့တော်စည်ပင်သာယာရေးကော်မတီက အငှားချမည်ဖြစ်ကြောင်း သိရသည်။ သို့ဖြစ်ရာ ယခင်အစိုးရလက်ထက်က ရန်ကုန်မြို့တွင်း ယာဉ်ရပ်နားခကောက်ခံမှုကို ပယ်ဖျက်ခဲ့သည့် အခြေအနေမှ တစ်ဖန်ပြောင်းလဲကာ  ဈေးပြိုင်တင်ဒါခေါ်ပြီးနောက် ယာဉ်ရပ်နားခများကို  မြို့တွင်းခြောက်မြို့နယ်၌ တစ်နာရီ ကျပ်၂၀၀ နှုန်းဖြင့် ပြန်လည်ကောက်ခံတော့မည် ဖြစ်သည်။ စည်ပင်အနေဖြင့် ယင်းသို့ကောက်ခံရန် ဆုံးဖြတ်မှုမှာ ပြဿနာမရှိသော်လည်း နောက်ဆက်တွဲ အနေဖြင့် လူထုအတွက် ပြန်လည်လုပ်ဆောင်ပေးမည့် ဝန်ဆောင်မှုပိုင်းအတွက်မူ မေးခွန်းထုတ်စရာများ ရှိလာခဲ့သည်။

အချို့နေရာများတွင် ယာဉ်ရပ်နားခ တရားမဝင်ကောက်ခံမှုများ ရှိနေရာ စည်ပင်က ဘဏ္ဍာငွေရှာ၍ မြို့ခံလူထုအတွက် စနစ်ကျသောဝန်ဆောင်မှုပေးမည်ဆိုပါက ကောင်းမွန်သည့် ကိစ္စရပ်ပင်ဖြစ်လိမ့်မည်။ သို့သော်လည်း အစိုးရအဖွဲ့အစည်းများအနေဖြင့် ပြည်သူ့ထံမှ အခွန်ရယူပြီး မှန်ကန်မျှတသော ဝန်ဆောင်မှု မပေးနိုင်လျှင် ဝေဖန်ခံရပေလိမ့်မည်။ ရန်ကုန်တိုင်းအတွင်း ဧပြီ ၂ ရက်မှစတင်၍ ဘီးခွန်နှုန်းထားများ ယခင်ထက်အနိမ့်ဆုံး ၁၃ ဆခန့်တိုးမြှင့် ကောက်ခံစဉ်အခါကလည်း လူအများက ပြင်းပြင်းထန်ထန် ဝေဖန်ခဲ့ကြသည်။ ယင်းသို့တိုးမြှင့်ကောက်ခံမှု၏ နောက်ဆက်တွဲတွင် အစိုးရအဖွဲ့အစည်းများမှ လုပ်ဆောင်ပေးရမည့် ဝန်ဆောင်မှုပိုင်းများ အားနည်းချက်များရှိခြင်းကြောင့် အဝေဖန်ခံရခြင်းလည်း ဖြစ်သည်။ ယခင်က တစ်နှစ်လျှင် ဘီးခွန်ကျပ် ၄၀၀၀ ကျော်သာပေးဆောင်ရသော ၁၃၀၀ စီစီကားများမှာ ယခုအခါ တစ်နှစ်လျှင် ဘီးခွန်ကျပ် ၅၄၇၅၀ သို့ ပြောင်းလဲကောက်ခံခဲ့ခြင်း ဖြစ်သည်။ ၆၀၀ စီစီနှင့် အောက်ယာဉ်များမှာ ဘီးခွန်တစ်ရက် ကျပ် ၁၀၀ နှုန်းဖြင့် တစ်နှစ်အတွက် ကျပ် ၃၆၅၀၀ ကျသင့်ပြီး ၄၃၀၀ စီစီနှင့်အထက်ယာဉ်များ၏ နှုန်းထားများသည် လည်း ကျပ် ၁၀၉၅၀၀ သို့ တိုးမြှင့်ပေးဆောင်ကြရသည်။ ထိုသို့အခွန်များ အဆမတန် တိုးမြှင့်လိုက်ချိန်တွင် ပိုမိုရရှိသွားသော အခွန်ငွေကြေးများကို မည်သည့်ဝန်ဆောင်မှုပိုင်းတွင် အကောင်းဆုံးဖြစ်အောင် လုပ်ဆောင်မည်ဟူသည့် အစိုးရ၏ဝန်ဆောင်မှုပိုင်းများ အာမခံချက်ဖြင့် ချပြနိုင်မှုမရှိခြင်း၊ ရန်ကုန်မြို့၏ လမ်းများလွန်စွာဆိုးရွားခြင်းတို့ကြောင့် စိတ်ပျက်စရာ ဖြစ်ခဲ့ရသည်။

သက်ဆိုင်ရာ အာဏာပိုင်အစိုးရအဖွဲ့အစည်းများအနေဖြင့် ပြည်သူလူထုထံမှ ကောက်ခံရရှိသော အခွန်ဘဏ္ဍာများဖြင့် ရပ်တည်လုပ်ဆောင်ရသည်မှာ မှန်သော်လည်း မျှတသော အခွန်ကောက်ခံမှုစနစ်နှင့် ပြည်သူလူထုအပေါ် ပြန်လည်လုပ်ဆောင်ပေးသော အစိုးရ၏ ပြည်သူ့ဝန်ဆောင်မှုကဏ္ဍများ တိုးတက်မှု နှိုင်းယှဉ်ချက်သည် အရေးကြီးသည်။ ပြည်သူတို့၏ နေ့စဉ်ဘဝများတွင် အစိုးရမှလုပ်ဆောင်ရန်လိုအပ်သော ဝန်ဆောင်မှုလုပ်ငန်းများများစွာ ရှိသည်။ ပြည်သူ့ဝန်ဆောင်မှု လုပ်ငန်းအသီးသီးအတွက် လူထုက ရွေးချယ်တင်မြှောက်လိုက်သော ဒီမိုကရေစီအစိုးရတစ်ရပ်ဟူသည် တာဝန်ယူ၊ တာဝန်ခံပေးရသည်။ ပုဂ္ဂလိကလုပ်ငန်းများက အမြတ်အစွန်းမရှိ၍ဖြစ်စေ၊ အကြောင်းအချက်အမျိုးမျိုးကြောင့် လုပ်ဆောင်ပေးနိုင်ခြင်းမရှိသော ပြည်သူ့ဝန်ဆောင်မှုလုပ်ငန်းများကို အစိုးရက အကောင်းဆုံးဖြစ်စေရန် ဆောင်ရွက်ပေးရသည်။ ပြည်သူကအခွန်ထမ်း၍ အစိုးရကကောက်ခံရရှိသော အခွန်ငွေဖြင့် ယင်းကဏ္ဍများ တိုးတက်မြင့်မားရန် အဓိကလုပ်ဆောင်ကြရသည်ချည်း ဖြစ်သည်။

နိုင်ငံသားတစ်ဦး၏ တာဝန်များ၌ ရွေးကောက်ပွဲများတွင် ပါဝင်မဲပေးခြင်း၊ ဥပဒေကို လိုက်နာရခြင်းအပြင် အခွန်ပေးဆောင်ရခြင်းသည်လည်း အဓိကတာဝန်တစ်ခုအဖြစ် ရှိနေသည်။ အစိုးရအာဏာပိုင်များ အနေဖြင့်လည်း ဝင်ငွေနည်းပါးသောအိမ်ထောင်စုများအား အခွင့်အရေးပေးသည့် ကျန်းမာရေးနှင့် ပညာရေးကဲ့သို့သော ဝန်ဆောင်မှုများတွင်လည်းကောင်း၊ လူမှုရေးညီမျှစေရန် မြှင့်တင်ပေးနိုင်မည့် အခြေခံအဆောက်အအုံများ ကြီးထွားစေရန်လည်းကောင်း ပြည်သူ့အသုံးစရိတ်အတွက် ဘဏ္ဍာငွေစုဆောင်းရန် အခွန်ကောက်ခံခြင်းမူဝါဒသည် အရေးကြီးသည်။ ဆိုလိုသည်မှာ အစိုးရအဖွဲ့အစည်းများက ပြည်သူထံမှ အခွန်ဘဏ္ဍာရှာပြီးလျှင် ပြည်သူထံသို့ ညီမျှသည့် ဝန်ဆောင်မှုကောင်းကို မလွဲမသွေပြန်ပေးရမည်။ သို့မဟုတ်ဘဲ ပြည်သူက ကဏ္ဍအသီးသီးမှ အခွန်အတုတ်များပေးနေရပြီး လူနေမှု အဆင့်အတန်းနှင့် ဝန်ဆောင်မှုကဏ္ဍများတွင် ပြောင်းလဲတိုးတက်လာမှုရှိအောင် အစိုးရက ပြန်လည်ဖန်တီးမပေးနိုင်လျှင် အခွန်များအဟောသိကံ ဖြစ်သွားသည်ဟု ယူဆ၍ မျှတမှုမရှိဟုဆိုကာ ပြစ်တင်ခံရပေလိမ့်မည်။ ထို့ကြောင့် အစိုးရအာဏာပိုင် အဖွဲ့အစည်းများအနေဖြင့် မျှတသင့်လျော်သော အခွန်စည်းကြပ်မှုပြုလုပ်ခြင်းနှင့်အတူ လူထုကို မိမိတို့ပြန်လည် ပြုလုပ်ပေးရမည့် ဝတ္တရားများကိုလည်း တာဝန်ယူလုပ်ဆောင်ပေးရန် လိုအပ်မည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

(သြဂုတ်လ ၂၅ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)

Most Read

Most Recent