<

အဂတိနှင့် ဘက်လိုက်မှု

လက်ရှိအခြေအနေအရ ပြည်တွင်းငြိမ်းချမ်းရေးနှင့် စီးပွားရေးကဏ္ဍများကို နိုင်ငံတော်၏ အတိုင်ပင်ခံပုဂ္ဂိုလ်က အဓိက ကိုင်တွယ်ဆောင်ရွက်နေပြီး သမ္မတက တရားဥပဒေစိုးမိုးရေးနှင့် အဂတိတိုက်ဖျက်ရေးတို့ကို ဦးစားပေးကိုင်တွယ်ကာ ဧပြီလမှစ၍  နိုင်ငံရေးအရ နည်းဗျူဟာအပြောင်းအလဲ ပြုလုပ်ခဲ့သည်ဟု ထင်မြင်သုံးသပ်မှုများ ရှိနေသည်။ ကျန်းမာရေးအရဟုဆိုကာ ဦးထင်ကျော်၏နေရာတွင် ဦးဝင်းမြင့်ကို သမ္မတအဖြစ် တာဝန်ပေးပြီး NLD အစိုးရအပေါ် အဘက်ဘက်မှ ကျရောက်နေသည့် ဖိအားများနှင့် ဝေဖန်မှုများအပေါ် တုံ့ပြန်ဖြေရှင်းနိုင်ရန် အစိုးရသက်တမ်း ၂ နှစ်အကြာတွင် ဒေါ်အောင်ဆန်းစုကြည်က အပြောင်းအလဲကို စတင်ခဲ့သည်ဟုလည်း ဆိုရမည်ဖြစ်သည်။ ငြိမ်းချမ်းရေးနှင့် တိုင်းရင်းသားအရေးကိုကြည့်လျှင် လားဟူနှင့် မွန်အဖွဲ့နှစ်ဖွဲ့ NCA လက်မှတ်ထိုးပြီးနောက်တွင် နောက်ထပ်တိုင်းရင်းသား လက်နက်ကိုင်အဖွဲ့များ NCA လက်မှတ်ထိုးရန် မရေရာသည့် အခြေအနေဖြစ်နေသည့်အပြင် ငြိမ်းချမ်းရေးခရီးစဉ်သည် မျှော်မှန်းသည်ထက်ပို၍ ရှည်ကြာနိုင်သည်ဟု မြင်လာကြသည်။ စီးပွားရေးပိုင်းတွင်လည်း တိုင်းပြည်၏ အခြေအနေမှာ စံချိန်တင်ဘတ်ဂျက်လိုငွေနှင့် ကျပ်ငွေတန်ဖိုးကျဆင်းမှု၊ ငွေကြေးဖောင်းပွမှု မြင့်မားခြင်းတို့ကြောင့် ဘေးကျပ်နံကျပ်ဖြစ်ကာ ပြိုလဲမသွားရန် ရုန်းကန်နေရသည်။

ထို့အပြင် သမ္မတ တာဝန်ယူကိုင်တွယ်နေသည်ဟုဆိုရမည့် တရားဥပဒေစိုးမိုးရေး နှင့် အဂတိတိုက်ဖျက်ရေး အခြေအနေကိုကြည့်ရင်လည်း မေးခွန်းထုတ်စရာများရှိနေသည်။ အထူးသဖြင့် ခေတ်အဆက်ဆက် အမြစ်တွယ်နေသော အဂတိလိုက်စားမှုအပေါ် အစိုးရအနေဖြင့် မည်ကဲ့သို့ကိုင်တွယ်ဖြေရှင်းမည်နည်း။ သမ္မတသည် ၎င်း၏ ပြောကြားထားမှုများအတိုင်း အဂတိကို ထိရောက်စွာ ကိုင်တွယ်နိုင်ခြင်း ရှိ၊ မရှိ ဆိုသည့်အပေါ် လူထု၏ သံသယဖြင့် စောင့်ကြည့်အကဲဖြတ်မှုကို ခံနေရသည်။ သမ္မတဦးဝင်းမြင့်အနေဖြင့် မတ်လ ၂၈ ရက်က ပထမဆုံးမိန့်ခွန်းပြောကြားရာတွင် ဦးစားပေးရည်မှန်းချက်ပန်းတိုင် သုံးခုနှင့် အကောင်အထည်ဖော်မည့် လုပ်ငန်းစဉ်ရှစ်ချက်ကို ထည့်သွင်းပြောကြားပြီး ယင်းရှစ်ချက်ထဲတွင် အဂတိလိုက်စားမှုတိုက်ဖျက်ရေးကို ပိုမိုလုပ်ဆောင်သွားမည်ဟု ပြောကြားခဲ့သည်။

သို့သော်လည်း အစိုးရအရာထမ်းတွင် အမြင့်ဆုံးရာထူးဖြစ်သည့် FDA ညွှန်ချုပ်တစ်ဦးကို အဂတိလိုက်စားမှုနှင့် ဖမ်းဆီးအရေးယူမှုဖြစ်စဉ်မှလွဲ၍ ကျန်နိုင်ငံရေး အာဏာရယူထားသူအချို့၊ ဝေဖန်ခံရသည့် ၀န်ကြီးအချို့နှင့် ပတ်သက်သည့် အဂတိဖြစ်စဉ်များတွင် အရေးယူမှုတစ်စုံတစ်ရာ မရှိသေးသည့်အပေါ် လူထု၏ မေးခွန်းထုတ်မှုခံခဲ့ရသည်။ အဂတိလိုက်စားမှု၊ ငွေကြေးခ၀ါချမှု အပါအ၀င် အချက်ရှစ်ချက်ဖြင့် စီမံဘဏ္ဍာဝန်ကြီး ဦးကျော်ဝင်း တိုင်ကြားခံခဲ့ရသော်လည်း တိုင်ကြားချက်များ မှန်ကန်မှုမရှိဟု အဂတိလိုက်စားမှုတိုက်ဖျက်ရေးကော်မရှင်က ဆုံးဖြတ်ခဲ့သည်။ သို့သော်လည်း ၎င်းတွင်အပြစ်မရှိဟု ပြောဆိုခြင်းမဟုတ်ကြောင်းလည်း ကော်မရှင်က ပြည်သူသို့ရှင်းလင်းချက်တွင် ပြောကြားခဲ့ပြန်သည်။ ယင်းအခြေအနေမှာ လူအများအကြား ဒွိဟဖြစ်စေခဲ့ပြီး အဂတိတိုက်ဖျက်ရေးတွင် ပွင့်လင်းမြင်းသာမှုနှင့် လူပုဂ္ဂိုလ်၊ ပါတီနှင့် အစိုးရတစ်ရပ်၏ ဂုဏ်သိက္ခာဆိုင်ရာ အကြောင်းအချက်များအပေါ် ဘက်လိုက်မှု ရှိ၊ မရှိ ဆိုသည့်အပေါ် ယုံကြည်ပေးနိုင်ရန် ခက်ခဲလာစေခဲ့သည်။  ယခင်အစိုးရအဆက်ဆက် အစိုးရတာဝန်ရှိသူများအနေဖြင့် အဂတိနှင့်ပတ်သက်လျှင် ပွင့်လင်းမြင်သာမှု မရှိ၊ တာဝန်ယူမှု၊ တာဝန်ခံမှု မရှိဆိုသည့် အခြေအနေမျိုး လက်ရှိအချိန်တွင်လည်း တွေ့မြင်နေရဆဲဖြစ်သည်ဟု ဝေဖန်လာကြသည်။ ပြည်သူများအကြား ဟာသသရုပ်ဆောင် အောင်ရဲထွေး သတ်ဖြတ်ခံရမှု ဖြစ်စဉ်ကဲ့သို့သော အမှုမျိုးတွင် အဂတိ ရှိ၊ မရှိ အစိုးရ၏ ပွင့်လင်းမြင်သာစွာချပြနိုင်မှုအပေါ်  လူထုကအား မလို အားမရဖြစ်ကာ စောင့်ကြည့်ခဲ့ကြပြန်သည်။

မြန်မာနိုင်ငံအနေဖြင့် ယခင်အစိုးရလက်ထက်မှစ၍ အဂတိလိုက်စားမှုဆိုင်ရာ အညွှန်းကိန်း (Corruption Perception Index ) တွင် တိုးတက်မှုရှိလာပြီး ၂၀၁၇ ခုနှစ် အညွှန်းကိန်းအရ နိုင်ငံ ၁၈၀ တွင် အဆင့် ၁၃၀ အဖြစ် သတ်မှတ်ခံခဲ့ရသည်။ သို့သော်လည်း ယင်းအခြေအနေမှာ စိုးရိမ်စရာ အညွှန်းကိန်းအခြေအနေတွင် ရှိနေဆဲဖြစ်ပြီး ဆင်းရဲသော နိုင်ငံတစ်နိုင်ငံအနေဖြင့် အဂတိကို ပြတ်ပြတ်သားသားဖြင့် ထိထိရောက်ရောက် ကိုင်တွယ်နိုင်ခြင်းမရှိပါက တရားဥပဒေစိုးမိုးရေးနှင့် ဒီမိုကရေစီ ပြုပြင်ပြောင်းလဲရေးသည် မည်သို့မျှအောင်မြင်နိုင်မည် မဟုတ်ပေ။ အဂတိလိုက်စားမှုများသည် ပြည်သူလူထုကို စိတ်ပျက်စေပြီး တိုင်းပြည်တွင်ရှိနေသော အင်စတီကျူးရှင်းများအပေါ်ယုံကြည်မှု ကင်းမဲ့စေသည်။  အဂတိလိုက်စားမှုကို ဥပဒေအရ ဘောင်ဝင်စေရန် ပြုလုပ်ထားသကဲ့သို့ ဖြစ်နေခြင်းနှင့် မမျှတသော ဥပဒေများကို အသုံးချကာ အဂတိလိုက်စားခြင်းတို့ကို အစိုးရအနေဖြင့် စေ့စပ်သေချာစွာကာကွယ်ရန် လိုအပ်မည်ဖြစ်သည်။ အဂတိလိုက်စားမှုတိုက်ဖျက်ရေးကို ခိုင်မာအောင် မလုပ်ဆောင်နိုင်ပါက တရားဥပဒေစိုးမိုးမှုနှင့် လူထုဘ၀ တည်ငြိမ်အေးချမ်းရေး ရရှိနိုင်မည်မဟုတ်ဆိုသည့် အချက်မှာ ငြင်းမရနိုင်ပေ။

အဂတိလိုက်စားမှုကို မထိန်းချုပ်နိုင်လျှင် စီးပွားရေးဖွံ့ဖြိုးတိုးတက်မှုသည်လည်း ဖြစ်မလာနိုင်သည့်အပြင် လူ့အသိုင်းအ၀ိုင်းများအကြား အချိုးအစား မညီမျှမှု နှင့် အတူ တရားဥပဒေစိုးမိုးမှု ပျက်ယွင်းခြင်းသို့လည်း ရောက်ရှိမည်ဖြစ်သည်။ ထို့ကြောင့် အစိုးရ အနေဖြင့် လူထုကို ပေးထားသောကတိနှင့် ပြောထားသော စကားများအတိုင်း အဂတိနှင့် ပတ်သက်လျှင် ပွင့်လင်းမြင်သာစွာဖြင့် ဘက်လိုက်မှုကင်းစွာ လုပ်ဆောင်ရန် လိုအပ်ပါကြောင်း The Daily Eleven သတင်းစာက တိုက်တွန်းရေးသားအပ်ပါသည်။

(သြဂုတ် ၂၂ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)

August 21, 2018














Copy Protected by Chetan's WP-Copyprotect.