စီးပွားရေးတစ်ရပ်တွင် ဆင်းရဲမွဲတေမှုကို ဖြစ်စေနိုင်သည့် အကြောင်းတရားများစွာ ရှိသည်။ ယင်းတို့အနက် အလုပ်လက်မဲ့ဖြစ်မှုသည် အတွေ့ရအများဆုံး အကြောင်းရင်း တစ်ရပ်ဖြစ်သည်။ လူဦးရေအများဆုံးနိုင်ငံ ၁၀ နိုင်ငံ၌ပင်လျှင် အလုပ်လက်မဲ့ အရေအတွက် ၁ ဒသမ ၁ ဘီလျံသို့ ရောက်ရှိလာခြင်းက ယင်းသည် အလွန်အရေးကြီးသည့် အကြောင်းအရာတစ်ရပ်ဖြစ်ကြောင်း ပြသနေသည်။ ကမ္ဘာတစ်ဝန်းရှိ စီးပွားရေးများစွာတို့ တွေ့ကြုံရသည့် အလုပ်လက်မဲ့ဖြစ်မှုက ဆင်းရဲမွဲတေမှုကို ဖန်တီးပုံအား ယခုကဲ့သို့ တွေ့မြင်ရမည်ဖြစ်သည်။

ဝင်ငွေမဲ့ခြင်း - အလုပ်လက်မဲ့ဖြစ်မှုက ဆင်းရဲမွဲတေခြင်း ဖြစ်စေပုံနှင့် ပတ်သက်၍ အသိသာဆုံးမှာ ဝင်ငွေမဲ့ခြင်းဖြစ်သည်။ အလုပ်မရှိသောကြောင့် ဝင်ငွေမရှိခြင်းနှင့်အတူ မိသားစုများစွာတို့သည် ဘဝနေထိုင်မှု ကုန်ကျစရိတ်အတွက် ဝင်ငွေလုံလောက်စွာမရှိဘဲ နေထိုင်နေရသည်။ ငွေရပေါက်ရလမ်းအား ရှာဖွေနိုင်ခြင်း မရှိသည့်အခါ ငွေချေးရခြင်း၊ စုဆောင်းငွေများထဲမှ အသုံးပြုရခြင်းမှသည် အိုးမဲ့အိမ်မဲ့ဖြစ်ရခြင်းနှင့် အာဟာရ မပြည့်ဝခြင်းဆီသို့ ဦးတည်သွားသည်။

ဆင်းရဲမွဲတေမှုသံသရာ ဆက်လက်တည်တံ့စေခြင်း - အနာဂတ်၌ ဆင်းရဲမွဲတေမှု ဖြစ်နိုင်ခြေကို မြင့်တက်စေသည့် လက်ရှိလူငယ်များ အလုပ်လက်မဲ့ဖြစ်မှုနှုန်းနှင့်အတူ အဆိုပါ ဝန်ထုပ်ဝန်ပိုးသည် အနာဂတ် မျိုးဆက်များပေါ်သို့ ပို၍လေးလံစွာ ကျရောက်စေလိမ့်မည်ဖြစ်သည်။ အလုပ်လက်မဲ့ဖြစ်မှုက လူအသီးသီးတို့အား မျိုးဆက်အဆက်ဆက် ဆင်းရဲမွဲတေမှု သံသရာအတွင်း၌သာ ဆက်လက် တည်တံ့နေစေလိမ့်မည် ဖြစ်သည်။

ရာဇဝတ်မှုများ မြင့်တက်စေခြင်း - အလုပ်လက်မဲ့ဖြစ်မှုသည် ရာဇဝတ်မှုများ မြင့်တက်မှုဆီသို့လည်း ဦးတည်သွားစေနိုင်သည်။ အထူးသဖြင့် လူငယ်များ အလုပ်လက်မဲ့ဖြစ်မှုသည် ရာဇဝတ်မှုများနှင့် ခိုးဆိုးလုယက်မှုများ ပို၍မြင့်တက်လာခြင်းနှင့် ဆက်စပ်လျက် ရှိသည်။ လူအသီးသီးတို့သည် မိမိတို့၏ မိသားစုများကို ထောက်ပံ့ရန် ဥပဒေဘောင်အတွင်းမှ ဝင်ငွေရှာဖွေနိုင်မှု မရှိတော့သည့်အခါ ရာဇဝတ်မှုမြောက်သော အကြမ်းဖက်သော လုပ်ရပ်များဆီသို့ ဦးတည်သွားတော့သည်။

ရေရှည်အလုပ်လက်မဲ့ဖြစ်မှု - လူအသီးသီးတို့သည် အလုပ်လက်မဲ့ဖြစ်သည်နှင့် ရေရှည်အလုပ်လက်မဲ့ ဖြစ်နိုင်ခြေ မြင့်တက်၍လာသည်။ ဆင်းရဲမွဲတေသည့် ရပ်ကွက်များ၌ နေထိုင်ရခြင်းနှင့် ပတ်သက်သော စရိုက်လက္ခဏာရပ်များက ဆင်းရဲမွဲတေမှု ထောင်ချောက်တစ်ရပ်ကို ဖြစ်စေသည်။ မိသားစုများအနေဖြင့် အလုပ်ရရှိရန် လိုအပ်သော ကိရိယာတန်ဆာပလာများ မရှိသောကြောင့်ဖြစ်သည်။ ဆင်းရဲမွဲတေသောနေရာများ၌ နေထိုင်ရသူတို့သည် အရည်အသွေးနိမ့်သော အိမ်ရာ၊ မပြည့်စုံသောကျောင်းများနှင့် အကန့်အသတ်ရှိသော လမ်းပန်းဆက်သွယ်ရေးနှင့် ဝန်ဆောင်မှုများကိုသာ ထိတွေ့ရသည်။ ယင်းရလဒ်များက နောက်တစ်ကြိမ် အလုပ်အကိုင်ရှာဖွေရန် တစ်ဦးချင်း အခွင့်အလမ်းအား ပို၍နည်းသွားစေသည်။

အလုပ်လက်မဲ့ဖြစ်မှုသည် ဆင်းရဲမွဲတေမှုကို ဖြစ်စေသကဲ့သို့ ဆင်းရဲမွဲတေမှုသည် အလုပ်အကိုင်ရရှိရန် အခွင့်အလမ်းအား လျော့နည်းသွားမှုကို ဖြစ်စေသည်။ ထို့ကြောင့် အစိုးရအနေဖြင့် အလုပ်လက်မဲ့ဖြစ်မှုနှင့် ဆင်းရဲမွဲတေမှု သံသရာစက်ဝန်းအား ဖြတ်တောက်နိုင်ရန်အတွက် ပညာရေး အရည်အသွေး တိုးတက်ရေးနှင့် လူငယ်များအားလုံးကို ကျောင်း၌ရှိစဉ်ကပင် ကောင်းစွာသင်ကြား လေ့ကျင့်ပေးရေးတို့အပေါ်၌ အဓိကထားသင့်ပါကြောင်း The Daily Eleven သတင်းစာက ရေးသားအပ်ပါသည်။

သြဂုတ်လ ၂၁ ရက်နေ့ထုတ် The Daily Eleven သတင်းစာ အယ်ဒီတာ့အာဘော်