မျှော်လင့်ချက် ပျက်သုဉ်းခြင်း

မျှော်လင့်ချက် ပျက်သုဉ်းခြင်း
Published 15 August 2018

စီးပွားရေး၊ လူမှုရေးနှင့် နိုင်ငံရေး အစရှိသည့် အကျပ်အတည်းပေါင်းစုံတို့အကြား ယနေ့ခေတ်လူသားများသည် တစ်နေ့တခြား ပို၍ပို၍ ဘေးကျပ်နံကျပ် ဖြစ်လာကြရာမှ  နောက်ဆုံးတွင် မျှော်လင့်ချက်အလုံးစုံ ပျက်သုဉ်းကာ စိတ်ပျက်လက်ပျက်ဖြင့် လက်မှိုင်ချရသည့် အနေအထားသို့ ရောက်ရှိသွားတတ်သည်။ မျှော်လင့်ချက်ပျက်သုဉ်းခြင်းမှသည် မိမိကိုယ်မိမိ သတ်သေခြင်းဆီသို့ပင် ဦးတည်သွားနိုင်သည်။ ယင်းအနေအထားကို ကျော်လွန်နိုင်ရန် အကြံပြုချက်အချို့ရှိသည်။

ယခုထက် ပိုကောင်းလာမည့် နေ့တစ်နေ့ရှိကြောင်း ယုံကြည်ပါ-မည်သူမျှ အမှောင်ထဲ တစ်သက်လုံး နေရမည်မဟုတ်ပါ။ လူတိုင်း၏ဘဝ၌ အတက်အကျများ ရှိသည်သာ ဖြစ်သည်။ ယင်းကို မည်သူမဆို ဖြတ်သန်းရမည်ဖြစ်ပြီး အတက်ဖြစ်စေ အကျဖြစ်စေ ထာဝရ တည်နေမည်မဟုတ်ဟု မှတ်ယူအပ်သည်။ ယနေ့တွင် အလင်းရောင်ကို မမြင်ရပါက မနက်ဖြန် သို့မဟုတ်လာမည့် သီတင်းပတ် သို့မဟုတ် လာမည့်လကို မျှော်ရမည်သာ ဖြစ်သည်။

တစ်ခုခု ပြုလုပ်ပါ- တစ်ခုခု ပြုလုပ်နေရပါက အမှောင်သည် အနည်းငယ်လင်းလာ သကဲ့သို့ ခံစားရလိမ့်မည်။ မုန့်တစ်ခုခု ပြုလုပ်ခြင်း သို့မဟုတ် ရုပ်ပုံတစ်ခုခု ရေးဆွဲခြင်း အစရှိသဖြင့် တစ်စုံတစ်ခုကို ဖန်တီးခြင်း ပြုနိုင်သည်။ မည်သည့်အရာ ပြုလုပ်သည်ဆိုသည်က အရေးမကြီးပေ။ တစ်ခုခုဖြင့် အလုပ်ရှုပ်ကာ တစ်ခုခု ဖန်တီးနေရန်သာလိုသည်။ တစ်ခုခု ဖန်တီးရန် ကြိုးပမ်းနေခြင်းအားဖြင့် စိတ်အတွင်းသို့ စိတ်ပျက်ဖွယ်အတွေးများ  ဝင်မလာနိုင်တော့ပေ။

ခန္ဓာကိုယ်ကို လှုပ်ရှားပါ- နိုးနိုးကြားကြား နေရန်လိုသည်။ ပြေးခြင်း၊ ကခြင်း၊ လမ်းလျှောက်ခြင်းနှင့် ရေကူးခြင်း အစရှိသဖြင့် ကြွက်သားများ လှုပ်ရှားအောင်၊ နှလုံးခုန်နှုန်း တက်လာအောင်နှင့် အက်ဒရီနယ်လင်ဟော်မုန်းများ ပြန်လည်စီးဆင်းလာအောင် တစ်ခုခုလုပ်ရန်လို၏။ ယင်းသို့အားဖြင့် ဦးနှောက်အတွင်းသို့ ဒိုပါမင်းဓာတ် အနည်းငယ် စီးဆင်းလာခြင်းက အမှောင်ထဲ၌ အလင်းရောင် ပြိုးပြက်စေမည့် အချက်အချို့ကို မြင်လာစေရန် အထောက်အကူပြုသည်။

ဆုတောင်းခြင်းပြုပါ- ယုံကြည်ချက်တစ်ရပ် ရှိမနေလျှင်ပင် ဆုတောင်းမှုပြုခြင်းက  စိတ်ပျက်ဖွယ်အနေအထားမှ လွန်မြောက်ရေးအတွက် အထောက်အကူ ပြုစေနိုင်သည်။  မည်သည့်ဘာသာဝင်မဆို ဆုတောင်းမှု ပြုလိုက်ခြင်းက စိတ်သက်သာရာ ရသွားခြင်းကို ဖြစ်စေနိုင်သည်။

တစ်စုံတစ်ဦးအား စကားပြောပါ- တစ်ဦးတည်း အထီးကျန်စွာ မျှော်လင့်ချက် ပျက်သုဉ်းနေသည့် အနေအထားသည် ရှင်သန်ရန် ခက်ခဲစေလိမ့်မည်။ ဂရိတွေးခေါ်ရှင် အရစ္စတိုတယ်ဆိုသကဲ့သို့ လူသည် လူမှုရေးသတ္တဝါဖြစ်၏။ လူသည် လူ့အသိုင်းအဝိုင်း၌  နေထိုင်ရခြင်း ဖြစ်သည်။ အကူအညီတောင်းခံရခြင်းက ရှက်စရာ မဟုတ်ပေ။ မိတ်ဆွေ သူငယ်ချင်း သို့မဟုတ် မိသားစုဝင်တစ်ဦးဦး အစရှိသဖြင့် သင်ယုံကြည်ရာတစ်ဦးဦးဖြင့် ပြောဆိုဆွေးနွေးမှု ပြုလုပ်ပါ။

အပြင်သို့ ထွက်ပါ- နေရောင်ထဲတွင် မတ်တတ်ရပ်ပါ။ လတ်ဆတ်သောလေကို ရှူပါ။ သစ်ပင်တစ်ပင်ကို မှီကြည့်ပါ။ သဘာဝက ကုစားပေးနိုင်သည်။ အောက်ဆီဂျင် ကြွယ်ဝသော လေကိုရှူရင်း နွေ၌ ခြောက်သွေ့နေသည့် သစ်ပင်များ မိုးအခါ စိမ်းစိုလာမည်ကို နှလုံးသွင်းပါ။

မည်သို့ပင်ဆိုစေကာမူ စီးပွားရေး၊ လူမှုရေးနှင့် နိုင်ငံရေးအစရှိသော ကိစ္စအမျိုးမျိုးကြောင့် မျှော်လင့်ချက်ပျက်သုဉ်းနေရသည့် မြန်မာပြည်သူပြည်သားအပေါင်း အကျပ်အတည်းများမှ လွတ်မြောက်နိုင်ပါစေကြောင်း The Daily Eleven သတင်းစာက ဆုမွန်ကောင်းတောင်းအပ်ပါသည်။

(သြဂုတ်လ ၁၅ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)

Most Read

Most Recent