ပြည်သူ့ရေးရာ မူဝါဒနှင့် စီမံခန့်ခွဲမှု

ပြည်သူ့ရေးရာ မူဝါဒနှင့် စီမံခန့်ခွဲမှု
Published 12 August 2018

ပြည်သူ့ရေးရာမူဝါဒကို လေ့လာမှုနှင့် ပြည်သူ့ရေးရာ စီမံခန့်ခွဲမှုအား လေ့လာမှုတို့သည် ပညာရပ်ဆိုင်ရာအရ သီးခြားစီဖြစ်သော အကြောင်းအရာနှစ်ရပ်ဖြစ်သော်လည်း လက်တွေ့ကျင့်သုံးမှု၌ အနီးကပ် ဆက်နွှယ်လျက်ရှိသည်။ တစ်ဖက်တွင် ပြည်သူ့ရေးရာမူဝါဒများ ဖွံ့ဖြိုးလာရေးနှင့် အကောင်အထည်ဖော်ရေး လုပ်ငန်းစဉ်ရှိပြီး အခြားတစ်ဖက်တွင် ပြည်သူ့ရေးရာ ဝန်ဆောင်မှုများကို ဖြန့်ကျက်မှု ရှိနေသည်။ အစိုးရ သို့မဟုတ် စေတနာ့ဝန်ထမ်း သို့မဟုတ် ပုဂ္ဂလိကကဏ္ဍအဖွဲ့အစည်း အစရှိသော ပြည်သူ့ရေးရာ ဝန်ဆောင်မှု နယ်ပယ်တစ်ရပ်၌  လက်တွေ့လုပ်ကိုင်နေသူများအတွက် မူဝါဒချမှတ်ခြင်းနှင့် စီမံခန့်ခွဲ ခြင်းတို့အကြား ယင်းဆက်နွှယ်ချက်သည် လွန်စွာအရေးကြီးသည်။ မူဝါဒချမှတ်ခြင်းက အဖွဲ့အစည်းများနှင့် လူပုဂ္ဂိုလ်တစ်ဦးချင်းတို့အနေဖြင့် ပြည်သူတို့၏ လိုအပ်ချက်များနှင့် ပြဿနာများကို ကိုင်တွယ်ရာ၌ အောင်မြင်နိုင်ရန် နည်းလမ်းရှာဖွေရသော်လည်း မူဝါဒ၌ ပါဝင်သည့် ရည်မှန်းချက်များ အမှန်တကယ် အကောင်အထည်ပေါ်လာရန် စီမံခန့်ခွဲမှု နှင့် ခေါင်းဆောင်မှုဆိုင်ရာ ကျွမ်းကျင်မှုများမှတစ်ဆင့်သာ လုပ်ဆောင်နိုင်မည်ဖြစ်သည်။ ထို့ပြင် လက်တွေ့မြေပြင်၌ ဝန်ဆောင်မှုများ ဖြန့်ချိခြင်းမှရရှိသည့် အတွေ့အကြုံများသည် ကောင်းမွန်သည့် မူဝါဒချမှတ်ရေး၏ အဓိကအစိတ်အပိုင်းတစ်ရပ် ဖြစ်သင့်သည်။

ခြိုးခြံချွေတာရေး၊ ဂလိုဘယ်လိုက်ဇေးရှင်း၊ နည်းပညာနှင့် အဖွဲ့အစည်းဆိုင်ရာ နယ်နိမိတ်များ ပြောင်းလဲခြင်း အစရှိသည်တို့အားလုံးသည် ပြည်သူ့ရေးရာ စီမံခန့်ခွဲသူများအပေါ် ကြီးမားသော သက်ရောက်မှုများရှိပြီး ပြည်သူ့ရေးရာ မူဝါဒနှင့် စီမံခန့်ခွဲမှုတို့ကို ပို၍ပို၍ ရှုပ်ထွေးလာစေခဲ့သည်။ ခြိုးခြံချွေတာရေး၏ ရိုက်ခတ်ချက်သည် လူမှုရေးနှင့် စီးပွားရေးပြဿနာများအား ပေါင်းစပ်သွားစေပြီး ပြည်သူ့ရေးရာ မူဝါဒချမှတ်ရာ၌ အဓိကအချက် ဖြစ်လာသည်။ တစ်ချိန်တည်းမှာပင် ယင်းသည် ပြဿနာများကို ကိုင်တွယ်ရန် ရရှိနိုင်သည့် ရင်းမြစ်များကိုလည်း လျော့ကျသွားစေသည်။ ဂလိုဘယ်လိုက်ဇေးရှင်း၏ သက်ရောက်မှုကြောင့် နိုင်ငံတကာ၊ နိုင်ငံအလိုက်နှင့် ဒေသဆိုင်ရာ ပြဿနာများသည် ရောယှက်၍ သွားကြပြီး အတိုင်းအတာ ပို၍ကြီးမားလာကာ အထူးသဖြင့် အစိုးရအဖွဲ့ များပေါ်သို့ သက်ရောက်မှုများ ရှိလာသည်။

ဒီဂျစ်တယ်နည်းပညာ၏ စိန်ခေါ်မှုများသည်လည်း အစိုးရအဖွဲ့များနှင့် ၎င်းတို့၏ နိုင်ငံသားများအကြား ဆက်ဆံရေးများကို ပြန်လည်ပုံသွင်း၍လာသည်။ အဖွဲ့အစည်းဆိုင်ရာ နယ်နိမိတ်များ ပြောင်းလဲသွားခြင်းသည် အစိုးရ၊ ပုဂ္ဂလိက၊ အစိုးရမဟုတ်သောအဖွဲ့အစည်းများနှင့် အရပ်ဘက်လူ့အဖွဲ့အစည်းများ အစရှိသည့် ကဏ္ဍများအကြား ပူးပေါင်းဆောင်ရွက်မှုကို တိုး၍တိုး၍ အရေးပါလာစေသည်။ ယင်းစိန်ခေါ်မှုများသည် ပြည်သူ့ရေးရာ စီမံခန့်ခွဲသူများနှင့် ၎င်းတို့ လိုအပ်သည့် ကျွမ်းကျင်မှုများအပေါ် ကြီးမားသော သက်ရောက်မှုများရှိပြီး ပြည်သူ့ရေးရာ မူဝါဒချမှတ်ခြင်းနှင့် စီမံခန့်ခွဲခြင်းတို့အကြား အပြန်အလှန် ဆက်နွှယ်ချက်ကို ပို၍ကြီးမားလာစေသည်။ သို့သော် အဓိကလိုအပ်သည့် ကျွမ်းကျင်မှုမှာ ပရော်ဖက်ရှင်နယ်ကျသော လေ့လာသင်ယူရေးနှင့် ဖွံ့ဖြိုးရေးဆိုင်ရာ စွမ်းရည်ဖြစ်သည်။ ပြည်သူ့ရေးရာ မူဝါဒများ ချမှတ်ခြင်းနှင့် စီမံခန့်ခွဲခြင်းတို့အား လုပ်ဆောင်နေသူများအနေဖြင့် ပညာရပ်ဆိုင်ရာဗဟုသုတ၊ လက်တွေ့ကျသော ကျွမ်းကျင်မှု များနှင့် လက်ရှိ ပြည်သူ့ရေးရာ ဝန်ဆောင်မှုအဝန်းအဝိုင်းနှင့်ပတ်သက်သော စိန်ခေါ်မှုများကို ပိုမိုကျယ်ပြန့်စွာ နားလည်မှုတို့အား ပေါင်းစပ်ကျင့်သုံးရမည်ဖြစ်သည်။

ထို့ကြောင့် ပြည်သူ့ရေးရာ မူဝါဒများ ချမှတ်ခြင်းနှင့် စီမံခန့်ခွဲခြင်းတို့အား လုပ်ဆောင်နေသူများအနေဖြင့် ပရော်ဖက်ရှင်နယ်ကျသော ကျွမ်းကျင်မှုများ မရှိမဖြစ် လိုအပ်မည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

 

(သြဂုတ်လ ၁၂ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)

Most Recent