လူငယ်တို့၏ ဖွံ့ဖြိုးမှုနှင့် ခေါင်းဆောင်မှု

လူငယ်တို့၏ ဖွံ့ဖြိုးမှုနှင့် ခေါင်းဆောင်မှု
Published 10 August 2018

လူငယ်တစ်ဦး အနေဖြင့် လူပျိုဖော်/အပျိုဖော် ဝင်ကာစနှင့် အရွယ်ရောက်ပြီးသူ ဘဝ၏ စိန်ခေါ်မှုများအတွက် ပြင်ဆင်ရေးနှင့် ၎င်းတို့၏ အစွမ်းအစ အပြည့်အ၀ ရရှိနိုင်ရေး လုပ်ငန်းစဉ်တစ်ရပ်ကို လူငယ်တို့၏ ဖွံ့ဖြိုးမှုဟု ခေါ်သည်။ လူငယ်တို့၏ ဖွံ့ဖြိုးမှုကို လူမှုရေးဆိုင်ရာ၊ ကျင့်ဝတ်ဆိုင်ရာ၊ စိတ်ခံစားမှုဆိုင်ရာ၊ ရုပ်ပိုင်းဆိုင်ရာနှင့် သိမြင်မှုဆိုင်ရာ ရင့်ကျက်မှုများ ဖွံ့ဖြိုးရေးအတွက် အထောက်အကူပြုသည့် လုပ်ဆောင်ချက်များနှင့် အတွေ့အကြုံများမှတစ်ဆင့် မြှင့်တင်ပေးရသည်။ လူငယ်တို့၏ ခေါင်းဆောင်မှုဟူသည် လူငယ်တို့၏ ဖွံ့ဖြိုးမှုလုပ်ငန်းစဉ် အစိတ်အပိုင်းတစ်ရပ်ဖြစ်ပြီး လူငယ်တို့ကို (လူ့အသိုင်းအဝိုင်း ဘဝ၌ အပြည့်အ၀ ပါဝင်နိုင်ရန်နှင့် အပြုသဘောဆောင်သော လူမှုရေးပြောင်းလဲမှုများအပေါ် ထိရောက်မှုရှိရန်အလို့ငှာ အထောက်အပံ့ကွန်ရက်များ ထူထောင်နိုင်စွမ်း အပါအဝင်) မိမိ၏ အားသာချက်နှင့် အားနည်းချက်များကို သုံးသပ်နိုင်စွမ်း၊ တစ်သီးပုဂ္ဂလဆိုင်ရာနှင့် အသက်မွေးဝမ်းကျောင်းဆိုင်ရာ ရည်မှန်းချက်များ ချမှတ်နိုင်စွမ်းနှင့် မိမိကိုယ်မိမိ လေးစားမှု၊ ယုံကြည်မှု၊ စေ့ဆော်မှုနှင့် ယင်းတို့ကို အကောင်အထည်ဖော်နိုင်စွမ်းတို့ ဖွံ့ဖြိုးလာအောင်လည်းကောင်း၊ အခြားသူများကို လမ်းညွှန်ညွှန်ကြားမှုပြုနိုင်စွမ်း၊ အခြားသူများ၏ ထင်မြင်ချက်များနှင့် အပြုအမူများအပေါ် သြဇာသက်ရောက်နိုင်စွမ်းနှင့် ရိုးလ်မော်ဒယ်တစ်ဦးအဖြစ် ဆောင်ရွက်နိုင်စွမ်းတို့ ဖွံ့ဖြိုးလာအောင်လည်းကောင်း ထောက်ပံ့ပေးရသည်။

ကျန်းမာသန်စွမ်းသော လူငယ်တို့၏ ဖွံ့ဖြိုးမှုကို မြှင့်တင်သည့် အခြေအနေရပ်များအား ကျောင်းများနှင့် လူ့အသိုင်းအဝိုင်းများ၌ အစီအစဉ်များနှင့် လှုပ်ရှားမှုများမှတစ်ဆင့် ထောက်ပံ့ပေးရသည်။ လူငယ်တို့၏ ဖွံ့ဖြိုးမှုကို သုတေသနပြုသူများနှင့် လက်တွေ့ဆောင်ရွက်သူများသည် ထိရောက်သော အစီအစဉ်များနှင့် ပါဝင်ဆောင်ရွက်မှုများက လူငယ်တို့၏ စွမ်းအားများကို အသိအမှတ်ပြုပြီး အပြုသဘောဆောင်သော မြှင့်တင်ရေးနည်းလမ်းများကို ရှာဖွေရသည်ဟူသည့် အချက်အပေါ် အဓိကထားကြသည်။ လေ့လာသင်ယူခြင်းနှင့် ဆောင်ရွက်ခြင်းတို့၌ အပြုသဘောဆောင်လျက် ပါဝင်သည့် လူငယ်များနှင့် အရွယ်ရောက်ပြီးသူများ၊ မိမိတို့နှင့် သက်တူရွယ်တူများတို့နှင့် အပြုသဘောဆောင်စွာ ဆက်သွယ် ဆောင်ရွက်သည့် လူငယ်များတို့သည် မိမိကိုယ်မိမိ ရှုံးနိမ့်စေသည့် အပြုအမူများအတွင်းသို့ ကျရောက်နိုင်ခြေ နည်းပါးသည်။ အပြုသဘောဆောင်သော လူငယ်တို့၏ ဖွံ့ဖြိုးမှုအတွက် အခြေအနေရပ်များကို ထောက်ပံ့ခြင်းသည် မိသားစုများ၊ ကျောင်းများနှင့် လူ့အသိုင်းအဝိုင်းများက မျှဝေယူရမည့် တာဝန်တစ်ရပ်ဖြစ်သည်။

ကောင်းစွာရေးဆွဲထားပြီး ကောင်းစွာဆောင်ရွက်သည့် လူငယ်တို့၏ဖွံ့ဖြိုးမှု အစီအစဉ်များသည် လိုအပ်သော လေ့လာသုံးသပ်မှု၊ စီစဉ်မှု၊ အကောင်အထည်ဖော်မှုနှင့် အကဲဖြတ်မှုများ၌ လူငယ်များကို ပါဝင်စေခြင်းအားဖြင့် လူငယ်တို့၏ခေါင်းဆောင်မှုကို မြှင့်တင်ပေးသည်။ လူငယ်များကို ဦးဆောင်ညွှန်ကြားမှု ဘုတ်အဖွဲ့၌ ထည့်သွင်းသည့် အဖွဲ့အစည်းများ များပြားလာခြင်းသည် ကောင်းသောလက္ခဏာတစ်ရပ်ဖြစ်သည်။ ဝန်ဆောင်မှုများကို လေ့လာသင်ယူခြင်း၊ အနုပညာနှင့် အားကစားကဲ့သို့သော လှုပ်ရှားမှုများမှတစ်ဆင့် အပြုသဘောဆောင်သည့် လုပ်ဆောင်ချက်များ၌ လူငယ်များအားလုံးကို ပါဝင်စေခြင်းနှင့် ချစ်ကြည်ရင်းနှီးမှု၊ နိုင်ငံသားကောင်းပီသမှုနှင့် လေ့လာသင်ယူမှုကဲ့သို့သော ဘုံစံတန်ဖိုးများကို အထူးပြုခြင်းတို့သည် ထိရောက်သော အစီအစဉ်များဖြစ်ကြသည်။

မည်သို့ပင်ဆိုစေကာမူ နိုင်ငံတစ်နိုင်ငံ၏ အနာဂတ်သည် လူငယ်များအပေါ်၌ တည်မှီနေခြင်းဖြစ်သည်နှင့်အညီ လူငယ်တို့၏ ဖွံ့ဖြိုးမှုနှင့် လူငယ်တို့၏ခေါင်းဆောင်မှုကို မြှင့်တင်ပေးရေးသည် နိုင်ငံတစ်နိုင်ငံ၏ ဦးစားပေးလုပ်ငန်းစဉ်တစ်ရပ် ဖြစ်သင့်ပါကြောင်း The Daily Eleven သတင်းစာက ရေးသားအပ်ပါသည်။

သြဂုတ်လ ၁၀ ရက်နေ့ထုတ် The Daily Eleven သတင်းစာ အယ်ဒီတာ့အာဘော်

Most Read

Most Recent