NLD အစိုးရလက်ထက်တွင် လူထုကြားစိုးရိမ်မှုမြင့်ပြီး ဝေဖန်ခံရဆုံးသော အကြောင်းအရာမှာ စီးပွားရေး ကျဆင်းမှုပင်ဖြစ်သည်။ အစိုးရ၏ ရက်တစ်ရာ စီမံကိန်းနောက်ပိုင်းတွင် မြန်မာ့စီးပွားရေးသည် အများမျှော်လင့်သကဲ့သို့ တိုးတက်မြင့်မားလာမည့် အရိပ်အယောင် မတွေ့ရသဖြင့် လူအများကြား ဝေဖန်သံ စတင်ကျယ်လောင်လာခဲ့သည်။ လက်ရှိအချိန်တွင် အစိုးရသက်တမ်း နှစ်နှစ်ကျော် ရောက်ရှိလာသည့်အခါ မြန်မာ့စီးပွားရေးမှာ ပြိုလဲသွားနိုင်သည့် အခြေအနေနှင့် ရင်ဆိုင်လာရသည့်အတွက် တုန်လှုပ်စရာဖြစ်လာသည်ဟု အများက ယူဆလာခဲ့ကြသည်။ ထို့ပြင် အမေရိကန်နှင့် တရုတ်၏ ကုန်သွယ်ရေးတိုက်ပွဲကြားတွင် မြန်မာ့စီးပွားရေး အခြေအနေမှာ တိုးတက်မှု ဖော်ဆောင်ရေးလမ်းစဉ်ထက် တစ်စတစ်စ ယိုင်လဲမသွားအောင် ကျားကန်ကြရတော့မည့် အနေအထား ဖြစ်လာသည်။ လာမည့် ခြောက်လ၊ တစ်နှစ်ကဲ့သို့သော ကာလတိုအတွင်း မိမိတို့လုပ်ငန်းများ ရပ်တန့်မသွားအောင် ရုန်းကန်နေကြရသည်အထိ ဖြစ်လာသည်ဟုပင် စီးပွားရေး အသိုင်းအဝိုင်းကြား ညဉ်းတွားသံများ ကျယ်လောင်လာသည်။ တစ်ဖက်တွင် အချို့သော ကိန်းဂဏန်း အချက်အလက်များအရ မြန်မာ့စီးပွားရေး ကျဆင်းခြင်းမရှိဟု အစိုးရဘက်မှ သုံးသပ်မှုများ ရှိနေခဲ့သည်။

သို့သော်လည်း အစိုးရအနေဖြင့် ဘတ်ဂျက်လိုငွေကို လျှော့ချနိုင်ခြင်းမရှိသည့်အပြင် ယခင်ထက် စံချိန်တင်လိုငွေပြနေမှုက တိုင်းပြည်အတွက် ရင်လေးစရာဖြစ်နေသည်။ မြန်မာကျပ်ငွေတန်ဖိုး နိမ့်ကျနေမှုကို ထိန်းချုပ်ရန် ခက်ခဲနေပြန်သည်။ ကမ္ဘာ့ဒေါ်လာဈေး အညွှန်းကိန်း ကျသွားသော်လည်း ဒေါ်လာလဲနှုန်းမှာ ကျသွားခြင်းမရှိဘဲ ပြီးခဲ့သည့်ရက်ပိုင်းအတွင်း သမိုင်းတစ်လျှောက် မရှိဖူးသော စံချိန်တင်ဈေးနှုန်းအဖြစ် တစ်ဒေါ်လာ ၁၄၇၀ ကျော် ရောက်ရှိခဲ့သည်။ ယင်းသို့ မြန်မာကျပ်ငွေတန်ဖိုး ကျဆင်းမှုကို ထိန်းချုပ်နိုင်ခြင်းမရှိပါက တစ်ဒေါ်လာ ၁၅၀၀၊ ၂၀၀၀ ကျပ်သို့ ရောက်ရှိသွားလျှင် စီးပွားရေးလုပ်ငန်းများ ကြီးမားသောဂယက်ဖြင့် ရင်ဆိုင်ရမည်ဖြစ်သည်။ ဗဟိုဘဏ် အနေဖြင့် ပြည်တွင်းပုဂ္ဂလိက ဘဏ်များသို့ ဒေါ်လာဈေး စံချိန်တင်မြင့်တက်မှုကို ထိန်းချုပ်ရန် ရည်ရွယ်၍ စတင်ရောင်းချပေးနေသည်ဟု သတင်းများ ထွက်ပေါ်လာခဲ့သည်။ သို့သော်လည်း တစ်ရက်လျှင် ဒေါ်လာ ငါးသောင်းမှ တစ်သိန်းကြားခန့်သာ ရောင်းချပေးမည်ဆိုပါက ငွေကြေးဈေးကွက် အနေအထားအပေါ် ထူးထူးခြားခြား ပြောင်းလဲနိုင်စွမ်းရှိလိမ့်မည် မဟုတ်ဟု သုံးသပ်နေကြသည်။

မြန်မာ့စီးပွားရေးကဏ္ဍတွင် အလားအလာအကောင်းဆုံးဟု သုံးသပ်ခံရသော အထည်ချုပ်လုပ်ငန်းများ၏ အခြေအနေသည်ပင်လျှင် လက်ရှိအချိန်၌ အလားအလာ ကောင်းမွန်ခြင်းမရှိသည်ကို တွေ့ရသည်။ တချို့သော စက်ရုံများ ပြောင်းရွှေ့ပိတ်သိမ်းမှုများ ရှိနေသည်ဆိုသည့် သတင်းများကလည်း မြန်မာ့စီးပွားရေး အတက်အကျအပေါ် အကဲဖြတ်နိုင်လိမ့်မည်ဖြစ်သည်။ နိုင်ငံတကာမှ ရင်းနှီးမြှုပ်နှံမှုများ မျှော်မှန်းသကဲ့သို့ ဝင်ရောက်လာခြင်း မရှိသည့် အခြေအနေတွင် အစိုးရအနေဖြင့် အသုံးစရိတ် လျှော့ချနိုင်မှုမရှိခြင်း၊ ငွေကြေးဖောင်းပွမှု မြင့်မားနေခြင်းနှင့် မြန်မာကျပ်ငွေတန်ဖိုး နှစ်နှစ်ကျော်အတွင်း ရာခိုင်နှုန်း ၂၀ မှ ၃၀ ကြားအထိ ကျဆင်းနေခြင်းတို့သည် စိုးရိမ်စရာဖြစ်နေသည်။ ထိုအခြေအနေများကြောင့်လည်း မကြာသေးမီက လွှတ်တော်တွင် ဝန်ကြီးဌာနအသီးသီး၏ ဘတ်ဂျက်တောင်းခံမှုများကို မလိုအပ်ပါက စိစစ်ဖြတ်တောက်ရန် ပြည်သူများအကြား ဝေဖန်တောင်းဆိုနေကြခြင်း ဖြစ်သည်။

ဇူလိုင်လလယ်တွင် ဒေါ်လာဈေးနှုန်း ၁၄၄၀ ကျော်ရှိနေချိန်တွင် စီးပွားရေး အသိုင်းအဝိုင်းအတွင်း၌ မကြာမီ တစ်ဒေါ်လာ ၁၅၀၀ ကျပ်သို့ မြင့်တက်လာနိုင်သည်ဟု သုံးသပ်ခဲ့ကြသည်။ ယခုသြဂုတ်လဆန်းတွင် ဖြစ်ပေါ်ခဲ့သော ငွေလဲနှုန်းအရ တစ်ဒေါ်လာ ၁၅၀၀ ကျပ်အနီးသို့ ရောက်ရှိလာခဲ့သည်ကို တွေ့ရသည်။ ထိုသို့ မြန်မာကျပ်ငွေတန်ဖိုး တရိပ်ရိပ် ကြောက်စရာကောင်းအောင် ကျဆင်းနေသည့်အချိန်တွင် အစိုးရဘတ်ဂျက်လိုငွေမှာ ကျပ်ဘီလျံ ၅၀၀၀ နီးပါး ရှိနေသည်ဆိုသည့်အချက်မှာ တိုင်းပြည်စီးပွားရေးအတွက် များစွာစိုးရိမ်စရာကောင်းလှသည်။ သို့ဖြစ်ရာ အစိုးရအနေဖြင့် ပြည်သူများ စီးပွားရေးအကျပ်အတည်းနှင့် ရင်ဆိုင်နေရချိန်တွင် ဘတ်ဂျက်သုံးစွဲမှုကို ယခင်ထက်ပို၍ စနစ်တကျ အလေအလွှင့်မရှိရန် ထိန်းသိမ်းသင့်ပါကြောင်းနှင့် အချို့သောဝန်ကြီးဌာနများ၏ လူထုအတွက် မလိုအပ်ဘဲ ဘဏ္ဍာငွေသုံးစွဲမှုများအပေါ် တိတိကျကျ စိစစ်ရန် လိုအပ်မည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

သြဂုတ်လ ၉ ရက်နေ့ထုတ် The Daily Eleven သတင်းစာ အယ်ဒီတာ့အာဘော်