အဂတိလိုက်စားမှုနှင့် ရာဇဝတ်မှုများ

အဂတိလိုက်စားမှုနှင့် ရာဇဝတ်မှုများ
Published 7 August 2018

အဂတိလိုက်စားမှုနှင့် ရာဇဝတ်မှုတို့သည် အတူတကွ အမြဲယှဉ်တွဲ နေတတ်သည်ကား မဟုတ်ပေ။ ထို့အတူ တူညီသော အဆုံးအဖြတ်ပေးသည့် အရာများရှိသည် သို့မဟုတ် တူညီသော ဗျူဟာများနှင့် နည်းလမ်းများကို တုံ့ပြန်မှုရှိသည် ဟူသော အချက်များမှာလည်း အမြဲတမ်း မှန်ကန်ခြင်း မရှိပေ။ အဂတိလိုက်စားသည့် အာဏာရှင်နိုင်ငံမှ ရဲတပ်ဖွဲ့သည် ဖြစ်ပွားနေကျ ရာဇဝတ်မှုများကို ထိန်းချုပ်နိုင်စွမ်း ရှိတတ်ကြသည်။ သို့သော် အဂတိလိုက်စားမှု တိုက်ဖျက်ရေး၌ ကျေနပ်ဖွယ် မှတ်တမ်းရှိသည့် နိုင်ငံများ၌ ဖြစ်ပွားနေကျ ရာဇဝတ်မှုများမှာ စိန်ခေါ်မှုများ ဖြစ်နေတတ်သည်။

အလုပ်လက်မဲ့နှုန်း မြင့်မားသော၊ လူမှု-စီးပွား တန်းတူညီမျှမှုမရှိခြင်း ကြီးမားသော နေရာများ၌ ရာဇဝတ်မှု ဖြစ်ပွားမှုနှုန်း မြင့်မားတတ်သည်။ အရပ်ဘက် လွတ်လပ်ခွင့်၊ စာနယ်ဇင်း လွတ်လပ်ခွင့်၊ ပွင့်လင်းမြင်သာမှုနှင့် ပြိုင်ဆိုင်မှုရှိသည့် နိုင်ငံရေး ကင်းမဲ့သော နေရာများ၌မူ အဂတိလိုက်စားမှု ကြီးမားတတ်သည်။ ရာဇဝတ်မှုနှင့် အဂတိလိုက်စားမှု နှစ်ခုစလုံးကို ထိန်းချုပ်ရန်အတွက် တရားဥပဒေစိုးမိုးရေးက အရေးပါသည်။ သို့သော် ကွာခြားချက်မှာ နိုင်ငံရေးဆိုင်ရာ အဂတိလိုက်စားမှုများကို တိုက်ဖျက်ရာ၌ လွတ်လပ်သည့် တရားစီရင်ရေးစနစ်သည် အရေးကြီးပြီး သေးဖွဲသည့် အဂတိလိုက်စားမှုများနှင့် ဖြစ်ပွားနေကျ ရာဇဝတ်မှုများအတွက် ထိရောက်သည့် ရဲတပ်ဖွဲ့က အရေးပါသည်။

ဖြစ်ပွားနေကျ ရာဇဝတ်မှုများနှင့် အဖွဲ့လိုက် စုစည်းကျူးလွန်သည့် ရာဇဝတ်မှုများအကြား ၎င်းတို့ ဖြစ်ပွားစေရန် ဆုံးဖြတ်ပြဋ္ဌာန်းသည့် အရာများမှာ ကွဲပြားခြားနားချက် ရှိသည်။ အဖွဲ့လိုက် စုစည်းကျူးလွန်မှု ရာဇဝတ်မှုများသည် အဂတိလိုက်စားမှုများနှင့် ပို၍ ပတ်သက်သည်။ ဥပမာအားဖြင့် မူးယစ်ဆေး မှောင်ခိုကုန်ကူးသူူများနှင့် လက်နက်မှောင်ခိုကုန်သည်များသည် တရားဥပဒေစိုးမိုးမှု အားနည်းသော နိုင်ငံများရှိ အဂတိလိုက်စားသော အာဏာပိုင်များနှင့် ပတ်သက်လျက် ရှိသည်။

ရာဇဝတ်မှုနှင့် အဂတိလိုက်စားမှုဆိုင်ရာ ကွဲပြားခြားနားသော သရုပ်သကန်များအား တိုက်ဖျက်ရန် မဟာဗျူဟာများမှာလည်း တစ်ခုနှင့်တစ်ခု ကွဲပြားခြားနားကြသည်။ သက်ဆိုင်ရာနိုင်ငံ၏ ဆက်နွှယ် ပတ်သက်နေသော အကြောင်းခြင်းရာများနှင့် ယှဉ်တွဲလျက် ရှိသည်။ ဖြစ်ပွားနေကျ ရာဇဝတ်မှုများကို တိုက်ဖျက်ရန် လူမှု-စီးပွား တိုးတက်မှုများကို မျှဝေရေးပေါ်၌ လည်းကောင်း၊ လူငယ်များအကြား အလုပ်လက်မဲ့ဖြစ်မှုနှုန်း လျှော့ချရေးအပေါ်၌ လည်းကောင်း၊ ရဲတပ်ဖွဲ့၏ ထိရောက်မှုကို တိုးမြှင့်ရေးအပေါ်၌ လည်းကောင်း အဓိကထားရန် အရေးကြီးသည်။ တရားရေးဆိုင်ရာ အဂတိလိုက်စားမှုများကို တိုက်ဖျက်ရန် ပွင့်လင်းမြင်သာမှု ရှိအောင် ပြုပြင်ပြောင်းလဲမှုများ ပြုလုပ်ရေးအပေါ်၌ အဓိကထားရန် လိုအပ်သည်။

အထူးသဖြင့် အသွင်ကူးပြောင်းရေး လုပ်ဆောင်နေသော နိုင်ငံများတွင် နိုင်ငံသားများ၊ အရပ်ဘက် လူ့အဖွဲ့အစည်းများ၊ လွတ်လပ်သော မီဒီယာများနှင့် အစိုးရအရာရှိများအပေါ် ပို၍ လက်တွေ့ကျသော ချဉ်းကပ်မှုမျိုး ပြုလုပ်ရန် လိုသည်။ ၎င်းတို့ အားလုံးသည် အဂတိလိုက်စားမှုများနှင့် အဖွဲ့လိုက် စုစည်းကျူးလွန်သည့် ရာဇဝတ်မှုများကို ထိန်းချုပ်ရေး၌ အရေးပါသည်။ အဂတိလိုက်စားမှုများနှင့် အဖွဲ့လိုက် စုစည်းကျူးလွန်သည့် ရာဇဝတ်မှုများသည် နယ်စည်းမခြားဘဲ ကျူးလွန်မှုများ ဖြစ်သည်။ ယင်းတို့ကို အစိုးရယန္တရားများအပြင် လူ့အဖွဲ့အစည်းနှင့် မီဒီယာတို့၏ ထောက်ကူမှုအားဖြင့် ပြည်တွင်း၌ ထိန်းချုပ်နိုင်သည်။ နိုင်ငံတကာအဆင့်၌မူ ပူးပေါင်းဆောင်ရွက်မှုနှင့် အပြန်အလှန် နားလည်မှုများ လိုအပ်သည်။

မည်သို့ပင် ဆိုစေကာမူ အဂတိလိုက်စားမှုနှင့် ရာဇဝတ်မှု နှစ်ရပ်စလုံးအား တိုက်ဖျက်ရေးသည် ဖွံ့ဖြိုးတိုးတက်သော နိုင်ငံတစ်နိုင်ငံ ဖြစ်လာရေး၌ မဖြစ်မနေ ဦးစားပေး လုပ်ဆောင်ရမည့် ကိစ္စရပ်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

သြဂုတ်လ ၇ ရက်နေ့ထုတ် The Daily Eleven သတင်းစာ အယ်ဒီတာ့အာဘော်

Most Read

Most Recent