နိုင်ငံတစ်နိုင်ငံ၏ ငွေကြေး လဲလှယ်နှုန်းကို ပုံသေထိန်းသိမ်းထားရန် ယင်းနိုင်ငံ၏ ဗဟိုဘဏ်၌ နိုင်ငံခြားငွေကြေး အရန်ငွေ အလုံအလောက် ရှိပါ၏လောဟူ၍ ပြင်းထန်သော သံသယတည်ရှိနေသည့် အနေအထားတစ်ရပ်ကို ငွေကြေးအကျပ်အတည်းဟု ခေါ်သည်။ ယင်း အကျပ်အတည်းသည် နိုင်ငံခြားငွေလဲလှယ်မှု ဈေးကွက်၌ ဈေးကစားကာ တိုက်ခိုက်မှုနှင့် ယှဉ်တွဲဖြစ်ပေါ်တတ်သည်။ ငွေကြေး အကျပ်အတည်းတစ်ရပ်သည် ရေရှည်ပေးချေသည့်ငွေမျှခြေ ပျက်ယွင်းခြင်းမှ လာသောကြောင့် ပေးချေသည့်ငွေကြေးဆိုင်ရာ မျှခြေဟုလည်း ခေါ်ဆိုသည်။ ယင်းကဲ့သို့သော အကျပ်အတည်းတစ်ရပ်သည် ငွေကြေးတန်ဖိုး ကျဆင်းခြင်း ရလဒ်ဖြင့် အဆုံးသတ်သည်။
ငွေကြေး အကျပ်အတည်းတစ်ရပ်သည် ဘဏ္ဍာရေးဆိုင်ရာ အကျပ်အတည်း အမျိုးအစားတစ်ရပ်ဖြစ်ပြီး စီးပွားရေး အကျပ်အတည်းစစ်စစ်တစ်ရပ်နှင့်အတူ ပူးတွဲဖြစ်ပေါ်တတ်သည်။ ငွေကြေးအကျပ်အတည်းတစ်ရပ်သည် ဘဏ်လုပ်ငန်း အကျပ်အတည်း တစ်ရပ် သို့မဟုတ် အကြွေးအကျပ်အတည်းတစ်ရပ် ဖြစ်ပေါ်နိုင်ခြေကို မြင့်တက်စေသည်။ ငွေကြေးအကျပ်အတည်းတစ်ရပ်အတွင်း ပြည်တွင်းသုံးငွေကြေးတန်ဖိုး ကျဆင်းခြင်းနှင့် ဆက်နွှယ်လျက် နိုင်ငံခြားငွေကြေးဖြင့် သတ်မှတ်ထားသော အကြွေးတန်ဖိုး သိသိသာသာ မြင့်တက်လာလိမ့်မည်ဖြစ်သည်။ ဘဏ္ဍာရေးဆိုင်ရာ အင်စတီကျူးရှင်းများ နှင့် အစိုးရတို့သည် ပေးဆပ်ရန်ရှိသည့် အကြွေးများ ပြည့်မီစေရန် ရုန်းကန်ရမည်ဖြစ်ပြီး စီးပွားရေးအကျပ်အတည်း ဖြစ်ပေါ်လာနိုင်သည်။ အကျိုးတရားတစ်ရပ်သည်လည်း အခြားလမ်းကြောင်းတစ်ရပ်ကို ဖြစ်စေသည်။ နိုင်ငံတစ်နိုင်ငံအနေဖြင့် ဘဏ်လုပ်ငန်း အကျပ်အတည်း သို့မဟုတ် အကြွေးအကျပ်အတည်းတစ်ရပ် ကြုံတွေ့ရသည့်အခါ ငွေကြေး အကျပ်အတည်းတစ်ရပ် ဖြစ်နိုင်ခြေသည် မြင့်တက်၍လာသည်။ ဘဏ်လုပ်ငန်းအကျပ်အတည်း သို့မဟုတ် အကြွေးအကျပ်အတည်းကြောင့် ထိခိုက်ရမှုကို ကာမိစေရန် ဗဟိုဘဏ်သည် ငွေကြေးအာမခံထားမှုကို တိုးမြှင့်ရတတ်သည်။ ယင်းသည် ကန့်သတ်ငွေလဲ နှုန်းဖြစ်ပေါ်သည့် အဆင့်တစ်ဆင့်အထိ အရန်ငွေကြေးကို ကျဆင်းစေနိုင်သည်။ ငွေကြေး အကျပ်အတည်း၊ ဘဏ်လုပ်ငန်းအကျပ်အတည်းနှင့် အကြွေး အကျပ်အတည်းတို့ ပေါင်းဆုံသွားမှုက နှစ်မြွှာပူး အကျပ်အတည်း သို့မဟုတ် သုံးမြွှာပူးအကျပ်အတည်းတို့ ဖြစ်နိုင်ခြေကို မြင့်တက်စေပြီး လူတစ်ဦးချင်းတိုင်း၏ စီးပွားရေးကုန်ကျစရိတ် အကျပ်အတည်းကို ကြီးထွားစေနိုင်သည်။
အစိုးရအဖွဲ့များသည် မိမိနိုင်ငံ၏ ငွေကြေးအရန်ငွေ သို့မဟုတ် နိုင်ငံခြားငွေကြေး အရန်ငွေ (အမေရိကန်ဒေါ်လာ သို့မဟုတ် ယူရိုငွေ သို့မဟုတ် စတာလင်ပေါင်) တို့ကို အသုံးပြုလျက် သက်ဆိုင်ရာ ငွေကြေးတစ်ရပ်အတွက် အပိုဝယ်လိုအားကို ပြည့်မီအောင် ပြုလုပ်ခြင်းဖြင့် ငွေကြေးဈေးကစား တိုက်ခိုက်မှုများကို ကာကွယ်တားဆီးရေး အခန်းကဏ္ဍအား တာဝန်ယူရတတ်သည်။ ငွေကြေးအကျပ်အတည်းများသည် စီးပွားရေးစနစ်တစ်ရပ်အပေါ် ကြီးမားပြီး တိုင်းတာ၍ရသော ထိခိုက်မှုများ ဖြစ်စေနိုင်သော်လည်း အကျပ်အတည်းများ၏ အချိန်ကိုက်မှုနှင့် ပမာဏအား ကြိုတင်တွက်ချက်နိုင်စွမ်းသည် မက်ခရိုစီးပွားရေးအုတ်မြစ်များ၊ ရင်းနှီးမြှုပ်နှံသူတို့၏ မျှော်လင့်ချက်များနှင့် အစိုးရမူဝါဒတို့အကြား ရှုပ်ထွေးသည့် ဆက်နွှယ်ချက်များအား သဘောတရားဆိုင်ရာအရ နားလည်မှုအားဖြင့် အကန့်အသတ်ရှိသည်။ ငွေကြေးအကျပ်အတည်းတစ်ရပ်သည် လက်ရှိအာဏာရယူထားသူများအပေါ် နိုင်ငံရေးဆိုင်ရာ ဂယက်ရိုက်ခတ်မှုများ ရှိသည်။ ငွေကြေး အကျပ်အတည်းတစ်ရပ်၏နောက်၌ အစိုးရအဖွဲ့ ခေါင်းဆောင်အပြောင်းအလဲနှင့် ဘဏ္ဍာရေး ဝန်ကြီး အပြောင်းအလဲများအပြင် ဗဟိုဘဏ်အုပ်ချုပ်ရေးမှူး အပြောင်းအလဲများ ဖြစ်ပေါ်နိုင်ခြေရှိသည်။
မည်သို့ပင်ဆိုစေကာမူ နိုင်ငံတစ်နိုင်ငံ၏ ငွေကြေးအကျပ်အတည်းတစ်ရပ်သည် အဆိုပါနိုင်ငံ၏ စီးပွားရေးအပေါ်တွင်သာမက နိုင်ငံရေးအပေါ်သို့ပါ ကြီးစွာသောဂယက်ရိုက်ခတ်မှုများ ဖြစ်ပေါ်စေနိုင်သည်ကို သတိပြုရန်လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
(သြဂုတ်လ ၅ ရက်နေ့ထုတ် The Daily Eleven သတင်းစာ၏ အယ်ဒီတာ့ အာဘော်)
