မကျေနပ်ချက်နှင့် ပဋိပက္ခများကို ဖြေရှင်းခြင်း

မကျေနပ်ချက်နှင့် ပဋိပက္ခများကို ဖြေရှင်းခြင်း
Published 29 July 2018

ဝန်ထမ်းများအကြား ပဋိပက္ခများကို ဖြေရှင်းခြင်းနှင့် အငြင်းပွားမှုများ မဖြစ်ပေါ်ရန် ကာကွယ်ခြင်းတို့အား သိရှိခြင်းသည် စီမံခန့်ခွဲမှုလုပ်ငန်းတစ်ရပ်၌ လွန်စွာအရေးကြီးသည်။ ဝန်ထမ်းများနှင့် ပဋိပက္ခသည် မကျေမချမ်းဖြစ်မှုဆီသို့ ဦးတည်သွားစေနိုင်ပြီး ကျေနပ်မှုမရှိသည့် ဝန်ထမ်းများသည် ၎င်းတို့၏ အလုပ်များကို အကောင်းဆုံး ပြုလုပ်နိုင်လိမ့်မည် မဟုတ်ပါ။ ဝန်ထမ်းများနှင့် ပြဿနာဖြစ်ပွားနိုင်ခြေကို လျှော့ချရန်အတွက် အကြံပေးမှု ရှစ်ခုရှိသည်။

အစီအစဉ်တစ်ရပ် ဖွံ့ဖြိုးအောင်ပြုလုပ်ခြင်း - ဝန်ထမ်းများအား မိမိက ပြီးမြောက်အောင်ပြုလုပ်စေလိုသည့်  အရာများအား အစီအစဉ်တစ်ရပ်ရေးဆွဲပါ။ စီးပွားရေးစွမ်းဆောင်ရှင်တစ်ဦးသည် မိမိကုမ္ပဏီ၏ ဦးတည်ရာကို သိရှိရမည်ဖြစ်ပြီး ယင်းကို ချရေးနိုင်စွမ်းလည်း ရှိရမည်ဖြစ်သည်။ ထိရောက်သည့် လုပ်ငန်းအစီအစဉ်တစ်ရပ် ဖွံ့ဖြိုးအောင် ပြုလုပ်ခြင်းသည် အချိန်နှင့်ငွေ သက်သာစေသည်။ ယင်းကဲ့သို့ အစီအစဉ်ချထားခြင်းသည်  ကုမ္ပဏီတစ်ရပ်အောင်မြင်ရေးအတွက် အလွန်အရေးပါသည်။

ထိထိရောက်ရောက် ဆက်ဆံဆောင်ရွက်ခြင်း -  နောက်တစ်ဆင့်အနေဖြင့် ချမှတ်ထားသည့် အစီအစဉ်ကို မန်နေဂျာများ၊ အခြားဝန်ထမ်းများထံ မျှဝေရမည်ဖြစ်သည်။ ၎င်းတို့ လုပ်ဆောင်ရန် လိုအပ်သည့်အရာများကို လူတိုင်းအား အသိပေးရမည်ဖြစ်သည်။ စီမံကိန်းမန်နေဂျာများအား ချန်မထားဘဲ အကုန်အစင် ရှင်းပြရမည်ဖြစ်သည်။ အခြားဝန်ထမ်းများကိုလည်း အလားတူ ဆက်ဆံဆောင်ရွက်ရန် လိုသည်။

နားထောင်ခြင်း - ဝန်ထမ်းများက ပြောဆိုသည့်အရာများကို ဂရုစိုက် နားထောင်ရမည်ဖြစ်သည်။ မိမိထံ၌ အဖြေများအားလုံး ရှိသည်ဟု မှတ်ယူခြင်း မပြုပါနှင့်။ ဝန်ထမ်းများ အား မေးခွန်းများမေးရန် အားပေးပြီး ၎င်းတို့ ပြောကြားသည်များကို ဂရုတစိုက် နားထောင်ရမည်ဖြစ်သည်။ အချို့ကိစ္စများ၌ မိမိသည်လည်း မှားယွင်းနိုင်သည်ကို ဝန်ခံရန် ဝန်မလေးပါနှင့်။ မိမိနှင့် သဘောမတူသူများနှင့်  အပြင်းအထန် ငြင်းခုံခြင်းကို ရှောင်ကြဉ်ပါ။

မိမိ၏ အမှားများကို ဝန်ခံခြင်း - စီးပွားရေးစွမ်းဆောင်ရှင်အချို့သည် မိမိတို့သာ အရာရာကို သိရှိသည်ဟု ထင်တတ်ကြပြီး ဝန်ထမ်းများအနေဖြင့် ကုမ္ပဏီ၏ ရည်မှန်းချက်များကို အဓိပ္ပာယ်ရှိစွာ ပါဝင်ဆောင်ရွက်ရန် ကျွမ်းကျင်မှုမရှိဟု ထင်မှတ်တတ်ကြသည်။  မိမိအနေဖြင့် အမြဲတမ်းမမှန်နိုင်သည်ကို သတိပြုရန် လိုသည်။ ဝန်ထမ်းများက မျှတ၊ ရိုးသားပြီး မိမိ၏ အမှားကို ဝန်ခံရန် ဆန္ဒရှိသူများအတွက် အလုပ်လုပ်ပေးရခြင်းကို နှစ်သက်ကြသည်။

မျက်နှာလိုက်မှုကို ရှောင်ကြဉ်ခြင်း - မကျေနပ်ချက်များဖြစ်ပေါ်စေသည့် လမ်းကြောင်းတစ်ရပ်မှာ အချို့ဝန်ထမ်းများကို အခြားဝန်ထမ်းများထက် ပို၍ကောင်းမွန်စွာ ဆက်ဆံခြင်း ဖြစ်သည်။  လူတိုင်းသည် မိမိ၏ အဖွဲ့အစည်းဝင်များဖြစ်သောကြောင့် ဝန်ထမ်းတိုင်းကို မျှတစွာဆက်ဆံပြီး တူညီသည့်အခွင့်အရေးများ အာမခံပေးရန်လိုသည်။ ယင်းကဲ့သို့ ပြုလုပ်ခြင်းအားဖြင့် ဝန်ထမ်းများအကြား တစ်ဦးနှင့်တစ်ဦး မနာလိုမှုများ ဖြစ်ပေါ်ခြင်းကို ကာကွယ်နိုင်သည်။

ချီးကျူးမှုပြုလုပ်ခြင်း - အလုပ်ကို ကောင်းမွန်စွာ ပြုလုပ်သည့် ဝန်ထမ်းများကို ချီးကျူးမှု ပြုလုပ်ပါ။ ဝန်ထမ်းတိုင်းသည် ချီးကျူးအားပေးခြင်းကို မလိုလားဟု မှတ်ယူခြင်း မပြုပါနှင့်။ အနည်းဆုံး ကျေးဇူးတင်ကြောင်း ရိုးရှင်းစွာ ပြောပါလေ။ ဝန်ထမ်းများအား ကျေနပ်ရရှိစေပြီး ၎င်းတို့၏ လုပ်ဆောင်ချက်များကို အသိအမှတ်ပြုသည်ဟု ခံစားရပါစေ။

ပဋိပက္ခဖြစ်နိုင်ခြေများကို လျှော့ချခြင်း - အရာရာတိုင်းသည် အစဉ်အမြဲ ချောမွေ့တတ်သည် မဟုတ်ပေ။ မိမိဝန်ထမ်းများအကြား ပြဿနာဖြစ်ပွားနိုင်ခြေတစ်ရပ် ပေါ်ထွက်လာပါက ဖြေရှင်းရန် နည်းလမ်းတစ်ရပ်ကို ရှာဖွေရန် ချက်ချင်းကြိုးစားပါ။ ပဋိပက္ခဖြစ်ပွားနိုင်ခြေများအား သီတင်းတစ်ပတ်ပြီးတစ်ပတ်ကြာအောင် အချိန်ဆွဲမထားပါနှင့်။ အငြင်းပွားမှုများကို ကာကွယ်ရန် မိမိ၏ ပြဿနာဖြေရှင်းရေး ကျွမ်းကျင်မှုစွမ်းရည်ကို အသုံးပြုပါ။  စိတ်ကိုဖွင့်ထားလျက် အခြားသူတစ်ဦးထံမှ ပေါ်ထွက်လာနိုင်သည့်အရာကို မြင်တွေ့ရအောင် ကြိုးစားပါ။

ဆွဲဆောင်မှုပြုလုပ်ခြင်း - ကုမ္ပဏီတစ်ခု၌ အချို့သောအလုပ်များသည် ထပ်ကာထပ်ကာ လုပ်ရသည့် သဘောရှိသည်။ ထိုအခါ ဝန်ထမ်းများအား ပျင်းရိငြီးငွေ့သွားစေနိုင်သည်။ ပျင်းရိငြီးငွေ့မှု လျော့ကျစေရန် ဝန်ထမ်းများအား လုပ်ငန်းတာဝန်မျိုးစုံ ပြုလုပ်တတ်အောင်  လေ့ကျင့်ပေးပြီး အလုပ်ကြိုးစားမှုအတွက် အပိုဝင်ငွေရရှိသည့် မက်လုံးပေးသည့် အစီအ စဉ်များ ထားရှိရန် လိုသည်။ အပိုလုပ်ရသည့် အလုပ်များအတွက် အမြဲတမ်း တစ်စုံတစ်ရာ ချီးမြှင့်ရန် လိုသည်။

မည်သို့ပင်ဆိုစေကာမူ စီမံခန့်ခွဲရသည့် လုပ်ငန်းတစ်ရပ်တွင် ဝန်ထမ်းများအကြား ပဋိပက္ခများကို ဖြေရှင်းခြင်းနှင့် အငြင်းပွားမှုများ မဖြစ်ပေါ်ရန် ကာကွယ်ခြင်းတို့သည် လွန်စွာအရေးကြီးပါကြောင်း The Daily Eleven သတင်းစာက ရေးသားအပ်ပါသည်။

(ဇူလိုင် ၂၉ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)

Most Read

Most Recent