ဘဏ္ဍာရေးဟူသည် . . .

ဘဏ္ဍာရေးဟူသည် . . .
Published 25 July 2018

ဘဏ္ဍာရေးဟူသည် စီးပွားရေး၏ လက်တက်တစ်ခုဟု ဆိုနိုင်သည်။ ဘဏ္ဍာရေးစနစ်များကို ဖွဲ့စည်းထားသော ငွေကြေး၊ ဘဏ်လုပ်ငန်း၊ ဘဏ်စာရင်းရှိငွေ၊ ရင်းနှီးမြှုပ်နှံမှု၊ ပိုင်ဆိုင်မှုနှင့် ပေးဆပ်ရန်ရှိငွေ အစရှိသည်တို့နှင့် ပတ်သက်၍ စီမံခန့်ခွဲခြင်း၊ ဖန်တီးခြင်းနှင့် လေ့လာခြင်းတို့သည် ဘဏ္ဍာရေးလုပ်ငန်းများ ဖြစ်ကြသည်။ ၎င်းအပြင် ဘဏ္ဍာရေးဆိုင်ရာ တိုင်းတာသည့် အရာများအား လေ့လာခြင်းသည်လည်း ဘဏ္ဍာရေးပင် ဖြစ်သည်။ ဘဏ္ဍာရေးကို ပြည်သူ့ဘဏ္ဍာရေး၊ ကော်ပိုရေးရှင်းဘဏ္ဍာရေးနှင့် ပုဂ္ဂလိကဆိုင်ရာ ဘဏ္ဍာရေးဟူ၍ သုံးမျိုးခွဲခြားနိုင်သည်။ ဘဏ္ဍာရေးသည် အထူးသဖြင့် ဈေးနှုန်းများ၊ အတိုးနှုန်းများ၊ ငွေကြေးစီးဆင်းမှုများနှင့် ဘဏ္ဍာရေးဆိုင်ရာ ဈေးကွက်များအား လေ့လာခြင်းအပေါ်၌ အဓိကထားသည်။ ပို၍ကျယ်ပြန့်စွာ တွေးကြည့်လျှင် ဘဏ္ဍာရေးသည် ငွေကြေး၏ အချိန်တန်ဖိုး၊ အမြတ်အစွန်းနှုန်း၊ အရင်းအနှီးကုန်ကျမှု၊ အကောင်းဆုံးဘဏ္ဍာရေး အဆောက်အအုံများနှင့် အန္တရာယ်ဖြစ်နိုင်ခြေများကို ရေတွက်ခြင်းတို့ ပါဝင်သော ကိစ္စရပ်များဆီသို့ ဦးတည်သွားသည်။

ကော်ပိုရေးရှင်းဘဏ္ဍာရေး အဖြစ်ကြည့်လျှင် ပိုင်ဆိုင်မှုများ၊ အကြွေးဆပ်ရန်ကိစ္စများ၊ အမြတ်ငွေများနှင့် အကြွေးများကို လုပ်ငန်းတစ်ရပ်အတွက် စီမံခန့်ခွဲမှုများ ပါဝင်သည်။ လုပ်ငန်းများအနေဖြင့် ဘဏ္ဍာငွေထူထောင်ခြင်းကို ရှယ်ယာရင်းနှီးမြှုပ်နှံမှုများမှသည် အကြွေးစနစ်များကို စီမံခြင်းအထိ အတိုင်းအတာ ကျယ်ပြောလှသော နည်းလမ်းအမျိုးမျိုးမှတစ်ဆင့် ရရှိနိုင်သည်။ ကုမ္ပဏီတစ်ခုအနေဖြင့် ဘဏ်တစ်ခုမှ ငွေချေးနိုင်သကဲ့သို့ ဘဏ်စာရင်းများကို စီမံခြင်းကိုလည်း ပြုလုပ်နိုင်သည်။ အကြွေးယူခြင်းနှင့် အကြွေးများကို စီမံခြင်းတို့အား စနစ်တကျ ပြုလုပ်နိုင်ခြင်းသည် ကုမ္ပဏီတစ်ခုအား ကြီးထွားအောင် ချဲ့ထွင်ရာ၌လည်းကောင်း၊ အကျိုးအမြတ် ပိုမိုရရှိအောင် ပြုလုပ်ရာ၌လည်းကောင်း အထောက်အကူပြုနိုင်သည်။ ပုဂ္ဂလိကဘဏ္ဍာရေးကိုကြည့်လျှင် လူပုဂ္ဂိုလ်တစ်ဦး သို့မဟုတ် အိမ်ထောင်စုတစ်စု၏ ဘဏ္ဍာရေးဆိုင်ရာ ဆုံးဖြတ်ချက်များအားလုံးနှင့် လုပ်ဆောင်ချက်များ အားလုံးပါဝင်သည်။ ယင်းတို့မှာ ဘတ်ဂျက်ချမှတ်ခြင်း၊ အာမခံထားရှိခြင်း၊ ပေါင်နှံမှုများကို စီမံခြင်း၊ ငွေစုခြင်းနှင့် အငြိမ်းစားယူရန် အစီအစဉ်ချခြင်းတို့ ဖြစ်ကြသည်။ ပြည်သူ့ဘဏ္ဍာရေး၌ အခွန်စနစ်များ၊ အစိုးရအသုံးစရိတ်များ၊ ဘတ်ဂျက်လုပ်ငန်းစဉ်များ၊ မူဝါဒနှင့် တိုင်းတာမှုဆိုင်ရာ တည်ငြိမ်ရေးများ၊ အြေ0ွကးကိစ္စများနှင့် အခြားအစိုးရကိစ္စများ ပါဝင်သည်။

ဘဏ္ဍာရေးဘွဲ့ဒီဂရီတစ်ခုသည် ငွေကြေးလောကရှိ သုံးသပ်သူများ၊ ဘဏ်လုပ်ငန်း လုပ်ကိုင်သူများနှင့် ငွေကြေးဆိုင်ရာ မန်နေဂျာများအတွက် အခြေခံပညာတစ်ရပ် ဖြစ်သည်။  ထို့အတူ စီးပွားရေးဘဏ်များ၊ အာမခံကုမ္ပဏီများနှင့် အခြားဘဏ္ဍာရေးဝန်ဆောင်မှု ထောက်ပံ့ရေးလုပ်ငန်းများ၌ လုပ်ကိုင်သူများအနေဖြင့် တက္ကသိုလ်ကောလိပ်တု့ိမှ ဘဏ္ဍာရေးဆိုင်ရာ ပညာဖြင့် ဘွဲ့ရရှိရန် လိုအပ်သည်။ ဘဏ္ဍာရေးလုပ်ငန်းလောကအပြင် ကုမ္ပဏီများနှင့် ကော်ပိုရေးရှင်းများ၌ အကြီးတန်းစီမံခန့်ခွဲမှု လုပ်ကိုင်မည့် လမ်းကြောင်းသွားမည့် သူများလည်း ဘဏ္ဍာရေးဆိုင်ရာ ဘွဲ့ရရှိရန် လိုအပ်သည်။ ရင်းနှီးမြှုပ်နှံသူများအနေဖြင့်  ဘဏ္ဍာရေးဆိုင်ရာ အငြင်းပွားမှုများ မဖြစ်အောင် ရှောင်ရှားနိုင်ရေးနှင့် ခိုင်မာသော အထောက်အထားများရှိရေးက လွန်စွာအရေးကြီးသည်။ ကုမ္ပဏီများ သို့မဟုတ် ရင်းနှီးမြှုပ်နှံသူများအနေဖြင့် စွန့်စားရမည့် အန္တရာယ်များနှင့် ပြန်လည်ရရှိနိုင်မည့် အကျိုးအမြတ်များအား အကဲဖြတ်တွက်ချက်နိုင်ရေးအတွက် ဘဏ္ဍာရေးပညာက အဓိကကျသည်။ ဘဏ္ဍာရေးဆိုင်ရာ ပရော်ဖက်ရှင်နယ်များကို အစိုးရအဖွဲ့များ၊ ကော်ပိုရေးရှင်းများနှင့် ဘဏ္ဍာရေးဈေးကွက်များတွင် ခန့်ထားကြရသည်။

ထို့ကြောင့် ဘဏ္ဍာရေးပညာဟူသည် စီးပွားရေး၊ ရင်းနှီးမြှုပ်နှံမှုနှင့် ဈေးကွက်တို့၌ အလွန်အရေးကြီးသော အခန်းကဏ္ဍမှနေ၍ ပါဝင်နေဦးမည်သာဖြစ်ပါကြောင်း The Daily Eleven  သတင်းစာက ရေးသားအပ်ပါသည်။

(ဇူလိုင်လ ၂၅ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)

Most Read

Most Recent