အဲလ်ဘတ်အိုင်းစတိုင်းက “နိုင်ငံရေးသည် ရူပဗေဒထက် ပို၍ခက်ခဲသည်” ဟု ဆိုဖူးသည်။ စီမံခန့်ခွဲမှုအား လက်တွေ့ကျင့်သုံးသည့်အခါ ဤနည်းနှင်နှင်ပင် ဖြစ်သည်။ အခြားသူများကို စီမံခန့်ခွဲခြင်းသည် ရှုပ်ထွေးခြင်း မရှိလှသော်လည်း လွယ်ကူသည်ဟုကား မဆိုနိုင်ပေ။ စီမံခန့်ခွဲခြင်းသည် ရိုးရှင်းသည်ဟု ထင်ရတတ်သော်လည်း တည့်တိုးသဘော တရားစည်းမျဉ်းများကိုပင် အကောင်အထည်ဖော်ရန် ခက်ခဲသယောင်ရှိသည်။ စုပေါင်းလုပ်ဆောင်ရသော အသင်းတစ်သင်း၊ အဖွဲ့တစ်ဖွဲ့ကို တည်ဆောက်ပုံအား လေ့လာရန်လိုသည်။ မိမိအဖွဲ့၏ စွမ်းဆောင်ရည် တိုးတက်စေရန် ရှိနှင့်ပြီးသား ရင်းမြစ်များကို ထိရောက်စွာ အသုံးပြုတတ်ရမည်။
မိမိကိုယ်တိုင်နှင့် အခြားသူများကို စီမံခန့်ခွဲခြင်းသည် ပြောင်းလဲနေသော လုပ်ငန်းစဉ်တစ်ရပ် ဖြစ်သည်။ ပါဝင်လုပ်ဆောင်သူများနှင့် တစ်ခါတစ်ရံ စည်းမျဉ်းများသည် အမြဲတစေ ပြောင်းလဲ၍နေ၏။ သို့သော် ယင်းကို မဟာဗျူဟာမြောက်စွာ ချဉ်းကပ်နိုင်သည်။ ယင်းသည် မိမိကိုယ်မိမိ သိရှိခြင်းနှင့်အတူ မိမိအား အမှန်တကယ် စေ့ဆော်သောအရာ၊ မိမိ၏ အင်အားများနှင့် ကြိုတင်မသိနိုင်သောအရာများနှင့် စတင်သည်။ အမှန်တကယ်၌ မိမိကိုယ်မိမိ နားလည်နိုင်ရန်သည် ခက်ခဲပြီး အသိဉာဏ်လင်းပွင့်ရန် လိုအပ်သော လုပ်ငန်းစဉ်တစ်ရပ် ဖြစ်သည်။ မိမိကိုယ်မိမိ နားလည်သိရှိခြင်းက ပို၍တိကျလေလေ မိမိ၏ အင်အားများ ပါဝင်နေသည့် ဝန်းကျင်များနှင့် အနေအထားများ၌ မိမိကိုယ်မိမိ နေရာချ ထားနိုင်စွမ်း ပို၍ကြီးမားလေလေ ဖြစ်သည်။
မိမိကိုယ်မိမိ သိမြင်မှုနှင့်အတူ အဖွဲ့အစည်းဆိုင်ရာ ဓလေ့ထုံးတမ်းကို နားလည်ခြင်းနှင့် စတင်နိုင်ပြီး ဓလေ့ထုံးတမ်းအမျိုးမျိုး၌ မည်ကဲ့သို့ ရှင်သန်ဖွံ့ဖြိုးအောင် ပြုလုပ်ရမည်ကို နားလည်လာနိုင်ရာ၏။ ဥပမာအနေဖြင့် စံသတ်မှတ်ချက်များကား အဘယ်နည်း၊ လက်ခံနိုင်သည့်အရာများကား အဘယ်နည်း၊ မျှော်လင့်နိုင်သည့် အရာများကား အဘယ်နည်းနှင့် ရှောင်ကြဉ်ရမည့် အရာများကား အဘယ်နည်း အစရှိသည်တို့ ဖြစ်သည်။ ရည် ရွယ်ချက်ဖြင့် စူးစမ်းလေ့လာခြင်းနှင့် ဆက်သွယ်ဆက်ဆံခြင်းမှတစ်ဆင့် ဖော်ပြပါ အရေးကြီးသည့် အသိများကို စုဆောင်းနိုင်သည်။ ယင်းနောက် ၎င်းတို့သည် မိမိ၏ စေ့ဆော်ချက်များ၊ အင်အားများနှင့် ရည်မှန်းချက်များအပြင် မိမိပါဝင်နေသည့် ဓလေ့ထုံးတမ်းတို့နှင့် ကိုက်ညီမှု ရှိ၊ မရှိ လေ့လာနိုင်သည်။ ကိုက်ညီမှု မရှိပါက မိမိအနေဖြင့် ကျော်လွှားရမည့် အဟန့်အတား အခက်အခဲများ ပို၍ကြီးမားကြောင်း သိရှိနိုင်မည် ဖြစ်သည်။
ယင်းနောက် ရလဒ်ကောင်းများ ရရှိရန်အတွက် အကောင်းဆုံးချဉ်းကပ်ပုံကို နားလည်နိုင်ရန် ရှာဖွေလေ့ကျင့်ရမည် ဖြစ်သည်။ ယင်းသည် အဖွဲ့အစည်းအလိုက် ကွဲပြားခြားနားပြီး တစ်ခါတစ်ရံ အဖွဲ့အစည်းတစ်ခုအတွင်း၌ပင် ဌာနအလိုက် ကွဲပြားခြားနားနိုင်သည်။ အလုပ်နှင့်ပတ်သက်၍ အောင်မြင်နိုင်ရေးအတွက် မိမိ၏ စွမ်းရည်ကို အမြင့်ဆုံး မြှင့်တင်နိုင်ရန် နည်းလမ်းအမျိုးမျိုးရှိသည်။ ယင်းတွင် ရောက်ရှိနေသည့် ဝန်းကျင်၌အခြား သူများအပေါ် သြဇာသက်ရောက်နိုင်ပုံကို လေ့လာခြင်း၊ မိမိ၏ အဖွဲ့ကို စီမံခန့်ခွဲပုံအား လေ့လာခြင်း၊ မိမိ၏ အထက်လူများနှင့် စီမံခန့်ခွဲပုံကို လေ့လာခြင်း၊ လုပ်ဖော်ကိုင်ဖက်များ နှင့် မည်သို့ဆောင်ရွက်ရမည်ကို လေ့လာခြင်းတို့ပါဝင်သည်။ မိမိဝန်းကျင်ရှိလူများနှင့် ဆက်ဆံရာ၌ မိမိ၏ အားသာချက်များနှင့် အားနည်းချက်များကိုလည်း မှတ်သားထားရမည်ဖြစ်သည်။ အလုပ်ဖြစ်ရန်အတွက် မိမိ၏ လုပ်ဆောင်ချက်များက မိမိ၏ အရည်အချင်းအပေါ် သြဇာသက်ရောက်ပုံကို နားလည်ရန်လည်း လိုအပ်သည်။
မည်သို့ပင်ဆိုစေကာမူ စီမံခန့်ခွဲမှုဟူသည် အလွန်တရာခက်ခဲသော အမှုမဟုတ်သော်လည်း မဟာဗျူဟာမြောက်စွာ ချဉ်းကပ်တတ်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
(ဇူလိုင်လ ၁၄ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)
