<

စစ်မှန်သော ငြိမ်းချမ်းရေးနှင့် အခွင့်အရေး

ယခင်အစိုးရလက်ထက်က စတင်ခဲ့သည့် ငြိမ်းချမ်းရေးဆွေးနွေးပွဲများ၏ ရလဒ်သည် အားရကျေနပ်ဖွယ်ရှိသည် မရှိသည်ဆိုသည်ကို အကဲဖြတ်ရန် ခက်ခဲသည်ဟု သုံးသပ်မှုများ ရှိနေသည်။ ကမ္ဘာပေါ်တွင် အရှည်ကြာဆုံးသော ပြည်တွင်းစစ်မီးကို ငြှိမ်းသတ်နိုင်ရေးနှင့် အမျိုးသားပြန်လည်သင့်မြတ်ရေး၊ ပြည်ထောင်စုအစဉ် ငြိမ်းချမ်းရေးတို့အတွက် အချိန်တိုအတွင်း အဖြေထုတ်ရန် မလွယ်ကူသော်လည်း နှစ်ပေါင်း ၇၀ ကျော် ကြာမြင့်ခဲ့သည့် ပြည်တွင်းပဋိပက္ခများကို အဆုံးသတ်ရန် အချိန်ကျရောက်နေပြီဟု အားလုံးက ယုံကြည်နေကြသည်မှာ အမှန်ပင်ဖြစ်သည်။ ငြိမ်းချမ်းရေးနှင့်ပတ်သက်သည့် ပထမအကြိမ် ပြည်ထောင်စုအဆင့် ညီလာခံကို ၂၀၁၆ ခုနှစ် ဇန်န၀ါရီ ၁၂ ရက်က ကျင်းပခဲ့ပြီး ဒုတိယအကြိမ်အဖြစ် ပြည်ထောင်စုငြိမ်းချမ်းရေးညီလာခံ ၂၁-ရာစု ပင်လုံအစည်းအဝေးကို ၂၀၁၇ ခုနှစ် မေ ၂၄ ရက်တွင် ပြုလုပ်ခဲ့သည်။ ယခုတတိယအစည်းအဝေးကို နေပြည်တော်တွင် သက်ဆိုင်ရာအစုအဖွဲ့များ ပါဝင်ပြီး ယမန်နေ့က စတင်ပြုလုပ်ခဲ့သည်။ ငြိမ်းချမ်းရေးအတွက် ပထမဆုံးခြေလှမ်းဟုဆိုရမည့် NCA သဘောတူစာချုပ်ကို သမ္မတဟောင်း ဦးသိန်းစိန်လက်ထက်က တိုင်းရင်းသားလက်နက်ကိုင်အဖွဲ့ ရှစ်ဖွဲ့က လက်မှတ်ရေးထိုးခဲ့ပြီး NLD အစိုးရလက်ထက်တွင် မွန်နှင့် လားဟူအဖွဲ့နှစ်ဖွဲ့က NCA တွင် လက်မှတ်ထိုးခဲ့သည်။ ယခင်ဦးသိန်းစိန်လက်ထက်နှင့်ယှဉ်လျှင် ယခုအစိုးရလက်ထက်တွင် နှစ်နှစ်ကျော်အတွင်း အဖွဲ့နှစ်ဖွဲ့သာ NCA လက်မှတ်ထိုးနိုင်ခဲ့သည့်အတွက် အားရမှုမရှိကြောင်း သုံးသပ်မှုများလည်း ရှိနေသည်။ သို့သော်လည်း ငြိမ်းချမ်းရေးနှင့် ပတ်သက်လျှင် အဓိကထိပ်တိုက် တွေ့ဆုံညှိနှိုင်းမှုများ ပြုလုပ်နေကြရသော အစိုးရ၊ တပ်မတော်နှင့် တိုင်းရင်းသားလက်နက်ကိုင်အဖွဲ့များအကြား ပြေလည်မှု ရရှိရေးသည်သာ အဓိကကျသည်ဟု ကောက်ချက်ချမှုများလည်း ရှိသည်။ ယင်းသို့သော တာဝန်ရှိသူများအကြား ပြေလည်မှုသည် တစ်ဖက်နှင့်တစ်ဖက် နားလည်မှုနှင့် သဘောထားသည် အရေးကြီးသော အကြောင်းအရာ ဖြစ်နေသည်ဟု ဆိုရမည်ဖြစ်သည်။

NLD အစိုးရလက်ထက်တွင် ပြုလုပ်ခဲ့သည့် NCA နှစ်ပတ်လည် အခမ်းအနားတွင် နိုင်ငံတော်၏အတိုင်ပင်ခံပုဂ္ဂိုလ်က မိန့်ခွန်းတစ်ရပ်ပြောကြားခဲ့ပြီး ယင်းမိန့်ခွန်းပေါ် အခြေတည်၍ အမျိုးသားပြန်လည်သင့်မြတ်ရေးနှင့် ပြည်ထောင်စုငြိမ်းချမ်းရေးမူဝါဒ ခုနစ်ချက်ကို အစိုးရဘက်က ထုတ်ပြန်ခဲ့သည်။ ယင်းအချက်များတွင် (၁) နိုင်ငံရေးဆွေးနွေးမှု မူဘောင်ပြန်လည်သုံးသပ်ခြင်း၊ (၂) နိုင်ငံရေးဆွေးနွေးမှုမူဘောင် ပြန်လည်ပြင်ဆင်ခြင်း၊ (၃) ပြင်ဆင်အတည်ပြုပြီးဖြစ်သော နိုင်ငံရေးဆွေးနွေးမှုမူဘောင်နှင့်အညီ ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံကျင်းပခြင်း၊ (၄) ၂၁ ရာစုပင်လုံညီလာခံရလဒ်များအား စုစည်းပြီး ပြည်ထောင်စုသဘောတူညီချက် လက်မှတ်ထိုးခြင်း၊ (၅) ပြည်ထောင်စု သဘောတူညီချက်နှင့်အညီ ဖွဲ့စည်းပုံ အခြေခံဥပဒေ ပြင်ဆင်ရေးသားခြင်း၊ အတည်ပြုခြင်း၊ (၆) ပြင်ဆင်ရေးသား အတည်ပြုပြီးဖြစ်သော ဖွဲ့စည်းပုံအခြေခံဥပဒေနှင့်အညီ ပါတီစုံ အထွေထွေဒီမိုကရေစီ ရွေးကောက်ပွဲများ ကျင်းပခြင်း၊ (၇) ပါတီစုံဒီမိုကရေစီ အထွေထွေရွေးကောက်ပွဲ ရလဒ်နှင့်အညီ ဒီမိုကရက်တစ် ပြည်ထောင်စု တည်ဆောက်ခြင်း စသည်တို့ ပါဝင်ခဲ့သည်။ တပ်မတော်၏ ငြိမ်းချမ်းရေးမူခြောက်ချက်ကို ကြည့်လျှင် ထာဝရငြိမ်းချမ်းရေး ရယူရန်အတွက် အမှန်တကယ်ဆန္ဒရှိရန်၊ သဘောတူစာချုပ်များအတိုင်း ကတိတည်ရန်၊ ငြိမ်းချမ်းရေး သဘောတူညီချက်များအပေါ် အမြတ်မထုတ်ရန်၊ ဒေသခံပြည်သူများအပေါ် ၀န်ထုပ်ဝန်ပိုးမဖြစ်စေရန်၊ နိုင်ငံတော်က ထုတ်ပြန်ထားသည့် တည်ဆဲဥပဒေကို လိုက်နာရန်၊ ဒို့တာဝန်အရေးသုံးပါးနှင့် ဒီမိုကရေစီအနှစ်သာရကို လက်ခံပြီး ၂၀၀၈ ဖွဲ့စည်းပုံအခြေခံဥပဒေဖြင့် ဒီမိုကရေစီ လျှောက်လှမ်းနေမှုတွင် လိုက်ပါလုပ်ဆောင်ရန်ဆိုသည့် အချက်တို့ ပါဝင်သည်။

စစ်မှန်သော ငြိမ်းချမ်းရေးအတွက် နိုင်ငံရေးစကားဝိုင်းများ၊ ဆွေးနွေးပွဲများ လုပ်ဆောင်ရာတွင် သက်ဆိုင်ရာအဖွဲ့အစည်းများ အနေဖြင့် ၎င်းတို့၏ မူဝါဒများ၊ ရပ်တည်ချက်များအတိုင်း အဆင့်ဆင့် လုပ်ဆောင်နေသည်ကတော့ အမှန်ပင်ဖြစ်သည်။ သို့သော်လည်း ဆွေးနွေးပွဲများမှတစ်ဆင့် လူထုလိုလားသော ရလဒ်ကောင်းများ ထွက်ပေါ်လာရန် အတွက်မူ အဖွဲ့အစည်း အသီးသီး အနေဖြင့် ဘုံသဘောတူညီချက်နှင့် အရှိတရား၊ လူထုအပေါ် သက်ရောက်မှုစသည်တို့အပေါ် ချိန်ထိုး၍ အာဃတများ၊ အတ္တများကို ဖယ်ရှားနိုင်ရန်လည်း လိုအပ်မည်ဖြစ်ပါသည်။ မည်သို့ပင်ဖြစ်စေကာမူ ရှည်လျားလှသော ပြည်တွင်းစစ်မီးငြှိမ်းသတ်နိုင်ရန်နှင့် လိုအပ်နေသော ပြည်ထောင်စုငြိမ်းချမ်းရေးအတွက် အခွင့်အရေးကောင်းများသည် သက်ဆိုင်သောသူအားလုံး၏ လက်ထဲတွင်သာ ရှိနေမည် ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

ဇူလိုင် ၁၂ ရက်နေ့ထုတ် The Daily Eleven သတင်းစာ အယ်ဒီတာ့အာဘော်

July 11, 2018














Copy Protected by Chetan's WP-Copyprotect.