သိမှုအဆင့်အတန်း သုံးရပ်

သိမှုအဆင့်အတန်း သုံးရပ်
Published 11 July 2018

လူတို့ ရရှိသည့် သိမှု သို့မဟုတ် သတင်းအချက်အလက် အမျိုးအစားသုံးရပ်ရှိသည်။ ပထမဆုံး အမျိုးအစားမှာ အာရုံငါးပါးမှတစ်ဆင့် သိရှိခြင်းဖြစ်သည်။ ကြည့်ရှုခြင်းမှလည်းကောင်း၊ နားထောင်ခြင်းမှလည်းကောင်း ဗဟုသုတများကို ရရှိသည်။ အနံ့ခံမှုမှလည်းကောင်း၊ အရသာခံမှုမှလည်းကောင်းနှင့် ထိတွေ့မှုမှလည်းကောင်း သတင်းအချက်များကို ရရှိသည်။ အာရုံငါးပါးသည် သိမှုအချို့ကို လူတို့ထံသို့ ဆောင်ကြဉ်းပေးသည်။ လူတို့၏ သိမှုအများစုသည် အာရုံငါးပါးမှတစ်ဆင့် ရရှိခြင်းသာ ဖြစ်သည်။

သို့သော် ဒုတိယသိမှုအမျိုးအစားမှာ အသိဉာဏ်မှတစ်ဆင့် ရရှိခြင်းဖြစ်သည်။ အသိဉာဏ်မှတစ်ဆင့်ရရှိသော သိမှုသည် အာရုံငါးပါးမှတစ်ဆင့် ရရှိသော သိမှုထက်ပို၍ မြင့်မားသည်။ သိပ္ပံပညာဟူသည် အသိဉာဏ်မှတစ်ဆင့် ရရှိသည့် သိမှုဖြစ်သည်။ မျက်စိမှ မြင်ရမှုအရ နေဝင်၍သွားပြီ။ သို့သော် သိပ္ပံပညာကို လေ့လာသင်ကြားခြင်းမှတစ်ဆင့် သိရှိရသော သိမှုက နေသည်ဝင်၍သွားသည် မဟုတ်ကြောင်း ပြော၍နေသည်။ ယင်းသည် ကမ္ဘာကြီး လည်နေခြင်းသာဖြစ်ကြောင်း သိရ၏။ လူတို့အနေဖြင့် ကမ္ဘာကြီးလည်နေကြောင်း အာရုံငါးပါးအားဖြင့် မသိနိုင်။ ကမ္ဘာကြီးသည် မိမိဝင်ရိုးစွန်းပေါ်တွင် ၂၃ ၁/ ၂  ဒီဂရီ တိမ်းစောင်းလျက် လည်ပတ်ကာနေကို လှည့်ပတ်နေကြောင်း အသိဉာဏ်မှတစ်ဆင့်သာ နားလည်နိုင်သည်။

ရေခွက်ထဲသို့ ဘောလ်ပင်တစ်ချောင်းကို ထည့်လိုက်ပါက ဘောလ်ပင်သည် ကောက်၍သွားကြောင်း မြင်ရမည်ဖြစ်သည်။ ယင်းသည် သိမြင်မှုသာဖြစ်သည်။ သို့သော်  အသိဉာဏ်က ဘောလ်ပင်သည် ကောက်၍သွားခြင်းမဟုတ်ကြောင်း ပြော၍နေသည်။ ယင်းသည် အမြင်ဆိုင်ရာ အာရုံလွဲမှားမှုတစ်ရပ်သာဖြစ်၏။ ယင်းသည်လည်း အသိဉာဏ်မှတစ်ဆင့်ရရှိသော သိမှုဖြစ်သည်။ သို့သော် ယင်းသိမှုအမျိုးအစား နှစ်ရပ်စလုံးသည် တတိယမြောက် သိမှုအမျိုးအစားထက်များစွာ ပို၍နိမ့်ကျသည်။ ယင်းတတိယမြောက် အမျိုးအစားမှာ ထိုးထွင်းသိမြင်မှု ဖြစ်သည်။ ယင်းသိမှုသည် မိမိ၏ စိတ်ဝိညာဉ်အတွင်းမှနေ၍ အသံတိတ် ထွက်ပေါ်လာခြင်း ဖြစ်သည်။ ယင်းသိမှုမျိုးကို အာရုံငါးပါးဖြင့်လည်းကောင်း၊ အသိဉာဏ်မှတစ်ဆင့်လည်းကောင်း အကဲဖြတ်၍ မရနိုင်ပေ။ ပထမသိမှုနှစ်ရပ်ကို ကျော်လွန်သော တတိယသိမှုနယ်ပယ်အတွင်းသို့ စတင်ချင်းနင်းဝင်ရောက်လာမှုက  လူသားဟူ၍ ဖြစ်တည်လာစေခဲ့ခြင်း ဖြစ်သည်။

စစ်မှန်သော သိမှုသည် အာရုံငါးပါးကိုသာမက အသိဉာဏ်ကိုပါ ကျော်လွန်၏။ ယင်းသည် ထိုးထွင်းသိမြင်မှု ဖြစ်သည်။ လူတိုင်းလူတိုင်း ယင်းအရည်အသွေး ရှိကြသည်။ ဘဝတွင် ယင်းကဲ့သို့သော ခံစားမှုမျိုးကို ကြုံတွေ့ရမည်သာ ဖြစ်သည်။ အချို့သော သိမှုများသည် ဘာမှန်းမသိသော တစ်နေရာရာမှ အလိုလို ရောက်ရှိလာခြင်းဖြစ်သည်။ ယင်းသည် မည်သည့်အရာဖြစ်ကြောင်း လူသားတို့ တွက်ချက်ဖော်ထုတ်နိုင်ခြင်း မရှိပေ။ တစ်စုံတစ်ရာသည် မိမိအနေဖြင့် ပြုလုပ်ရန် မှန်ကန်သော အရာဖြစ်ကြောင်း ရုတ်တရက်ခံစား လိုက်ရသည်။ တစ်စုံတစ်ရာသည် မိမိ၏ ဝမ်းတွင်း၌ ရုတ်တရက်ဖြစ်ပွားလိုက်သကဲ့သို့ ဖြစ်သည်။ သိမှုသည် ရုတ်တရက်ထွက်ပေါ်လာသော်လည်း မည်သည့်နေရာမှဝင်လာမှန်း မသိလိုက်ရ။ လူတို့သည် အာရုံငါးပါးအရ သို့မဟုတ် အသိဉာဏ်အရ ရရှိသော သိမှုများ အပေါ်၌သာ အခြေပြုတတ်ကြသည်။ မည်သို့ပင်ဆိုစေကာမူ လူသားတို့သည် အခြားသတ္တဝါများထက် သာလွန်သူများဖြစ်သည်နှင့်အညီ ပထမသိမှုနှစ်ရပ်ထက် ကျော်လွန်၍ သွားနိုင်ရမည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

(ဇူလိုင်လ ၁၁ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)

Most Read

Most Recent