ကိုယ်ကျင့်တရားဆိုင်ရာ၊ ပရဟိတဆိုင်ရာနှင့် ယုတ္တိဗေဒဆိုင်ရာ အကြောင်းတရားများအတွက် ပိုမိုကောင်းမွန်သော လူ့လောကဖြစ်လာစေရန် အခြားလူသားများကို ကူညီထောက်ပံ့ခြင်းနှင့် စေတနာသဒ္ဓါတရားဖြင့် ဆောင်ရွက်ခြင်းစသည့် လူသားဆန်သော ကျင့်သုံးမှုတို့အားဖြင့် လူ့ဘဝ၏ စံတန်ဖိုးများ၌ နိုးကြားစွာ ယုံကြည်ခြင်းကို လူသားချင်း စာနာထောက်ထားမှုဝါဒဟုခေါ်သည်။ ယင်းသည် နယ်ပယ်အမျိုးမျိုး၌ လူသားမျိုးနွယ်တို့၏ တိုးတက်မှုဆီသို့ လုပ်ဆောင်ချက်၌ ဒဿနိကဗေဒဆိုင်ရာ ယုံကြည်မှုလည်း ဖြစ်သည်။ လူသားတို့၏ ကောင်းကျိုးချမ်းသာနှင့် အထူးသဖြင့် ပတ်သက်နေသော အတိုင်းအတာ ကျယ်ပြောသည့် လုပ်ဆောင်ချက်များစွာကိုဖော်ပြရန် အသုံးပြုသည်။ လူသားချင်းစာနာ ထောက်ထားမှုဝါဒသည် လူတို့၏ တာဝန်ဝတ္တရားက လူသားတို့၏ ကောင်းကျိုးချမ်းသာ ကိုမြှင့်တင်ရန် ဖြစ်သည်ဟူသည့် အယူဝါဒအပေါ် အခြေခံထားသည်။
လူသားချင်း စာနာထောက်ထားမှုဝါဒသည် လူသားအားလုံးအနေဖြင့် လေးစားမှု၊ ဂုဏ်သိက္ခာတို့နှင့် ထိုက်တန်ပြီး ယင်းကဲ့သို့ ထိုက်တန်စွာ ဆက်ဆံသင့်သည်ဟူသည့် အမြင်တစ်ရပ်ပေါ်၌ အခြေခံထားခြင်းဖြစ်သည်။ ထို့ကြောင့် လူသားချင်းစာနာထောက်ထားမှု ဝါဒီများသည် လူသားမျိုးနွယ်တစ်ရပ်လုံး၏ ကောင်းကျိုးချမ်းသာဆီသို့ ဦးတည်ဆောင်ရွက်သည်။ လူသားချင်း စာနာထောက်ထားမှုဝါဒများသည် ကျွန်ပြုခြင်း၊ အခြေခံလူ့အခွင့်အရေးများကို ချိုးဖောက်ခြင်းနှင့် အရေပြားအရောင်၊ ဘာသာရေး၊ မျိုးနွယ်နှင့် မွေးဖွားရာဇာတိ အစရှိသော အချက်အလက်များအပေါ် အခြေခံလျက် ခွဲခြားဆက်ဆံခြင်းတို့အား ရွံမုန်းသည်။ လူသားချင်း စာနာထောက်ထားမှုဝါဒသည် သဘာဝဘေးအန္တရာယ်များ သို့မဟုတ် လူသားတို့ကြောင့်ဖြစ်ပွားသော ဘေးအန္တရာယ်များ ဖြစ်ပေါ်နေသည့်အကြား အသက်ကယ်ရန်၊ ဝေဒနာများကို သက်သာစေရန်နှင့် လူသားဂုဏ်သိက္ခာကို မြှင့်တင်ရန် လူသားတို့အား မောင်းနှင်သည်။ လူသားချင်း စာနာထောက်ထားမှုဝါဒ၌ ရည်ရွယ်ချက်တစ်ရပ်အတွက် လူသားတစ်ဦးကို မည်သည့်အခါမျှ စတေးခြင်းမပြုဟူသည့် အချက်ပါဝင်သည် ဟု ပြင်သစ်-ဂျာမန်တွေးခေါ်ရှင် အဲလ်ဘတ်ရှဝစ်ဇာက ဆိုသည်။
အပြည်ပြည်ဆိုင်ရာ ကြက်ခြေနီကော်မတီ၏ ဒုတိယဥက္ကဋ္ဌအဖြစ်ဆောင်ရွက်ခဲ့သူ ယန်းဆိုင်မွန်ပစ်တက်က ကြက်ခြေနီ၏ အခြေခံစည်းမျဉ်းများ၌ လူသားချင်းစာနာထောက် ထားမှုဝါဒ၏ ကမ္ဘာလုံးဆိုင်ရာ လက္ခဏာရပ်များကို ဖော်ပြခဲ့သည်။ သူက လူသားဆန်မှု၏ စည်းမျဉ်းသည် ဝါကျတစ်ကြောင်းတည်းဖြင့် ဖော်ပြ၍ရသော လူမှုကိုယ်ကျင့်တရား၏ အနှစ်သာရဖြစ်ကြောင်း၊ ယင်းမှာ လူများက သင့်အပေါ် ပြုလုပ်ပေးသင့်သည်မှန်သမျှအတိုင်း သင့်အနေဖြင့် ၎င်းတို့အပေါ်လည်း ပြုလုပ်ပေးရမည်ဟူ၍ဖြစ်ကြောင်း ပြောကြားခဲ့သည်။ ယင်းအခြေခံကျင့်ဝတ်ကို ဘာသာကြီးများဖြစ်သော ဘရာမင်နစ်ဇင်၊ ဗုဒ္ဓဘာသာ၊ ခရစ်ယာန်၊ ကွန်ဖြူးရှပ်ဝါဒ၊ အစ္စလာမ်၊ ရဟူဒီဝါဒနှင့် တာအိုဝါဒ အစရှိသည်တို့ အားလုံး၌ အလားတူတွေ့နိုင်သည်ဟုလည်း ၎င်းကဆိုသည်။
သမိုင်းတွင် အင်္ဂလန်၌ စက်မှုတော်လှန်ရေးနှင့် ပတ်သက်၍ စီးပွားရေးပျက်ကပ်ဖြစ် ပေါ်ပြီးနောက် ၁၈၀၀ ပြည့်လွန်နှစ်များနှင့် ၁၉၀၀ ပြည့်လွန်နှစ်များအစောပိုင်း လူမှုရေး ပြုပြင်ပြောင်းလဲမှုများ၌ လူသားချင်း စာနာထောက်ထားမှုဝါဒကို ထင်ရှားစွာတွေ့မြင်နိုင်သည်။ ၁၉၀၀ ပြည့်လွန်နှစ်များအတွင်း ဣတ္ထိယဝါဒ၌ ပါဝင်သော ဗြိတိန်မှ အမျိုးသမီးများစွာတို့သည်လည်း လူသားချင်း စာနာထောက်ထားမှုဝါဒကို တွန်းအားပေးခဲ့သည်။ ကလေးများနှင့် မကျွမ်းကျင်သည့် အလုပ်သမားများနှင့် ပတ်သက်သည့် ရက်စက်ကြမ်းကြုတ်သော အလုပ်ချိန်များနှင့် လုပ်ငန်းခွင်အခြေအနေရပ်များအား ဥပဒေနှင့် မလျော်ညီကြောင်း သတ်မှတ်ရန် ပါလီမန်တွင် လူသားချင်းစာနာထောက်ထားမှုဝါဒီများက ဖိအားပေးခဲ့ကြသည်။
မည်သို့ပင်ဆိုစေကာမူ လူသားတိုင်းအနေဖြင့် လူသားအားလုံး၏ ကောင်းကျိုးချမ်းသာကို ရှေးရှုသော လူသားချင်း စာနာထောက်ထားမှုဝါဒကို ကျင့်သုံးကြမည်ဆိုပါက ကမ္ဘာကြီးတစ်ခုလုံး ငြိမ်းချမ်းသာယာလျက် အစဉ်ဖွံ့ဖြိုးဝေစည်နေမည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။
(ဇူလိုင်လ ၁၀ ရက်နေ့ထုတ် The Daily Eleven သတင်းစာ အယ်ဒီတာအာဘေ်ာ)
