ခေါင်းဆောင်မှု ပုံစံဟူသည် လူတစ်ဦးက အခြားသူများကို ဦးဆောင်ရန် ပါဝါကို အသုံးပြုပုံပြုနည်းဖြစ်သည်။ နောက်လိုက်အရေအတွက်အပေါ် အခြေခံလျက် ခေါင်းဆောင်မှုပုံစံအမျိုးမျိုးရှိသည်။ အသင့်တော်ဆုံးခေါင်းဆောင်မှုပုံစံသည် ခေါင်းဆောင်၏ လုပ်ငန်းတာဝန်၊ နောက်လိုက်များနှင့် အနေအထားတို့အပေါ်၌ မူတည်နေသည်။ အချို့ခေါင်းဆောင်များသည် ဆုံးဖြတ်ချက်ချရာတွင် နောက်လိုက်များပါဝင်မှု အတိုင်းအတာမြင့်မားခြင်းကို အဆင်ပြေအောင် ဆောင်ရွက်နိုင်ခြင်း မရှိပေ။ အချို့သည် တာဝန်ယူမှု ခွဲဝေပေးရန် ဆန္ဒမရှိခြင်း သို့မဟုတ် အရည်အချင်းမရှိခြင်း ဖြစ်တတ်သည်။ တစ်ခါတစ်ရံတွင်လည်း ပြဿနာများကို ကိုင်တွယ်ရာတွင် နောက်လိုက်များနှင့် တိုင်ပင်ခြင်းမပြုဘဲ ချက်ချင်း ဆုံးဖြတ်ရန် လိုအပ်သည့်အခါများလည်း ရှိသည်။ ခေါင်းဆောင်မှုပုံစံအချို့ကို ဖော်ပြအပ်ပါသည်။
တစ်ဦးတည်း ခေါင်းဆောင်မှု - ယင်းခေါင်းဆောင်မှုတွင် ခေါင်းဆောင်သည် လုပ်ပိုင်ခွင့်အားလုံးနှင့် တာဝန်ယူမှုအားလုံးကို တစ်ဦးတည်း ဆုပ်ကိုင်ထားသည်။ ခေါင်းဆောင်များသည် ဆုံးဖြတ်ချက်ချရာ၌ လက်အောက်ငယ်သားများနှင့် တိုင်ပင်ခြင်းမပြုဘဲ မိမိဘာသာ ပြုလုပ်လေ့ရှိသည်။
ဒီမိုကရေစီကျသော ခေါင်းဆောင်မှု - ယင်းပုံစံ၌ လက်အောက်ငယ်သားများသည် ဆုံးဖြတ်ချခြင်း လုပ်ငန်းစဉ်၌ ပါဝင်သည်။ တစ်ဦးတည်းခေါင်းဆောင်မှုနှင့် မတူဘဲ လက်အောက်ငယ်သားများ ပါဝင်မှုအပေါ်၌ ဗဟိုပြုထားသည်။ ဒီမိုကရေစီကျသော ခေါင်းဆောင်များသည် နောက်ဆုံးတာဝန်ယူမှုကို ဆုပ်ကိုင်ထားသော်လည်း အခြားသူများကို လုပ်ပိုင်ခွင့်များ ခွဲဝေပေးသည်။ ယင်းသည် လူကြိုက်များသော ခေါင်းဆောင်မှုပုံစံတစ်ရပ်ဖြစ်ပြီး မျှတမှု၊ ကျွမ်းကျင်မှု၊ ဖန်တီးမှု၊ သတ္တိ၊ အသိဉာဏ်ရှိမှုနှင့် ရိုးသားမှုတို့ ကပ်လျက်ပါလာသည်။
မဟာဗျူဟာမြောက် ခေါင်းဆောင်မှု - အဖွဲ့အစည်းတစ်ရပ်၏ အကြီးအကဲအဖြစ် ခေါင်းဆောင်တစ်ဦး မဖြစ်မနေလိုအပ်သော ပုံစံဖြစ်သည်။ မဟာဗျူဟာမြောက်ခေါင်းဆောင်ကို အဖွဲ့အစည်း ထိပ်ဆုံး၌သာ ကန့်သတ်၍ မထားပေ။ အဖွဲ့အစည်း သို့မဟုတ် အသင်းတစ်သင်း၏ စွမ်းဆောင်ရည်မြင့်မားသောဘဝကို ဖန်တီးလိုသည့် မည်သည့်အဆင့်၌မဆို မဟာဗျူဟာမြောက်ခေါင်းဆောင် ပေါ်ထွက်လာသည်။
အသွင်ကူးပြောင်းရေး ခေါင်းဆောင်မှု - အခြားခေါင်းဆောင်မှုပုံစံများနှင့်မတူဘဲ အသွင်ကူးပြောင်းရေး ခေါင်းဆောင်မှုသည် အဖွဲ့အစည်းများ၊ အုပ်စုများ၊ မိမိကိုယ်တိုင်နှင့် အခြားသူများ၌ ပြောင်းလဲလာအောင် လှုံ့ဆော်မှုနှင့်ပတ်သက်သော ခေါင်းဆောင်မှုဖြစ်သည်။ အသွင်ကူးပြောင်းရေးခေါင်းဆောင်မှုသည် အခြားသူများအား ၎င်းတို့ မူလက ရည်ရွယ်ထားသည်ထက် ပို၍လုပ်ဆောင်အောင် သူတို့ တွေးနိုင်ဖွယ်ရှိသည်ထက် ပိုမိုစဉ်းစားလာအောင် စေ့ဆော်နိုင်သည်။
နည်းပေးလမ်းပြ ခေါင်းဆောင်မှု - ယင်းခေါင်းဆောင်မှု၌ နောက်လိုက်များအား သင်ကြားပေးခြင်းနှင့် အကြံဉာဏ်ပေးခြင်း ပါဝင်သည်။ နည်းပေးလမ်းပြခေါင်းဆောင်တစ်ဦးသည် ရလဒ် သို့မဟုတ် စွမ်းဆောင်ရည် တိုးတက်ရန်လိုအပ်နေသော အနေအထားတစ်ရပ်၌ မဖြစ်မနေလိုအပ်သည်။
သြဇာတိက္ကမနှင့် ပြည့်စုံသော ခေါင်းဆောင်မှု - ယင်းတွင် သြဇာရှိသော ခေါင်းဆောင်က တော်လှန်ပြောင်းလဲမှုဆန်သော ပါဝါကို ထုတ်ပြနိုင်သည်။ သြဇာဟူသည် အမူအကျင့်ဆိုင်ရာ ပြောင်းလဲမှု ဖြစ်ပေါ်စေခြင်းကို မဆိုလိုပေ။ နောက်လိုက်များ၏ တန်ဖိုးထားမှုများနှင့် ယုံကြည်ချက်များကို အသွင်ပြောင်းပေးခြင်းသာ ပါဝင်သည်။ ထို့ကြောင့် သြဇာရှိသော ခေါင်းဆောင်ဟူသည် အထူးရည်မှန်းချက်တစ်ရပ်ဆီသို့ ဦးတည်သည့် သဘောထားများအပေါ် သက်ရောက်နိုင်သည့် အများကြိုက် ခေါင်းဆောင်တစ်ဦးဖြစ်သည်။
အဖွဲ့အစည်းတစ်ရပ်သည် ကြီးသည်ဖြစ်စေ၊ ငယ်သည်ဖြစ်စေ အမှန်တကယ်တည်ရှိ ဖြစ်ပေါ်နေသည့် အနေအထားတစ်ရပ်နှင့် ကိုက်ညီမည့် ခေါင်းဆောင်မှုပုံစံတစ်ရပ်ရပ်က မဖြစ်မနေ လိုအပ်နေမည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။
(ဇူလိုင် ၈ ရက်နေ့ထုတ် The Daily Eleven သတင်းစာ၏ အယ်ဒီတာ့ အာဘော်)
