လောကတွင် ပြီးပြည့်စုံသူဟူ၍မရှိပေ။ သို့သော် ပြီးပြည့်စုံမှုကို လိုလားသည့် ယနေ့ ခေတ်ယဉ်ကျေးမှုသည် ပြီးပြည့်စုံသော ခေါင်းဆောင်များကို တောင်းဆို၍နေသည်။ အကျိုးတရားအနေဖြင့် အမှန်တကယ် ပိုမို ကောင်းမွန်လာစေရန် ခေါင်းဆောင်များအတွက်ရော နောက်လိုက်များအတွက်ပါ ပိုမို ခက်ခဲ၍သွားစေသည်။ ထို့ကြောင့် လူတစ်ဦးချင်းအနေဖြင့် ဖွံ့ဖြိုးရေးအစီအစဉ်တစ်ရပ် ထားရှိရန်လိုသည်။ ယင်းအစီအစဉ်၌ မိမိကိုယ်မိမိ လေးနက်စွာ ပြန်၍ဝေဖန်ခြင်း၊ အခြားသူများထံမှ မိမိအပေါ် အမြင်အား သဘောထားများ တောင်းခံခြင်းနှင့် တစ်ခါတစ်ရံ ပုံမှန်သုံးသပ်မှုများပြုလုပ်ခြင်းတို့ ပါဝင်သည်။ ယင်းအစီအစဉ်အား အချိန်နှင့်အမျှ ချမှတ်ထားရမည်ဖြစ်ပြီး ချရေးလျက် သိမ်းဆည်းထားရမည် လည်းဖြစ်သည်။ လူတို့သည် မိမိ၏ အမှားများကို ဝန်ခံရမည်အား ကြောက်ရွံ့နေတတ်သည်။ ငယ်စဉ် အခါကတည်းက ကလေးများအား မိမိကိုယ်မိမိ ဝေဖန်တတ်အောင် သင်ကြားပေးရမည်ဖြစ်သည်။ ကလေးများအနေဖြင့် တတ်နိုင်သမျှ အကောင်းဆုံးလုပ်ရန် နှင့် အမှားလုပ်မိမည်ကို စိုးရိမ်ခြင်းနှင့် အမှားကို ဝန်ခံရမည်ကို ကြောက်ရွံ့ခြင်းတို့ မရှိအောင် လေ့ကျင့်ပေးရမည်ဖြစ်သည်။ ယင်းသည် ရိုးသားမှုနှင့် ပွင့်လင်းမြင်သာမှုရှိရေးအတွက် သင်ယူခြင်းလုပ်ငန်းစဉ်ဖြစ်သည်။
သို့သော် ပွင့်လင်းမြင်သာမှုရှိရန်ထက် ရိုးသားမှုရှိရန် များစွာ ပို၍ ခက်ခဲသည်။ သမာဓိရှိရန်မှာမူ အခက်ခဲဆုံးဖြစ်သည်။ သို့သော် မာသာထရီဆာက “ရိုးသားမှုနှင့် ပွင့်လင်းမြင်သာမှုသည် သင့်အား အားနည်းချက်ရှိအောင် လုပ်နိုင်သည်။ သို့သော် မည်သို့ပင်ဖြစ်စေ ရိုးသား၍ ပွင့်လင်းမြင်သာမှုရှိပါ” ဟု ဆိုခဲ့သည်။ ဒလိုင်းလားမားကမူ “သင်သည် ရိုးသား၊ မှန်ကန်ပြီး၊ ပွင့်လင်းမြင်သာမှုရှိပါက သင့်အား လူအများက ယုံကြည်လာလိမ့်မည်။ လူအများက သင့်အား ယုံကြည်ပါက ကြောက်ရွံ့ရန်၊ မယုံသင်္ကာဖြစ်ရန်နှင့် မနာလိုဝန် တိုမှုဖြစ်ရန် သင့်၌ နေရာမရှိတော့” ဟု ဆိုသည်။ အခြားသူများ သိစေရန်လိုအပ်သည်ဟု ခံစားရသော အမှန်တရားများကို ထုတ်ဖော်ပြောဆိုခြင်းသည် ရိုးသားမှုဖြစ်သည်။ အခြား သူများက ၎င်းတို့သိရန် လိုအပ်သည်ဟု ခံစားရသော အမှန်တရားများကို ထုတ်ဖော်ပြောဆိုခြင်းသည် ပွင့်လင်းမြင်သာမှုဖြစ်သည်။ ပွင့်လင်းမြင်သာမှုသည် အခြားသူများအား အမှန်တကယ်ဖြစ်သည့်အရာကား အဘယ်နည်းဟူသည်ကို တွေ့မြင်သွားစေရန် ခွင့်ပြုသည်။
ရိုးသားမှုဟူသည် လူမျိုးများစွာနှင့် ဘာသာများစွာတို့၏ ယဉ်ကျေးမှုတို့၌ တန်ဖိုးထားသည့်အရာဖြစ်သည်။ ဘင်ဂျမင်ဖရန်ကလင်က “ရိုးသားခြင်းသည် အကောင်းဆုံး မူဝါဒ” ဟု ဆိုပြီး သောမတ်ဂျက်ဖာဆင်က “ရိုးသားမှုသည် ဉာဏ်ပညာစာအုပ်၌ ပထမဆုံးအခန်းဖြစ်သည်” ဟု ဆိုသည်။ ဝီလျံရှိတ်စပီးယားကမူ “ရိုးသားမှုလောက် မည်သည့်အမွေ ကမှ ပို၍ ကြွယ်ဝခြင်း မရှိ” ဟု ရေးသားခဲ့သည်။ ပွင့်လင်းမြင်သာမှုဟူသည်ကို သိပ္ပံပညာ၊ အင်ဂျင်နီယာပညာ၊ စီးပွားရေးလုပ်ငန်းဆိုင်ရာနှင့် အခြားလူမှုရေးအကြောင်းအရာများတွင် အသုံးပြုပြီး မည်သည့်လုပ်ဆောင်ချက်များ ပြုလုပ်သည်ကို အခြားသူများ မြင်သာစေရန် ကျင့်သုံးသည့်နည်းလမ်းဖြစ်သည်။ ပွင့်လင်းမြင်သာမှုဟူသည် ပွင့်ပွင့်လင်းလင်း ရှိမှု၊ ဆက်သွယ်ဆောင်ရွက်မှုနှင့် တာဝန်ခံမှုရှိခြင်းတို့ကို ရည်ညွှန်းခြင်းဖြစ်သည်။ ကုမ္ပဏီများ၊ အဖွဲ့အစည်းများ၊ အုပ်ချုပ်ရေးများနှင့် လူ့အသိုင်းအဝိုင်းများ၌ ပွင့်လင်းမြင်သာမှုကို ကျင့်သုံးကြသည်။
မည်သို့ပင်ဆိုစေကာမူ ရိုးသားမှုရှိခြင်းနှင့် ပွင့်လင်းမြင်သာမှုရှိခြင်းသည် လူသား တစ်ဦး၏ ကောင်းသော ဂုဏ်အင်္ဂါတစ်ရပ်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။
(ဇူလိုင် ၁ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)
