ခြောက်သွေ့နေလေ့ရှိသည့် ကုန်းမြေမြုပ်လောက်အောင်ရေများ အလွန်အကျွံ စီးဝင်လာမှုကို ရေလွှမ်းမိုးခြင်းဟု ခေါ်သည်။ ရေလွှမ်းမိုးမှုသည် မြစ်ချောင်း၊ ရေအိုင် သို့မဟုတ် ပင်လယ်သမုဒ္ဒရာကဲ့သို့သော နေရာမျိုးမှနေ၍ ရေများအလွန်အကျွံ စီးဝင်လာသည့်အခါ ဖြစ်ပွားသည်။ ယင်းနေရာများတွင် ရေများအလွန်အကျွံ မြင့်တက်လာမှု သို့မဟုတ် ရေကာတာ/တာရိုးများ ကျိုးပျက်မှုတို့ကြောင့် ရေသည် ပုံမှန်ရှိနေကျ နယ်နိမိတ်များကို ကျော်လွန်လျက် စီးဆင်းလာသောကြောင့် ဖြစ်သည်။ ရေစီးဆင်းမှုမရှိသော မြေပြင်တစ်ခု၌ မိုးရေများ အလွန်အကျွံ အိုင်ထွန်းလာမှုကြောင့်လည်း ရေလွှမ်းမိုးခြင်း ဖြစ်ပေါ်သည်။

မြစ်က လက်ခံနိုင်သည့် ရေထုထည်ကို ကျော်လွန်လျက် မြစ်ရေစီးဆင်းမှုနှုန်း လျင်မြန်လာသည့် မြစ်များကြောင့်လည်း ရေလွှမ်းမိုးခြင်း ဖြစ်ပေါ်သည်။ မြစ်များ၏ ရေလျှံသည့် မြေပြင်၌ ရှိခဲ့ပါက ရေလွှမ်းမိုးမှုသည် အိမ်များနှင့် လုပ်ငန်းများကို ပျက်စီးစေသည်။ အချို့သော ရေလွှမ်းမိုးမှုများသည် ဖြည်းဖြည်းချင်း ဖြစ်ပေါ်သော်လည်း အချို့မှာ ရုတ်တရက်ဖြစ်ပေါ်သည်။ အချို့သော ရေလွှမ်းမိုးမှုများသည် မြင်သာသည့် မိုးကြီးမှုကို မပြဘဲ မိနစ်အနည်း ငယ်အတွင်း ရုတ်တရက် ဖြစ်ပေါ်တတ်သည်။

ရေလွှမ်းမိုးခြင်း၏ တိုက်ရိုက်သက်ရောက်မှုများတွင် လူ့အသက်များ ဆုံးရှုံးရခြင်း၊  အဆောက်အအုံများနှင့် တံတား၊ မိလ္လာစနစ်များ၊ ကားလမ်းများနှင့် တူးမြောင်းများကဲ့သို့သော အခြားတည်ဆောက်ထားမှုများ ပျက်စီးခြင်းတို့ ပါဝင်သည်။ ရေလွှမ်းမိုးခြင်းကြောင့်  လျှပ်စစ်ဓာတ်အား ဖြန့်ဖြူးခြင်းနှင့် တစ်ခါတစ်ရံတွင် လျှပ်စစ်ဓာတ်အား ထုတ်လုပ်ခြင်းကိုပါ ပျက်စီးစေပြီး လျှပ်ဓာတ်အား ပြတ်တောက်မှု ဖြစ်စေသည်။ ရေပေးဝေမှုနှင့် ရေသန့်စင်မှု စနစ်များကိုလည်း ပျက်စီးစေသည်။ ထိုမှတစ်ဆင့် သောက်သုံးရေ ညစ်ညမ်းမှု အကြီးအကျယ် ဖြစ်ပေါ်စေသည်။ မိလ္လာနှင့် ရေဆိုးထုတ် ကွန်ရက်များကိုလည်း ပျက်စီးစေနိုင်သည်။  သန့်ရှင်းသော ရေမရခြင်းနှင့်အတူ ညစ်ညမ်းသော ရေများက ရေလွှမ်းမိုးမှု၌ ပါလာသောကြောင့် ရေမှတစ်ဆင့် ကူးစက်သော ရောဂါများ ဖြစ်ပွားနိုင်သည်။ ယင်းတွင် အူရောင်ငန်းဖျားရောဂါ၊ ဝမ်းပျက်ဝမ်းလျှောရောဂါနှင့် ကာလဝမ်းရောဂါ အစရှိသည်တို့ ပါဝင်သည်။ လမ်းများနှင့် လမ်းပန်းဆက်သွယ်ရေး အခြေခံအဆောက်အအုံများ ပျက်စီးခြင်းကြောင့်  ရေဘေးသင့်ဒေသများသို့  အကူအညီများနှင့် အရေးပေါ်ကျန်းမာရေး စောင့်ရှောက်မှုတို့ ထောက်ပံ့ရန် အခက်ကြုံရတတ်သည်။ လွှမ်းမိုးလာသော ရေများက လယ်မြေများဆီသို့  ဝင်ရောက်သောကြောင့် လယ်ယာမြေများ၌ အလုပ်မလုပ်နိုင်ဘဲ စိုက်ပျိုးမှု သို့မဟုတ် ရိတ်သိမ်းမှုကို ထိခိုက်စေသည်။ ထို့ကြောင့် လူသာမက တိရစ္ဆာန်များအတွက်ပါ စားနပ်ရိက္ခာပြတ်လပ်မှုနှင့် ရင်ဆိုင်ရတတ်သည်။

တစ်ဆင့်ခံ သို့မဟုတ် ရေရှည်သက်ရောက်မှုအနေဖြင့် ခရီးသွားလုပ်ငန်း ယာယီကျဆင်းခြင်း၊ ပြန်လည်တည်ဆောက်စရိတ်များ ကုန်ကျခြင်းနှင့် ယင်းတို့ကြောင့် စီးပွားရေး ကျပ်တည်းခြင်းတို့ ဖြစ်ရသည်။ ပြင်းထန်သော ရေလွှမ်းမိုးမှုဖြစ်ပေါ်ပြီးနောက် စားနပ်ရိက္ခာ ပြတ်လပ်မှုကြောင့် ကုန်ဈေးနှုန်းတက်ခြင်းလည်း ဖြစ်တတ်သည်။ သေဆုံးမှု၊ ပြင်းထန်စွာ ဒဏ်ရာရရှိမှုနှင့် စည်းစိမ်ဥစ္စာများ ဆုံးရှုံးရမှုတို့ကြောင့် စိတ်ပိုင်းဆိုင်ရာ ထိခိုက်မှုများလည်း ဖြစ်ကြရသည်။

ထို့ကြောင့် ရေလွှမ်းမိုးမှုများကြောင့် ထိခိုက်မှုနည်းပါးအောင် ကြိုတင်ကာကွယ်မှုများ ပြုလုပ်ထားရန် လိုအပ်သကဲ့သို့ ရေလွှမ်းမိုးခြင်းဖြစ်ပွားပြီးနောက်  ပြန်လည်ထူထောင် နိုင်ရေးကို အလျင်အမြန် ပြန်လည်ပြုလုပ်နိုင်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။

(ဇွန်လ ၁၉ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)