အဖွဲ့အစည်းအများစု၌ လေ့လာတွေ့ရှိရသည့် အတွေ့ရအများဆုံး တာဝန်ယူခြင်း နှင့် ပတ်သက်သော စိတ်ထားသုံးမျိုးကို ရှောင်လွှဲတတ်သော၊ တွက်ချက်တတ်သောနှင့် ပြေးတွေ့တတ်သောဟူ၍ သုံးမျိုးခွဲခြားလေ့ရှိကြသည်။ ယင်းအမျိုးအစား အသီးသီးတို့သည် တာဝန်ယူခြင်းနှင့်ပတ်သက်၍ ရှုမြင်ရာတွင်လည်းကောင်း၊ တုံ့ပြန်ရာတွင်လည်းကောင်း ကွဲပြားခြားနားကြသည်။
သို့သော် လူအချို့သည် အခြေအနေတစ်ရပ်၌ ပြေးတွေ့တတ်သော စိတ်ထားရှိသော်လည်း အခြားအခြေအနေတစ်ရပ်၌မူ ရှောင်လွှဲတတ်သော သို့မဟုတ် တွက်ချက်တတ်သော စိတ်ထားမျိုး ရှိသည်ကိုလည်း တွေ့ရှိရသည်။ အချို့မှာမူ အလုပ်ခွင်၌ စိတ်ထားတစ်မျိုး၊ အိမ်၌ စိတ်ထားတစ်မျိုးနှင့် မိမိ ပိုမိုနှစ်သက်သော လုပ်ဆောင်ချက်များ၌ ပါဝင်ရသည့်အခါ စိတ်ထားတစ်မျိုး ဖြစ်တတ်သည်။ ထို့ကြောင့် လူတစ်ဦးအား အမျိုးအစားတစ်ရပ်အတွင်း၌ အသေသတ်မှတ်ထား၍ မရပါ။ အဖွဲ့အစည်းတစ်ရပ်အတွင်း လူတို့၏ တွေးပုံနှင့် ပြုမူပုံ၌ ယင်းစိတ်ထားသုံးမျိုးနှင့်ပတ်သက်၍ အလျင်အမြန် ပြောင်းလဲနိုင်သည်ကို နားလည်ထားရမည် ဖြစ်သည်။
ရှောင်လွှဲတတ်သော စိတ်ထား - ကျရှုံးနိုင်ခြေရှိသည့် စွန့်စားမှုမျိုးကို ရှောင်ရှားသည်။ အမြဲတစေ သားကောင်တစ်ဦးကဲ့သို့ ခံစားနေတတ်သည်။ “ဘာလုပ်ရမလဲ ပြောပါဦး” ဟူသော စိတ်အခြေအနေ၌သာ ရှိနေတတ်သည်။ အမှားအယွင်းများ ဖြစ်ပေါ်သည့်အခါ အကာအကွယ်ရှာတတ်ပြီး တာဝန်ခံရမှုကို ငြင်းပယ်တတ်သည်။ အလုပ်ကို ရပ်ဆိုင်းပစ်ရန်အတွက် အခက်အခဲမှန်သမျှကို အကြောင်းပြချက်အဖြစ် ရှုမြင်တတ်သည်။
တွက်ချက်တတ်သော စိတ်ထား - မည်သည့်စွန့်စားမှုမျိုး ပြုလုပ်မည်ကို သေချာစွာ ဆုံးဖြတ်တတ်သည်။ အနေအထားပေါ်မူတည်လျက် ဖြစ်နိုင်ခြေလျော့နည်းသော အရာများကို အလျင်အမြန်လွှတ်ချတတ်သည်။ တစ်သမတ်တည်းမရှိ၊ သာမန်ထက် ထူးကဲမှုမှသည် စိတ်မပါလက်မပါ အားထုတ်မှုမျိုးသို့ ပြောင်းလဲသွားတတ်သည်။ အမှားအယွင်းများ ဖြစ်ပေါ်သည့်အခါ အားနည်းချက်ကို ဆင်ခြေပေးရန်အတွက် အသေအချာဖန်တီးထားသော အကြောင်းအရာများကို ပြောတတ်သည်။ အကျိုးအမြတ်အပေါ် မူတည်လျက် အခက်အခဲများကို အတားအဆီးများ သို့မဟုတ် စိန်ခေါ်မှုများဟု ရှုမြင်တတ်သည်။
ပြေးတွေ့တတ်သော စိတ်ထား - ကျရှုံးမည်ကို ကြောက်ရွံ့ခြင်း မရှိသောကြောင့် စွန့်စားမှုကို စိတ်ပါလက်ပါ ပြုလုပ်တတ်သည်။ အနေအထား အရပ်အရပ်အတွက် တာဝန်ယူတတ်ပြီး တိုးတက်မှု မရှိခြင်းအတွက် စိတ်ထဲရှိသည်ကို ထုတ်ဖော်ပြခဲသည်။ အရင်းအမြစ်များ ရှိမှုနှင့်ပတ်သက်၍ လှုံ့ဆော်ပေးခြင်းနှင့် သရုပ်ပြခြင်းတို့ ပြုလုပ်တတ်သည်။ အမှားအယွင်းများ ဖြစ်ပေါ်သည့်အခါ မိမိအမှားကို ဝန်ခံတတ်သည်။ အခက်အခဲများကို ဖန်တီးမှုရှိစွာ တိုက်ခိုက်ရမည့် စိန်ခေါ်မှုများဟု ရှုမြင်သည်။
မည်သို့ပင်ဆိုစေကာမူ အဖွဲ့အစည်းတစ်ရပ်အတွင်း လူတစ်ဦးအား သက်ဆိုင်ရာ တာဝန်တစ်ရပ်ရပ်ကို ပေးမည်ဆိုပါက ထိုသူ၏ တွေးပုံနှင့် ပြုမူပုံအရ တာဝန်ယူခြင်းနှင့် ပတ်သက်၍ မည်သည့်စိတ်ထား အမျိုးအစား၌ရှိသည်ကို မှန်ကန်စွာအကဲဖြတ်နိုင်ခြင်းသည် လုပ်ငန်းအောင်မြင်ရေး၌ အရေးကြီးသည့် အချက်တစ်ချက်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။
(ဇွန်လ ၁၆ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)
