အဂတိလိုက်စားမှုတိုက်ဖျက်ရေးကော်မရှင်များ

အဂတိလိုက်စားမှုတိုက်ဖျက်ရေးကော်မရှင်များ
Published 10 June 2018

ကမ္ဘာပေါ်ရှိ အဂတိလိုက်စားမှုတိုက်ဖျက်ရေးကော်မရှင် (ACA) များသည် အဂတိ လိုက်စားမှုများကို စုံစမ်းစစ်ဆေးရပြီး လွတ်လပ်သောအဖွဲ့အစည်းများဟု ယူဆထားကြသည်။ အဂတိလိုက်စားမှုများကို ဥပဒေအရ အရေးယူရန် တရားစီရင်ရေးအဖွဲ့အတွက် သက်သေအထောက်အထားများ ထောက်ပံ့ပေးရသောကြောင့် ယင်းအေဂျင်စီများသည် အဂတိလိုက်စားမှုများအတွက် အဟန့်အတားအဖြစ် အကောင်းဆုံးဆောင်ရွက်သည်။ သို့သော် ယင်းကဲ့သို့ ဆောင်ရွက်နိုင်ရန် ၎င်းအဖွဲ့များအနေဖြင့် လွတ်လပ်မှုရှိရန်၊ လူသိရှင်ကြား တာဝန်ခံမှုရှိရန်နှင့် ရန်ပုံငွေကောင်းစွာရှိလျက် ပါဝင်သူများဖြင့် ကောင်းစွာ ဖွဲ့စည်းထားရန် လိုအပ်သည်။

ACA တွင် ပါဝင်သော ခေါင်းဆောင်မှုနှင့် ဝန်ထမ်းများကို ရွေးချယ်ခြင်းနှင့် ခန့်အပ်ခြင်းတို့၌ လွတ်လပ်မှုရှိရန် အစိုးရအဖွဲ့များနှင့် နိုင်ငံရေးပါတီများက အာမခံချက်ပေးထားရသည်။ စုံစမ်းစစ်ဆေးမှုပြုလုပ်ရန်၊ ဖမ်းဆီးရန်နှင့် တရားစွဲဆိုရန် ACA ၏ ကြီးမားသော လုပ်ပိုင်ခွင့်များကို ဥပဒေက အာမခံထားပေးရသည်။ မည်သူ သို့မဟုတ် မည်သည့်အဖွဲ့ အစည်းကမျှ ကြားဝင်စွက်ဖက်ခြင်း မပြုဘဲ ၎င်းတို့၏ ဥပဒေအရလုပ်ပိုင်ခွင့်များကို သမာသမတ်ကျကျ ထုတ်ပြန်ရန် ACA များကို အပြည့်အ၀ လွတ်လပ်ခွင့် ပေးထားရသည်။ ACA ၏ လုပ်ငန်းဆောင်တာများနှင့် ကျင့်သုံးဆောင်ရွက်မှုများကို ထိန်းချုပ်စောင့်ကြည့်ရန်အတွက် လွတ်လပ်သည့် ကြီးကြပ်ရေးလုပ်ငန်းစဉ်တစ်ရပ်လည်း ရှိရမည်ဖြစ်သည်။  ဥပမာအားဖြင့် လွှတ်တော်ကော်မတီတစ်ရပ် သို့မဟုတ် ပရော်ဖက်ရှင်နယ်အဖွဲ့များနှင့် အရပ်ဘက်လူ့အဖွဲ့အစည်းများမှ ပုဂ္ဂိုလ်များဖြင့် ဖွဲ့စည်းထားသော ကော်မတီတစ်ရပ်က ကြီးကြပ်နိုင်သည်။

ACA အဖွဲ့များသည် 'ငါးကြီးများ' ဟုခေါ်သော အဂတိလိုက်စားမှုကြီးများ၌ ပါဝင်ပတ်သက်သူများကို စုံစမ်းစစ်ဆေးရန်နှင့် တရားစွဲဆိုရန် ၎င်းတို့၏စွမ်းဆောင်ရည်နှင့် ဆန္ဒရှိမှုများကို ဖော်ထုတ်ပြသရမည်ဖြစ်သည်။ ACA ၌ ပါဝင်သူများသည် ပိုင်ဆိုင်မှုများ ကြိုတင်ထုတ်ဖော်ထားရန်၊ ၎င်းတို့၏ လုပ်ဆောင်ချက်များနှင့်ပတ်သက်၍ ပြည်သူကို အစီရင်ခံရန်နှင့် ပြည်သူတို့၏ သတင်းသိပိုင်ခွင့်ကို အာမခံရန်တို့ကို ကျင့်သုံးရသည်။ အဂတိ လိုက်စားမှု၏ မကောင်းသော အကျိုးဆက်များကို ပြည်သူများ သိရှိကြစေရန်နှင့် အဂတိ လိုက်စားမှု တိုက်ဖျက်ရေးလုပ်ဆောင်ချက်များ၌ ပြည်သူများ ပူးပေါင်းပါဝင်လာကြစေရန်  ပြည်သူ့ဆက်ဆံရေး အစီအစဉ်များမှတစ်ဆင့် ACA အနေဖြင့် နိုင်ငံသားများကို ပညာပေးခြင်းနှင့် ၎င်းတို့နှင့် ပူးပေါင်းဆောင်ရွက်ခြင်းတို့ ပြုရန်လိုသည်။

အဂတိလိုက်စားမှုများသည် ကမ္ဘာတစ်လွှား၌ စီးပွားရေးနှင့် လူမှုရေး ဖွံ့ဖြိုးမှုများအတွက် ကြီးစွာသော အဟန့်အတားဖြစ်ပြီး စဉ်ဆက်မပြတ် ဖွံ့ဖြိုးရေးနှင့်ပတ်သက်၍ မကောင်းသော ရိုက်ခတ်ချက်ရှိသည်။ အထူးသဖြင့် ဆင်းရဲသော လူ့အဖွဲ့အစည်းများ အပေါ် သက်ရောက်မှုကြီးမားသည်။ ကုမ္ပဏီများအတွက်လည်း အဂတိလိုက်စားမှုက လုပ်ငန်းကြီးထွားမှုကို အဟန့်အတားဖြစ်စေကာ ကုန်ကျစရိတ်ကြီးမားစေရုံသာမက ဥပဒေကြောင်းအရနှင့် ဂုဏ်သတင်း ကျော်စောမှုအရလည်း ကြီးမားသော အန္တရာယ်ရှိစေသည်။  အဂတိလိုက်စားမှုသည် ညှိနှိုင်းစရိတ်များ တက်စေလျက် မျှတသောယှဉ်ပြိုင်မှု ယုတ်လျော့စေကာ ပြည်တွင်းပြည်ပ ရေရှည်ရင်းနှီးမြှုပ်နှံမှုများကို အဟန့်အတားဖြစ်စေပြီး ဖွံ့ဖြိုးရေး ဦးစားပေးအစီအစဉ်ကို ပုံပျက်စေသည်။

ထို့ကြောင့် နိုင်ငံတစ်နိုင်ငံ၏ ဖွံ့ဖြိုးတိုးတက်မှုသည် အဂတိလိုက်စားမှုကော်မရှင်၏ စွမ်းဆောင်ရည်အပေါ် အကြီးအကျယ် မူတည်နေပါကြောင်း The Daily Eleven သတင်းစာက ရေးသားအပ်ပါသည်။

 

(ဇွန်လ ၁၀ ရက်နေ့ထုတ် The Daily Eleven သတင်းစာ၏ အယ်ဒီတာ့ အာဘော်)

Most Read

Most Recent