ဆရာများအနေဖြင့် စာသင်ခန်းအတွင်း စိန်ခေါ်မှုအမျိုးမျိုးကို ရင်ဆိုင်ရတတ်သည်။ ယင်းတို့အနက် နှောင့်ယှက်သော လေးစားမှုကင်းမဲ့သော သည်းမခံနိုင်ဖွယ်ရာ အပြုအမူများ ပါတတ်သည်။ အပြုအမူဆိုင်ရာ သိပ္ပံပညာရှင်တို့က စာသင်ခန်းအတွင်း ရင်ဆိုင်ရသည့် အပြုအမူအချို့ကို ဖော်ပြခဲ့သည်။
လေအိုး - သင်ခန်းစာတစ်ခု သင်ကြားနေစဉ် စကားများနေခြင်းသည် ဆရာကိုသာမက အခြားကျောင်းသားများအပေါ်ပါ လေးစားမှုကင်းမဲ့သည့် အပြုအမူဖြစ်သည်။ ကျောင်းသားများအနေဖြင့် ယင်းအပြုအမူသည် လက်ခံနိုင်ဖွယ်မရှိသည့် ရိုင်းပျသော အပြုအမူဖြစ်သည်ကို နားလည်ရန် အရေးကြီးသည်။ စကားများနေခြင်းကို ရပ်တန့်ပစ်ရန် နည်းလမ်းများစွာ ရှိသော်လည်း အဆိုပါကျောင်းသားကို သီးသန့်ခွဲထုတ်လိုက်ခြင်း သို့မဟုတ် ရပ်တန့်ရန် အမိန့်ပေးလိုက်ခြင်းသည် နားကျည်းဖွယ်ရာများကိုသာ ဖြစ်စေနိုင်သည်။ ယင်းကဲ့သို့ အနုတ်လက္ခဏာသဘောဆောင်သော နည်းလမ်းများကို အသုံးပြုမည့်အစား သင်ကြားနေခြင်းကို ရပ်၍ အဆိုပါကျောင်းသား စကားပြောရပ်သွားသည်အထိ စောင့်နေရန်လိုသည်။ ထိုအခါ သူက သင့်အား ကျေးဇူးတင်မည်ဖြစ်ပြီး ပြုံးပြလိုက်ရန်သာ လို သည်။
ပုန်ကန်သူ - မည်သည့်အရာကိုမျှ မလုပ်ဘဲ ပူးပေါင်းဆောင်ရွက်ရန် ငြင်းဆန်သည့် ကျောင်းသားများ၏ အာဏာဖီဆန်မှုကို ကြုံတွေ့ရနိုင်သည်။ သူနှင့် အာဏာလွန်ဆွဲမှုထဲသို့ ဝင်ရောက်ခြင်း မပြုပါနှင့်။ လုပ်မည်လား၊ မလုပ်ဘဲ အကျိုးဆက်ကို ရင်ဆိုင်မည်လား ရွေးချယ်ခွင့်ပေးရန်သာ လိုသည်။ ယင်း၌ အားလပ်ချိန် မပေးတော့ခြင်းသည် နည်းလမ်းတစ်ရပ်အဖြစ် ပါဝင်နိုင်သည်။ သူ့အနေဖြင့် ပူပေါင်းဆောင်ရွက်ပါက သူ၏ ကောင်းမွန်လာသော အပြုအမူကို အသိအမှတ်ပြုကာ အပြုံးဖြင့် အားပေးရန် လိုသည်။
အငြင်းသန်သူ - ကျောင်းသားတစ်ဦးအနေဖြင့် ဆရာအား ဆန့်ကျင်ငြင်းခုံခြင်းသည် ချက်ချင်းဖြေရှင်းရမည့် အာဏာဖီဆန်မှုတစ်မျိုးဖြစ်နိုင်သည်။ ကျောင်းသား၏ ထင်မြင်ချက်နှင့် လုံးဝမသက်ဆိုင်ဘဲ သူနှင့် ငြင်းခုံပွဲအတွင်းသို့ ဝင်ရောက်ရန် မကြိုးစားပါနှင့်။ သူ့အား ဆန့်ကျင်ဘက်ပြောပါက အာခံနေသူ ကျောင်းသားအနေဖြင့် သူမှန်ကန်ကြောင်း ပြောရန်လိုအပ်သည်ဟု ပို၍ပင် ခံစားလာရနိုင်သည်။ ယခုအချိန်သည် ဆွေးနွေးရမည့် အချိန်မဟုတ်ကြောင်း တည်ငြိမ်စွာ ရှင်းပြလျက် မိမိအလုပ်ကို ဆက်လုပ်ရန်လိုသည်။ ကျောင်းသားက ဆက်လက်ငြင်းခုံနေပါက စာသင်ချိန်ပြီးမှ ဆွေးနွေးရန် အကြံပြုပါ။ စာသင်ခန်းကို ထိန်းထားရင်း ကျောင်းသားများ၏ သိလိုစိတ်နှင့် မေးခွန်းထုတ်မှုကိုမူ အားပေးရမည်သာဖြစ်သည်။
စိတ်ဓာတ်ကျနေသူ - စိတ်ဂနာမငြိမ်သော သို့မဟုတ် စိတ်ဓာတ်ကျနေသော ကျောင်းသားတစ်ဦးသည် ဆရာတစ်ဦးအတွက် အာရုံထွေပြားဖွယ်ရာဖြစ်သည်။ ယင်းအပြုအမူကို သတိထားမိလျှင်ထားမိချင်း ဆွေးနွေးမှုပြုလုပ်ရန် အရေးကြီးသည်။ အထူးသဖြင့် အဆိုပါ ကျောင်းသားသည် ရုတ်တရက် ပြောင်းလဲသွားခြင်း သို့မဟုတ် စာရိတ္တပျက်ပြားသွားခြင်း ဖြစ်ပေါ်သည့်အခါ၌ ဖြစ်သည်။ စာသင်ချိန်ပြီးနောက် ကျောင်းသားနှင့် အသေအချာ ဆွေးနွေးရင်း ပြဿနာ၏ အရင်းအမြစ်ကိုသိရရန် ကြိုးပမ်းပါ။ ယင်းသည် အိမ်၌ဖြစ်ပွား သောကိစ္စ သို့မဟုတ် ကျောင်း၌ အနိုင်ကျင့်ခံရခြင်းကဲ့သို့သော ပြဿနာမျိုးဖြစ်နိုင်သည်။ မည်သို့ပင်ဆိုစေကာမူ မိဘများကို အသိပေးရမည်သာဖြစ်သည်။
တွယ်ကပ်နေသူ - ဆရာ၏အကူအညီကို အဆက်မပြတ် တောင်းခံနေသည့် ကျောင်းသားတစ်ဦးသည်လည်း စာသင်ချိန်၌ အနှောင့်အယှက်ဖြစ်စေနိုင်သည်။ ဆရာအနေဖြင့် အနေအထားကို မှန်မှန်ကန်ကန် အကဲဖြတ်နိုင်ရန်လိုပြီး ကျောင်းသား၌ သင်ယူရခက်ခဲသည့် ချွတ်ယွင်းချက် ရှိနေသလားဟူသည်ကို သုံးသပ်နိုင်ရန်လိုသည်။ ဆရာအနေဖြင့် အဆိုပါကျောင်းသားအား မိမိကိုယ်မိမိ အားကိုးလာအောင် လေ့ကျင့်ပေးရမည်ဖြစ်သည်။ ကျောင်းသားတစ်ဦးအနေဖြင့် ဒုတိယအကြိမ်မြောက် ထပ်မံရှင်းပြရန် တောင်းခံလာပါက ၎င်း၏ဘေးမှ ကျောင်းသားအား မေးမြန်းနိုင်သည်ဟု ပြောပါ။
ယခုဖော်ပြချက်များသည် ဆရာများအတွက် အထွေထွေ သဘောလမ်းညွှန်ချက်များသာဖြစ်ပြီး မည်သည့်ပရော်ဖက်ရှင်နယ်အတွက်မဆို အရာရာသည် မိမိတို့၏ ကိုယ်ပိုင် အတွေ့အကြုံပေါ်၌သာ အမြဲတမ်း မူတည်နေမည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။
(ဇွန်လ ၉ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)
