အခင်အမင်မပျက် နိုင်ငံရေးဆွေးနွေးခြင်း

အခင်အမင်မပျက် နိုင်ငံရေးဆွေးနွေးခြင်း
Published 12 May 2018

အားကောင်းသည့် ဒီမိုကရေစီဟူသည် စိတ်ကူးသဘောထားများ ပြိုင်ဆိုင်မှုမှနေ၍ အကောင်းဆုံး ပြည်သူ့ရေးရာ မူဝါဒများကို ထွက်ပေါ်စေသည်။ လူအများအနေဖြင့် မိမိ စိတ်ကူး သဘောထားနှင့် ပတ်သက်၍ မိမိ စိတ်ထဲရှိသည့်အတိုင်း ပြောရမလား သို့မဟုတ် မိမိ၏ လုပ်ဖော်ကိုင်ဖက်များနှင့် ခင်မင်မှုကို ဆက်လက် ထိန်းသိမ်းရမလား ဟူသည့် နှစ်ခုထဲမှ တစ်ခုအား ရွေးရတော့မည်ဟု တွေးမိလိုက်သည့်အခါ ယင်း စိတ်ကူးသဘောထားများ ပြိုင်ဆိုင်မှုသည် အဆုံးသတ်သွားခြင်း သို့မဟုတ် အဆိပ်သင့် လာခြင်းတို့ ဖြစ်နိုင်သည်။ လေ့လာချက်တစ်ရပ်က ယင်းကဲ့သို့ ရွေးချယ်စရာမလိုဘဲ နိုင်ငံရေးနှင့် ပတ်သက်၍ မိမိသဘောထားကို လုပ်ဖော်ကိုင်ဖက်များနှင့် ပြောဆိုဆွေးနွေးနိုင်ရန် မျှော်လင့်ချက်ကို ပေးခဲ့သည်။ မိမိတို့အနေဖြင့် အခြားသူများကို စိတ်ပိုင်းဆိုင်ရာ လုံခြုံမှု အနည်းငယ်ပေးရန် ဆန္ဒရှိပြီး မိမိကိုယ်တိုင်၏ စေ့ဆော်ချက်များအား ကောင်းစွာစီမံနိုင်ပါက အခင်အမင်မပျက် နိုင်ငံရေး ဆွေးနွေးနိုင်သည်ဟု ဆိုသည်။ အကြောင်းအရာတစ်ရပ်အပေါ် ကောက်ချက်ချရာ၌လည်းကောင်း၊ သဘောထား ကွဲပြားနိုင်သည့် နိုင်ငံရေးကိစ္စကို ဆွေးနွေးရာ၌လည်းကောင်း အောက်ပါကျွမ်းကျင်မှု လေးရပ် လိုအပ်သည်ဟု ဆိုသည်။

လေ့လာသင်ယူလိုမှုအပေါ်  အဓိကထားခြင်း - အပြန်အလှန် ဆွေးနွေးခြင်းအား အခြားသူ၏ သဘောထား ပြောင်းလဲသွားစေရန် မဟုတ်ဘဲ တစ်ဦးနှင့်တစ်ဦး အသိအမြင် ဖလှယ်ရန် သို့မဟုတ် တစ်ဦးထံမှ အခြားတစ်ဦးက သင်ယူရန် အခွင့်အလမ်း တစ်ရပ်ဟု သဘောထားရန်ဖြစ်သည်။ သက်ဆိုင်ရာ အကြောင်းအရာတစ်ရပ်နှင့် ပတ်သက်၍ အခြားသူ၏ ရပ်တည်ချက်ကို သိလိုခြင်းသာဖြစ်သည်ဟု သဘောထားရန်ဖြစ်သည်။ သို့သော် မိမိအနေဖြင့် အခြားသူတစ်ဦးကို ပြောင်းလဲနိုင်ရန် မျှော်လင့်ချက်ထားရှိပါက ထိုသူအား အတင်းအကျပ်ပြုခြင်း သို့မဟုတ် အကျပ်ကိုင်ခြင်းဆီသို့ ဦးတည်သွားစေနိုင်သည်။ ဥပမာအားဖြင့် “ဒီကိစ္စကို ငါကတော့ ဒီလိုထင်တယ်။ မင်းက ဘာလို့ ငါနဲ့ ကွဲလွဲနေတာလဲဆိုတာ သိချင်တယ်။ မင်းရဲ့ရပ်တည်ချက်ကို ငါနဲ့ ပွင့်ပွင့်လင်းလင်း ဆွေးနွေးလို့ ရမလား” ဟူသည့် ပုံစံမျိုးဖြစ်နိုင်သည်။

ခွင့်ပြုချက် တောင်းခံခြင်း - ထိရှလွယ်သော အကြောင်းအရာနှင့် ပတ်သက်၍ မိမိအမြင်ကို ပြောဆိုရန်အတွက် အခြားသူထံမှ ခွင့်ပြုချက် တောင်းခံရမည်ဖြစ်သည်။ ဥပမာအားဖြင့် “ငါက မငြင်းခုံလိုပါဘူး။ မင်းရဲ့သဘောထားကို ပြောင်းလဲအောင်လည်း မကြိုးစားပါဘူး။ ငါ နားလည်ချင်ရုံလေးပါ။ ငါကတော့ ဒီကိစ္စမှာ မင်းနဲ့ အမြင် လုံးဝကွဲနေတယ်။ ငါ့အမြင်ကို ရှင်းပြလို့ ရမလား” ဟူသည့် ပုံစံမျိုး ဖြစ်သည်။

လေးစားမှုကို ပြသခြင်း - မိမိနှင့်ပတ်သက်၍ အခြားသူများက သူတို့ကို မလေးစားဘူးဟု ခံစားရပါက ၎င်းတို့အနေဖြင့် မိမိနှင့် ပြောဆိုဆွေးနွေးလိုမည် မဟုတ်ပါ။ ထို့ကြောင့် အခြားသူများကို လေးစားမှုပြသခြင်းဖြင့် ဆွေးနွေးမှုကို စတင်ရမည်ဖြစ်သည်။ “ငါ မင်းကိုရော မင်းရဲ့အမြင်ကိုပါ တန်ဖိုးထားပါတယ်။ ငါ မင်းဆီကနေ ကြားချင်တာပါ။ ငါ့ကိုယ်ငါ မှန်တယ်လို့ ယူဆမထားပါဘူး” ဟူသည့် ပုံစံမျိုးဖြစ်ရမည်။

နှစ်ဦးသဘောတူနိုင်မည့်အချက်ကို အဓိကထားခြင်း - သဘောမတူနိုင်ခြင်းထက် သဘောတူနိုင်မည့် အစိတ်အပိုင်းများကို ရှာဖွေရမည်ဖြစ်သည်။ အပြန်အလှန်ဆွေးနွေးမှုသည် ပို၍ပို၍ သိသိသာသာ ကွဲလွဲလာပါက ထင်မြင်ချက် နှစ်ရပ်စလုံးအပေါ် လွှမ်းမိုးသည့် ပိုမိုကျယ်ပြန့်သည့် သဘောတရားများကို ရှာဖွေရမည်ဖြစ်သည်။ မိမိတို့၏ ကွဲလွဲသော ကောက်ချက်များ နောက်ကွယ်၌ တူညီသောရည်ရွယ်ချက်များကို ရှာဖွေတွေ့ရှိနိုင်သည်။ “ငါ့အနေနဲ့ကတော့ ငါတို့မှာရှိနေတဲ့ တူညီတဲ့ရည်မှန်းချက်ကို ရှာဖွေလိုပါတယ်။ ပြီးတော့ ငါတို့စိတ်ထဲက အဲဒီရည်မှန်းချက်တွေနဲ့ပဲ ဒီအကြောင်းအရာကို ကြည့်ကြရအောင်” ဟူ သည့်ပုံစံမျိုးဖြစ်သည်။

မည်သို့ပင်ဆိုစေကာမူ ဒီမိုကရေစီဟူသည် စိတ်ကူးသဘောထားများ ပြိုင်ဆိုင်မှုဟု နားလည်သဘောပေါက်လျက် အခင်အမင်မပျက် နိုင်ငံရေး ဆွေးနွေးနိုင်ကြပါစေကြောင်း The Daily Eleven သတင်းစာက ဆုမွန်ကောင်း တောင်းအပ်ပါသည်။

(မေလ ၁၂ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)

Most Read

Most Recent