နိုင်ငံရေးစစ်ပွဲနှင့် နိုင်ငံ၏ အကျိုးစီးပွား

နိုင်ငံရေးစစ်ပွဲနှင့် နိုင်ငံ၏ အကျိုးစီးပွား
Published 11 May 2018

ရန်လိုသော ကြံရွယ်ချက်အပေါ် အခြေခံလျက် မိမိ၏ သဘောဆန္ဒကို ပြိုင်ဘက်အနေဖြင့် လိုက်နာလာအောင် အကျပ်ကိုင်သည့် နိုင်ငံရေးနည်းလမ်းအား အသုံးပြုခြင်းကို နိုင်ငံရေးစစ်ပွဲဟုခေါ်သည်။ ယခု စကားရပ်တွင် အခြားနိုင်ငံ၏ အစိုးရ၊ စစ်တပ်နှင့် အထွေထွေလူထုအား ထည့်တွက်လာရန် အစိုးရတစ်ရပ်နှင့် ပစ်မှတ်ထားသည့် ပရိသတ်အကြား တွက်ချက်ထားသည့် အပြန်အလှန် ဆက်နွှယ်ချက်ကို နိုင်ငံရေးဟု ခေါ်ဆိုခြင်းဖြစ်သည်။ အစိုးရအဖွဲ့များက သက်ဆိုင်ရာ လုပ်ဆောင်ချက် ပြုလုပ်ရေးအတွက် အကျပ်ကိုင်ရန် နည်းလမ်းအမျိုးမျိုးကို အသုံးပြုခြင်းဖြစ်သည်။ ဤသို့အားဖြင့် ပြိုင်ဘက်အပေါ် အားသာချက် ရယူခြင်းဖြစ်သည်။ ယင်းကဲ့သို့သော နည်းစနစ်များထဲတွင် ဝါဒဖြန့်ချိရေးနှင့် စိတ်ဓာတ်စစ်ဆင်ရေးတို့ ပါဝင်သည်။ ၎င်းတို့အား နိုင်ငံတော်အတွက် ရည်မှန်းထားမှုများအတွက်လည်းကောင်း၊ စစ်ဘက်ဆိုင်ရာအရလည်းကောင်း အသုံးပြုသည်။ ဝါဒဖြန့်ချိရေးတွင် မျက်နှာစာများစွာရှိပြီး ရန်လိုသော၊ အကျပ်ကိုင်သော၊ နိုင်ငံရေးဆန်သော ရည်ရွယ်ချက်တစ်ရပ် ပါဝင်သည်။ စိတ်ဓာတ်စစ်ဆင်ရေးများမှာမူ စစ်ဘက်ဆိုင်ရာ မဟာဗျူဟာမြောက်နှင့် နည်းဗျူဟာမြောက် ရည်မှန်းချက်များဖြစ်ပြီး ရန်လိုသော စစ်တပ်အတွက် လည်းကောင်း၊ အရပ်သား လူထုအတွက်လည်းကောင်း ရည်ရွယ်ခြင်းမျိုး ဖြစ်နိုင်သည်။

နိုင်ငံရေးစစ်ပွဲ၏ အကျပ်ကိုင်တတ်သော သဘောသဘာဝသည် ပြိုင်ဘက်၏ နိုင်ငံရေး၊ လူမှုရေး သို့မဟုတ် လူ့အဖွဲ့အစည်းဆိုင်ရာ ဆန္ဒသဘောထားတို့အား အားနည်းစေခြင်း သို့မဟုတ် ဖျက်ဆီးပစ်ခြင်းတို့ဆီသို့ ဦးတည်သွားပြီး မိမိနိုင်ငံ၏ အကျိုးစီးပွားအတွက် အားသာချက်ရှိသော လမ်းကြောင်းပေါ်သို့ တွန်းပို့သည်။ နိုင်ငံရေးစစ်ပွဲတွင် အကြမ်းဖက်မှု၊ စီးပွားရေးအရ ဖိအားပေးမှု၊ အဖျက်အမှောင့်လုပ်ကိုင်မှု၊ သံတမန်နည်းလမ်း ကျင့်သုံးမှု အစရှိသည်တို့အား ပေါင်းစပ်အသုံးပြုမှု ပါဝင်နိုင်သည်။ သို့သော် နိုင်ငံရေးစစ်ပွဲ၏ အဓိက မျက်နှာစာမှာ စကားလုံးများ၊ ရုပ်ပုံများနှင့် စိတ်ကူးများဖြစ်သည်။ ယင်းကဲ့သို့ အကျပ်ကိုင်သည့် နည်းလမ်းများကို ဖန်တီးခြင်း၊ ဖြန့်ကြက်ထားခြင်းနှင့် အဆက်မပြတ် ပြုလုပ်ခြင်းတို့သည် နိုင်ငံများအတွက် နိုင်ငံရေး ပရိယာယ်ဖြစ်ပြီး စစ်ရေးအရ တိုက်ရိုက် တိုက်ခိုက်ခြင်းကို အစားထိုးထားသည့် နည်းလမ်းတစ်ရပ်လည်းဖြစ်သည်။ ဥပမာအားဖြင့် စီးပွားရေးပိတ်ဆို့ခြင်း သို့မဟုတ် ကုန်သွယ်မှု ပိတ်ပင်ခြင်းကဲ့သို့သော နည်းလမ်းများသည် နိုင်ငံရေး အပြောင်းအလဲများလုပ်ရန် တွန်းအားပေးရေးအတွက် လိုအပ်သည့် စီးပွားရေး ပျက်စီးမှုများ ဖြစ်ပေါ်အောင် ရည်ရွယ်ထားခြင်းဖြစ်သည်။ နိုင်ငံရေးစစ်ပွဲ၌ အသုံးပြုသော နည်းလမ်းများနှင့် နည်းစနစ်များသည် သက်ဆိုင်ရာနိုင်ငံ၏ နိုင်ငံရေးအမြင်နှင့် နိုင်ငံရေး ဖွဲ့စည်းပုံအပေါ်၌ မူတည်သည်။ သက်ဦးဆံပိုင်စနစ်၊ အာဏာရှင်စနစ်၊ ဒီမိုကရေစီစနစ် အစရှိသည့် နိုင်ငံရေးစနစ်အလိုက်လည်း ဆောင်ရွက်ပုံ ကွဲပြားနိုင်သည်။

နိုင်ငံရေးစစ်ပွဲ၏ အဆုံးစွန်သော ရည်မှန်းချက်မှာ စစ်အင်အားသုံးစရာမလိုဘဲ မိမိနိုင်ငံ၏ အကျိုးစီးပွား အားသာမှုဘက်သို့ ပြိုင်ဘက်၏ သဘောထားများနှင့် လုပ်ဆောင်ချက်များ ပြောင်းလဲလာရေးဖြစ်သည်။ ယင်းကဲ့သို့ စုစည်းထားသည့် ဆွဲဆောင်သိမ်းသွင်း အကျပ်ကိုင်မှုပုံစံသည် နောက်ထပ်နိုင်ငံရေး ရည်မှန်းချက်များရရှိရန် အကြမ်းဖက်နည်းလမ်းကို အသုံးပြုမှုအား ရှောင်ရှားလျက် လူတို့၏ အသက်များကို ကယ်ဆယ်လိုသည့် လက်တွေ့ကျသော ရည်မှန်းချက်လည်းဖြစ်နိုင်သည်။ ထို့ကြောင့် နိုင်ငံရေးစစ်ပွဲတွင် မိတ်ဆွေများကို အားပေးခြင်းနှင့် ရန်သူများကို စိတ်ပျက်အားလျော့အောင် ပြုလုပ်သည့် အနုပညာဆန်သော ပညာလည်း ပါဝင်သည်။ အရိုးရှင်းဆုံးပုံစံမှာ မိတ်ဆွေနိုင်ငံများ၏ ကိစ္စရပ်များကို ကူညီခြင်းနှင့် ရန်သူနိုင်ငံများ၏ ကိစ္စရပ်များကို ပစ်ပယ်ထားခြင်းဖြစ်သည်။ အထွေထွေသဘောအရ နိုင်ငံရေးစစ်ပွဲသည် ရန်လိုသော ကြံရွယ်ချက် ပါရှိသောကြောင့် မနှစ်မြို့ဖွယ်ကောင်းသော်လည်း အသက်များဆုံးရှုံးရမည့်နည်းလမ်းကို ရှောင်ရှားနိုင်ခြင်းမှာမူ လက်ခံနိုင်ဖွယ် အကျိုးဆက်ဖြစ်နေသည်။

မည်သို့ပင်ဆိုစေကာမူ နိုင်ငံရေးစစ်ပွဲ ဆင်နွှဲလာနိုင်ခြင်းကို ဂရုပြုလျက် မိမိနိုင်ငံ၏ အကျိုးစီးပွားအား အမြဲတစေ မျက်ခြည်မပြတ်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။

မေလ ၁၁ ရက်နေ့ထုတ် The Daily Eleven သတင်းစာ အယ်ဒီတာ့အာဘော်

Most Read

Most Recent