ဒီဂျစ်တယ် နည်းပညာသည် ခေတ်သစ်ကမ္ဘာကို တော်လှန်ပြောင်းလဲပစ်ခဲ့ပြီ ဖြစ်သည်။ ယင်းနည်းပညာ ပိုမိုတိုးတက်လာသည်နှင့်အမျှ လူ့အဖွဲ့အစည်းအပေါ် အန္တရာယ်များကလည်း ပို၍မြင်သာထင်သာ ရှိလာသည်။ လူမှုမီဒီယာများက လူ့အဖွဲ့အစည်းအပေါ် အလွန်ကြီးမားသော သက်ရောက်မှုရှိကြောင်း သက်သေပြခဲ့ပြီး ဖြစ်သည်။ ယင်းတို့အနက် Facebook သည် သတင်းများ ဖြန့်ချိမှုကို များစွာချုပ်ကိုင်လာခြင်းနှင့်အတူ အစဉ်အလာအတိုင်း ရှိခဲ့သည့် မီဒီယာကုမ္ပဏီများနှင့် ထုတ်ဝေသူများသည် ၎င်းတို့၏ တရားဝင်သတင်းများ အများပြည်သူတို့ထံ ရောက်ရှိနိုင်စွမ်းကို တိုး၍တိုး၍ ဆုံးရှုံး၍လာသည်။ ရည်ရွယ်ချက်ရှိသည်ဖြစ်စေ၊ မရှိသည်ဖြစ်စေ ယင်းသည် Facebook က မီဒီယာများကို အသေသတ်ရန် တိတ်တဆိတ် စစ်ခင်းလာခြင်းဟုပင် ဆိုနိုင်သည်။ အမေရိကန် ပြည်ထောင်စု၏ ဖွဲ့စည်းပုံအခြေခံဥပဒေ ပထမအကြိမ် ပြင်ဆင်ချက်က လွတ်လပ်စွာ ပြောဆိုခွင့် သို့မဟုတ် စာနယ်ဇင်း လွတ်လပ်ခွင့်အား ချိုးဖောက်မှုမှန်သမျှကို တားမြစ်ထားသောကြောင့် ယင်းလွတ်လပ်ခွင့် နှစ်ရပ်ကို Facebook က အကာအကွယ် ယူထားခြင်းဖြစ်သည်။
ရွေးကောက်ပွဲအပြီး လူအများ၏ တုံ့ပြန်မှုကို ခံရပြီးနောက် Facebook က သူ၏ Facebook ဂျာနယ်လစ်ဇင် စီမံချက်ကို ကြေညာခဲ့သည်။ Facebook အနေဖြင့် သတင်းလုပ်ငန်းလောကနှင့် ပိုမိုခိုင်မာသော ပူးပေါင်းဆောင်ရွက်မှု တည်ဆောက်ရေးအပေါ်၌ အာရုံပြုလာသည့် ပဏာမခြေလှမ်း ဖြစ်သည်။ ယင်းစီမံချက်တွင် သတင်းအကြောင်းအရာ ပြောပြခြင်း ပုံစံခွက်အသစ်ဖြင့် အလုပ်လုပ်ရန်နှင့် ဒေသခံသတင်းဌာနများနှင့် တွဲဖက်ဆောင်ရွက်ရန် တို့အတွက် ကတိပေးမှု ပါဝင်သည်။
သို့သော် သတင်းစားသုံးသူ အများစု၏ လက်ရှိ သတင်းဖတ်ပုံနည်းလမ်းသည် သတင်းထုတ်ဝေသူများအပေါ် တိုက်ရိုက်ခြိမ်းခြောက်မှုတစ်ရပ် ဖြစ်ပေါ်နေစေလျက်ပင် ရှိသေးသည်။ လူအများစုသည် သတင်းအကြောင်းအရာများကို Facebook Feed ပေါ်၌သာ ရှာဖွေကြည့်ရှုလျက်ပင် ရှိသေးသည်။ လူအများသည် သတင်းတစ်ခုကိုဖတ်ရန် သတင်းဝက်ဘ်ဆိုက်များသို့ ခေတ္တခဏမျှ ဝင်ရောက်ကြည့်ရှုပြီး မကြာမီမှာပင် ယင်းသတင်း အကြောင်းအရာကို ဆွေးနွေးရန်အတွက် Facebook ပေါ်သို့သာ ပြန်လာကြရသည်။ မူရင်းဝက်ဘ်ဆိုက်ကို မကြည့်ဘဲ Facebook သို့သာ ပြန်လည်ဝင်ရောက်မှု တစ်ကြိမ်သည် သတင်းထုတ်ဝေသူများအတွက် အကျိုးအမြတ် ဒေါ်လာပေါင်း ရာနှင့်ချီလျက် ဆုံးရှုံးသွားစေသည်။ အဘယ့်ကြောင့်ဆိုသော် ဝင်ရောက်ကြည့်ရှုသူ ပရိသတ်မရှိဘဲ ငွေကောက်ခံရရှိရန် မဖြစ်နိုင်သောကြောင့်ဖြစ်သည်။ မိမိဝက်ဘ်ဆိုက်သို့ ဝင်ရောက်ကြည့်ရှုမှု လွတ်သွားခြင်းသည် ငွေကြေးဆုံးရှုံးမှု သက်သက်သာမကဘဲ ပရိသတ် ပြန်လည်ရရှိရန် အတွက်ပါ အန္တရာယ်ရှိနေသည့် အမှတ်လက္ခဏာဖြစ်သည်။
သတင်းအကြောင်းအရာများကို Facebook ၌ ရှာဖွေသည့် အလေ့အကျင့်ရှိသူ များလာလေလေ သတင်းဝက်ဘ်ဆိုက်များသို့ ပြန်လည်ဝင်ရောက်မည့် အသုံးပြုသူ နည်းလာလေလေဖြစ်သည်။ ဤလမ်းကြောင်း အတိုင်းသာ ဆက်၍သွားနေပါက သတင်းထုတ်ဝေသူများနှင့် ဂျာနယ်လစ်များ မျိုးသုဉ်းရပေတော့မည်။ သတင်းထုတ်ဝေသူများသည် အချိန်များစွာ ကြာမြင့်ခဲ့သည့် အတောအတွင်း Facebook ကို စိန်ခေါ်နိုင်မည့် အခွင့်အလမ်းများအား လျစ်လျူပြုခဲ့ကြကာ ဥပဒေအရ ဖြေရှင်းရန်သာ ကြိုးပမ်းခဲ့ကြသောကြောင့် ယခုအနေအထားသို့ ဆိုက်ရောက်လာခြင်းဖြစ်သည်။ ဂျာနယ်လစ်များက သတင်းအချက်အလက်များကို အစီရင်ခံနိုင်ရန် ကြိုးပမ်းနေဆဲမှာပင် သတင်းထုတ်ဝေသူများ အနေဖြင့် ၎င်းတို့သတင်းဌာနများ ရပ်တည်ရေးအတွက် ခေါင်းခဲနေရသည်။
မည်သို့ပင်ဆိုစေကာမူ တရားဝင် သတင်းမီဒီယာများ အနေဖြင့် Facebook ကို စိန်ခေါ်နိုင်မည့် နည်းလမ်းများအား အမြန်ဆုံး ပူးပေါင်းရှာဖွေကြရန် အရေးတကြီး လိုအပ်နေပြီ ဖြစ်ပါကြောင်း The Daily Eleven သတင်းစာက ရေးသားအပ်ပါသည်။
မေလ ၅ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်
