ကမ္ဘာ့စာနယ်ဇင်းလွတ်လပ်ခွင့်နေ့

ကမ္ဘာ့စာနယ်ဇင်းလွတ်လပ်ခွင့်နေ့
Published 4 May 2018

၂၅ ကြိမ်မြောက် ကမ္ဘာ့စာနယ်ဇင်းလွတ်လပ်ခွင့်နေ့ကို ယူနက်စကိုက ဦးဆောင်ကျင်းပခဲ့သည်။ ပင်မ အခမ်းအနားကို ယူနက်စကိုနှင့် ဂါနာအစိုးရတို့က ကြီးမှူးလျက် မေ ၂ ရက်နှင့် ၃ ရက်နေ့များ၌ ဂါနာနိုင်ငံ အက်ခရာမြို့၌ ပြုလုပ်ခဲ့သည်။ ယခုနှစ်အတွက် ကမ္ဘာ့ဆောင်ပုဒ်မှာ 'ပါဝါကို စောင့်ကြည့်စစ်ဆေးပါ-မီဒီယာ၊ တရားမျှတမှုနဲ့ ဥပဒေစိုးမိုးရေးပါ' ဟူ၍ ဖြစ်သည်။ မီဒီယာနှင့် နိုင်ငံရေး လုပ်ငန်းစဉ်၏ ပွင့်လင်းမြင်သာမှု၊ လွတ်လပ်မှု နှင့် တရားရေးစနစ်နှင့် ပတ်သက်သည့် မီဒီယာဖော်ပြမှု၊ ပြည်သူအပေါ် နိုင်ငံတော် အင်စတီကျူးရှင်းများ၏ တာဝန်ခံမှု အစရှိသည့် အကြောင်းအရာများ အားလုံးအပေါ် လွှမ်းခြုံ ထားခြင်းဖြစ်သည်။ ကမ္ဘာ့စာနယ်ဇင်းလွတ်လပ်ခွင့်နေ့သည် အွန်လိုင်း၌ စာနယ်ဇင်းလွတ်လပ်ခွင့်ကို အာမခံရေးနှင့်ပတ်သက်သော ခေတ်ပြိုင်စိန်ခေါ်မှုများကို စစ်ဆေးရန်လည်း ဖြစ်သည်။

စာနယ်ဇင်းလွတ်လပ်ခွင့် အခြေခံသဘောတရားများကို မြှင့်တင်ရန်၊ ကမ္ဘာတစ်လွှားမှ စာနယ်ဇင်းလွတ်လပ်ခွင့်ကို အကဲဖြတ်ရန်၊ ၎င်းတို့၏ လွတ်လပ်ခွင့်အပေါ် တိုက်ခိုက်ခံရမှုများမှ မီဒီယာများကို ကာကွယ်ပေးရန်နှင့် မီဒီယာအလုပ်ကို လုပ်ကိုင်ရင်း အသက်ဆုံးရှုံးခဲ့ရသည့် ဂျာနယ်လစ်များကို ဂုဏ်ပြုရန်တို့အတွက် နှစ်စဉ် မေ ၃ ရက်တွင် ကမ္ဘာ့စာနယ်ဇင်း လွတ်လပ်ခွင့်နေ့ကို ကျင်းပလာခဲ့သည်မှာ ၂၅ ကြိမ်မြောက်ခဲ့ပြီဖြစ်သည်။ ကမ္ဘာ့စာနယ်ဇင်း လွတ်လပ်ခွင့်နေ့ကို ၁၉၉၁ ခုနှစ် ယူနက်စကို၏ ညီလာခံတွင် အဆိုပြုခဲ့ပြီး ၁၉၉၃ ခု နှစ် ကုလသမဂ္ဂ အထွေထွေညီလာခံတွင် အတည်ပြုခဲ့ခြင်းဖြစ်သည်။ မီဒီယာဗဟုဝါဒနှင့်  မီဒီယာလွတ်လပ်ခွင့်နှင့် ပတ်သက်သော Windhoek ကြေညာစာတမ်းကို ၁၉၉၁ ခုနှစ်တွင် အာဖရိက ဂျာနယ်လစ်များက ထုတ်ပြန်ခဲ့ပြီး ယင်းသမိုင်းဝင်စာတမ်းကို တုံ့ပြန်သောအားဖြင့် ကမ္ဘာ့စာနယ်ဇင်း လွတ်လပ်ခွင့်နေ့ ကျင်းပရန် အဆိုပြုခဲ့ခြင်းဖြစ်သည်။

ကမ္ဘာ့စာနယ်ဇင်းလွတ်လပ်ခွင့်နေ့သည် စာနယ်ဇင်းလွတ်လပ်ခွင့်ကို ချိုးဖောက်နေမှုများအား ပြည်သူများကို အသိပေးသည့် အခါသမယဖြစ်သည်။ ဒါဇင်နှင့်ချီသော နိုင်ငံများ တွင် သတင်းရေးသားထုတ်ဝေမှုများကို ဆင်ဆာဖြတ်ခြင်း၊ ဒဏ်ရိုက်ခြင်း၊ ရွှေ့ဆိုင်းထား ခြင်းနှင့် ပိတ်ပင်ခြင်းတို့ ပြုလုပ်နေသကဲ့သို့ ဂျာနယ်လစ်များ၊ အယ်ဒီတာများနှင့် ထုတ်ဝေသူများကို နှောင့်ယှက်ခြင်း၊ တိုက်ခိုက်ခြင်း၊ ဖမ်းဆီးထိန်းသိမ်းခြင်းနှင့် သတ်ဖြတ်ခြင်းများ ပြုလုပ်နေမှုများကို သတိပေးရန်လည်းဖြစ်သည်။ ကမ္ဘာ့စာနယ်ဇင်း လွတ်လပ်ခွင့်နေ့သည် စာနယ်ဇင်းလွတ်လပ်ခွင့် မြှင့်တင်ရေးကို အားပေးလှုံ့ဆော်ရန်နှင့် ကမ္ဘာတစ်လွှား၏ စာနယ်ဇင်းလွတ်လပ်ခွင့်အနေအထားကို ဆန်းစစ်သုံးသပ်ရန် အခါသမယလည်းဖြစ်သည်။

ကမ္ဘာ့စာနယ်ဇင်း လွတ်လပ်ခွင့်နေ့သည် စာနယ်ဇင်းလွတ်လပ်ခွင့်နှင့် ပတ်သက်၍ ၎င်းတို့ ကျင့်သုံးမှုများက လေးစားမှုရှိရန် ကမ္ဘာအစိုးရအဖွဲ့များကို သတိပေးသည့် အခါသမယဖြစ်သည့်အပြင် စာနယ်ဇင်းလွတ်လပ်ခွင့်၊ ပရော်ဖက်ရှင်နယ်ကျင့်ဝတ်တို့နှင့် ပတ်သက်၍ မီဒီယာလုပ်ကိုင်နေသူများအကြား ထင်ဟပ်ပြသည့်နေ့လည်းဖြစ်သည်။ ကမ္ဘာ့ စာနယ်ဇင်းလွတ်လပ်ခွင့်နေ့သည် စာနယ်ဇင်းလွတ်လပ်ခွင့်နှင့်ပတ်သက်၍ ထိန်းချုပ်ကန့်သတ်မှုနှင့် ချိုးဖောက်မှုခံနေရသော မီဒီယာများကို အားပေးထောက်ခံသော နေ့တစ်နေ့လည်းဖြစ်သည်။ ကမ္ဘာ့စာနယ်ဇင်းလွတ်လပ်ခွင့်နေ့သည် သတင်းကိစ္စနှင့်ပတ်သက်၍ အသက်စွန့်သွားခဲ့ရသော ဂျာနယ်လစ်များအတွက် အမှတ်ရအောက်မေ့ဖွယ်နေ့လည်း ဖြစ်သည်။

ထို့ကြောင့် ကမ္ဘာ့စာနယ်ဇင်း လွတ်လပ်ခွင့်နေ့က သတိပေးခဲ့သည့်အတိုင်း စာနယ်ဇင်း လွတ်လပ်ခွင့်ကို ဝိုင်းဝန်းထိန်းသိမ်း ကာကွယ်စောင့်ရှောက်ရန် ကမ္ဘာ့လူသားအားလုံး တာဝန်ရှိပါကြောင်း The Daily Eleven သတင်းစာက ရေးသားအပ်ပါသည်။

 

(မေလ ၄ ရက်ထုတ် The Daily Eleven  သတင်းစာ၏ အယ်ဒီတာ့ အာဘော်)

Most Read

Most Recent