လူနေမှုအဆင့်အတန်းဟူသည် သက်ဆိုင်ရာ ပထဝီဝင်ဒေသအတွင်း (အထူးသဖြင့် နိုင်ငံတစ်နိုင်ငံအတွင်း) ချမ်းသာကြွယ်ဝမှု၊ သက်သောင့်သက်သာရှိမှု၊ ရုပ်ဝတ္ထုပစ္စည်းပိုင်ဆိုင်မှုနှင့် သက်ဆိုင်ရာလူမှုစီးပွား အဆင့်အတန်းတစ်ရပ်အတွက် လိုအပ်ချက်များ ရရှိနိုင်မှုတို့၏ အဆင့်အတန်းကို ရည်ညွှန်းသည်။ လူနေမှုအဆင့်အတန်းတွင် ဝင်ငွေ၊ အလုပ်အကိုင်၏ အရည်အသွေး၊ အလုပ်အကိုင်ရရှိနိုင်မှု၊ အဆင့်အတန်းကွာဟမှု၊ ဆင်းရဲမွဲတေမှုနှုန်း၊ အိမ်ရာတတ်နိုင်မှုနှင့် အိမ်ရာ၏ အရည်အသွေး၊ လိုအပ်ချက်များကို ဝယ်ယူနိုင်ရန်လုပ်ရသည့် အလုပ်ချိန်၊ စုစုပေါင်း ပြည်တွင်းအသားတင်ထုတ်လုပ်မှုတန်ဖိုး (ဂျီဒီပီ)၊ ငွေကြေးဖောင်ပွမှုနှုန်း၊ နှစ်စဉ် အားလပ်ရက်ပမာဏ၊ အရည်အသွေးရှိသော ကျန်းမာရေး စောင့်ရှောက်မှုကို တတ်နိုင်မှု သို့မဟုတ် အခမဲ့ရရှိနိုင်မှု၊ ပညာရေးရရှိနိုင်မှုနှင့် ပညာရေး၏ အရည်အသွေး၊ မျှော်လင့်နိုင်သည့် ဘဝသက်တမ်း၊ ရောဂါများဖြစ်ပွားနှုန်း၊ ကုန်ပစ္စည်းနှင့် ဝန်ဆောင်မှုတို့၏တန်ဖိုး၊ အခြေခံအဆောက်အအုံ၊ နိုင်ငံ၏ စီးပွားရေးကြီးထွားမှု၊ စီးပွားရေးနှင့် နိုင်ငံရေးတည်ငြိမ်မှု၊ နိုင်ငံရေးနှင့် ဘာသာရေးဆိုင်ရာလွတ်လပ်မှု၊ ပတ်ဝန်းကျင်အရည်အသွေး၊ ရာသီဥတုနှင့် ဘေးကင်းလုံခြုံမှု အစရှိသော အကြောင်းခြင်းရာများ ပါဝင်သည်။
သို့သော် အထွေထွေသဘောအရ လူနေမှုအဆင့်အတန်းကို (ငွေကြေးဖောင်းပွမှုနှင့် ညှိနှိုင်းပြီး) အမှန်တကယ်ဝင်ငွေနှင့် ဆင်းရဲမွဲတေမှုနှုန်းကဲ့သို့သော အဆင့်အတန်းများနှင့် တိုင်းတာလေ့ရှိသည်။ ကျန်းမာရေးစောင့်ရှောက်မှုရရှိနိုင်ခြင်းနှင့် ကျန်းမာရေး စောင့်ရှောက်မှုအရည်အသွေး၊ ဝင်ငွေကြီးထွားခြင်း မညီမျှမှုနှင့် ပညာရေးဆိုင်ရာ အဆင့်အတန်းများကဲ့သို့သော အခြားတိုင်းတာမှုများကိုလည်း အသုံးပြုလေ့ရှိသည်။ ဥပမာအားဖြင့် လူ ၁၀၀၀ ၌ လေအေးပေးစက် သုံးနိုင်သည့် အရေအတွက်ကဲ့သို့သော ကုန်ပစ္စည်းတစ်ခုကို သုံးစွဲနိုင်မှုနှုန်း သို့မဟုတ် မျှော်လင့်နိုင်သည့် ဘဝသက်တမ်းကဲ့သို့သော ကျန်းမာရေးဆိုင်ရာ တိုင်းတာမှုတို့ကိုလည်း အခါအားလျော်စွာ အသုံးပြုလေ့ရှိသည်။ သတ်မှတ်ထားသည့် အချိန်တစ်ရပ်အတွင်း သို့မဟုတ် သတ်မှတ်ထားသည့် နေရာတစ်ခုအတွင်း နေထိုင်သည့် လူများအနေဖြင့် ၎င်းတို့၏ လိုအပ်ချက်များ သို့မဟုတ် ၎င်းတို့၏ လိုလားချက်များနှင့်ပတ်သက်၍ ကျေနပ်မှုအားဖြင့် တိုင်းတာခြင်းသည်လည်း လွယ်ကူသော တိုင်းတာမှုဖြစ်သည်။
ပင်မသဘောတရားအရ လူနေမှုအဆင့်အတန်းဟူသည် ဘဝအရည်အသွေးဟု ခေါ်ဆိုသော စကားရပ်နှင့် ကွဲပြားခြားနားသည်။ ဘဝအရည်အသွေးဟူသည် ရုပ်ပိုင်းဆိုင်ရာ လူနေမှုအဆင့်အတန်းသာမက အားလပ်ချိန်၊ ဘေးကင်းလုံခြုံမှု၊ ယဉ်ကျေးမှုရင်းမြစ်၊ လူမှုဘဝ၊ ရုပ်ပိုင်းဆိုင်ရာကျန်းမာရေး၊ ပတ်ဝန်းကျင်အရည်အသွေးဆိုင်ရာ အကြောင်းအရာများ အစရှိသော လူ့ဘဝအား ဖွဲ့စည်းထားသည့် ဆုပ်ကိုင်၍ မရသော ရှုထောင့်များကိုပါ ရည်ညွှန်းသောကြောင့် ဖြစ်သည်။ လူတို့၏ ကောင်းကျိုးချမ်းသာကို တိုင်းတာသည့် ပိုမိုရှုပ်ထွေးသောနည်းလမ်းများ၌ လူနေမှုအဆင့်အတန်းနှင့် ဘဝအရည်အသွေးတို့ကို ထည့်သွင်းအကဲဖြတ်လေ့ရှိသည်။ သို့သော် ယင်းကဲ့သို့ တိုင်းတာမှုမျိုးသည် နိုင်ငံရေးဆန်လေ့ရှိပြီး အငြင်းပွားဖွယ် ဖြစ်တတ်သည်။ ရုပ်ဝတ္ထုပစ္စည်းအရ လူနေမှုအဆင့်အတန်း တူညီသည့် နိုင်ငံနှစ်နိုင်ငံအကြား သို့မဟုတ် လူ့အဖွဲ့အစည်းနှစ်ရပ်အကြား၌ပင်လျှင် ဘ၀ အရည်အသွေးဆိုင်ရာ အကြောင်းခြင်းရာများသည် အမှန်တကယ်တွင် သက်ဆိုင်ရာလူ တစ်ဦးသို့မဟုတ် အုပ်စုတစ်စုအတွက် နိုင်ငံတစ်နိုင်ငံ သို့မဟုတ် လူ့အဖွဲ့အစည်းတစ်ရပ်အား ပို၍ ဆွဲဆောင်မှုရှိစေသည်။
မည်သို့ပင်ဆိုစေကာမူ နိုင်ငံတစ်နိုင်ငံ၊ ဒေသတစ်ခု၊ လူ့အဖွဲ့အစည်းတစ်ရပ်၏ လူနေမှုအဆင့်အတန်းနှင့် ဘဝအရည်အသွေးကို မြှင့်တင်ပေးရန် အစိုးရတစ်ရပ်၌ မဖြစ်မနေ တာဝန်ရှိပါကြောင်း The Daily Eleven သတင်းစာက ရေးသားအပ်ပါသည်။
(ဧပြီ ၂၄ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)