နိုင်ငံတစ်နိုင်ငံ၏ စီးပွားရေးအဆင့်အတန်းသည် SME အသေးစား အလတ်စား စီးပွားရေးလုပ်ငန်းများအပေါ် အစိုးရ၏အားပေးကူညီမှုနှင့် ယင်းတို့၏ ဖွံ့ဖြိုးတိုးတက်မှု အပေါ်ကြည့်လျှင် သိနိုင်သည်။ စီးပွားရေးဖွံ့ဖြိုးတိုးတက်မှု နောက်ကျကျန်နေသော မြန်မာနိုင်ငံတွင်လည်း အသေးစားနှင့်အလတ်စား စီးပွားရေးလုပ်ငန်းများ၏ အခန်းကဏ္ဍသည် များစွာအရေးပါသည်။ မြန်မာတစ်နိုင်ငံလုံးတွင်ရှိသော စီးပွားရေးလုပ်ငန်းများ၏ ၉၉ ရာခိုင်နှုန်းသည် အသေးစားနှင့် အလတ်စား စီးပွားရေးလုပ်ငန်းကဏ္ဍများဖြစ်နေရာ ယင်းတို့၏ တိုးတက်မှု၊ ဆုတ်ယုတ်မှုသည် တိုင်းပြည်စီးပွားရေးတည်ငြိမ်မှု၊ ကျဆင်းမှုနှင့် တိုက်ရိုက် ဆက်စပ်နေလိမ့်မည်ဖြစ်ပေသည်။ စီးပွားရေးပြန်လည်ဦးမော့ရန် အရှိန်မြှင့်ကြိုးစားနေသည့် NLD အစိုးရအနေဖြင့် ၎င်းတို့၏ မူဝါဒနှင့် ဆောင်ရွက်ချက်များတွင် ပြည်တွင်း အသေးစားနှင့်အလတ်စားလုပ်ငန်းများ ရေရှည်ရပ်တည်ရေးအပေါ် မည်သို့ လုပ်ဆောင်မည်နည်းဆိုသည့် အချက်သည် စိတ်ဝင်စားစရာဖြစ်သည်။ အစိုးရအနေဖြင့်လည်း ယင်းအချက်သည် စိန်ခေါ်မှုတစ်ရပ်ဖြစ်နေသည်။
မြန်မာနိုင်ငံတွင် မြေပေါ်မြေအောက် သယံဇာတများ ထုတ်ယူရောင်းချပြီး မမှန်မကန် စီးပွားရှာခဲ့မှုများကြောင့် နိုင်ငံ၏ စီးပွားရေးအခြေအနေသည် နာလန်မထူနိုင်သည့် အခြေအနေတစ်ရပ်ကို ရောက်ရှိသွားရသည်။ ခေတ်အဆက်ဆက်တွင် အသေးစားနှင့်အလတ်စား စီးပွားရေးလုပ်ငန်းများ အောင်မြင်ဖွံ့ဖြိုးတိုးတက်အောင် ရလဒ်ကောင်းများဖြင့် လုပ်ဆောင်နိုင်ခြင်း မရှိသည့်အတွက် အစိုးရအဆက်ဆက် စီးပွားရေးပြုပြင်ပြောင်းလဲမှုများတွင် နာမည်မရဘဲ ကျရှုံးခဲ့ကြရသည်။ ပြည်တွင်း SME လုပ်ငန်းများမှာ ဒေသတွင်းအခြား နိုင်ငံများနှင့် ယှဉ်ပြိုင်နိုင်စွမ်းမရှိသည့်အပြင် ရပ်တည်ဖို့ပင် အတော်ခက်ခဲနေကြခြင်းကြောင့် ၂၀၂၀ နောက်ပိုင်းတွင် အာဆီယံအသိုက်အမြုံ (AEC) ကဲ့သို့ နိုင်ငံတကာနှင့် ရင်ပေါင်တန်းရမည့်အချိန်တွင် ကုန်စည်များ၊ ဝန်ဆောင်မှုလုပ်ငန်းများ၊ ရင်းနှီးမြှုပ်နှံမှု များနှင့် ကျွမ်းကျင်လုပ်သားများ လွတ်လပ်စွာစီးဝင်လာပါက အခက်အခဲများဖြင့် ရင်ဆိုင် ကြရမည်ဖြစ်သည်။
အစိုးရအနေဖြင့် နိုင်ငံ့စီးပွားရေးအတွက် အသေးစားအလတ်စား စီးပွားရေးလုပ်ငန်းများ၏ ဖွံ့ဖြိုးတိုးတက်ရေးကို အကူအညီ အထောက်အပံ့ကောင်းများ ဆောင်ရွက်ပေးရမည်ဖြစ်ရာ ချေးငွေကဲ့သို့သော ငွေသားအရင်းအမြစ်ကောင်းမွန်အောင် ဖန်တီးပေးမှုနည်းလမ်းအပြင် လူ့စွမ်းအား အရင်းအမြစ်နှင့် နည်းပညာဖွံ့ဖြိုးမှု၊ ကိုယ်ပိုင်တီထွင် ဆန်းသစ်မှုပိုင်းတို့တွင်လည်း ပံ့ပိုးပေးရန်လိုသည်။ သင့်လျော်သော အခွန်အကောက်နှုန်းထားများဖြစ်ရန်၊ လုပ်ထုံးလုပ်နည်းများဆောင်ရွက်ရာတွင် ကြိုးနီစနစ်များကို ဖြေလျှော့ပေးရန်နှင့် ဈေးကွက်အထောက်အကူပြုရေးအတွက် ဆောင်ရွက်ပေးရန်စသည့်တို့အပေါ် မူဝါဒများကို စဉ်ဆက်မပြတ် ချမှတ်လုပ်ဆောင်ပေးရန် လိုအပ်သည်။
သို့ဖြစ်ရာ အစိုးရတာဝန်ရှိသူများ၊ Policy Maker များအနေဖြင့် မြန်မာ့စီးပွားရေးကို အခြေခိုင်စွာ တိုးတက်ပြောင်းလဲမှုလိုချင်ပါက ပြည်တွင်းအသေးစားအလတ်စား စီးပွားရေး လုပ်ငန်းများ ရှင်သန်နိုင်ရန် မဖြစ်မနေ ကြိုးစားဆောင်ရွက်ကြရမည်ဖြစ်ပါသည်။ သို့မဟုတ်ဘဲ ခေတ်အဆက်ဆက် နည်းမျိုးစုံဖြင့် အခွင့်အရေးရယူခဲ့ကြသော လက်တစ်ဆုပ်စာ ခရိုနီလုပ်ငန်းရှင်ကြီးများ ရှင်သန်မှုအတွက်သာ ဦးစားပေးလုပ်ဆောင်နေမည်ဆိုပါက တိုင်းပြည်အနေဖြင့် ဆင်းရဲတွင်းနက်သထက်နက်မည့် အခြေအနေနှင့် ရင်ဆိုင်ကြရပေလိမ့်မည်။ ထို့ကြောင့် တိုင်းပြည်စီးပွားရေး အမှန်တကယ် ဦးမော့လာစေရေးအတွက် အရေးကြီးသော ကဏ္ဍတစ်ရပ်ဖြစ်သည့် အသေးစား အလတ်စား စီးပွားရေးကဏ္ဍ ဖွံ့ဖြိုးတိုးတက်ရေးကို ဦးစားပေးလုပ်ဆောင်သင့်ပါကြောင်း The Daily Eleven သတင်းစာက ရေးသားအပ်ပါသည်။
(မတ်လ ၂၀ ရက်ထုတ် The Daily Eleven သတင်းစာ၏ အယ်ဒီတာ့အာဘော်)
