အကြမ်းဖက်မှုကို နှိမ်နင်းရန် သို့မဟုတ် ကာကွယ်ရန် အစိုးရ၊ စစ်တပ်၊ ဥပဒေထိန်းသိမ်းရေးအဖွဲ့များ၊ လုပ်ငန်းများနှင့် ထောက်လှမ်းရေး အေဂျင်စီများက အသုံးပြုသည့် ကျင့်သုံးမှု၊ စစ်ဘက်ဆိုင်ရာနည်းဗျူဟာ၊ မဟာဗျူဟာနှင့် နည်းစနစ်များကို ပေါင်းခြုံလျက် အကြမ်းဖက်မှု တန်ပြန်ရေးဟု ခေါ်ဆိုသည်။ အကြမ်းဖက်မှု တန်ပြန်ရေး မဟာဗျူဟာများတွင် အကြမ်းဖက်မှုကို ဘဏ္ဍာရေး ထောက်ပံ့မှုအား တန်ပြန်နှိမ်နင်းရန် ကြိုးပမ်းမှုလည်း ပါဝင်သည်။ အကြမ်းဖက်မှုသည် ပိုမိုကျယ်ပြန့်သော သူပုန်ထမှုတစ်ရပ်၏ အစိတ်အပိုင်း တစ်ရပ်ဖြစ်ခဲ့ပါက အကြမ်းဖက်မှု တန်ပြန်ရေးသည် သူပုန်ထမှု တန်ပြန်ရေး နည်းလမ်းများကို ကျင့်သုံးရနိုင်သည်။ အမေရိကန်ပြည်ထောင်စု လက်နက်ကိုင် တပ်ဖွဲ့များသည် သူပုန်ထမှု၊ ဥပဒေမဲ့မှုများ သို့မဟုတ် အဖျက်အမှောင့် လုပ်ဆောင်မှုများကို နှိမ်နင်းရန် သို့မဟုတ် လုံခြုံရေးဆိုင်ရာ ခြိမ်းခြောက်မှုများ ဖြစ်ပေါ်လာနိုင်သည့် အခြေအနေရပ်များကို လျှော့ချရန် ကြိုးပမ်းမှုများ၌ အခြားနိုင်ငံများကို ထောက်ပံ့ရန် အစီအစဉ်များအတွက် နိုင်ငံရပ်ခြား ပြည်တွင်းကာကွယ်ရေးဟူသည့် စကားရပ်ကို အသုံးပြုသည်။
အကြမ်းဖက်မှုတန်ပြန်ရေး မဟာဗျူဟာအများစု၌ ရဲတပ်ဖွဲ့နှင့် ပြည်တွင်းထောက်လှမ်းရေး၏ အဆင့်အတန်းကို မြှင့်တင်ခြင်းတစ်ရပ် ပါဝင်သည်။ အဓိကကျသော လုပ်ရိုးလုပ်စဉ်များမှာ အဆက်အသွယ်များကို ကြားဖြတ်ရယူခြင်းနှင့် လူများကို ခြေရာခံလိုက်ခြင်းတို့ ပါဝင်သည်။ သို့သော် နည်းပညာအသစ်က စစ်ဘက်ဆိုင်ရာနှင့် ဥပဒေထိန်းသိမ်းမှုဆိုင်ရာ စစ်ဆင်ရေးများ၏ အတိုင်းအတာကို ချဲ့ထွင်ပေးနိုင်ခဲ့သည်။ ပြည်တွင်းထောက်လှမ်းရေးသည် နိုင်ငံရေးအရ အငြင်းပွားဖွယ်ရာ ရင်းမြစ်တစ်ရပ်ဖြစ်သော ၎င်းတို့၏ မူလဒေသ သို့မဟုတ် ဘာသာရေးကို အခြေခံလျက် အထူးအုပ်စုများ ခွဲခြားကာ ထောက်လှမ်းရန် ညွှန်ကြားခံရတတ်သည်။ လူအုပ်စု တစ်ရပ်လုံးအား အစုလိုက် အပြုံလိုက်အဖြစ် သိမ်းကျုံးကာ စောင့်ကြည့် ထောက်လှမ်းမှုအား အရပ်ဘက်ဆိုင်ရာ လွတ်လပ်ခွင့် ရှုထောင့်မှနေ၍ ကန့်ကွက်မှုများ ပေါ်ထွက်လာခဲ့သည်။ ပြည်တွင်းဖြစ် အကြမ်းဖက်သမားများ (အထူးသဖြင့် တစ်ကိုယ်တော် တိုက်ခိုက်ရေးသမားများ) သည် စုံစမ်းထောက်လှမ်းရန် ပိုမိုခက်ခဲတတ်သည်။ အဘယ့်ကြောင့်ဆိုသော် ၎င်းတို့၏ နိုင်ငံသားဖြစ်မှု သို့မဟုတ် ဥပဒေဆိုင်ရာ အနေအထားနှင့် စောင့်ကြည့်မှုအောက်၌ နေထိုင်နိုင်စွမ်း တို့ကြောင့်ဖြစ်သည်။
သီးသန့်ဆန်သော အဖြစ်အပျက် တစ်ရပ်ထက် ပိုမိုသည့် အကြမ်းဖက်မှု ဖြစ်ပွားသည့်အခါ ထိရောက်သည့် လုပ်ဆောင်ချက်ကို ရွေးချယ်ရန် သက်ဆိုင်ရာအစိုးရ အဖွဲ့အစည်းများသည် အကြမ်းဖက်အုပ်စုများ၏ ရင်းမြစ်၊ စေ့ဆော်မှု၊ ပြင်ဆင်ပုံနည်းလမ်းများနှင့် နည်းဗျူဟာများကို နားလည်ရန် လိုအပ်သည်။ အကြမ်းဖက်မှု တန်ပြန်ရေး၌ ထောက်လှမ်းရေး ကောင်းမွန်မှုအပြင် ဖြေရှင်းနိုင်မည့် နာကျည်းချက်များကို နိုင်ငံရေးအရနှင့် လူမှုရေးအရ နားလည်နိုင်မှုလည်း လိုအပ်သည်။ အဆက်အသွယ်များကို ကြားဖြတ်ရယူနိုင်ပါက ဘဏ္ဍာရေး ထောက်ပံ့မှု လမ်းကြောင်းကို ခြေရာခံလိုက်နိုင်ခြင်းသည်လည်း အရေးကြီးသည်။ သို့သော် ပုဂ္ဂိုလ်ရေးလုံခြုံမှုနှင့် ပတ်သက်သော ဥပဒေများနှင့် ထိန်းညှိရန် လိုအပ်သည်။
မည်သို့ပင်ဆိုစေကာမူ အစိုးရတစ်ရပ်သည် နိုင်ငံသားအားလုံး၏ ဘေးကင်းလုံခြုံရေးကို တာဝန်ယူ တာဝန်ခံထားရသောကြောင့် အကြမ်းဖက်မှု တန်ပြန်ရေးကို စနစ်တကျ လုပ်ဆောင်နိုင်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
မတ်လ ၁၃ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်
