w အကျဉ်းသားတို့၏ အခွင့်အရေး - Eleven Media Group <

အကျဉ်းသားတို့၏ အခွင့်အရေး

အကျဉ်းထောင်စနစ် ပြုပြင်ပြောင်းလဲရေး အလုပ်ရုံဆွေးနွေးပွဲမှ ရရှိလာသည့် ဆွေးနွေးချက် ရလဒ်များကို နိုင်ငံတော်သမ္မတရုံးသို့ တင်ပြသွားမည် ဖြစ်ကြောင်း မြန်မာနိုင်ငံ အမျိုးသားလူ့အခွင့်အရေးကော်မရှင် (MNHRC) ပြောရေးဆိုခွင့်ရှိသူ ဦးယုလွင်အောင် က ပြောကြားသည်။ မြန်မာနိုင်ငံ အမျိုးသားလူ့အခွင့်အရေးကော်မရှင်နှင့် နိုင်ငံရေးအကျဉ်းသားများ ကူညီစောင့်ရေးအသင်း (AAPP) တို့ ပူးပေါင်းပြီး အကျဉ်းထောင်စနစ် ပြုပြင်ပြောင်းလဲရေးနှင့် သက်ဆိုင်သော အလုပ်ရုံဆွေးနွေးပွဲ တစ်ရပ်ကို နေပြည်တော်ရှိ Max ဟိုတယ်တွင် မတ် ၈ ရက်မှ ၉ ရက်အထိ ပြုလုပ်ခဲ့ပြီး သက်ဆိုင်ရာဌာနများမှ တာဝန်ရှိသူများ၊ လွှတ်တော်ကိုယ်စားလှယ်များ စသည့်ပုဂ္ဂိုလ်များ တက်ရောက်ခဲ့ကြသည်။

နှစ်ရက်တာ ဆွေးနွေးပွဲတွင် ဆွေးနွေးချက် ရလဒ်များစွာ ရရှိသော်လည်း အဓိကအားဖြင့် အချက်လေးချက်ရှိကြောင်း ဦးယုလွင်အောင်က ပြောကြားသည်။ “အဓိက ကတော့ အချက်လေးချက်ပေါ့နော်။ လူ့အခွင့်အရေး မဆုံးရှုံးစေရေးကို ဦးတည်ပြီးတော့ ပြုပြင်ပြောင်းလဲရေး လုပ်ငန်းစဉ်ပေါ့။ နောက်အကျဉ်းသားတွေရဲ့ စိတ်သစ်၊ လူသစ်ဖြစ်စေမှု ဦးတည်ပြီးလုပ်တဲ့ လုပ်ငန်းစဉ်ပေါ့။ နောက် ၀န်ထမ်းအခွင့်အရေး၊ နောက် ၀န်ထမ်းတွေရဲ့ စိတ်ဓာတ်ပြုပြုင် ပြောင်းလဲရေး လုပ်ငန်းစဉ်ပေါ့။ နောက်ပြီးတော့ မူလအရင်းခံကို လေ့လာ ဖြေရှင်းတဲ့ဟာကို ဦးတည်တဲ့ လုပ်ငန်းစဉ်ပေါ့။ ဆိုလိုတာက ထောင်မကျခင် ဘာကြောင့် ထောင်ကျတာလဲ၊ ထောင်မကျအောင် ဘယ်လိုလုပ်မလဲ။ ဒါလေးတွေ အဲဒီ လုပ်ငန်းစဉ် တွေပေါ့”ဟု ဦးယုလွင်အောင်က ဆိုသည်။

အရပ်ဘက်နှင့် စစ်ဘက် အကျဉ်းသားများ၏ အခွင့်အရေးကို နိုင်ငံတော်၏ ဥပဒေများသာမက နိုင်ငံတကာ ဥပဒေများကပါ လွှမ်းမိုးကြီးစိုးသည်။ နိုင်ငံတကာ သဘောတူညီချက်များတွင် အပြည်ပြည်ဆိုင်ရာ အရပ်ဘက်နှင့် နိုင်ငံရေး အခွင့်အရေးဆိုင်ရာ သဘောတူညီချက်-ကုလသမဂ္ဂ၏ အကျဉ်းသားများအပေါ် ကျင့်သုံးရေးဆိုင်ရာ အနိမ့်ဆုံးစည်းမျဉ်းများ၊ နှိပ်စက်ညှဉ်းပန်းခြင်းနှင့် လူမဆန်ခြင်း၊ နှိမ့်ချဆက်ဆံခြင်းနှင့် အပြစ်ပေးခြင်းတို့အား ကာကွယ်မှုဆိုင်ရာ ဥရောပကော်မတီနှင့် မသန်စွမ်းသူများ အခွင့်အရေးဆိုင်ရာ သဘောတူညီချက်တို့ ပါဝင်သည်။

ကုလသမဂ္ဂ၏ အကျဉ်းသားများအပေါ် ကျင့်သုံးရေးဆိုင်ရာ အနိမ့်ဆုံးစည်းမျဉ်းများသည် ၁၉၅၅ ခုနှစ်တွင် စတင်သက်ဝင် လာခြင်းဖြစ်သည်။ ကုလသမဂ္ဂက ချမှတ်ထားသော စံချိန်စံညွှန်းများသည် ဥပဒေသဘော သက်ဝင်ခြင်း မရှိသော်လည်း ဖမ်းဆီးချုပ်နှောင် ထိန်းသိမ်းထားသည့် မည်သူ့အတွက်မဆို အပြည်ပြည်ဆိုင်ရာ ဥပဒေနှင့် ဒေသဆိုင်ရာ ဥပဒေများအတွက် လမ်းညွှန်ချက်များကို ပေးသည်။ အကျဉ်းထောင်များနှင့် အချုပ်ခန်းများတွင် စီမံခန့်ခွဲရာ၌ သဘောတရား စည်းမျဉ်းနှင့် လက်တွေ့ကျင့်သုံးမှုတို့အရ ကောင်းမွန်မှု ရှိစေရန် လမ်းညွှန်ပေးသည်။ အကျဉ်းသားများအတွက် ချမှတ်ထားသော စံချိန်စံညွှန်းများသည် မှတ်ပုံတင်ခြင်း၊ တစ်ကိုယ်ရေသန့်ရှင်းမှု၊ အ၀တ်အစားနှင့်အိပ်ရာ၊ အစားအစာ၊ လေ့ကျင့်ခန်းနှင့် အားကစား၊ ဆေးဝါးကုသခြင်း ၀န်ဆောင်မှု၊ စည်းကမ်းထိန်းသိမ်းရေးနှင့် အပြစ်ပေးရေး၊ ထိန်းချုပ်ရေးဆိုင်ရာ ကိရိယာများ၊ အကျဉ်းသားတို့အတွက် အချက်အလက်များနှင့် အကျဉ်းသားတို့၏ တိုင်ကြားမှုများ၊ အကျဉ်းထောင်ပြင်ပနှင့် ဆက်သွယ်မှု၊ စာအုပ်များ၊ ဘာသာရေး ကိုးကွယ်ခွင့်၊ အကျဉ်းသားများ၏ ပိုင်ဆိုင်မှုများကို ပြန်လည်ပေးအပ်ခြင်း၊ သေဆုံးမှု၊ နာမကျန်းဖြစ်ခြင်း၊ ပြောင်းရွှေ့ခြင်း၊ ဖယ်ရှားခြင်းဆိုင်ရာ အသိပေးမှုများ၊ အကျဉ်းထောင်များ စစ်ဆေးခြင်းနှင့် အကျဉ်းဦးစီးဆိုင်ရာ ၀န်ထမ်းများ အစရှိသည်တို့အတွက် ပြည့်ပြည့်စုံစုံ ရေးဆွဲထားသည်။ ၎င်းအပြင် ကျင့်သုံးမှု၊ အမျိုးအစားခွဲမှုနှင့် တစ်ဦးချင်းခွဲခြားမှု၊ အထူးအခွင့်အရေးများ၊ အလုပ်၊ ပညာရေးနှင့် အပန်းဖြေရေး၊ လူမှုဆက်ဆံရေးနှင့် နောက်ပိုင်း စောင့်ရှောက်မှုများ ထပ်မံပါဝင်သည့် စီရင်မှုများအောက်၌ အကျဉ်းသားများအတွက် လမ်းညွှန်ချက်များကိုလည်း ရေးဆွဲထားသည်။ ယင်းတွင် ရူးသွပ်နေသော သို့မဟုတ် စိတ်ပိုင်းဆိုင်ရာ မူမမှန်သော အကျဉ်းသားများ၊ ချုပ်နှောင်ခံထားရသော သို့မဟုတ် အမှုစစ်ဆေးခံရန် စောင့်ဆိုင်းနေရသော အကျဉ်းသားများ၊ တရားစွဲဆိုခြင်းမရှိ ဘဲ ဖမ်းဆီးခြင်း သို့မဟုတ် ထိန်းသိမ်းခြင်း ခံထားရသည့် အရပ်ဘက်ဆိုင်ရာ အကျဉ်းသားများ သို့မဟုတ် ပုဂ္ဂိုလ်များအတွက် အထူးအကြံပြုချက်များလည်း ပါဝင်သည်။

မည်သို့ပင် ဆိုစေကာမူ အကျဉ်းသားများ၏ အခွင့်အရေးများ မဆုံးရှုံးစေရန်အတွက် နိုင်ငံတော်၏ ဥပဒေများနှင့်သာမက နိုင်ငံတကာ စံချိန်စံညွှန်းများနှင့် ကိုက်ညီအောင် အကျဉ်းထောင်စနစ် ပြုပြင်ပြောင်းလဲရေးကို ဆောင်ရွက်ရမည် ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

မတ်လ ၁၁ ရက်ထုတ် The Daily Eleven သတင်းစာ အယ်ဒီတာ့အာဘော်

March 11, 2018














Copy Protected by Chetan's WP-Copyprotect.