ယမန်နေ့က ကျင်းပခဲ့သည့် အမျိုးသားလွှတ်တော် အစည်းအဝေးတွင် ငြိမ်းချမ်းစွာ စုဝေးခြင်းနှင့် စီတန်းလှည့်လည်ခြင်းဆိုင်ရာဥပဒေ ပြင်ဆင်သည့် ဥပဒေကြမ်းအား ဆန္ဒမဲပေးခွင့်ရှိသူ စုစုပေါင်း ၁၉၄ ဦး ရှိသည့်အနက် ထောက်ခံမဲ ၁၁၃ မဲ၊ ကန့်ကွက်မဲ ၇၈ မဲဖြင့် အတည်ပြုလိုက်သည်။ ငြိမ်းစုစီဥပဒေကို ပြင်ဆင်သည့် ဥပဒေကြမ်းအား လက်ခံဆွေးနွေးရန် ဖေဖော်ဝါရီ ၁၉ ရက်က ရန်ကုန်တိုင်းဒေသကြီး မဲဆန္ဒနယ်အမှတ် (၃) အမျိုးသားလွှတ်တော်ကိုယ်စားလှယ် ဒေါက်တာမြတ်ဉာဏစိုးက တင်သွင်းခဲ့ခြင်းဖြစ်သည်။ ယင်းဥပဒေကြမ်းပါအချက်အချို့မှာ ဒီမိုကရေစီသဘောတရားနှင့် ဆန့်ကျင်နေသည့်အတွက် လယ်သမား၊ အလုပ်သမား၊ လူ့အခွင့်အရေး တက်ကြွလှုပ်ရှားသူများ၊ အရပ်ဘက်အဖွဲ့အစည်းများ၊ နိုင်ငံရေးလေ့လာစောင့်ကြည့်သူများနှင့် အလွှာအသီးသီးမှ ကန့်ကွက်မှုများ ရှိခဲ့သည်။
ငြိမ်းစုစီဥပဒေကို ပြင်ဆင်သည့် ဥပဒေကြမ်းအပေါ် အရပ်ဘက်အဖွဲ့အစည်း ၁၈၈ ဖွဲ့နှင့် တစ်သီးပုဂ္ဂလ ၁၇ ဦးတို့က သဘောထား ထုတ်ပြန်ချက်များ ပူးပေါင်းထုတ်ပြန်ပြီး ပယ်ဖျက်ပေးရန် တောင်းဆိုကြသည်။ မတ် ၅ ရက်က အင်အား ၅၀၀ ခန့်ဖြင့် ငြိမ်းစုစီဥပဒေကို ပြင်ဆင်သည့် ဥပဒေကြမ်းအား ပယ်ဖျက်ပေးရန် ရန်ကုန်မြို့တွင် ဆန္ဒပြတောင်းဆိုခဲ့ကြသည်။ ငြိမ်းစုစီပြင်ဆင်သည့်ဥပဒေကြမ်း ပုဒ်မ ၂၊ ပုဒ်မ ၃၊ ပုဒ်မ ၄ တို့၌ ပါရှိသည့် အချက်များမှာ အာဏာပိုင်များအနေဖြင့် နိုင်ငံရေးအရ မလိုလားသူများအပေါ် လိုသလို ဖိနှိပ်နိုင်သော ဥပဒေတစ်ရပ်ကဲ့သို့ ဖြစ်လာနိုင်သဖြင့် ပယ်ဖျက်ပေးရန် အလွှာအသီးသီးက စုပေါင်းတောင်းဆိုကြခြင်းဖြစ်သည်။ ပြင်ဆင်သည့် ဥပဒေကြမ်း၏ ပုဒ်မ ၂ တွင် ပြည်သူများသည် “နိုင်ငံတော်လုံခြုံရေး၊ တရားဥပဒေစိုးမိုးရေး၊ တည်ငြိမ်အေးချမ်းရေး၊ သို့မဟုတ် အများပြည်သူကိုယ်ကျင့်တရား” တို့နှင့် မဆန့်ကျင်မှသာ ၎င်းတို့၏ အခွင့်အရေးဖြစ်သော ဆန္ဒထုတ်ဖော်ခွင့်ကို ကျင့်သုံးနိုင်ကြောင်း အဆိုပြုထားသည်။ ပုဒ်မ ၃ တွင် “ဆန္ဒထုတ်ဖော်မှုကို စီစဉ်သူများသည် ၎င်းတို့၏ ခန့်မှန်းကုန်ကျစရိတ်နှင့် ကုန်ကျခံမည့် အရင်းအမြစ်ကို အာဏာပိုင်တို့ထံ တင်သွင်းရသည့် အသိပေး အကြောင်းကြားစာတွင် အသေးစိတ် ထည့်သွင်းဖော်ပြရန်” တောင်းဆိုထားသည်။ ထို့ပြင် ပုဒ်မ ၄ ၌ “နိုင်ငံတော်လုံခြုံရေး၊ တရားဥပဒေစိုးမိုးရေး၊ တည်ငြိမ်အေးချမ်းရေး၊ သို့မဟုတ် အများပြည်သူ ကိုယ်ကျင့်တရားတို့ကို ဆန့်ကျင်သော ဆန္ဒထုတ်ဖော်မှုကို ငွေ၊ သို့မဟုတ် ပစ္စည်းအားဖြင့်ဖြစ်စေ၊ အခြားနည်းလမ်းအားဖြင့်ဖြစ်စေ အားပေးထောက်ခံသည့် မည်သည့်ပုဂ္ဂိုလ်ကိုမဆို ထောင်ဒဏ်သုံးနှစ်နှင့် အကန့်အသတ်မရှိသော ငွေဒဏ်ကျခံစေရန် အဆိုပြုထားသည်။
ယင်းကဲ့သို့ ပြင်ဆင်ရန် ဥပဒေကြမ်းတင်ပြလာမှုကိုကြည့်လျှင် ပြင်ဆင်ချက်သည် တိကျသော အဓိပ္ပာယ်ဖွင့်ဆိုချက်မရှိဘဲ အာဏာပိုင်များ အလိုအတိုင်း ကျယ်ပြန့်စွာ အနက်ဖွင့်သုံးစွဲနိုင်ခြင်း၊ ပုဂ္ဂလိကလွတ်လပ်ခွင့်နှင့် လုံခြုံခွင့်ကိုသော်လည်းကောင်း၊ ငြိမ်းချမ်းစွာ ဆန္ဒပြလိုသူများ၏ သတင်းအချက်အလက် လုံခြုံမှုကိုသော်လည်းကောင်း တိုက်ရိုက်ထိခိုက်စေခြင်း၊ ငြိမ်းချမ်းစွာဆန္ဒထုတ်ဖော်လိုသူများ၏ အကူအညီ ရယူပိုင်ခွင့်နှင့် ဆန္ဒထုတ်ဖော်မှုကို ငွေအား၊ လူအား၊ ရိက္ခာအား သို့မဟုတ် အခြားနည်းလမ်းအားဖြင့် အားပေးထောက်ခံ ပါဝင်လိုသူများ၏ အကူအညီပေးပိုင်ခွင့်ကို ထိခိုက်စေခြင်းအပြင် အဆိုပြုထားသော ပြစ်ဒဏ်မှာလည်း မူရင်းဥပဒေပါ အမြင့်ဆုံးပြစ်ဒဏ်ထက် ပိုမိုနေခြင်း စသည်တို့ကြောင့် နယ်ပယ်အသီးသီးမှ ကန့်ကွက်ကြခြင်းလည်းဖြစ်သည်။ ပြင်ဆင်ရန် တင်ပြလာသော ယင်းဥပဒေသည် အတည်ဖြစ်သွားပါက အုပ်ချုပ်သူ အာဏာပိုင်များအနေဖြင့် ပြည်သူလူထုအပေါ် လိုသလို ဖိနှိပ်တရားစွဲဆိုနိုင်သည့် အခွင့်အရေး ရရှိသွားမည်ဆိုပါက လူတစ်ဦးချင်းစီ၏ ဒီမိုကရေစီ အခွင့်အရေးများကို ချိုးဖောက်ရာ ရောက်လိမ့်မည်ဖြစ်ကြောင်း ဝေဖန်ထောက်ပြမှုများလည်း ရှိနေသည်။
ဥပဒေတစ်ခု တရားသည်၊ မတရားသည်မှာ နောက်ဆုံးတွင် ပြည်သူလူထုသာလျှင် ဆုံးဖြတ်ကြရမည်ဟု နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကလည်း ပြောကြားထားခဲ့ပြန်သည်။ မည်သို့ပင်ဆိုစေကာမူ အာဏာပိုင်တို့ အတည်ပြု ပြဋ္ဌာန်းလိုက်သော ဥပဒေတစ်ရပ်၏ ကောင်းခြင်း၊ ဆိုးခြင်း စသည့် အကျိုးသက်ရောက်မှုကို ပြည်သူသာလျှင် ခံစားကြရမည်မှာ အမှန်ပင်ဖြစ်သည်။ တရားမျှတသော ဥပဒေများမဖြစ်လျှင် တရားဥပဒေစိုးမိုးမှု ရှိလာလိမ့်မည်မဟုတ်သည့်အပြင် နိုင်ငံ၏လားရာသည်လည်း ကောင်းနိုင်လိမ့်မည်မဟုတ်ပါ။ တရားဥပဒေစိုးမိုးရေး (Rule of Law) မခိုင်မာလျှင် ဒီမိုကရေစီပြုပြင် ပြောင်းလဲရေးသည် လမ်းကြောင်းမှန်ပေါ်ရောက်ရှိနိုင်လိမ့်မည် မဟုတ်ပါကြောင်း The Daily Eleven သတင်းစာက ရေးသားအပ်ပါသည်။
မတ်လ ၈ ရက်နေ့ထုတ် The Daily Eleven သတင်းစာ အယ်ဒီတာ့အာဘော်
