မိမိ၏ဝန်းကျင်တစ်ဝိုက်၌ ဖြစ်ပျက်နေသည်များကို သိထားရန်လိုသောကြောင့် နိုင်ငံရေးနှင့်ပတ်သက်၍ ဂရုစိုက်ရန်မှာ လွန်စွာအရေးကြီးသည်။ မိမိဝန်းကျင်တစ်ဝိုက်၌ ဖြစ်ပျက်နေသည်များနှင့်ပတ်သက်၍ ဝင်ရောက်ပြောဆိုရန်လည်း အရေးကြီးသည်။ လူများက ချမှတ်လိုက်သော နိုင်ငံရေးဆိုင်ရာဆုံးဖြတ်ချက်များသည် ဘဝပေါင်းများစွာအပေါ် သက်ရောက်မှုရှိလာမည်ဖြစ်သည်။ လူများစွာတို့က နိုင်ငံရေးဟူသည်ကို အစိုးရနှင့် ချမှတ်ထားသောဥပဒေများဟု ရှုမြင်ကြသည်။ ယင်းမှာ မှန်ကန်သည်ဟု ဆိုနိုင်သော်လည်း ယင်းထက်မူ ပိုမိုရှုပ်ထွေးသည်။ ချမှတ်လိုက်သော ဥပဒေတိုင်းသည် လူများစွာတို့အပေါ် သက်ရောက်မည်ဖြစ်သည်။ တစ်ခါတစ်ရံတွင် ဆုံးဖြတ်ချက်များသည် လူများအပေါ် မကောင်းသောနည်းလမ်းဖြင့် သက်ရောက်လိမ့်မည်ဖြစ်သည်။ ထို့ကြောင့် မိမိအနေဖြင့် ပေးလိုက်သော မဲတိုင်းသည် လူတို့၏ဘဝကို တည်ဆောက်ပေးနိုင်ခြင်း သို့မဟုတ် ဖျက်ဆီး ပစ်လိုက်နိုင်ခြင်းတို့ရှိကြောင်း သဘောပေါက်ရမည်ဖြစ်သည်။
မိမိတို့အနေဖြင့် မိမိတို့ဝန်းကျင်၌ ဖြစ်ပျက်နေသည်များကို အမြဲတမ်း သိရှိနေရမည် ဖြစ်ခြင်းသည် နိုင်ငံရေးနှင့်ပတ်သက်၍ ဂရုစိုက်ရန် အကြောင်းရင်းတစ်ချက်ဖြစ်သည်။ ဥပမာအားဖြင့် မိမိ၏ဒေသ၌ ဥပဒေသစ်တစ်ရပ် ပြဋ္ဌာန်းလိုက်ပါက ယင်းဥပဒေကို မသိလိုက်သောကြောင့် ချိုးဖောက်ခြင်းမျိုး မဖြစ်ရလေအောင် ဥပဒေသစ်တစ်ရပ် ပြဋ္ဌာန်းလိုက်ကြောင်း မိမိသာမက မိမိဝန်းကျင်ရှိလူများပါ ယင်းဥပဒေသစ်ကို သိရှိနေစေရေး သေချာရန်လိုအပ်သည်။ ၎င်းအပြင် မိမိ၏ဝန်းကျင်၌ သို့မဟုတ် မိမိသိသော လူတစ်စုံတစ်ဦး၌ အန္တရာယ်ရှိသော တစ်စုံတစ်ရာဖြစ်ပွားနေပါက တစ်စုံတစ်ဦးသည် ဥပဒေကို ချိုးဖောက်နေပါသလားဟု သတိပြုသိရှိရန် လိုလားရမည်ဖြစ်သည်။ မိမိဝန်းကျင်၌ ဖြစ်ပျက်နေသည်များ ကိုသိရှိရန်မှာ လွန်စွာအရေးကြီးသည်။
လူအများက နိုင်ငံရေးသည် နေ့စဉ်ဘဝနှင့် ပတ်သက်ဆက်နွှယ်မှုမရှိဟု ရှုမြင်နေလေ့ ရှိခြင်းမှာလည်း ဆိုးရွားလှသည်။ နိုင်ငံရေးဟူသည် နိုင်ငံရေးသမားများ၊ ဥပဒေနှင့် အစိုးရတို့နှင့်ဆိုင်သော လုပ်ငန်းများသာဖြစ်ပြီး သာမန်လူများအနေဖြင့် ဘာမျှမသိနိုင်သကဲ့သို့ ဝင်ရောက်စွက်ဖက်ခြင်းမပြုသင့်ဟူသည့် အမြင်မျိုးမှာလည်း ဝမ်းနည်းဖွယ်ကောင်းလှသည်။ နိုင်ငံရေးသည် ဘဝနှင့်ပတ်သက်သော အကြောင်းဖြစ်ကြောင်း မသိနိုင်ခြင်းမှာ ဝမ်းနည်းဖွယ်အကောင်းဆုံးဖြစ်သည်။ အစိုးရသည် မိမိတို့၏နေ့စဉ်ဘဝအပေါ်သက်ရောက်သည့် ဆုံးဖြတ်ချက်များ ချမှတ်နေသည်။ ယင်းကို အားလုံးသိကြပြီးဖြစ်သည်။ သို့သော် သာမန်လူများအနေဖြင့် မည်သည့်အတိုင်းအတာအထိ ပါဝင်နေသနည်း။ နိုင်ငံတစ်ခု ရှေ့သို့ချီတက်သည့်အခါ ယင်းနိုင်ငံ၏ပြည်သူများအနေဖြင့် မိမိတို့၏အနာဂတ်ကို မိမိတို့၏လက်ဝယ် ဆုပ်ကိုင်ထားနိုင်ရန်လိုသည်။ အမှန်တကယ်၌ နိုင်ငံတစ်နိုင်ငံဟူသည် ပြည်သူများသာ ဖြစ်သည်။ နိုင်ငံတစ်နိုင်ငံဟူသည် နိုင်ငံရေးအရ သတ်မှတ်ချက်တစ်ရပ်သာ ဖြစ်သည်။ နိုင်ငံတစ်နိုင်ငံဟူသည် ယင်း၏ပြည်သူများနှင့် ယင်းပြည်သူတို့၏ ဘဝများအကြောင်းသာ ဖြစ်သည်။ နိုင်ငံချစ်စိတ်ရှိခြင်းဟူသည် မိမိကိုယ်မိမိချစ်ခြင်းနှင့် မိမိဆင်းသက်လာသော နေရာကို ချစ်ခြင်းဖြစ်သည်။ နိုင်ငံရေး အသိစိတ်ရှိခြင်းဟူသည်မှာလည်း မိမိဘဝအကြောင်း ဂရုစိုက်ခြင်းသာဖြစ်သည်။ နိုင်ငံရေးသည် မိမိနှင့်ဝေးကွာသော တစ်စုံတစ်ရာဟု ခံယူသူ များသည် မိမိကိုယ်မိမိ မေ့လျော့နေကြသူများသာဖြစ်သည်။
မည်သို့ပင်ဆိုစေကာမူ ဆိုးရွားသောတစ်စုံတစ်ရာ ဖြစ်ပျက်လာသည့်အခါကျမှ နောင်တရရှိခြင်း မရှိရလေအောင် မည်သူမဆို နိုင်ငံရေးနှင့်ပတ်သက်၍ အမြဲဂရုပြုနေရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
(ဖေဖော်ဝါရီ ၂၄ ရက်ထုတ် The Daily Eleven သတင်းစာ၏ အယ်ဒီတာ့အာဘော်)
