စိုးရွံ့ထိတ်လန့်ဖွယ်ဖြစ်လာသည့် သက်ငယ်မုဒိမ်း

စိုးရွံ့ထိတ်လန့်ဖွယ်ဖြစ်လာသည့် သက်ငယ်မုဒိမ်း
Published 20 February 2018

လတ်တလောဖြစ်ပွားမှု အများဆုံး၊ လူထုအကြားတွင် မနှစ်မြို့ဖွယ်အခြေအနေတစ်ရပ်နှင့် ဝေဖန်မှုအမြင့်ဆုံး ဖြစ်နေသည့်ကိစ္စမှာ သက်ငယ်မုဒိမ်းပြဿနာပင်ဖြစ်သည်။ သက်ငယ်မုဒိမ်းမှုများတွင် အသက်ငါးနှစ်အောက် လူမမည်အရွယ် ကလေးငယ်များပါ သားကောင်ဖြစ်လာကြရသည်အထိ မြန်မာ့လူမှု အသိုင်းအဝိုင်းတွင် စိုးရွံ့ထိတ်လန့်ဖွယ် ဖြစ်လာစေခဲ့သည်။ ပြီးခဲ့သည့်ရက်ပိုင်းအတွင်းကပင် မန္တလေးတိုင်းဒေသကြီး မတ္တရာမြို့နယ်အတွင်းရှိ ဥဒိန်ကျေးရွာအုပ်စု မြွေကုတို့ဆိပ်ကျေးရွာတွင် အသက် နှစ်နှစ်ကျော်အရွယ် မိန်းကလေးငယ်တစ်ဦး အဓမ္မပြုကျင့်ခံရပြီးနောက် သေဆုံးခဲ့ရသည့် မှုခင်းဖြစ်စဉ်တစ်ခု ဖြစ်ပွားခဲ့သည်။

ယင်းကဲ့သို့ နှစ်နှစ်ကျော်အရွယ် မိန်းကလေးငယ်အား သတ်ဖြတ်အဓမ္မပြုကျင့်ခဲ့သူ တရားခံအား သေဒဏ်ပေးရေးအပါအဝင် သက်ငယ်မုဒိမ်းမှုနှင့် အမျိုးသမီးများအပေါ် ကျူးလွန်သော မုဒိမ်းမှု၊ လူသတ်မုဒိမ်းမှုများအပေါ် သေဒဏ်ပေးရေးအတွက် ဖေဖော်ဝါရီ ၁၈ ရက်က မတ္တရာမြို့နယ်တွင် ဒေသခံ ထောင်နှင့်ချီတောင်းဆို ဆန္ဒပြခဲ့ကြသည်။ သက်ငယ် မုဒိမ်းမှုနှင့် လူသတ်မုဒိမ်းမှုများအပေါ် ပြင်းထန်သည့်အရေးယူမှုများ ပြုလုပ်နိုင်စေရေး အတွက် ဥပဒေပြဋ္ဌာန်းနိုင်ရန် ဒေသအချို့တွင် ကမ်ပိန်းများ၊ တောင်းဆိုဆန္ဒပြမှုများပြုလုပ်ခဲ့ကြသည်။ ထို့ပြင် ယင်းသို့သော မှုခင်းကျူးလွန်သူများကို သေဒဏ်ပေးရေးအတွက် အဖွဲ့အစည်းအချို့က ဦးဆောင်ကာ ဆန္ဒပြုလက်မှတ်များ ကောက်ခံပြီး ဥပဒေပြုရေးမဏ္ဍိုင် ဖြစ်သည့် လွှတ်တော်သို့ တင်ပြရန် လုပ်ဆောင်နေကြကြောင်းလည်း သိရသည်။

တစ်နိုင်ငံလုံးတွင် ၂၀၁၇ ခုနှစ်အတွင်း မုဒိမ်းမှု ၁၄၀၅ မှုဖြစ်ပွားပြီး ၂၀၁၆ ခုနှစ်ထက် အမှုပေါင်း ၃၀၅ မှု ပိုမိုဖြစ်ပွားခဲ့ကြောင်း ရဲတပ်ဖွဲ့၏ ထုတ်ပြန်ချက်အရ သိရသည်။ ၂၀၁၆ ခုနှစ်အတွင်း ပြည်နယ်နှင့် တိုင်းဒေသကြီးအတွင်း အသက် ၁၆ နှစ်အောက်ကလေးငယ်များ မုဒိမ်းပြုကျင့်ခံရမှု ၆၇၁ မှုရှိခဲ့ပြီး ၂၀၁၇ ခုနှစ်၌ ကလေးငယ်များ မုဒိမ်းပြုကျင့်ခံရမှု ၈၉၇ မှုရှိခဲ့ကာ ၂၂၆ မှု ပိုမိုဖြစ်ပွားခဲ့သည်ကို စာရင်းအချက်အလက် နှိုင်းယှဉ်ချက်အရ  သိရသည်။ အသက် ၁၆ နှစ်အထက် မိန်းကလေးများ မုဒိမ်းပြုကျင့်ခံရမှုမှာ ၂၀၁၆ ခုနှစ် အတွင်း ၄၂၉ မှုရှိခဲ့ပြီး ၂၀၁၇ ခုနှစ်အတွင်း ၅၀၈ မှုရှိလာကာ ၇၉ မှု ပိုမိုဖြစ်ပွားခဲ့ပြန်သည်။ ၂၀၁၇ ခုနှစ်အတွင်း မုဒိမ်းမှု အများဆုံးဖြစ်ပွားခဲ့သည့် ပြည်နယ်နှင့်တိုင်းဒေသကြီး ငါးခု မှာ ရန်ကုန်တိုင်းဒေသကြီးတွင် သက်ငယ်မုဒိမ်း ၁၉၂ မှု၊ သက်ကြီးမုဒိမ်း ၇၈ မှု စုစုပေါင်း ၂၇၀ မှုဖြင့် အများဆုံဖြစ်ကာ ဧရာဝတီတိုင်းဒေသကြီးတွင် သက်ငယ်မုဒိမ်းမှု ၁၅၆ မှု၊ သက်ကြီးမုဒိမ်းမှု ၈၇ မှုနှင့် စုစုပေါင်း ၂၄၃ မှုဖြင့် ဒုတိယအများဆုံးဖြစ်သည်။ ယင်းတို့နောက်၌ မန္တလေးတိုင်းဒေသကြီးတွင် သက်ငယ်မုဒိမ်း ၁၀၈ မှု၊ သက်ကြီးမုဒိမ်း ၆၆ မှု စုစုပေါင်း ၁၇၄ မှု၊ ပဲခူးတိုင်းဒေသကြီးတွင် သက်ငယ်မုဒိမ်း ၇၆ မှု၊ သက်ကြီးမုဒိမ်း ၅၃ မှု စုစုပေါင်း ၁၂၉ မှုနှင့် စစ်ကိုင်းတိုင်းဒေသကြီးတွင် သက်ငယ်မုဒိမ်း ၇၅ မှု၊ သက်ကြီးမုဒိမ်း ၆၅ မှု စုစုပေါင်း ၁၄၀ မှု အသီးသီးဖြစ်ပွားခဲ့သည်။

ထိုကဲ့သို့ တစ်နှစ်တာအတွင်း သက်ငယ်မုဒိမ်းမှုနှင့် မုဒိမ်းမှုဖြစ်စဉ်ဖြစ်ပွားမှု မြင့်မားလာခြင်းအပေါ် လူထုအကြား ကျယ်ကျယ်ပြန့်ပြန့် သုံးသပ်မှုများရှိလာခဲ့ပြီး ဥပဒေပိုင်းဆိုင်ရာ ပြင်ဆင်မှုတွေ အမြင်မတူမှုများလည်း ရှိနေသည်။ တစ်ဖက်တွင် သက်ငယ်မုဒိမ်း နှင့် သားမယား ပြုကျင့်သတ်ဖြတ်မှုများအတွက် အမြင့်ဆုံးပြစ်ဒဏ်အဖြစ် သေဒဏ်ချမှတ်ရန် တောင်းဆိုမှုများ ရှိသကဲ့သို့ပင် တစ်ဖက်တွင်လည်း အချို့က ယင်းကဲ့သို့ ကြီးလေးသည့် ပြစ်ဒဏ်ကြောင့် ကျူးလွန်သူများမှာ ၎င်းတို့၏သားကောင်များကို နှုတ်ပိတ်သတ်ဖြတ်မှုအထိ ပိုမိုပြုလုပ်မည်ကို စိုးရိမ်ကြောင်း သုံးသပ်မှုများလည်း ရှိနေသည်။

တည်ဆဲဥပဒေတွင် သက်ငယ်မုဒိမ်းမှုအတွက် ပြစ်ဒဏ်သီးခြားဖော်ပြထားခြင်း မရှိသေးဘဲ ရာဇသတ်ကြီးပုဒ်မအရသာ ပြစ်ဒဏ်ချမှတ်နေကြောင်း သိရသည်။ မည်သို့ပင်ဆိုစေကာမူ  မိန်းကလေးငယ်များအပေါ် စက်ဆုပ်ဖွယ်မှုခင်းဖြစ်စဉ်များ မဖြစ်ပွားစေရေး မည်ကဲ့သို့သော နည်းလမ်းများဖြင့် ကာကွယ်ရမည်ဆိုသည့်အချက်များကို အာဏာပိုင်များအနေဖြင့် သုံးသပ်ကာ လုပ်ဆောင်နိုင်ရန်အချက်မှာလည်း လိုအပ်မည်ဖြစ်ပါကြောင်း  The Daily Eleven သတင်းစာက ရေးသားအပ်ပါသည်။

(ဖေဖော်ဝါရီ ၂၀ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)

Most Read

Most Recent